Aw Zoram, harh rawh; harh lul rawh!

May 4th, 2013 11:40 pm by TuaiSialA

T. Zorampela hla phuah ‘Duhaisam (Zoram ngaih hla)’ hi chuan ka nâk a zen thlawt a ni!

Chhaktiang kawlrawnah hian leng mah ila,
I sakhming sawi reng kan bang thei si lo,
Ka pian ka seilenna ram tiin,
Dawn lungrukah nghilhni i awm thei lo.

Hmun danga awm, a bikin Burma rama kan unau, Mizo em emte’na Mizoram an ngaihzia hi aw… An awmna atangin anmahni chawr chhuahna tiin chhuang em emin an sawi thin a, a chanchin an ngaihven a, an sawi thin. Programme leh thil dang dang an buatsaih pawhin Kawl zaithiam leh Kawl fiamthu thiam an sawm ngai lo, Mizo zaithiam te, Mizo fiamthu thiamte an rawn sawm vang vang thin. Mizoram-a kalna remchang an zawng reng thin a, zaithiam leh midang dang pawhin hun remchang an hmuh chuan an hna dang kalsanin Mizoram an rawn pan thin; mahse, kan lo hmusit si.

Aw, Zoram ka ngai em a che.
Nang lo chuan lawm a kim thei lo,
Dar ang tawn leh ni her chhuak thuai se,
Thinlai damten len ve maw ka nuam e.

Zoram hi an ngai ngawih ngawih a ni. He a thunawn hian Pu Rosangliana ‘Zoram Ngaih Hla’ min hriatchhuahtir ziah lehnghal. Keini a ram chhunga awm zawkte hian Zoram nawmzia leh thlakhlelhawmzia hi kan hrethiam si lo va, hmun dang daiha kan unau awmte’n Zoram hlutzia hriain an rawn au vawn vawn zawk zawk thin a; mahse, kan lo hmusit si.

Kan ram kan hnam lo san zelna turin,
Kan nun kan neih kan chakna zawng hlanin,
Lungngaih mangan buaina let zel te,
I tan hlimten ka lo dodai zel thin.

Mizoram-ah an khawsa lo, mahse, Mizo an ni. He an nihnaah hian an chiang em em a, Mizo an nih avangin Mizote chenna Mizoram hi an ramah an pawm hmiah mai a ni. Kan thiam an theih an finna zawng zawngin Mizoram an chawimawi a, Mizoram nawmzia te hla-ah an chawi a, an phuah a, khawvel hriatah an puang chhuak thin. Mzo an nihna kawnga harsatna an tawh pawhin ram leh hnam tan tiin chhel takin an tuar a, an dodai thin. Kan ram leh hnam hmasawn nan theihtawp an chhuah a, hmun hrang hranga an inzarpharhna hmunah pawh ‘MIZO’ chu an tilang thin a, thu leh hlaah an chawi kur ngiai nguai thin; mahse, kan lo hmusit si.

Mahse, vangkhua leta fan leh ni chuan,
I chhunga lungduh unaufa leng zawngten,
Khawchhak mi tia hming min selin,
Sirah damten puan ang min lo hnawl e.

He hla chang hian min tihrehawm ngawih ngawih a; he hlaa ‘chang sakei’ ka ti hial, mahse dawt a ni hauh si lo. ‘Kan ram’ tia an lo chhuan ve ngawih ngawih thin tlawha an lo ‘zin’ chang hian a chhunga chengte hian hmuhsitna kawng hrang hrangin kan lo lantir a. Mizo kan ti duh lo, BURMA MI kan ti thin. He kan ram hi an intineitu em em a, an lo kal chang pawhin ‘zin’ an ti lo va, ‘let’ an inti hial a ni. Mahse, keini chuan, kan unaute hi khawchhak thil hrim hrim huat phah nan kan hmang ta zawk hlauh si. Aw Zoram, harh lul rawh! Kan ram kan hnam chawisangtute hian min zahpui lo. Mahse, keini zawk erawh chu Burma thil fak leh chawimawi te, Burma thil neih te, Burma hming sawi hrim hrim pawhin ‘I va Burma ve!’ kan inti mai thin. Zoram ngaia rumte hian Zoram hi an thlahlel ngawih ngawih a, kan lo hmusit chung chung pawhin hun remchang an neih chuan an rawn tlawh hram hram thin; mahse, kan lo hmusit si.

Aw, a na tuar thiam zawng a har,
Hrilh ka hai, lunglam ka lo vai,
I tan ka tuarna leh hlim ni te,
Zantiang tawnmang mawl mai an chang zo ta.

