Bangalore Diary

June 14th, 2013 12:15 am by hlatekhua

Kan fapa zirna tur dapa Bangalore kan zin chu ka ṭhianpa u, Nutei’n (Prof. Lalrinawmi Ralte, B.A., B.D., M.Th., D.Min., D.Th.) hneh tak leh phal takin min lo thleng a, kan lawm takzet a ni. Ni 13 zet ka chamchilh lehnghal. Hmun dangah thleng ta ila ka hmuh miah loh tur mi pawimawh leh ṭangkai tak tak ka hmuh theih phah bawk nen, thlenin thlang fuh kan inti hle. Thlenin nu dawta Mizo kan hmuh hmasak ber pawh Bangalore Presbyterian Kohhran pastor ngat a ni.

Admission min tihpui turin Nutei chuan an tlangval fel te a’n be zung zung a, a tuk zinga Christ University kan thlen phei hnu lawkin Tv. Jonathana leh Nl. Tetei te an lo lang nghal a, min tihpuiin min kaihruai char char a, kan awlsam phah hle. Jonathana hi Aizawl mi hausa hlun Pu Buangthanga tupa a ni a, M.Sc. (Computer Science) zir zo chiah a ni a, tlangval fel, invawng tha thlap mai, a chetzia leh tawngkamah mihausa chhungkua-a mi a ni tih pawh hriat loh a ni. A u nula, MBA zir zo ṭep nen room pakhat an luah dun a. Kei ta pek chuan eirawng in inbawl chawp em ni? Engnge in hmeh ṭhin? tihte ka’n zawt chawt a. Dal leh alu an hmeh chhawk ṭhin tih te, sausage pawh an ei fo thin tih te min hrilh a; an taimakna leh tuarchhelna hi fakawm ka ti ngei mai. Tetei hi M.A. zir zo chiah, M.Phil. zir leh tum mek a ni a, zaithiam tak, Bangalore-a an choir lar tak, India ram pawnah pawh zaia rawngbawla fehchhuak ṭhinah member a ni ngat a ni. Ni khatah admission chu kan tifel ta nghal vek a.

Pathianni inkhawm hmain mi(sual) hlun, Dr. Mahminga Sailo-in min rawn pan vang vang a, kan inhmuh vawi khatna a ni nain ṭhian inkawmngeih sa ang maiin kan innel nghal sarh thei a, a nuam ngei mai. A hnu-ah pawh vawi khat min tlawh turin a lo kal leh a, mahse hmun danga zanriah eia kan thang hlan a ni hlauh a, kan inhmu thei ta lo. A hna lam avangin a zin bo a ngai sia, vawi khat bak kan inhmu thei ta rih lo a ni.

Weekend a tlak hnuin awmna tur lam kan han zawng leh a. Jonathana leh a thianpa, Tv. Peter-a, Lunglei tlangval fel, M.A.(Psychology) zir zo hlim chuan min han zawnpui leh vat vat a. Rei lo deuhah awmna tur PG (=Paying Guest) accommodation kan hmu leh ta mai a, Petera awm tawhna thin a lo ni nghe nghe a. Hemi ni chawhnu lam hian University-ah chuan an Vice-Chancellor, Colonel Father Doctor Thomas C. Mathew ka va hmu a, Pro VC leh Registrar te pawh ka hmu bawk (an VC hi sipai bang ngat a lo nia). Heng meeting hi International Department Director Dr. J.W. Lobo, MEA-a rei tak lo thawk tawh ṭhinin min arrange-sak a ni.

Tlai lamah Karnataka DGP&IGP, Pu Lalrokhuma Pachuau-te nupain zanriah kil turin min sawm a, min rawn lamtirin min thlah leh thlap nghe nghe. Pulit lal hlui, MP hlui ni bawk, Pu H.T. Sangliana te nupa an sawm tel bawk a, kan tlai ngei mai. Pu Sangliana hi Lok Sabha inthlan lo awm leh tura a plan te ka zawt a. ‘Min sawm leh chuan ka ding leh mai ang, Karnataka aṭang hian’ a ti. ‘Mizoram lam te hian an au nasa hle che a ni lo’m ni?’ ka’n ti ngei a. ‘A, chhuah hma hma hian min lo huphurh lawk nasa ṭhin a, Pu Hawla te khian’ a ti.

Kan cham chhungin ka ṭhiannu Machhungi (Dr. Hrangthan Chhungi, B.Com., B.D., M.Th., D.Th.), Executive Secretary, Commission on Tribals and Adivasis, National Council of Churches in India (NCCI) te nupain zanriah eiah min sawm bawk a. Hun hlimawm tak kan va hmang. An fanu Suzanne Sangi hi tun hnaia lehkhabu lar thar Facebook Phantom tih ziaktu hi a ni a, tunah kum 17 chauh a la ni. Novel dang a ziak leh mek. An nufa-thumin zai mawi takin min awi a, thiam leh thiam loin ka’n lo zawm ve ang awl awl a. Machhungi hi a vanglai na na na chuan zaithiam tak mai a ni ṭhin a, tunah pawh a la thiam vang vang khawp mai.

