Zo-business model leh Zo-inflation (Dichotomy of Zo- culture and economy)

June 7th, 2013 9:59 pm by VaiVa

Ka thiam zawng ni miah lo, Zopa sumdawnna kalphung leh thil man sang zel in kaihhnawih dan THEORY hi ti hian ka han sam kual vel a. Economist emaw eng management diploma nei emaw ka ni hek lo. Zopa tawnhriat atangin ka rawn chhawp chhuak dawn a ni.

Zo-Business model ~ Sumdawnna kawng a kailawn kan pen dan

1. Hausak thut: Hei hian hausak thut chakna atangin kut hna emaw sawrkar hna emaw min hmuh hniam tir a. Kan rilru a lo lut hmasa ber chu sumdawnna a ni. Chu chu a saptawng tak chuan business an tih ang hi a ni , entrepreneurship an tih ang hi a kawk pha lo a ni. Innovative ideas lam aiin hlawk tumna rilru profit oriented nen bul tan a ni thin a, bul tan nan erawh sum lu a ngai!

2. In tih hmuh: Zo business hi intih hmuh kalchar atangin a lo chhuak a tih theih awm e. A hlawk a ni tih proved sa ngei kan bawh thin. Hmanah chuan sipai an luck a, a hnu leh ah chuan driver an luck leh a. Keini thangthar ho zingah chuan engineer leh doctor ten ngaihsan an hlawh ber awm e. Vanduaithlak takin zirna lamah hian kan thatchhe ve hrim hrim tih chu ka awih chiah loh avangin kan zirna kalphung (education system) dik loh ah puh ta I la. Ngaisang viau e ti lo chuan hna bul tan nan chuan thenawm te loan a lei taxi tangin sumo atangin truck leh JCB thlengin a niang chu kan intih hmuh a. A chhan chu, hnathawh kan tum lo va, thawh tir kan tum vang a ni.

3. Pawl din (association): Hei hi sum lu kan lo hmu a nih pawh in kan rahbi next a ni ve hrim hrim a. Damdawi zuar kan ni emaw mutia kan ni emaw union leh democracy inhmeh zia kan hrechiang ah ngai ta I la. Rei vak lo ah pawl kan din thuai thin. A nei ngah deuh an thu tlangpui.

4. Hlawkna (Profit): A tir atang a kan tum ber chu a hlawkna tel a ni a. Kan target hi nuai aia tlem lo time frame kum 2 a rei berah a ni tlang pui a. Kan target kan achieve loh chuan hlawhchham (failure) ah kan in ngai tlangpui a, kan bansan zui mai thin.

5. Bul tanna dang (another start up): Hlawh chham hi chu kan in ti duh chiah lo va. A aia hlawk dang ah kan pakai thuai thin. Tih hram hramna nun hi kan tlachham ve hrim hrim a tih theih awm e.

Zo-inflation ~ Kan sumdawnna leh thil man pun chhoh dan

1. Hlawkna hnar: Kut hnathawk hmusit tawk a lehkha kan zir sil avang leh sawrkar hna hlawk loh zia hre tawk a sikul kan kai ve avangin a chung a sumdawnna hi kan pan ta ruih ruih mai a. Chu chu hlawkna hnar a ni.

2. Sum awmzia: A tirah financer i hmu mai a. Loan i la thei ta. I duhthusam ang chuan i sum neih ang chuan bul i han tan ta tawng a. I sum puk chu rulh leh a ngaih avangin kum khat na ah sum hlutzia i hre chhuak ang. Hausa emaw i lo inti kha mawl i in ti hman hle ang.

3. Hlawkna lamtluang: Hei hi chu zirna rahchhuah a tih theih awm e. I tum ang in i bul tan chuan hlawkna a thlen ta si lo che a, sum I lo puk ve laklawh tawh bawk si a. Hlawkna tur I han ngaihtuah a, mahni mai a I duh ang i beih theih loh avangin pawl din i rawt ta a. i tih ang ti vet ho te kha sangawizawnpui tur i zawng hmu ta reng a ni.

4. Hlawkna kua chu: Pawl in han din ta a. In duh ang thalin in in lek thei ta, sawrkar nep zia in hre thawi ve laklawh tawh bawk si a ( A bul takah chuan i sumdawnna tan hma khan i tih ang ti ve/ mi tih ang i tih ve intih hmuh culture kha a chhan a ni tih i haider tlat taw hang) Supply-demand chungchang ka sawi dawn lo. In in hawr khawm tel tel a, market (sumdawnna) chu in monopolise (thuhnuaia dah) ta ngawt mai a. I hlawkna ngei turin in product/ service a chu a man in bithliah ta a. Sawrkar lah in rawlh hek suh, mipui lah a tur reng emaw tiin kuhva dawrah an phun liam mai mai tawh a ni.