Kan hmuhsitna thil tih leh tawngkam zozaite hi an hre ve tho, an hai bik lo. Hrehawm ti takin an tuar tlawk tlawk thin. Zoram leh hnam tana an tawrhna leh thawhna zawng zawngte hi kan hmuh hmaih lui a, kan hre duh si lo. An tan chuan a na thlawt a ni. An ram ngeia an lo let leh chang hian hrilhhai leh zak, lungngaiin kan lo siam thin a nih si hi. Ngaihtuah teh, a nâ asin. Zalen leh ngaihngam taka len ve an châk a, Mizoram-a an awm loh lai, Burma-a an khawsak lai takngial pawhin tawngkam na tak takin kan umzui tawk tawk thin. Anni erawh chuan Zoram ngaih an bang chuang lo va, an thinlung hi MIZORAM a la ni tho tho thin; mahse, kan lo hmusit si.

Ramtin kiltina Zofate zawng hian,
Suihlung ruala thinlung hmunkhat puin,
Hmangaihnaa insuihkhawm zel hi,
Kei ka lungkham leh DUHAISAM a ni.

Hnama chiang chu kan hmuhsit Burma-a Mizo awmte hi an ni. Mizoram-a Mizo awmte zingah hnama chiang hi an va tam lo em! Tunge mahni unaute hmusit ngai? Kan unaute chu an chan a chhiat em em lai te, mangang leh hrehawma an rum laite hian kan tanpui zawk tur a ni lo’m ni? Khawvel danah foreigner an ni a ni mai thei, kan thinlungah erawh unau kan ni a, foreigner a awm lo. Mahse, keini zawng khawvel mi kan ni si a, inpumkhatna tichhetu zawkah kan la tang zawk zel a. Chuti chung chuan, thu leh hla hmangin inpumkhatna thu an la rawn au chhuahpui tawk tawk a, Zoram tana an duhthusamte chu an rawn puang chhuak thin a; mahse, kan lo hmusit si.

Aw Zoram, harh rawh; harh lul rawh!

Similar Posts:

Recent Posts:

22 Responses to “Aw Zoram, harh rawh; harh lul rawh!”

  1. 1
    Pakak Says:

    kan harh hlawl chu a… :p

    Report this comment

  2. 2
    CFL Says:

    “lungngaih mangan buaina leh zel te” tih ni lovin, “lungngaih mangan buaina leh Jail te” tih a ni e.

    Report this comment

  3. 3
    bucko Says:

    Ni ngawt mai, he hla hi chu a ril a ni. He hla lo pianchhuah dan hi…. Mizoram Musical Beat Contest ah Zodi Band hian tel ve tumin mizoram ah an lo kal a, mahse foreigners tiin tel an phal ta lova. hei hi he hla lo pianchhuah chhan ni ta in ka hria…

    Report this comment

  4. 4
    buhtlei Says:

    Ku tsa dam reng rawh se!

    Report this comment

  5. 5
    TuaiSialA Says:

    Pakak, harh reng turin duhsakna ka hlan a che. Chatthla khawp khawpin thil hi ti tawh suh. :P
    CFL, ka lawm e. A thu hi mi ziah sa ka copy a nia…admin-te’n an hmuh chuan lo edit mai se…
    Bucko, ka vawi khat hriatna. A lawmawmin a bengvarthlak hle mai.
    buhtlei, suankual iangin dam reng ang che. :)

    Report this comment

  6. 6
    Chhuaklinga Says:

    Ram chu amah leh amah a indo chuan a dingchhuak ngai lovang.

    Report this comment

  7. 7
    vakul Says:

    Mahni unaute hmelma ang hiala en thin hnam kan ni a, ka changkan ve deuh hnuleh khua leh khua kan indo lai inkar hi a la zim lu deuhte pawh a ang ka ti.

    Report this comment

  8. 8
    XaiA Says:

    A thu a tha,a thluk a nalh,mi lung a kuai…

    Report this comment

  9. 9
    Awmtea Leo Khiangte Says:

    (Y)

    Report this comment

  10. 10
    Ruata 4 Cabin Says:

    (Y) Tuaisiala hi a A der nge a A tak2 :D

    Report this comment

  11. 11
    Terema Chhakchhuak Says:

