Ka chenna ram thlaler a ni.

May 5th, 2013 5:00 am by PKfanai

Vawiin chu Mizo hlaphuahtute zinga ngaihsanawm ka tih em em Pi Lalruali leh a hlaphuah “Ka Chenna ram thlaler a ni Lalpa” tih hi I han en ve leh thuak thung teh ang aw.

Pi Lalruali hi Kum 1924 February ni 13 khan Sihfa khuaah a lo piang a. Naupanlai atanga mi hlim thei tak leh rual pawl thiam tak a ni a. Lehkha pawh thiam thei ang reng tak anih avangin 1936 khan Pawlthum Scholarship hmu phak ngei turin a bei a; mahse January thlaah a khup a lo na a, a vung a, a khuate a sik a, a khum bet chu ani ta reng mai a.

A natna lah chu, Doctor ten an han enchian chuan ‘ruhnget’ chi a lo ni lehnghal a, Durtlang Damdawiinah a kuma kum tam enkawl ani chung pawhin a dam tha tak tak thei lo a, Wheel Chair a hman deuh reng alo ngai ta a ni. Chutiang chuan, Pian tirha naupang hrisel leh harhvang tak ni si chu, ke nei reng chunga kal theilo, Wheel chair-a thut deuh reng ngai leh midangte bawihsawm ngai renga a awm chung pawh chuan, a thlarau nun erawh chu hrisel tha pangai tak ani reng thei tho a ni.

A vanduaina belhchhah turin, kum 1958 khan, Synod Dispensary Sihfaa a awm laiin a Lung lam tha lo avangin a tawngthei lo leh ta tlat mai a. Pathian hnenah, “Lalpa, hla min pe la, a satu apiang ka sawi ai sawitu-ah ka ngai tang e,” tiin a dil a; tichuan he hla hi a lo dawng ta a ni. A thluk hi Pu Rokunga siamsak a ni.

Khatia naupang harhvang, infiam nuam timi tak leh thenrual kawm thiam leh rualpawl naum ti tak ni thin kha, natna tihbaiawm tak mai, ‘ruh nget’ natnain a han tlakbuak a, kal thei lo leh infiam thei lo a awmin, pawna a thiante sikul kal leh infiam thawmte a han hmuh leh hriat chang te chuan, chutia Damdawiin khuma midang tanpui ngaia bawksawp ta reng mai nun chu, Mizoten chenna atana hmun hrehawm leh nuam lo ber mai nia kan hriat, tui awmlohna, ni sa rum rut hnuaia vaivut sa vur mai hlir hmuh tur awm, ‘Thlaler’ nen a tehkhin a, Buaina chhumpui chu a lo zing tup tup a, a Lalpa hmel an hliah bo fo thin a ni. Nimahsela, Lal Davida angin, chung tiang hun alo thlen pawhin, beidawnga vakbo mai lovin,

“Lalpa I hnena awm reng ka duh” a ti lawm lawm mai a ni.”

A lungngaih thawpik vawrtawpah pawh, Gethsemani huana a Lalpa Isua Lungngai vawrtawpa a tawngtai kha a hrechhuak a, a Lalpa hnung chu zui ve niin a in hria a, a Lalpa duhtak tanpuina a au ngawih ngawih mai a ni.

A Lalpa hnenah a tawngtai ngat ngat a, a chhanna aw nem a nghak reng a, a Lalpa duhtak Thlamuanna ‘Aw’ chu a ngaichang reng a, chu a thil nghah chu a hmu ta ni ngei tur a ni, chang thumna leh chang li naah chuan a thusawi ki a lo dang ta a.

Chutiang buaina leh Lungngaihna chhum ten an chim a, a khawvel a thim khup lai chuan, Chhum kara ni eng mawi tak lo lang angin Lalpa thu chuan a thinlung thim chu a rawn chhun eng ta raih mai le. Chutah zet chuan a tawrhna leh vanduaina lam en tawh lovin, Kalvari-a Hmangaihna rawn inpuang chhuak chanchin kha hrilh darh alo duh ta a, chumi ti thei tur chuan, a Lalpa tanpuina lo chuan atan tihrual ani lo tih a hria a, a Lalpa tanpuina chu a au ngawih ngawih mai a ni.

A Lalpa chuan awmpui rengin, a aw mawi tak pawh hre thin mahse, mihring lam chanah chuan, Nulaa pumpa, Wheel chair leh khuma tal tak reng mai chu, a hrehawm na chin a awm lo thei si lo. Nimahsela:-

“Hrehawm mahse I ta ka ni Lalpa,
I tan nung turin min pui la;
Ka hun zawng I tana hman ka duh,
I tan chauh min tithianghlim ang che.”

tiin a tawp a khar thlap a ni.

Thu belh: Pi Lalruali hi kum 2001 September ni 3 khan Lalpa hnenah a lo chawl ta a. Kum 1996 a Aizawl a B.Ed ka training lai khan, Mizo Academy of Letters ho buatsaih program-ah ka hmu ve hlauh mai a, Vannei ka inti hle a ni. Vanapa Hall-ah he hla a phuah chung chang hi an zawt a, a ngaihnawm ka tiin, ka rilru a hneh tak meuh mai a, Wheel Chair-ah a thu a, a sam a tuak var vek tawh a, Mi thianghlim zahawm tak, Mother Teressa ang maiin ka hmu a ni.