5. Hlawkna kawng ping: Hei hi chu nakin hun tur a ni. I hlawk loh chhan kha pakhatna ah chuan i duham vang a ni a. A dawtah chuan illegal/ dan bak ni chiah si lo, unethical (mi hmuh a mawi zo lo) practice in thlatin sawm a pakhat pe chungin i la hawicham hle ang. I sumdawnna avanga midangin hlawkna an tel ve loh chuan long run ah chuan a bul tumtu zing a mi, hlawkna kawngkhar vengtu ang mai i ni ang. I sumdawnna dawr zo lo i hmu tam tual tual ang a, a tawpah nangmah chauhin i thil neih i chhiar i chhiar ang a. I sumdawnna chu a tawp tihna a ni ang.

Tlipna: Kan rilru kalsual nasat zia hi ka ti thin a. Hausat thut duhna rilru, sumdawn pawh short term kum2/ long term kum 5 aia thui hi kan melh ngai lo a tih theih awm e. Kum 2 chhung a ka hnathawh ah ka hausak loh chuan ka bansan leh mai thin.

Tin, a dawt lehah chuan hnathawh kan tum lo a, mi hna thawh tir kan tum a ni. Sum pukin lirthei kan lei a, dawr kan hawng a. A khalhtu tur leh nghaktu tur kan ruai zui nghal mai thin. Tam tak chuan kan sumdawnna hi kan hriatpui vak awm lo ve. A pawi ber a chu kan zarah thil man a to ta thin a ni. Khawkar kawng ah sumo za chuang a tlan a, market in a la pha chiah lo a ni. An tlan vek chuan phurh tur an hmu lo a, an in tlan chhawk a, an awl ni aiah a man an san mai a ni (State dang aia petrol leh diesel tlawmna ramah hian km khar chuan man a to feeeeeeeeeee a ni).

Mi ramah chuan competition a awm chuan thil ma a tlawm thin a. Keini chu competition hmingin mipui min rawk ta thin a ni. Service dang sa zuar an ni emaw cable tv min petu te an ni emaw kan thuhmun pet pet a tih theih awm e. Newspaper thleng hian a content ai chuan fakna ah kan buai zawk a ni.

Sawrkar lah hi a bengngawng nuih ve mai mai a. Income Tax i pe lo a ni thei e, indirect tax avang hian sahbawn sen i lei pawhin 4-12% chhiah i pe a ni. Thlakhatah cheng 1000 man thil i lei chuan chhiah cheng za chuang i chhung lut tihna a ni a. Sawrkar sum hmanna ah hian sawi i nei ve a ni, NLUP i dawng a nih pawhin i sum thawh thenkhat i dawng let mai a ni tih i hrethiam taw hang.

Hei mai a la ni hlei nem. Sumdawng hausa ten Aizawl khawpui lunlaiah Bangkok bungrua ual au takin an zuar a, an chhiah pek hi chhui zui an ngam an gem! Kan economy heti khawp a a than lai hian kan chhiah chhun luh a va tlem si ve kan tih chuan sumdawng ten Aizawlah chhiah an lo pe lawk a (way bill an ti em ni), ABC velin emaw an rawn phur hawng a. Vairengte ah lo check ve mahse way bill an neih miau avangin an chhuah leh mai a. Cheng nuai 10 man la se, nuai khat man siam si se la, nuai khat man chhiah an chawi a a dang zawng chu help hlang a ni. Nang leh keiin bungrua a chhiah kan lo pek ve hi a in karah a boral then thin bawk a ni. VAT an introduced tan tirh khan Vairengte check gate ah hian min check uluk thei khawp mai a, way bill nei chu an tlang par par mai a. Sumo a kan zing a chuang ve neih zawng zawng a risk la kan tih ang chi sing hnih/ khat man erawh an lo man sak lawi a… a va han rapthlak em!

A hausa an hausa thur thur a, a rethei kan rethei tawlh tawlh a. Tu dang vang a ni hlei nem, keimah ni vang vek a ni! Sawrkar hi i mawhpuh tawh lo ang u ….

Similar Posts:

Recent Posts:

20 Responses to “Zo-business model leh Zo-inflation (Dichotomy of Zo- culture and economy)”

  1. 1
    Saitawk Says:

    Ngaihnawm mange! ka lut khat ta hle mai.

    Report this comment

  2. 2
    SHauzelSailo Says:

    Ziak thra thlerh thlawrh hle mai. (Y)
    Mipui te hi fing ila trangrual bawk ila a te a lian tan – ‘pakhat zavai tan, zavia pakhat tan’ tih angin), sawrkar thra siam tur erawh kan ni e. (Y)

    Report this comment

  3. 3
    caribou Says:

    Ziak tha lutuk. Hei lo liama thuziak tha a awm thei chuang dawn em ni?