    He hla hi chu a mi den a na khawp mai. A hla lo pian chhuah dan vel ngaihtuah phei chuan hnukulh teuh chungin a ngaithlak theih a ni. He hla phuahtu T. Zorampela ho hian ZODI band an din a, an huhang leh an huzah a nat vanglai takin Mizoramah an lo kal a, khawchhak mi tiin an lo hnawl leh si a, amah Zikpuii Pa phei chuan khatih lai khan Val upa R. Vanlawma bak an thlavang hauhsak ngam an awm lo a ti hial a ni. Mittui tla chungin an haw ta a, thu aia thil tithei zawk hla hmangin an rilru-a awm thu chu an han phawrh chhuak ta chiah a, chu hla hmang chuan Mizoram-a in pui lo nghaktute an han deng ta sak mai a, Mizoram dung leh vang chu he hla hian kar lovah a suartluan nghal a ni. A ngaithlatu apiang rilru a hneh a, he hla tlar 24 lek hian thu-in a sawi fiah phak loh a sawi fiahin mi rilru a hneh thei a ni. Tuaisiala nge nge i titha thin e. Ngalfimin dam nang che. (Y)

    Report this comment

  12. 12
    Sihtea Says:

    misual.comer te hnam a kan chian ang huan, CYMA hruai tu ni mek te hi
    hnam ah an chiang ve si lo hi
    a buai thlak a nih hi a. TuaiSiala nge nge a rawn ziak tha hle mai.

    Report this comment

  13. 13
    TuaiSialA Says:

    Apa Chhuakling, a dik chiah. Tun ang zela kan kal chuan dinchhuah chu khawi lai a ni ringawt!
    Vakul, nia, hun hian changkanna leh rilru puthmangte pawh a la thlak turah ngai ta ila.
    XaiA, a dik chiah. I sawi dik chaih chaih. :)
    Awmte, :) :*
    Ruata, a Tak. :D
    Terema, i comment a bengvarthlakin chhiar a nuam kher mai. Ka fiah uar uar e.
    Sihtea, a dik a ni. Tun term CYMA hruaitu thenkhat hi chuan boruak tha lo an vawrh zing ta khawp mai.

    Report this comment

  14. 14
    chhana Says:

    Burma-ah khian Mizo an awm a; chutih rualin inti Mizo leh kan han tih Mizo chawp an awm niin ka hria.

    Report this comment

  15. 15
    sheldon Says:

    Tuaite, kei i hla rawn chhawpchhuah hi ka lo la hre ve pek lo (H)

    Report this comment

  16. 16
    lr hlonchhing Says:

    (Y)

    Report this comment

  17. 17
    Mister North Says:

    he hla thu chuan ka hnuk a va ti ulh ve

    Report this comment

  18. 18
    coolsoul09 Says:

    Kan sawi ve ni. Thuziak chhiar a nuam a. Chanchinbu lamah engtiang chiahin nge tun boruak kal vel hi an chhuah thin ka hre lova. Media hi inlungrual sela chuan, hmalak chu a har lo tur a ni a..A bikin TV lama kan Local Channel neih ve ho leh Print Media lam hi..

    Khaw hal vel kha, ka lo hriat ve tirh chuan awih har ka ti a. Nunau thlabar turzia ka ngaihtuah ngawt pawhin na ka tihpui a. Kan kristianna te hi ka ringhlel…Kristianna te hian mi tha zawka min siam a nih si loh chuan eng awmzia nge maw a neih le?

    Kan thin a rimin khaw hmu lo lekin kan tal a, inthiam loh ahnekin kan insawithiam char char zel leh ta nghal a! 21st Century-ah a minaranin khawlthluaknei kan dawhkana kan hun ve hnu daihah khua kan la inhalsak ta hem hem mai chu a nia…

    YMA hi comment lamah in rawn sawi lang zauh a. YMA chang rel a sual ngai lo tih hi DAWT a ni. He tawngkam hi tawngkam awmze nei lo a ni.

    Report this comment

  19. 19
    Borat Says:

    He video hi kan hmuhna a rei tawh viau, nalh si, zaithiam hlawm si. Zopanliani leh Eden Tharnghaki te khi an thiam hlarh hlarh asin. Daisy aw khi ka familiar lo. Khita tel lo thiam ka tih leh chu ZoRebecca leh Lalparliani. ZoRebecca leh Eden Tharnghaki duet phei chu a nalh kher asin.

    Report this comment

  20. 20
    Tonix Says:

    Ka vawikhat hriatna, a lo ril hle mai a

    Report this comment

  21. 21
    Khuangpu Says:

    Burma ramah pawh Mizoram a awm ve tho alawm.Mizoram hming a pu lo mai ani lawm ni. Mizoram rawn ngai viau ho hi chu helam atanga chho leh te an nih ka ring. Chin hills huam chhungah khian Mizo tia chhiar theih engzat nge awm ang le.

    Report this comment

  22. 22
    Dr John Says:

    (Y) Gud post

    Report this comment