Census 2011 final report

June 21st, 2013 8:00 pm by Awmtea Leo Khiangte

Census 2011 chungchang hi post a la awm lo tlatin ka hria a, June ni 13 khan chanchinbu hrang hrangah a lo chhuak a, kan lo hmu ve tawh maithei a. Ka rawn dah ve leh hrim hrim e.

Source: Vanglaini.org

India chhiarpui 2011-a mihring zat chu tihfel a ni ta a; Mizoramah mihring 10,97,206 an awm a, mihring zat aṭanga teha ziak leh chhiat thiam zat (literacy) chu 91.33% a ni. Mizoram bika primary census abstract chu nimin khan Aizawl Press Club-ah MJA president, C Lalrambuatsaiha’n a tlangzarh a, hei hi tihdanglam tawh loh tur, kum 2021 chhiarpui thlenga rin tawh tur a ni.

Mizorama mihring zat 10,97,206 zingah hian mipa 5,55,339 leh hmeichhia 5,41,867 an ni a; kum 2001 aṭanga 2011-a mihring punna chu 23.48% a ni. India ram puma mihring zat chu 1,21,05,69, 573 (mipa 62,31,21,843 leh hmeichhia 58,74,47,730) a ni a, 2001 chhiarpui aia a punna chu 17.7% a ni. 2011 chhiarpuia provisional report lo tihchhuah tawhah chuan Mizorama mihring zat hi 10,91,014 a ni a, final report-ah hian mi 6,192-in an pun belh a ni.

Mizorama district zingah, Mamit district-ah mihring punna sang berin, 2001 aṭangin 2011-ah 37.56%-in an pung a, a dawttu Lawngtlai district-ah 34.59%-in an pung. Mihring punna rate hniam ber, Champhai district-ah chuan 16.65%-in an pung a, Lunglei district (17.64%)-in an dawt.

India rama literacy rate chu 93% a nih laiin, Mizoramah chuan 91.33% a ni a; literacy-ah hian Kerala chu sang berin 94% a ni a, a hniam ber, Bihar chu 61.8% a ni. Mizorama district zingah Serchhip district-ah ziak leh chhiar tam berin, 97.91%-in an thiam a, a hniam ber, Lawngtlai district-ah chuan 65.88% a ni thung.

Mizoram pumah district pariat leh sub-district 26 a awm a; kum 2001 chhiarpuiah khawpui (town) 22 a awm laiin, 2011-ah chuan 23 a awm tawh a, 2001-ah thingtlang khua 817 a awm laiin, 2011-ah chuan 830 a awm tawh a ni.

Chhiarpui thar berah hian Mizoram zau zawng chu sq.km. 21,081 a ni a; hetih lai hian, Mizoram zau zawng hi sq.km. 21,087-a chhinchhiah a ni. Hemi chungchangah hian Directorate of Census hotute chuan, sq.km. 21,087-a ziah ṭhin chu kum 1981 aṭangin sq.km. 21,081-a ziah a nih tawh thu leh, 1981 aṭanga sq.km. 6-a a zìm tak chhan an hriat loh thu an sawi.

2011 census primary abstract datasheet tlangzarhna inkhawm hi Census Operation, Mizoram deputy director, Lalhmingthanga’n a kaihruai a; statistical investigator, Lalbuanga Sailo-in sawifiah ngaite a sawifiah a ni.

vanglaini

Similar Posts:

Recent Posts:

16 Responses to “Census 2011 final report”

  1. 1
    Dr John Says:

    (Y) BVT hle mai

    Saiha leh Lawngtlai chu… Population leh Literacy-ah an va Inthlau ve le!!! Engnge a chhan ni ang le? Chhan tha tak-te hi a lo awm ang e???