Pathianni ka cham hnuhnun zawk tlai lamah, Mizo Inkhawm te kan zawh vek hnuin, United Theological College (UTC)-a an inkhawmnaah ka va tel ve a (ka thlenin nuin min tel luihtir a ni mah zawk ang chu). Inkhawm zawhah min ko chhuak a, pangpar ṭawnkhawm mawi tak min pe nghe nghe. Mahse he inkhawmah hian Pathian sawina a awm apiangin ‘Father’ ti lo-in ‘Parent’ an ti tlat mai chuan min tinuam lo deuh ul mai. Lal Ṭawngṭainaah pawh ‘Our Parent in heaven…’ an ti ngat mai (Our Father…ti lo-in). Mizoram Presbyterian Kohhran te pawh active taka kan tel venaa hetianga an ti tlat mai hian ngaihtuahna a hruai deuh veng veng a ni.

Ka haw lamah excess baggage ka nei a. Tun hnai mai aṭang khan India ram airlines-te hian economy class tlawm chia baggage allowance hi 15 kg. lek an lo ti thar hi a lo nia. Bangalore aṭanga Mumbai thlawhna atan 5 kg. excess min chawitir a ni. Mumbai aṭanga Istanbul pannaah hi chuan Turkish Airlines-ah ka chuang a, anni hi chuan a hma aṭang rengin excess baggage a neih pawhin tihdan kan lo ngaihtuah ang an ti sa tawh a. Chu mai ni lo-in check-in counter-a duty pa khan ‘mut i duh takin kan tia, nangma seat bakah i bula seat 3 hi kan block-sak che a nia’ min lo la ti nghe nghe. Flight hi a khat viau bawk sia, min duhsakna chu a lawmawm duh ngei mai. Mahse han mut deuh zuah tak tak chu ka tum ta chuang lo a, a hnu deuhah phei chuan vaipa thau deuh pakhat hi a rawn insawn a, a hnar ring phian lehnghal!

Ka zin apiang mai hian hlawkna ka chhar thar ṭhin. Tun ṭum pawh hian mi thar tam tak ka hmelhriat bakah Bangalore kawngah chuan car ṭha leh man to ber ber pawh auto-rickshaw speed baka chakin an kal thei chuang bik lo tih te ka hriat thar leh tak kha.

Similar Posts:

Recent Posts:

25 Responses to “Bangalore Diary”

  1. 1
    Charice_mizo Says:

    Hei zet chu VIP diary ni maw hehe

    Report this comment

  2. 2
    sheldon Says:

    Tukchhuah nuam vek u le (L)

    Kan Mahminga hi chu a fel teh mai ania. In inhmu chu a tihzia hle mai. In thil tih ah in tluang purh mai a, Pathian hnena lawmthu sawi i ba nasa mai.

    Report this comment

  3. 3
    Phivawk Says:

    Diary ngaihnawm tak a ni (Y)

    Report this comment

  4. 4
    hlatekhua Says:

    Charice_mizo@1, ‘P teh suh e.

    sheldon@2, a ni ngawt mai, a lawmawm takzet a ni. Admission zawng ve tho, khaw hrang hranga kal kual vak vaka la hlawhtling chuang lo te pawh kan hmu nghe nghe tak asin.

    Phivawk@3, ka lawm e.

    Report this comment

  5. 5
    Dr John Says:

    :O Pu Hlatekhua chuuu….
    Hmuh ka chak tehlul che nen…
    Engtik khan nge i lo kal a???

    Report this comment

  6. 6
    ZerO Says:

    UTC a Feminism hluar lutuk bik khu enge a chhan ni ang le? Our Father atangin our Parent an tia, nakin lawkah our Mother an ti leh mai long maw? :p

    Report this comment

  7. 7
    shailendra Says:

    Bangalore hi ka kal ve chak khawp mai.

    Report this comment

  8. 8
    hlatekhua Says:

    Dr John @5, Ka lo hre lo a nih chu a…May 30-June 10 thleng khan ka cham a.

    Ka thlenin nu Prof. Lalrinawmi Ralte degree khi ka lo tisual deuh a nih khi. Master of Sacred Theology (STM) pawh a nei tak asin; D. Min nen hian Boston, USA-a a zu zir chhuah ngat lehnghal.

    Report this comment

  9. 9
    Awmtea Leo Khiangte Says:

    Chhiar dawn ang.