    Report this comment

  4. 4
    chhana Says:

    A dik hle mai, ngaihtuahna a ti thui.

    Report this comment

  5. 5
    Chemtatrawta Says:

    Dichotomy of zo economy and????

    Rinawmna leh sumdawnna hi kalkawp tlat sela a hlawhtling thin a. Juda ho hian a pung lovin sum an puktir a, Bible a ziak angin, an sumdawnna a hlawk em em tho mai. Mizote’n kan tlakchham ber a ni bawk si.

    Report this comment

  6. 6
    Awmtea Leo Khiangte Says:

    Dik hlawm khawp mai.

    Report this comment

  7. 7
    VaiVa Says:

    @chemtatrawta, dichotomy of Zo(culture)and economy ??? ;-)

    Report this comment

  8. 8
    sheldon Says:

    I thlir zau kim. Post puitling tak ani. I hna atangin bang la politics khel teh, vision nei tha kan ti ang che.

    Report this comment

  9. 9
    Jennifer Lo Says:

    mawi a politics chu khel duh miah suh, a uih ltk rih :D
    engemaw hlek zawng zawng deuhthaw, ‘kei ka ni’ inti thei chin ve ka lo ngaihsan rilruk ve em em thrin ten a tawpah politics kawng an kal leh nulh thrin hi chu ka va… (W) thrin tak emm!!
    sumdawng chu sumdawng mai rawhse contractor poh contractor ni mai rawhse khawvel huap a sumdawnna/contract anmelh phalo a nih pon india ram huap tal hi melh chho se kan ram leh hnam tan a chhuanawm, ‘saw sumdawng hausa tak saw jewish a ni kherlo,mizo a nih saw’ emaw ‘helai project lian ltk hna thratak a thawk zo tu hi mizo contractor a nih hi’ tih hun hi ka nghakhlel ltk, chutiang ni pha reng tur te hian angganwadi ka hawng e, khawnvartui diltu ka recommend e, chumi transfer chu…chumi step rem chu lo insem ru…etc ti mai mai hian an kur bo thrin hi a pawi ltk

    Report this comment

  10. 10
    boihapa Says:

    Vaiva hi chu pha lo list -ah pawh kan dah phal hleinem hahaha…

    Post tha e. Ka inhlan e.

    Report this comment

  11. 11
    malsta27 Says:

    va tha e ziak simple thiam khawp mai a………..

    Report this comment

  12. 12
    ulawng Says:

    Tha (Y)

    Report this comment

  13. 13
    VaiVa Says:

    In va ti lawmawm hlawm ve aw… hei hi ka politics ve a ni e :) Kan mithiam ho an tawmin vek sia, cho chhuah nan ka rawn ti ve a nih hi

    Report this comment

  14. 14
    whotalk Says:

    Mizo sumdawng reng2 hi that chhe sumdawng(hnathawh peih loh vang) an ni tlangpui. Profit maximization bak kan thlir phak lo. Business entrepeneur ho chuan Wealth miximization theory in hma an la thin. Business te hi a zir a zir tham a awm a. Kan zoram a sumdawng ho chu zirlo an ni tlang pui. Consumer tan an hnawk sak monopopy business a nih tlangpui vek vang in. Mi sumdawng na hlawk sa hriat vang a bul tan kan ni tlang pui a. innovative, changes ( i will do it differently) a awm lo.

    Report this comment

  15. 15
    Ruata 4 Cabin Says:

    A tha hle ma! model a nih chuan a tih dan tur leh kalphung tur vel sawi tam deuh la ka lo ti deuh a, tuna kan kalphung leh tih dan atang hian kan tih dan tur lam han tam deuh se. Profit kan maximize theih dan tur te.

    Kan Pi leh Pute ECONOMY kha economy tha tak niin ka hre thin. Marx te mumang ram, Communist atanga Socialism ram te pawh kha a ang ka tia, a ang ka tihna chhan chu khawtlanga lakluh inthlauh avanga intluk tlan lohna a awm mang lo ta kha a nia. Bakah an economy kha intodelh economy kha a ni tawp maia. Tha tak a ni.

    Zo-inflation bikah khi chuan inflation dan pangngai angin kan economy pawh hi Demand-pull leh cost-push avanga inflation hi awm ve tho niin ka ngai. Deman-pull bikah hi chuan kan intodelh loh avangte hi a ni pakahta. Kan economy angah te hi chuan Says dan an tih mai Says Law of market te kha a la dik thei lutuka, a chhan chu Supply a awm chuan demand a awm mai dawna, chu chuan thil man chu a thunun mai turah a rin theih. Developing economy mai kan ni bawka.

