A thlawna Chhandamna man to (Sunday Pual)

June 16th, 2013 12:31 pm by PKfanai

India rama Missionary Pakhat hian, Tuifinriata Tuikeplung zawng thinho zingah thian tha tak tak a nei a, an zingah te chuan khawsain Tuithiam tak anih angin, Tuikeplungte pawh a zawnpui ve fo thin a. Tin, a remchan hun apiangah Pathian thu a hrilh thin bawk a ni.

Tumkhatchu, chutianga Tuifinriata Tuikeplung zawnga an han liluh leh chuan, a thian tha em em India mi Ram Bhau chuan, Tuikep lian tawk tak mai hi a han chhar a, hlim em em maiin, Missionary chu a han pe a. Missionary chuan a chemtea a han kar hawn chuan, a chhungah chuan Tuikeplung mawi ang reng tak mai chu a lo awm ngei mai a. mawi ti tak mai leh hlim em em maia a mawi a tihzia a han sawi chuan, Ram Bhau chuan, “Missionary, Mihringte mahni sualna hrethiam lo, Pathian mithmuha Sual leh hmelhem tak si, I sawi thin ang kha anih hi. I mitah chuan, sawiselna awm lo, sawisel bo leh mawi em em mai a ni a, keia mitah erawh chuan, a that tawk lohna leh a hmelhemna ka hmu tam khawp mai” a ti ta a.

Chu chu remchanga hmangin, Missionary chuan, Chutiang anga hmelhem nasa ni mahila, Pathian chuan, Chhandamna kawng min buatsaih sak a, chu chu engmah pek ngailo, a thlawna neih theih mai a ni tih thu a han hrilh ta ngat ngat a. Nimahsela, Ram Bhau chuan, Chutiang ang Pathian Chhandamna thil hlu lutuk mai, Chatuana Vanrama chen theihna chu, a thlawna neih chi awzawng ani lovang, Hindu Puithiam ho mahni intihrehawma Vanram kai tum angin, a hrehawm thei ang ber leh nasa taka tuar ngeiin ka hlawh chhuak dawn a ni” a ti ta tlat mai a, Missionary pawh chuan han thlem zui ngaihna a hre ta mang lo a.

Tukkhat chu, Ram Bhau-a chuan Missionary chu a inah leng turin a sawm a, a hmel a serious em avang chuan, Missionary chuan beisei pawh a nei sang viau a ni. Ram Bhaua te in an va thlen chuan, Ram Bhau-a chuan, Thingrem lian tak hi a han hawng a, a chhung atang chuan Bawm nalh zet mai a rawn phawrh ta a. Chu bawm a han hawn chuan le, Tuikeplung lian leh mawi em em mai hi a rawn phawrh chhuak a, Missionary chu pek a tum ta a. Missionary chuan mak a ti kher mai a, a la duh ta mai lova, chu hun chu hman tangkai a tum ta tlat a.

“Hetiang thil hlu lutuk chu ka la ngawt thei lovang, a manah cheng singkhat ka pe ang che” a han ti a, Ram Bhau a hmel ahan hmuh chuan, “anih leh cheng singhnih pawh” a han ti leh nghal zat a. Ram Bhau-a erawhchu a hmel a serious hle mai a, “He Tuikeplung chanchin hi ka han hrilh ang che, Pawisaa lei chi rual ani lo ve” a ti ta mai a. Tichuan a han sawi zui ta a:-

“Ka fapa hi helai rama tuihleuh leh Liluh thiam ber mai hi a ni a. Tumkhat chu, he Tuikeplung hi a hmu a, midangte luh ve phak lohna ami ani a, a han chhar luih hram chuan, a lo lut thuk lutuk a, a thaw-in a tlin ta lova, Tui te a hak ta a, a nunna kan chhan thei ta lo a ni. Nimahsela, a Ipteah a Tuikeplung chhar chu a lo ak a, hetiang ang reng renga Tuikeplung lian leh mawi, Sawiselna reng reng awmlo hi kan la hmu ngai lo a, Tin, Ka fapa neihchhun, ka chhuan em em leh ka mittlung zo em em mai chuan a nunna senga a chhar anih avang hian, He khawvel thilhlu dang leh Pawisa a lei chi awzawng ani lo, engmah hian a man zolo a ni” a ti ta a.

Chutah chiah chuan Missionary chuan, “Chhandamna Pathianin a thlawna min pek a tum pawh, chutiang chiah chu a lawm! Pathian Fapa mal neihchhun, a chhuan em em leh, a mittlung zo em em maiin a nunna hlana a buatsaih ani a, Pathian hian a ngaihlu em em mai a, Mihringte that tum vena emaw, taksa kan lo tih hrehawm ve na emaw, he Leia hausakna reng reng hian a lei phak lo nasa hle a ni. Chutiang taka thil hlu leh hautak nisi chu, Nangin kei min hmangaih a, min duhsak taka a thlawna min pek I tum ang hian, Pathian chuan Mihringte min hmangaih em avangin, a thlawn liau liaua min pek a tum a, chu chu i hnawl dawn em ni?” a han tih takah chuan, Ram Bhau-a chuan a hrethiam ta hle mai a, “Tunah chuan ka hrethiam ta e, Pathianin a fapa nunna hmanga min chhandamna a lo buatsaih diam, a thlawna min pek chu Lawm takin ka pawm ta e” a ti thei ta a ni.

“Thil chhe thei, Tangka leh Rangkachaka tlan in ni lo va, Beram no hmelhem lo leh bawlhhlawh kai lo thisen anga Krista thisen hlu chuan tlan in ni zawk tih in hre si a.” (I Petera 1:19)
“Nimahsela Pathian chuan a mi hmangaihna chu fak tlakin a lantir a, misualte kan la nih laia Krista kan aia a thih avang khan.”(Rom 5:8).

Similar Posts:

Recent Posts:

9 Responses to “A thlawna Chhandamna man to (Sunday Pual)”

  1. 1
    chhana Says:

    A tha h1e mai.

    Report this comment

  2. 2
    Sihtea Says:

    Sarmon tawite, tha tak ni si a nih hi.

    Report this comment

  3. 3
    VaiVa Says:

    12:31 ah published a nia, 12:30 ah chhana hian alo comment hman bik :P Network chian loh thut vang a ni e. Sunday pual hi kan zawng ru du du tawh mai a nih hi maw… Father’s Day Pual Dr. Mahminga ziah pawh a ngaihnawm dawn khawp mai (Y)

    Report this comment

  4. 4
    chhana Says:

    Ka network hu hun (time) aia chakin a kal a.

    Report this comment

  5. 5
    PKfanai Says:

    Chhana zawng a network hi a chak tha bawk aniang, Israel(Palestine) atangin Mizoram thil thleng a hre kim hneh thei thin em mai. :-o

    Report this comment

  6. 6
    Joel Lrsa Says:

    A tha lehpek khawp mai

    Report this comment

  7. 7
    TuaiSialA Says:

    A ngaihnawmin a fiah khawp mai. (Y)

    Report this comment

  8. 8
    chhana Says:

    @pk, i sermon hi ka duh thin ngawt mai, naupan lai a tanga ka hriatthiam thin dan angin tehkhin thu i hmang thiam bawk si.

    Report this comment

  9. 9
    Dr John Says:

    (Y) Amen! A Tha leh hle mai… Pu PK-a nge nge…

    Kei pawh ka awl ve deuh tawh dawn hnai e, Ka NET pawh a chak ve deuh tawh bawk a, ka rawn misual regu thei ve tawh ngei ang chu maw … :)

    Report this comment