    Report this comment

  10. 10
    lalpeace Says:

    Our Father and Mother tal tih awm a nia, mahni sawi duh chin chiah sawi a a bak chu ngawih hmak theih turin..

    Report this comment

  11. 11
    chhana Says:

    A ngaihnawm dap dap e.
    Pu Sangliana chu, Pu Hawla nen an intai theilo hle a niang maw?

    Report this comment

  12. 12
    sillyBoy Says:

    An intai thei hle zawk a ni ang ;-)

    Report this comment

  13. 13
    century child Says:

    (Y)

    Report this comment

  14. 14
    Dr John Says:

    Pu Hlatekhua, Dr Mahminga chuan a lo hmu bik bik che a, min thlim chiang a ni, i lo thlen thu hi min hrilh duh miah lo nia… a vin shuah-shuall thlak tak em!!! Hei-den-rial :D

    Report this comment

  15. 15
    Lalthoimoia Says:

    (Y)

    Report this comment

  16. 16
    hlatekhua Says:

    Dr John, ka lo kal leh dawn hunah nangmah chauh ka hrilh tawh ang che, midang ṭhenkhat nen!

    Report this comment

  17. 17
    ulawng Says:

    ‘Bangalore’ an tih hian Singapore emaw ka ti ve ziah; ‘Singapore’ an tih leh Bangalore emaw ka ti leh bawk si ;-)
    – I LO CHHIAR ANG.

    Report this comment

  18. 18
    Puii Says:

    Diary ngaihnawm tak a nih hi le…. a dang pawh lo ziak zel la hlatekhua…. (V)

    admission in hmu hma hle mai, a lawmawm hle mai, mahse admission hmu tur hian result tha neihte a lo ngai lawk thin a, i fapa chu a thiam hle a ni maw…. a zir zelnaah duhsakna ka hlan e…

    Report this comment

  19. 19
    vakul Says:

    Chu i tluang a a lawmawm hle mai.

    Zai hi i tui hmel hle mai a. Minu ramah i khawsa a, our parent tihna mualah i lut chu i khawr ve dawn chu. Feminism hi a thawhn mualah chuan na ve tak a nia.

    Report this comment

  20. 20
    H.Vangchhia Says:

    Chhiar a nuam hle mai (Y)

    Mi hi in fakawm hlawm thin mang e aw. Taimakna zar a hausate hi chu an thlahte pawh engemawchenah puitling khauhna hi a awm fo reng a ni. Hetiang hi an chhuanawm thin.

    Kg 15 lek ken an lo ti tawh a ni maw, a van tlem lulai ve mawle aw. Lam hla atanga chhungte tlawh tur tan phei chuan duhthawh a na duh ve si a, a van hreawm dawn vele!

    Report this comment

  21. 21
    bbney Says:

    (Y)

    I zinna-a i hmuh leh chenpuite atang hian mi turu tak pakhat chu i ni tih a hriat. Mahse, kei chu ni ila thlawhna-ah khian ka mu ang :)

    Report this comment

  22. 22
    hlatekhua Says:

    Puii@18, ka fapa hi a thiam hle lo tawpin ka hria, a zir taima tawk lo bawk. A IB ( = Class 12) result pawh a la chhuak lo, a exam zawh veleh kan kal nghal deuh mai a ni. Personal interview kohna kan lo hmuh mai loh avangin kan tlai zo a, mahse telephone-in an rawn interview leh ta hlauh a, an han admit ve ta phawt chu a nia. Eng tak ang zui ang maw!

    H.Vangchhia@20, ka lawm e. Baggage allowance hi economy class-ah pawh a man tam chi-ah chuan 20 kg. an la ti tho ni awmin airlines mite khan min hrilh a, zin leh dawn chuan bihchian deuh a thain ka ring.

    Report this comment

  23. 23
    Dr Mahminga Sailo Says:

    E khai, Bangalore Diary-ah ka hming a lang ve tlat mai a. Pu Hlatekhua nge nge, inkawmna hun kan nei tam lo nangin, a bula awm a nuam ngei mai… (Y)

    Ka zin tur cancel emaw ka tih laiin kal leh thut a ngai ta si a. Inkhawm dawna ka lo kal hma kha ka inchhir lo ve. Tluang takin i tihtur i tifel a, ka lawmpui che; chutih rualin i mi beisei ruk ve ang pawha ka tangkai thei lo erawh pawi ka ti deuh.. :-)

    Report this comment

  24. 24
    malsta27 Says:

    Ngaihnawm hle mai………….Feminism luh chilh lakloh toh hi chu an chhuak har tawh khawp a nia.

    Report this comment

  25. 25
    hlatekhua Says:

    Dr Mahminga Sailo, kan inhmu thei hlauh kha ka lawm takzet. Kawng tam takin min pui a, thurawn tha te min pek kha ka hre reng e.

    Report this comment