    Report this comment

  16. 16
    VaiVa Says:

    Zo pa chhutdan ka tih kha, market driven economy lam pangah chuan ka hre thui ve em lo a nia, factors chi hrang hrang zing a zo-inflation zia ka rawn pho lang mai a ni. Mithiam zawkte kaihharh nan, mi nawlpui ten kan lo hriatthiam ve a, kan lo chhut nawn ve nan a ka tih a ni a. Tan han la teh u, a thiam lo zawkin kan ziak fo mai :)

    Report this comment

  17. 17
    suaka Says:

    A dik khawp mai. Mahse phun lungawi hi kan zavai hian kan thanhnan tlat tawh a. A bangbo thlak khawp mai…

    Report this comment

  18. 18
    maawma Says:

    Ngaihnawm hle mai. Kan sumdawn pui te ah hian JAIN, AGARWAL leh Marwari ho te hi an awm nuk hlawm a, chuta an sawi thin chu “sumdawnna hi BCom/MCom/MBA zir zawh lam a ni lo, family ah a in tan tawh daih tawh” an ti mai a. Laws of supply and demand, inflation emaw statistical data tih vel atangin an chhut ve vak vak lo, an la kal ngai na miah loh market ah hian va hung tawrh i la, dam khaw chhuah pui na tur sumdawnna hi an rawn hmu chhuak ngei ngei ringawt mai ni, chutiang khawp chuan market ah hian an fing a ni. JAIN ho ngat phei chu tunah pawh INDIA ah hian richest community an ni hial a ni. An entawn tlak na em em chu an ui kawm a, an in chhut peih em em bawk, account an vawng fel peih, business partner in bum te hi an ti ngai lo. Lo hlep tha deuh se, an hmang ve huau huau lo Mizo angin. Sumdawnna reng reng ROI(Return on Investment) atangin an chhut vek peih. Short term atan an thlir ngai lo a, Long term hlir in an thlir thin. Sumdawnna chu sumdawn pui te Rinna leh thawhho thatna ah a in nghat (Trust & cooperation) tih hi an chang vawn tawp mai a ni. Chuan ui kawm viau e ti lo chuan an MONEY MINDED ngai miah lo, a awmzia chu sum duh luat vanga midang pawh bum hreh lohna hi an nei lo, heng an quality tam tak hi institution atanga zir chhuah chi a ni lo, chhung kaw inrelbawl danah a in tan daih tawh an tih chu le. Bengali pa tak ngial pawhin JAIN chu “an vai deuh thaw hian sum leh pai ah an rin tlak zu han ti thlawt a”.

    MVAT leh Waybill chung chang ah khi chuan Taxation lam atanga VATSOFT an hman hnu hian, Organised business ah chuan waybill alang zat leh invoice zat hi a in an ngei ngei a ngai tawh. Waybill a tih lan tlem a, invoice theh luh loh kha a theih loh a ni, CFORM dil dawn ah thil lan tel ngei ngei a ngai tho. Mahse raw material import eg khawlla puan tahna tur, aluminium, steel sheet etc etc lam ah hi chuan ka hre chiah lo, theh luh kim loh chu a theih mai theih. Chuan China leh Bangkok atanga thawmhnaw ah hian waybill an hman awm pawh ka hre chiah lo, an ti kual vel mai mai ni hian ka hria.

    Report this comment

  19. 19
    maawma Says:

    Sumdawnna chung chang ah chuan thil pawimawh lutuk mai chu hei hi a ni. Sumdawnna a invest tur, Finance lamah engmah harsat na pawh awm lo sawm sarih rawh se, Business Location tha lutuk pawh ni se, company tha eltiang “tie up” pui a sumdawn pui tur pawh ni raw sek sek. Sumdawnna ah hma la tu tur ber pawh eng anga thiam pawh ni rawh se, economic theory chi hran hran ziak kur ngiau nguau a thiam pawh ni rawh se. Hei te hi a pawimawh a nia aw RILRU DIK PU MI NIH LEH PATHIAN BEL BUL MI nih a ngai, chutiang mi nih loh chuan a hmui ngil theih loh. TAWP CHIN A AWM. Bible in “Lalpan in a sak loh chuan a thawk tu te chu an thawk rim thlawn mai a ni” a lo ti a ni. Hemi lai hi JAIN ho pawh hian an hmu chiang lutuk, an nun an fimkhur em em, sum tam tak aiin nun kawng dik zawk an thlang zawk zel, “sum chuan a rawn um mai” an ti thin.

    Report this comment

  20. 20
    VaiVa Says:

    @maawma #18&19, A va han lawmawm ve aw! I sawi hi ka ring khawp mai (Y)

    Report this comment