Lal Isua Leh Amen! {Sunday Pual}

July 7th, 2013 10:13 am by Dr John

Thuhmahruai
Bible-ah hian Amen hi hmandȃn tlȃnglawnah chuan, miin Pathian thu an sawi emaw, Pathian thu an chhiar chhuah emaw kha an pawmpui zia leh dik an tihzia lantir nȃn thusawi kȃr laklawh-ah emaw, a tawpah emaw ‘Amen’ an lo ti țhin a. Hei bȃkah hian Pathian fak leh chawimawi nȃn te, thuhril nan leh thutiam nan te an hmang bawk țhin. Thil mak tak chu, Lal Isuan Amen a hman dȃn erawhchu a danglamin a hrang nalh mai! Tuman an țawm ta lo bawk niin alang. Hemi chungchang hi kan chhui dawn a ni.

1. Lal Isuan Țawngkam Bulah (Țawngkam Hmalamah) A Hmang
Chanchin Țha bu 4-ten Amen hi vawi 100 chuang an hmang a. Johana Ziakah phei chuan a “Double” zelin Amen a hman thu kan hmu a (e.g. Joh.1:51, 3:3,5,11). ‘Amen, Amen’ tih aiah hian ‘tih tak meuhvin, tih tak meuhvin’ tia lehlin a ni tih hi theihnghilh lo ila. Juda-mi Pathian thusawitu dang zawng zawngin anmahni thusawi nemngheh nan Amen hi an hmang ngai lova, Pathian thusawi dikzia leh midangte thusawi dikzia nemngheh nan an hmang zawk țhin. Lal Isua erawhchuan, ama thusawi dik zia leh rintlak zia nemngheh nan Amen hi a chham (hmang) hmasa phawt țhin! Hei hian Lal Isua thuneihna a lantir nghal a, a duh duhnaa Amen hmang theitu a nihzia alang nghal.

Judaten an sawisel miah lo hi thil mak tak a tling bawk! Pathian thu sawitu dangte leh Judate reng reng chuan Amen hi thusawi kȃr lakah emaw, a tawpah emaw an hmang țhin a. Hei hian an Thu ngaihthlakin an thinlung a hneh (convince) dan azirin Amen hi an sawiin an sawi lo thei tih alang. Lal Isua erawhchuan, a țawngkam bulah, thildang a sawi hmaa a hman hmasak zawk tlat avangin, a thusawi tur kha a dik famkim a, a țha famkim a, a țha lo thei tawh lova, thu pawimawh tawp-khawk, ngaihthah mai mai chi a ni lova, ngaihtuahna senga ngaihthlak ngei ngei a ngai a, a thusawi tur quality hlutzia leh sȃnzia pawh a lang tel nghal bawk a ni.

2. Lal Isua Hi Amen A Ni
Lal Isuan Amen a hmandan ațangin Thuneihna sȃng tak a nei tih a chiang a. Hemi chungchang hi Chanchin Țha Bu leh Juda Lehkhathawn inkȃrah hian chiang taka sawina kan hmu lo. Thupuan Bu kan chhiar thlen erawhchuan, Amen nihna leh awmze dik tak chu fiah takin a lo lang chhuak a! Laodikei Khuaa Kohhran-hote hnenah he Thuruk ropui leh Thu inthup chu puanchhuah a lo ni ta a ni, Amena, Thuhretu rinawm leh dik taka, Pathian thilsiam bula khan heng thu hi a sawi a ni,” tiin Lal Isuan Ama Hmingah a rawn Inchhȃl ta a ni! (Thup. 3:14). Pathian thu dikzia nemngheh nan leh kan pawmpui zia lantir nana Amen kan hman țhin kha, Lal Isua Hming kan lo chhȃl a, kan lo chham țhin tihna a lo ni reng a nih chu! Lal Isua hian hming leh nihna (name/title) hi 308 vel a nei a, chung zinga pakhat chu Amen hi a ni.

3. Lal Isua Hian Engvangin Nge Amen Nihna Hi A Put?
Lal Isua hian Chhan leh vang țha tawk awm lovin Amen Hming/Nihna hi a pu ngawt lovang tih a chiang a. Engnge a chhan ni ta ang le? Dr. Merrill chuan, “Lal Isuan Amen nihna a putna chhan hi Pathian thutak leh thudik inpuanchhuahna tawpkhawk leh sȃngber a ni a. Amah lo chu inpuanchhuahna dang beisei tur a awm tawh loh avangin Thutak leh A tawpna nihna title hi a pu ta a ni” a ti. Dr. Charles leh Dr. Horton chuan, “Lal Isua chu englai pawh-a rintlȃk leh innghahna tlȃk a nihzia lantir nan he hming hi a pu a ni” an ti ve thung a.

Dr. Barclay chuan, “Malsawmtu tura Pathian ruat leh hriakthih a ni a, Amen Pathian tiin title a lo nei daih tawh alawm (cf. Isaia 65:16)” a ti ve thung! Helai thu hi kan țawngah chuan ‘Thutak Pathian’ tia lehlin a ni. Tichuan, Amah Lal Isua ngei inpuanchhuahna ațang hian, Lal Isua leh a thu zirtir leh sawi zawng zawng te, a thutiam tinreng te chu rintlȃk leh pawmtlȃk, innghahna tlȃk, zui tlȃk a nihzia a rawn nemnghet nghal a ni.

Tlȃngkawmna
Tunah chuan Amen awmzia chu kan chiang thawkhat tawh turah ka ngai a. Chuvangin, Lal Isua Lal leh Chhandamtu-a pawmtute chuan Amen kan chham (sawi) apiangin Lal Isua chu innghahna tlȃk a nihzia te, himna kulhpui a nihzia te, a dik zia te, a fel zia te, a rinawm zia te, a thutiam ngheh zia te, kan puang nawn țhin a ni, tih hre nawn ila. Ringtuten thinlung tih tak zetin, thinlung chhungrȋl ber ațangin, hlȋm tak leh chȃk tak leh phûr takin Lalpa ropui nan Amen hi i pe uar sauh sauh ang u.

{(Excerpted From the Book “Apostolte Thurin” (2002), pp. 310-312)}

Similar Posts:

Recent Posts:

7 Responses to “Lal Isua Leh Amen! {Sunday Pual}”

  1. 1
    Joel Lrsa Says:

    Amen

    Report this comment

  2. 2
    Athana Chhangte Says:

    Kan hmang nasa viau na a, A awmzia han hriat chuan a lo ril khawp mai. Khawvel thila AMEN kan hmang hi a dik thei chiah lo a va ang ta ve.

    Post tha tak a ni e

    Report this comment

  3. 3
    VL Hminga Says:

    A tha khawp mai, hriat ngai loh thil a ni e.

    Report this comment

  4. 4
    Sihtea Says:

    A beng var thlak thin teh e.
    Amen awm zia dik tak ka vawi khat hriat na a ni.

    Report this comment

  5. 5
    chhana Says:

    A bengvarthlak hle mai. אמן

    Report this comment

  6. 6
    Awmtea Leo Khiangte Says:

    Post tha leh hlu tak a ni.

    Report this comment

  7. 7
    PKfanai Says:

    “Amen”

    Report this comment