Ka Pa (Father’s Day pualin)

June 16th, 2013 1:01 pm by Dr Mahminga Sailo

Ka Pa,

Mi pa-te angin lehkha zir sang lovin, hna zahawm thawk lo mah la; kan chhungkaw tana I thiam leh phak tawk hlan theihtawp I chhuah thin kha hriatsak vek lo che mah ila, kan tan hian i va’n hlu tak em!

Zirna I ngaisang…
Thiamna run bela I fate’n kawng kan zawh tan atangin kan zirlai chu ngaihpawimawh bera I neih thu hi kan zirtirtu pa ngeiin uar taka min hrilh kha dawt a niin ka hre ngailo. Pawl khat ka bawh kan kuma zirlai bu a thlawna ka dawn ve tak loh nia kan zirtirtupa’n, ‘Mahminga chu a pa’n a leisak leh mai ang’ a tih kha naupang kum 6 mi lek benga ri ni mah se, vawiin thleng hian a sawitu leh min hrilhna class room kha ka la mitthla their eng a sin.

Pathian I tih…
Kristian nun min zirtir a, mite mit hmuha mawi leh mawi lo pawh thlu lova, chhungkhat laina hnaite dem hial hlawha I Pathian rawngbawla I nupui fanute I kalsan fo mai te kha, a hunlaia mi thenkhatin hnunglam atanga an sawisel fek fek ni thin mah se, a rawng I bawl hian kan ei tawk chu min pe ve zel a. Rethei tak siin, chhuanchham leh riltamin I fate hi kan awm ngai bik lo asin. I Pathian biak hi a tha teh e, biakpui loh chi pawh I ni hlei nem

I inngaitlawm
Ni, zo pa ve mai, kut themthiam lem lo tak I ni a, ka pi ngei paw’n a mit I tlin lohzia a sawi ve zauh zauh chang te pawh ka hre ve thin a sin. Chutih rualin, hna I thawk hreh ngai lo va, I thawh theih chinah thahnemngai taka I thawk thin te; fiamthua kan veng pa pakhatin, ‘Kan khua atang hian mi pakhat vanram kai turn i se, U Saimawia hi chu a kai hrim hrim ang’ a tih fiamthu te ka hre chhuak zel a. Ka ngaihtuah kal zel a, I fapa hi zilhna tiang leka min vua-a kut min thlak awm reng ka hre chhuak thei miah lo.

I zaidam…
Ka hriatchhuah pakhat chu, theipui lo tura min tirh nia, enge min mawlh pawh ka hre chuang lo, kan theite rah hel ipte khat dawn ka va lawh tuma theite pakhat a ka chala min vawm avanga ka tah chiam kha chu ka thiam loh liau liau a ni e. Tin, ka tah ban hnua theite hel kha tak mai, ipte khat ei zo vek tura thu min pek laia ka rilru hahzia te, mahse u mipa fel tak leh rem hre tak ka neih avanga ka vanneih si zia kha. Theite hel kha fek fawk pakhat ei pawh a har tih min hriatpuiin, ka u-in inhnuai a pan vat a, ka nu puanthukhawl hunna dawhkan hnuaia chhuat awng kan hman remchan daih dan erawh ka u finzia ka hre chiang. Theite pakhat te tein ka thlak zel a, ani’n a lo paih bo zel a nih kha!

Tawngtai I ngaina…
High sikul kala mi inhnuai kan luah laia I rilru a hah thin turzia te kha. Mahse, I hunawl neih apianga kil khata I lo tawngtai leh mawlh mawlh thinte khan thla a timuang thin a sin. Inhlawhna remchang I hmuh loh avanga lekha them a, ‘Mampuia te unau, Rs. 5 ka hnutchhiah che u a, in mamawh chu Nu Mambawihi dawr atangin in lo la ba mai dawn nia’ tia I ziak han hmuh te khan bei a dawng thin, mahse I Pathian biak khan min lo venghim a. I tawngtaina rah zar zova, kan chunga mi fel leh tha tak tak kan tawng thin te kha, lawmthu sawi sen loh kan ba asin.

I khua a har thin..
Sawi tur a tam mang e. Ka nu’n hun lo tak maia a boralsan tak hnu chea I khua har thinzia te, I beisei san ve ber kei lah ka zirna leh hna avanga hmun danga ka awm daih te hian I khawhar chu hnem a hnekin ka tizual tih ka hre reng a, mahse tihtheih erawh ka nei tlem hle.

Kum kal taa kar tawp lama I zing tho khawharin dar 5:30 vela min rawn biak thin te kha, a chang chuan lo men rei ve thin nen, ka ning hman tep a. Mahse, tun hnua ka ngaihtuah let leh hian ka inthiam miah lo tih min lo hriatsak dawn nia. Pathian zara ka dam a nih phawt chuan, ka mobile phone bill chu hek deuh mai rawh se, ka hunawl neih apiangin a tam thei ang ber ka be zel ang che.

Ngawi teh, ral khat atang hian I fapa hi ka luangliam leh hle pek a. I bula thu ngeia han titi ka va chak ve le. Nula bem dan min hrilh te kha I sawi nawn leh ngai ta lem bawk si lo, Pathian zarah hun a awm ang a, hun remchang kan nei thuai ang chu.

Ka Pa, ‘Ka hmangaih che’
Vawiin, Father’s Day-ah ngei hian, ‘Ka Pa ka hmangaih che’ tih ka sawi nawn leh e.

P.S. Father’s Day ka hre chawp chilh a, post siam hram ka duh si. A mimal thil lutuk em ka hrethiam chiah law, chhiartute ngaihthiam ka dil e.

Mi(sual) Pa zawng zawng te, Happy Father’s Day chibai ka buk vek a che u… (Y)

Similar Posts:

Recent Posts:

8 Responses to “Ka Pa (Father’s Day pualin)”

  1. 1
    chhana Says:

    A tha h1e mai.

    Report this comment

  2. 2
    PKfanai Says:

    Pa te an damlai ngeia chawimawina hlan hi a ropui ngawt mai. (Y)

    Report this comment

  3. 3
    Sihtea Says:

    Pa te hi an dam lai a fak hi kan tih tur ni awm tak a ni a. Lawm thu tak ngial pawh hi, kan hrilh ngai lem hlei law.
    An thih hnu hian, an hlut zia leh fak an phu zia hi, kan hre tlai khaw hnu leh si thin a. Nu leh Pa dam lai la nei te kha chuan, in Nu leh Pa te kha, fak an tul chang in fak u la, lawm thu te hrilh fo rawh u.

    Report this comment

  4. 4
    saint sammoo Says:

    kei ni chu fa ten I love you dad…. min ti hnap hnap tawh a nia… tlangval ho kha ṭang rawh u…haha

    Report this comment

  5. 5
    Dr Mahminga Sailo Says:

    @ saint sammoo… Tluk loh rim i nam bik teh e.. (Y) :-)

    Report this comment

  6. 6
    caribou Says:

    Vawiin Father’s Day ah hian fam chang ta ka pa ka hrechhuak vawng vawng mai.

    Report this comment

  7. 7
    TuaiSialA Says:

    A tha kher mai. Pate tan chuan chhiar a va han nuam dawn tak em!

    Report this comment

  8. 8
    Dr John Says:

    (Y) A Tha ngei mai…

    Pa nih hi a har lova, Patling nih leh Innghahna tlak nih hi a har khawp mai…

    I Pa hi Patling nih leh Innghahna tlak nih a fawm a ni.

    Report this comment