    Report this comment

  2. 2
    chhana hlawnchhing Says:

    KM 6 ngawt mai a Mizoram a zimna chhan hi hriat chian a va chak awm em. Assam ho hian min nek a ni mai lovang maw, tun tleng hian chief minister, minister MLA assam nen kan ramri fello chingfel ngam ka hmulo Goliatha hlau in an hlau niin ka hria. kan ramri chingfel ngam Goliatha hlaulo David kan ram hian a mamawh takzet in ka hria. CYMA zawkte hian hma an la thin a kan sorkar zawk hian hmala tur an nih lai in kan sorkar lah chu a la zah miah lo leh nghal a

    Report this comment

  3. 3
    Joel Lrsa Says:

    A bengvarthlak e.

    Report this comment

  4. 4
    Ijassdie Says:

    Ṭha khawp mei.. Very informative (y)

    Report this comment

  5. 5
    Awmtea Leo Khiangte Says:

    Tuk chhuah nuam ule.

    Report this comment

  6. 6
    paeia Says:

    A bengvarthlak hle mai…mahse thingtlang khua a va pun belh nasa em ve aw…

    Report this comment

  7. 7
    chhana Says:

    Sub-District khi enge a nih le? 26 lai a awm lehnghal. District dil ho hi ti dawn ila, a inthlau viau bawk sia.

    Report this comment

  8. 8
    Awmtea Leo Khiangte Says:

    Sub-district tih hi Sub-division tihna a ni awm e.

    Report this comment

  9. 9
    whotalk Says:

    Population kan la tlem lutuk hi chu a pawi ka ti. rethei mah i la han tam em2 phawt mai i la tha kei ma mimal ngaih dan. Dang chu pawi lo ah ngai ta i la. (Directorate of Census hotute chuan, sq.km. 21,087-a ziah ṭhin chu kum 1981 aṭangin sq.km. 21,081-a ziah a nih tawh thu leh, 1981 aṭanga sq.km. 6-a a zìm tak chhan an hriat loh thu an sawi.) tih lai tak khi thil mak tak chu nih hi. Mizoram sorkar hi a lo thil phal hle mai ka ti.

    Report this comment

  10. 10
    Ruata 4 Cabin Says:

    kan tlem hian advantage min pe emaw tih theih tur a ni..literacy rate ang chi ah te..engpawh nise a bengvarthlak khawp mai..maipawl lian tak pu ang vel kan ni (Y)

    Report this comment

  11. 11
    Diktea_Pa Says:

    Pho chhuah a tan chuan a tawk tiu teu hle mai! Chi thlahna hmun tha deuh chu a awm a nih hi mawle :)

    Report this comment

  12. 12
    Awmtea Leo Khiangte Says:

    Family planning te hian min chiah ve lo emaw kan ti ngawt ang e. Kan tunlai nula te hi han zawt chiang ila, fa neih tam tum an awm mang miah lo nia! Mipa te erawh chuan neih tam an duh tlangpui thung. Kan pung chak vak thei lo.

    Report this comment

  13. 13
    nell_maiden Says:

    India rama literacy rate chu 93% a nih laiin, Mizoramah chuan 91.33% a ni a;
    Typo a ni em aw? India literacy hi 93% a ni dawn emawni le?

    Lawngtlai Dist. hniam na chhan hi Lawngtlai khaw thlanglam pang hi Tuikuk leh Takam dominated areas a ni, heng hnam mawlho hi lehkhazir mumal lo an tam hle a ni tih a hriattheih awm e.

    Sakhua zawnga statistics hriat a ni thei em le?

    Report this comment

  14. 14
    Awmtea Leo Khiangte Says:

    Indian literacy rate hi 73% a ni. Tihsual palh a ni ang.

    Report this comment

  15. 15
    hltau Says:

    Lawngtlai leh Mamit hi Bru(tuikuk) leh Chakma tamna ani a, an in thlahpung nge ni ang, an pempung.. nausen piang percentage a om em le…

    Report this comment

  16. 16
    Awmtea Leo Khiangte Says:

    Vanglainiah hi chuan heti te chauh hi dah a ni a. Hei chu abstract a ni a, detail chu a awm ngei ang.

    Report this comment