A Hmang tangkai thiam (Sunday Pual)

June 9th, 2013 10:36 am by PKfanai

Violin tum thiam avanga Khawvel puma hmingthang hat Old Borneman Bull, ‘OLE BULL’ tia an koh thin kha, tumkhat chu, ramhnuaiah kawng a bo ta a. A awmna chin hre lova ngaw kara a vah a vah naah chuan, hmun pakhatah hian, thingtum remkhawm hmanga sak IN chhete hi a hmufuh ta hlauh mai a, a va pan ta a. A hmun a thlen meuh chuan khua a thim chiang tawh a, amah lah chu a chau chhe tak zet tawh a, thilo a ruangin kawngka bulah a va let tawp a ni ber mai.

Vanneihthlak takin chu in chu Sakhuana avanga inserh hranga Ramhnuai hmun fianrial taka Pathian pawl tura mahni chauha awm puithiam pakhat In a lo ni hlauh a. Ani chuan alo khawngaih em em mai a, a inchhungah a lalut a, eitur te siam sakin a eitir ta a. Chutia a lo harh leh tak deuh hnu chuan meilum an ai dun ta a. Chu puithiam chuan, Violin hlui chhe tawh tak mai hi a lo nei a, chu chu a han la a, a han tum ta a ni. A hruite chu herh dik an nih loh avangin, a lai ruai mai a, a nuihzatthlakin mawina reng a nei lo a.

Ole Bull chuan, “I Violin kha ka tum thiam I ring em?” tiin a han zawt a. Puithiam chuan nui chungin, “Ka Pu, ka Violin hi chu midang tum ve chi a ni lo, keipawhin ka zir rei a nia, I tum theih ka ring lo deuh a”, tiin a chhang a. Ole Bull-a chuan, “Ka pu, khawimaw, ka lo tum chhin ve reng reng teh ang” a han tih takah chuan, Puithiam chuan a pe ta a. Ole Bull chuan a hruite a han herhdik zung zung a, a han tum ta mai a le! Chu thing In leh ngaw reh ruih mai chu, rimawi lutuk tak mai chuan a fan ta raih raih mai a. Ole Bull-a tak pawh chu, lungleng tak leh a rilru zawng zawng pea tum a ni bawk a a kutthlak a dik lehzual zaih mai a. Mihring kutchhuak nilovin Vantirhkohten hmuh theihloh atangin an rawn tum ve ta emaw tih mai tur hian a mawi em em mai a ni. Chutiang Music mawi lutuk tak mai a Violin atanga rawn richhuak a han hriat meuh chuan chu puithiam rilru pawh a hneh lutuk a, a mittui tla zawih zawihin a insut hlawp hlawp mai niin an sawi hial a ni.

Keini mihringte pawh hi, Sual bumna avanga kan hrui thenkhat lo chat rem rum tawh, chat lo deuhte pawh herh mil loh avanga lai ruai mai, thil tha kan hriat ve te pawh, tih kan han tum ve viau pawh a ti hleithei tawh lo, sual kawng bawk awn leh thin kan ni a. Amaherawhchu, chu hmanraw chhe tawh leh ri a pek chhuah chhun pawh lai ruai mai, mawina leh awmzia reng nei thei tawh lo chu A siamtu, Pathian hnenah a duh ang anga hman tura kan pek erawh chuan ani Pathian kuta a awm chinah chuan RIMAWI tak leh tangkai takah, midangte tana malsawmna leh rimawi tling khawpin a lo hmang thei thin a ni. He thil hi kan hriat fuh loh thin avangin, keimahni thiamna leh theihna hmangin beih ve kan tum thin a, mualphona, beidawnna leh hlawhchhamna kan tawh phah fo thin a, a siamtu leh a hmang thiam, Pathian hnenah a duh ang anga a lo hman atan pe ila, a niin midangte tana malsawmna tling khawpin rimawi tak chhuah theiin a lo tum dawn a ni.

Similar Posts:

Recent Posts:

9 Responses to “A Hmang tangkai thiam (Sunday Pual)”

  1. 1
    chhana Says:

    A tha h1e mai.

    Report this comment

  2. 2
    caribou Says:

    Thil eng pawh hi a hmang thiam bik hi chu an lo awm a ni; Beckam-a pheikhawk pawh hi bun ve ngawt ila, pet goal chu sawi loh, keini anga duang chu kan ke kan bilh leh mai mai awm si a. Guitar kuah theuh theuh pawh hi kan lo intum thiam hleih thin khawp mai.

    Pkfanai nge nge, tehkhin thu i rawn chhawp chhuak thiam thin hle mai. A ngaihnawm e.

    Report this comment

  3. 3
    Joyce dady Says:

    A kham awm loh thin mange,tawi fel at,rilru hneh deuh si hian article i rawn chhawp chhuak thin a,.min ti harh sawng sawng zela lawm le..

    Report this comment

  4. 4
    PKfanai Says:

    Discipleship lam hawi deuh angin a lang a, kan tìm deuh hlawm em ni? Kan awm ang ang hian a hman turin han inpe tawp mai ila, min hman nalai tur chu Lalpa hian a hre khawp mai.

    Report this comment

  5. 5
    Joel Lrsa Says:

    Lehkhabu i chhiar zau mange ka’n tihlut teh ang

    Report this comment

  6. 6
    sheldon Says:

    Tukchhuah nuam vek u le (L)

    Report this comment

  7. 7
    PKfanai Says:

    Joel lrsa, lehkhabu hi ka chhiar zau hran lo, amaherawhchu, hetia misual.com leh fb vela nunkawng kaihruai tha thei tur thawnthu tawi zirtir nei tha post hi, Pathian rawngbawlna peng pakhat anga ka pawm hmiah hnu hian, hetiang lampang lehkhabu hi ka collect ve nual a, ka la chhiar hman hlawm meuh lo zawk a ni. Tin, ka post hmain, a dik ngei em? Belhchian a dawl em? tih Google atangin ka chhui leh phawt thin a ni.

    Report this comment

  8. 8
    Awmtea Leo Khiangte Says:

    Tha leh pek e. (Y)

    Report this comment

  9. 9
    Dr John Says:

    (Y) A tha hle mai…

    Pathian thu-in, “Ngilneihna leh Thutak an intawk a; Felna leh Remna an INFAWP” (Sam 85:10)a tih ang khan, Talent (gift), Tih tak takna (sacrifice) leh Tumna tlatna (determination)-te Tangkawp hi chuan Midang hi a lo hneh nge nge thin…

    Tunlai chu College kan buai vanglai (Buh lu chuh lai) a ni a, engmah ka ti hman lo… Misualah pawh engmah ka rawn Tangkai thei thlawt lo… hrehawm ka ti ang reng hle mai, ka in thlahrung viau bawk :)

    Report this comment