Pu Buka thlahrang

May 8th, 2013 6:00 pm by LaMea CâcTùs FLh

A vawi 3 na ani ta,kan bang chu a rawn ri leh bup a,tuntum phei chu a hma zawng aiin a na in kan bangchhak a,ka nu in damdawi bur leh a dumbur a rem te chu a tla chum chum a. Kan tlum ber Tea, mu tura tuibur hmuamda awm vela phei tawh pawh chu thlaphang taka choka a tap bula kan meilum aina lamah chuan rawn tlan pheiin, tap aw tuauin,

“A pa ka hlau”

“e, mamte hlau re re suh”

ti a,ka Pa , a tlangval lai pawha tlangval huaisena sawi leh kan khaw bul lui, a li thuk lai huai neia an sawi pawh, khaw mipui ten an hlauhna a reh phah ang tih avanga a mawng thleng zu liluh ngam ngat leh Pu Zakiama, Savawm ina a seh pawh thing bung nen chauha chhan ngamtu chuan a han hnem a. Chutah, hmeichhia tih takah ka Nu lah pek chuan fate thlabara an awmlai ani e tih pawh dâwnlo ni awm takin, aw pha dui leh khur deuh dar dar chuan,

“Pu Buka thlahrang aniang a” a han ti chu ka Pa’n a melh rum teh e.

Nia, sawi awmloh tak nimahse ka Nu ina a sawi “Buka thlahrang” chu kan rilru ah a awm vek tho áwm e, tunlai kawngkam leh fehna ah pawh kan khaw titi ber ani si a. Pu.Buka kan tih hi kan khaw tlangau thin niin, pa upa lam, amaha awm leh fiamthu duhtak ani a. Thla 3 vel liamta mai khan a awmna chin hriat leh chhui theih miah lova boin khawtlang pawh kan phek buai nasa a, amah lah mite ngaihnat alo ni nen, Mizo dana ni 7 ngawt kan zawn hnu pawh chuan kan hmu lova, kan hmulo mai pawh anilo, hnu chhui zui na tur leh rinhlelh awm tur pawh kan hriat belh hauhlo. Kan khua a lianlo nen, khawtlang kan hahin khua a ngui a, ni 4 kan zawn belh hnuah tlangval ho la tlawmngai mah ila, val upa te rawtna angin a vuina kan nei ta a. Pu Buka chanchin chuan kan khua reitak cham chilhin a reh dawnta maw tihah boruak dang a awm leh ta. Khatia kan khua mai nilo kan khaw pumina kan khaw ram zawng zawng uluk taka kan dap hnu pawha kan hmuh loh chu kan khaw tuikhur mual ah Pu Sapliana te bawngpu, Tapana kan tih chuan ruang pakhat, tawih chhe tawh tak a hmu a.Ruang bulah chuan hreipui a awm a,chu hreipui chu Pu Buka ta anih thu leh amah ngei pawhin vawi tam a hawhsak thu a thenawmpa Pu Sawian a sawi avang chuan ruang pawh chu nemngheh ani tain vui that leh ani ta a.

Thu a tam a, Pu Buka khawngaihthlak zia chu mitin titi a niin,sawi a tam a, a then chuan a bo hma lawk khan,a hma pawha a ina mikhual fo Burma 2 an thlen thu leh khami te kha an rinhlelh thu an sawi nasa hle bawk. Mahse, sawi a tam tual tual a, Pu.Buka ruang(?) an hmuh hnu chuan sawi dang a awm chho ta. A thla a hran thu sawi a tam tain, kan khua a,Burma mi kum tam awm tawh leh thingzaia inhlawh thin Liana phei chuan lengkir mualah chiang taka a hmuh thu sawiin ani phei chu a hlau lutuk ania nge, ni 6 chuang khumbet leh khawsik sang takin a damloh phah nghe nghe. Heiloh pawh a thawm hria, a thla hmu tih leh a dang sawi tur a tamin, Pu Thangliana te bawng la 2 thi ringawt pawh Pu Buka thlahrang tih nia sawi a tam a, hetih vel avang ani, tunlai kan khaw boruak a muang loin, mitin thinthi a awm kan awmlo.

Chuvang ani, ka Nu thusawi pawh chu a hunloh a, mintih thlabar ni. Chutia, ka Nu ina a sawi tak vang nge ni, Mami pawhin a hma lawka, a bialpa nena kan serhuana an kal thu ka pa te hnena ka sawi avanga min tum khum bur bur pawh chuan mi rawn hnaih ang sur sur a.

Ka Pa chuan “Mama” a han ti a, a rilru a a sawi tum chu ka hai lo. An khum lu a an dah , a roh em em a torchlight cell 5 ngat chu va la in. Ka khum lu a ka tun , kar hmasa lawka “Sih muala” sazuk pachal ka kahna ka ulhbun leh a mu chu ka la nghal bawk a. Ka Pa pawh chuan thawh pahin bangchhaka a chempui a thiah a la a, ka chhungte hlauh avanga ngawi daka min lo entu lamchu ka han hawi let a, keipawh chuan ka hlaulo ti ila dawt ka sawi áwm e, ka tirilah ka khur tlat.

Sana ka han ena,dar 8 lek mahni nise tun ni 3 kalta vel atanga khua a chêng avang leh tunah pawh current a awmlo nen, ruah a sur seng sengin kan khua leh kawt vel pawh a rehin,mi kal thawm hriattur pawh an awmlo.

