Kutdawh fing

June 23rd, 2013 4:00 pm by chhana

http://i39.tinypic.com/ibaq1t.jpg

Hmanlai hian ram pakhatah hian mi hausa an tam em em a. Chu’ng mi hausa te awmnaah chuan mi rethei em em te pawh an awm ve tho a.

Mi retheiho zing ah chuan hmeithai pakhat hi a awm, fapa fel tak mai a nei a. A hming chu ‘Tutah’ a ni. Tutah-a chuan a nu chu a hmangaih em em a, nitin hnathawkin a nu hmeithai chu a chawm a. A nu chu rethei taka dah a duh loh avangin mi hausa pakhat hnenah kum thum a inhlawhfa a. Kum thum alo tlin chuan Tutah-a chu lunghlu tha tak mai a pe a, ‘He lunghlu hi man tam tak a ni a, I fel em avangin i hlawh atan ka pe ang che. He lunghlu hi i hralh chuan mi hausa tak i lo ni mai dawn a ni’ a ti a.Tichuan,Tutah-a chu in lam pan chuan a haw ta a, in a thlen hma chuan, ‘Keima’n ka kawl chuan ka ti bo palh ang e,’ tiin khuaa a rin em em mai mi hausa pakhat hnenah chuan dahthat a tum a, chu mi hausa inah chuan a lut hmasa ta a.

Mahse, mi hausa chu khaw danga a zin lai a lo mi a, mi hausa pa fapa chauh a lo awm a, ani nen chuan an inkawm ta a ni. Mihausa fapa hnenah chuan kum thum zet mai hna a thawh hlawh lunghlu chungchang chu a sawi kai ta a, mi hausa fapa hnen ah chuan puan them a tuam lunghlu chu a hmuh ta a. Mi hausa fapa chuan a pa zan riaka a kal thute hrilh in, lunghlu chu ina hawn aia an hnena dah chu a that zawk thu a sawi a. A pa chu awm lo mah se dah tho se a duh thu leh a pa lo haw huna lo pek sak mai turin a hrilh a. Mi rethei chuan a thusawi chu a awih tak avangin lunghlu chu a hnuhchhiah ta a ni.

Tichuan,Tutah-a chu a haw ta a. A haw kawngah chuan a nu ei turte a lei a, nakinah chuan an in chu a thleng ta a. An thenawm khawvengte chu amah lawmin an lo kal khawm laih laih a, a hnathawh leh a thil tawn te chu an zawt hlawm a. Tutah-a chuan kum thum chhung a hnathawh dante leh hlawh atan lunghlu man tam tak a dawn thute chu a hrilh a. Lunghlu chu ina a dah chuan a him a rin loh avangin mi hausa fapa hnenah a dahthat thute a hrilh bawk a, chu’ng thute chu a nu hnen ah pawh hrilhin a tukah chu lunghlu chu va lak leh a tum thute a sawi a.

A tuk khua a lo var chuan Tutah-a chu hma takah a tho va, lunghlu la tur chuan mi hausa inah chuan a va let leh a. A va thlen chuan mi hausa fapa hnen ah chuan, ‘Thianpa, i pa chu alo haw taw em?’ tiin a zawt a. Mi hausa fapa chuan, ‘Ka pa a zin ka tih kha. Eng ti turin nge a lo kal?’ a lo ti a.Tutah-a chuan, ‘I pa alo haw tawh nge haw lo kan han zawt ve mai mai che ani e. Nimina lunghlu ka kawltir che kha la let leh turin ka lo kal a ni,’ a ti ta a.

Chu veleh mi hausa fapa chuan mak tih hmel em em chungin, ‘Lunghlu i ti em ni? Eng lunghlu maw? Tu hmaah nge min kawl tir? Chutiang min kawl tir ka va hre lo ve!’ a ti ta daih mai a. Mi hausa fapain chutia a tih tlat avang chuan Tutah-a chu a mangang hle mai a, ‘Hriatpuitu tumah an awm lem lo va, mahse, nangmah ngeiin dah tura min tih avangin ka kawltir che a nih kha. Min pe let leh mai rawh, a nih loh chuan lal hnen ah ka thlen dawn a ni,’ a ti ta a.

Mi hausa fapa chuan thinrim em emin, “Kan in atangin thlawkbo nghal rawh!” tiin a hnawtchhuak a.Tutah-a chuan a lunghlu chu pe let leh turin a ngen ngawih ngawih a. Mahse, a dil chhuak thei ngang lo a ni. A tawpah chuan a tihngaihna hre lo chu lal hnenah a kal ta a, lal chuan, “Kum thum zet thlan sa phul kaia i thawh chhuah a ni a; nu tar tawh tak chawm tura thawk fapa fel tak tan dikna chu a lo lang chhuak ngei ang,” a ti a.

Lal chuan thil awm dan zawng zawng chu a zawt fiah ta a. Mahse, mi hausa fapa chuan Tutah-a lunghlu chu la lo ang a a insawi tlat avangin rorelna chu a fel hleithei ta miah lo mai a. Thuhretu tumah an awmloh avangin an chingfel hleithei lova; lal chuan ni thum hnua ngaihtuah that leh turin a ti ta a ni.