Similar Posts:

Recent Posts:

15 Responses to “Ka chenna ram thlaler a ni.”

  1. 1
    PKfanai Says:

    Sap hlaphuah thiam leh an hlaphuah hlir sawi chu, Pu HSa leh Pu Rinzova ten, “Sap hlir in sawi, mizo pawh an awm ve tho si a” an tih ka hlau thawng deuh a. Mahse, Rev Vanlalnghaka thu khawchang ang deuhin, Local lutuk chu kan lo ngaisang vak lo ava ang ve? sap hlir kan sawi tawh dawn em ni ang? ;-(

    Report this comment

  2. 2
    Chhuaklinga Says:

    A bengvarthlak hle mai. Kan KTP vanglai khan kan sa nasa thin khawp mai. Lung a ti lengin a phuah chhan/dan han hriat phei chuan min hneh hle mai.

    Ruh nget sawi takah chuan a va vanduai ve aw. Ka nu pawh hi Pi Lalruali ang hian a primary sikul kal lai ve thoin a ngal ruh a nget a, kum enge maw chen khumah hun a hman hnuin a kal leh thei ta hlauh a, tunthleng hian a khat tawkin a ruh pan sawr bawl hi kan la paih tir fo mai. A na a chhuah chang chuan a buaithlak thin khawp mai. Pi Lalruali dinhmun tur hi hrethiam viauin ka inhria, ka khawngaiha mahse a vanduaina Pathian hmuh tirtu a ni hi ka lawmpui hle mai. A khawvel nun chu hreawm hle mahse thlarau nun chu a awhawm hle mai.

    Report this comment

  3. 3
    vakul Says:

    Ngaihnawm hle mai. Pi Lalruali i ka hmuh tum khan kan titi dun a, tleirawl harh rual lek ka ni a, ka phak tawka min titipui a thiam hle. Pi Lalruali a ni tih erawh ka hre lo. Kan chhuah hnuah chauh ka hre hnuhnawh ta a ni.

    A hlate hi ka duh em em vek mai. Pu PK iti tha e.

    Report this comment

  4. 4
    VL Hminga Says:

    A hlaphuah pakhat zawk HNEH THEIH LOH NUN tih phei kha chu sap hla thu ho ai hian a ropui lohna ka hre bik lo. Ka tawntai ngaithla la ka dil malsawm ang che…a ropui khawp mai. Mahni inhlanna( Devotion) tak tak atang a lo piangchhuak a ni theiin ka ring. A tih theih tlem hle in inhre mahse a aia Mizo Kristian nun chawm na ah thawk nasa an awm kher lo ang, a thawh ropui hle a ni.

    Report this comment

  5. 5
    XaiA Says:

    A hla thu hi a tha thei em a sin…

    Report this comment

  6. 6
    Awmtea Leo Khiangte Says:

    A tha hle mai. (Y)

    Report this comment

  7. 7
    Terema Chhakchhuak Says:

    Pathian rawngbawl hi a lo har a ni ang e, Pi Lalruali pawhin, “Hneh theih loh nun ka nei,” ti mah se a hnuah chuan, “Bo hmang ka ni, aw ka Lalpa, keimah mai chuan ka kal thiam lo,” a ti leh tho a ni. Pi Lalruali chanchin leh a hla phuah ziahna bu ‘Thlaler Nula’ tih Dr. Laltluangliana Khiangte pawhin a buatsaih tak kha maw le. (Ka la chhiar bik hauh chuang law)

    Report this comment

  8. 8
    Sihtea Says:

    Pi Lalruali hi ka ngai sang khawp mai.
    A hla phuah ho hi a thu a tha in,
    sak nuam tak nung tak an ni hlawm a.
    Pathian pawh in, kei mah bik ah hi chuan, min pawl nan a hmang thin.
    Pu Pka chawlh ni hman rawn ti nuam zel rawh.

    Report this comment

  9. 9
    chhana Says:

    A lo tawng theilo a ni maw? Mahse, hei, comment lamah in ti ti pui thute in ziak leh lawi bawk sia.

    Report this comment

  10. 10
    PKfanai Says:

    @Chhana, Pi Lalruali hi a tawng theih lo hlen lo a lawm. @Terema, ‘Thlaler nula’ chu chhiar a va chakawm ve aw, neih dan dap ve leh teh ang. Pi Lalruali nun hi indona ropui tak chu ani chiang mai, mahse ‘hneh theih loh nun’ kha a nei tlat a.

    Report this comment

  11. 11
    sheldon Says:

    Pu Pka chu i rawn chhawpchhuak tha thei thin ngei mai. He hla thu hi chu sermon ropui tak a tling. A phuahtu lam hi ka lo ngaihtuah ngai miah lova, a bengvarthlak e (Y)

    Report this comment

  12. 12
    lr hlonchhing Says:

    A bengvarthlak hle mai.

    Report this comment

  13. 13
    bbney Says:

    Keimahah chuan ‘Hneh theih loh nun’ kha a hit zawk mah, high school-ah khan kan zirlaibuah a awm thin. Mahse he hla pawh hi hla ropui tak a niin ka hria.

    Report this comment

  14. 14
    H.Vangchhia Says:

    Tha e (Y)

    Report this comment

  15. 15
    Dr John Says:

    (Y) Pi Lalruali hlaphuah ho hi chu a ‘thiltawn leh thlarau atanga a phuah’ an nih hlawm avangin a tha hi ka tiin, ka rilru a hneh hlawm khawp mai. Amah belhchian a dawl bawk sia… Gud post Pu Pk…

    Report this comment