Ka Ulhbunah chuan a mu ka han thun a,ka pa chuan torchlight chu ti engin, a kut ding lam,a chem humna lam chuan kawngkhar a han nawr hawng a. Pawn boruak vawt chuan hmai a rawn theh nghal thak a. Chutah thawm awmna lam chu ka pa chuan a sihdet chuan a han chhun a, keilah ka inring. Mahse,kan rin ang anilo, chutia ka pa in a han chhun chuan kei pawh ka silai chu hmeh ringin ka pa chhunna lam tur ka tin sa a. Mahse thawm awmna zawn lamah chuan, thlahrang reng alo awmlo. A awm chhun chu thenawmte Kelpa chal, a ki er tun tawh, a thlunna hrui nen ngei mai ani. Chutia,kan thawm a hriat phei chuan ala be al al zui. A thlunna a phelh a, a thim nen kan in lamah rawn tlanin kan bang a rawn su alo niawm e. Huaisenna sáwm khawma Pu Buka thlahrang beih tum khan,

“Ka Pa Hming, in kel thlun a chhuak ania” tiin ka au ta zawk a

Similar Posts:

Recent Posts:

13 Responses to “Pu Buka thlahrang”

  1. 1
    Pakak Says:

    chh1ar khur der der ang aw

    Report this comment

  2. 2
    sheldon Says:

    Lamea, thlahrang lampang hi chuan min ko lo :-[

    Report this comment

  3. 3
    caribou Says:

    A ngaihnawm, a hlauhawm, mahse a tawpna hi….

    Report this comment

  4. 4
    PKfanai Says:

    A ngaihnawm hle mai. “Hmanlaia Thlahrang an tih thin kha, mihuaisente finfiah dawl an awm ngai lo” tiin ka nuin min hrilh thin. Ka dawih viau na a, Thlahrang hi pakhat mah ka la hmu lo a, a thawm leh a rim a ra pawh ka la hre lo.

    Report this comment

  5. 5
    CFL Says:

    Va ngaihnawm kher e

    Report this comment

  6. 6
    chhana hlawnchhing Says:

    chhiar a nuam in a hrang tan dawn chauh emaw tih ah kel ah a chhuak daih a…. Mahse hemi in a min zirtir nia ka rilru a lang chu thil hi finfiah hmasa phawt rawh tih a ni e…

    Report this comment

  7. 7
    Dr John Says:

    (Y) Ngaihnawm hle mai.

    Pianthar hma khan (kan mit-vai a nih loh chuan)… hla deuh atangin thla (a hrang lem lo) ka hmu ve tawh a. Nula motor accident-a thi a ni nghe nghe a, a chhungte an awm hnai em a, a hming leh thilthleng chanchin chu ka sawi lo mai ang. Hriatchian tak-te a ni bawk a, a rapawm ve ang reng khawp mai. He accident ah hian mi engemaw zat an thi a, a rapthlak em em a. A khawchhungin hun engemaw chen chu ‘an thawm’ hi kan buaipui hle a ni. Kan hlau lutuk lem lo na a, a nuam lo khawp mai.

    Rawngbawla ka luh hnu daih, kum 6/7 vel kal taah khan, Ramhuai-pai kan hnawhchhuahnaah, zanah khawchhung lunlaiah, in chhungah leh pawnlam bangah, ‘thawm mak tak leh rim na tak’ kan hre bawk! Ramhuai-ho thiltih leh chet dan hi a mak thei hle a ni.

    Tleirawl chhuah-tirh chuan “Thlanmuala Mei-thingthu Dah Ngam” zingah ka tel ve a, Ramhuai leh thlahrang lam hi ka hmu ngai lova, Thlanah pawh ka hmu hauh lo thung!

    Report this comment

  8. 8
    Awmtea Leo Khiangte Says:

    Rin loh lam deuhah min keuh thlukpui daih mai ka ti.

    Report this comment

  9. 9
    Maverick13 Says:

    Ngaihnawm ve mawle….rinloh deuhin a tawp daih a… ‘min lo nuih khum vur2 a’ tih lampang nih duh hmel viau sin le :)

    Report this comment

  10. 10
    chhana Says:

    2008 chawhnu lam atang khan he site hi regular takin ka chhiar thin. Engemaw remchan loh avanga chawlhkar khat chuang internet awm loh naa ka awm paw’n a hnuah ka enlet leh vek thin tho. Mahse, thlahrang lam hi chuan nunphung a tih khaihlak leh thin avangin ka chhiar sak lo mai ang che. sethiams

    Report this comment

  11. 11
    LaMea CâcTùs FLh Says:

    Chhana, :-) chhiar ve hrim2 la.

    Report this comment

  12. 12
    SHauzelSailo Says:

    Min ti nui nasa teuh khawp mai haha, ziak thiam hle mai (Y)

    Prejudice an ti emawni, ‘ngaihdan lawk fiah leh dik si lo kan neih hian ani mihring min ti buai thrin ni,’ tih kan zir chhuak thei.

    He ngaihdan lawk fiah leh dik si lo vang hian min tihbuai loh nan thil dang poh ani thei tiin ka ngaihtuah thrin.

    Report this comment

  13. 13
    norton internet security 2014 keygen Says:

    norton internet security 2014 keygen

    Pu Buka thlahrang | mi(sual).com

    Report this comment