An thubuai chu a lar ta em em mai a. Ni thum hnua lalin ro a rel dan tur chu mipuite chuan an hre chak hle mai a. Chutih lai chuan kawna lo awm kutdawh putar pakhat chu Tutah-a chuan a tawng ta hlauh mai a. Kutdawh chu mi hnena inhlawh lai a khawngaih taka ei leh in tur a lo pek thin a lo ni reng mai a. Hmel hlim lo taka a lo kal boh boh Tutah-a chu kutdawh putar chuan thil awmdan a lo zawt a; a ni chuan thil awm dan zawng zawng chu chiang takin a hrilh ta a. Kutdawh putar chuan, “Hlauthawng reng reng suh, chu mi hausa fapa chu keima’n ka ti tlawm dawn a ni,” a ti ta a.

Tichuan, ni thum chu a lo liam ta a, mi hausa fapa chuan lamtang mi pathum a lo hruai bawk a; Mi hausa fapa leh Tutah-a chu lal hmaa an lo inlana, lal chuan mi hausa fapa chu thu a han zawt leh a; mahse, a inzep tlat avangin thubuai chu chinfel theih a ni leh ta chuang lova. Chutih lai chuan mipui zingah chuan kutdawh putar kha a lo awm reng a; lal hnenah chuan chu thubuai chu a chinfel theih thu a hrilh a. Lal pawh chuan, “I chingfel thei tak tak dawn a nih chuan han ti ta che le,” a ti a. Tichuan, kutdawh putar chuan ro a han rel dawn ta a. Kutdawh putar chuan Tutah-a chu luikama mi hlum nem chu a va laktir a. Mi hausa fapa leh lamtang mi pathum hnenah chuan, “Tutah-a chu lunghlu i hmu reng reng em?” tiin a han zawt a. Anni ho chuan, “Hmu ngai lo,” tiin an chhang a.

Chutah chuan, kutdawh putar chuan, “A tha e, a nih chuan chu lunghlu chu eng angnge a nih reng reng in suangtuahna hmangin a lem han siam teh u,” a ti a. Tuhtah-a, mi hausa fapa leh a lamtang mi pathumte chu hmun hran theuhah dahin hlum chuan lunghlu lem chu a siamtir ta a. An siam zawh chuan, an thilsiamte chu kutdawh hnenah chuan an rawn keng ta a. Chu’ng an thilsiamte an han en chuan mi hausa fapa leh Tutah-a lunghlu lem siamte chu a lo inang ta chiah mai a.

Kutdawh putar chuan, “Khaile, thubuai chu chinfel a ni ta. Mi hausa fapa rawn hruai mi pathumte hian lunghlu hi an la hmuh loh avangin danglam tak takin a lem an siam a, Tutah-a leh mi hausa fapa erawh hi chuan lunghlu kha an hmuh tawh miau avangin inang takin an siam a ni. Chuvangin, Tutah-a lunghlu chu mi hausa fapa hian a kawlsak ngei a ni tih a chiang a ni,” a ti ta a. Lal chuan kutdawh putar chu fing a ti hle mai a. A rorel dan pawh chu a fak hle a ni. Tichuan, lal chuan, “Um, kutdawh putar chuan thubuai chu a chingfel ta e, mi hausa fapa khan Tutah-a lunghlu a kawlsak kha pe nghal rawh se. Tin, mi hausa fapa leh a thiante hi na taka hrem ni rawh se,” tiin thupek a chhuah ta a.

Lalin thu a pek zawh chuan lunghlu chu sum tam takin a leisak a, Tutah-a chu mi hausa a lo ni ve ta a. Thubuai chingfeltu kutdawh chu lal chuan fing a tih em avangin ram rorelna lam hotuah a dah ta hial a ni.

Similar Posts:

Recent Posts:

9 Responses to “Kutdawh fing”

  1. 1
    Joel Lrsa Says:

    (Y)

    Report this comment

  2. 2
    PKfanai Says:

    A ngaihnawm hle mai. (Y)

    Report this comment

  3. 3
    muansakhi Says:

    Chu kutdawh chu pianpui B.A. a ni maw?

    Report this comment

  4. 4
    kiddo Says:

    Khai awww.. Inkhawm kal a hun dawn nakin ah ka chhiar mai ag. A ngaihnawm hmel phian lehnghal

    Report this comment

  5. 5
    Sihtea Says:

    A va han tha teh lul ve maw le.

    Report this comment

  6. 6
    saint sammoo Says:

    post tha tak a ni.

    Report this comment

  7. 7
    SHauzelSailo Says:

    Ka chhiar chhuak ve e (Y)

    Report this comment

  8. 8
    Awmtea Leo Khiangte Says:

    Ngaihnawm dawn e. (Y)

    Report this comment

  9. 9
    Siara Says:

    Ngaihnawm bwk si, tha bawk si a ni e.

    Report this comment