Archive for May, 2013

User kan delete nual maithei..

Friday, May 31st, 2013

cutest baby evar

Tunlai chu spam post kan dawng nasa lutuk a bots leh spammers nia kan ngaih 1000 chuang kan delete a. Theihtawpin user diktak delete loh cu kan tum a, chuti chung pawha spammers emaw kan tih, member diktak kan delete palh a nih chuan min hrethiam dawn nia. Rawn in register tha leh ula hlim takin kan lo lawm lut ang che u (H)

Mihring!!

Friday, May 31st, 2013

Ti hian, misual-ah post 239 ka submit ta! Min lo hrethiam ula, inlan ve deuh zeuh zeuh ka duh si a, ka tel tin aphai ta a niang e, tunhma ang khan ( ti ve khanglang ila) ka hnùm hleithei ta lo. Hei, tunah pawh ka fb wall-a mi ka rawn thlawh phei leh tawp! Thenkhat chuan in lo chhiar tawh ang a, ho pawh in ti viau maithei — misual-a pâwt châk tawh si, pâwt tur dang hre si lo post a nih mai mai hi… post tha tak tak karah lo awm ve luklak teh se. (H)

Tul lova computer, cell phone kan bih peih luatah kan mit a fiah lo zo a.

Ring uchûak tak taka bengah earphone kan hnawh-tawt thin avangin kan ri hriatna a tha lo zo a.

Sahdah, khaini vangin kan hmui hnuai zawk a piangsual a, mi zinga nui tha ngam lo khawpin kan ha a trit-êk a.

Zial vangin kan chuap a ro a.

Zu vangin kan thin a lian a.

Kuhva vangin kan pum a lawng a.

(more…)

English Premier League 2012/13 season khaikhawmna

Friday, May 31st, 2013

http://i42.tinypic.com/67hysx.jpg

English Premier League 2012/13 season chu khelh zawh a lo ni ta a,1992 atanga English division sang ber lo ni ta hi 21st. season a hman zawhna chiah a ni a, Manchester United chuan English top division ah vawi 20 champion an nihna niin, Premier League bik ah an vawi 13 na a ni a, English club zingah champion ngun ber an ni bawk. Chutih laiin, QPR, Reading leh Wigan Athletic te an relegate ve thung a, Wigan hi FA Cup champion Premier League atanga tla hmasa ber a ni ve thung!!

Season tan hnuah Chelsea in an manager an ban hmasa ber a, an manager Roberto Di Matteo chu 21st. Nov.2012 ah banin a aiah manager lailawk Rafael Benitez an la a, ani hian Europa a champion pui bakah top 3 ah season a zawhpui bawk. Club 6 in an manager an ban hman a, chung zing ah hnuhnung ber leh langsar ber chu Man City in 13th May,2013 khan an manager Roberto mancini chu FA Cup final an chakloh tuk ah an ban bawk.

EPL 2012-2013 SEASON RECORD
(more…)

Kan inneih dân hi

Friday, May 31st, 2013

Mizote hian tûn hma chuan inneihna hi urhsûn ve viau ṭhin mah ila, kan pi leh pute lo tihdân kha a zângkhai thei hlein ka hria. Khawthlang culture thlipuiin min nuai hnu hian Mizo tihdân leh khawthlang lam tihdân kaikawpin a ropui thei ang ber leh a hautak thei ang berin inneihna kan kalpui ta. Culture chi hnih tihdân inkawp a nih tlat avangin a hautak lo thei lova, a eng emaw zâwk zâwk kan paih phal si loh chuan a vau tumbu pawh kan khawrh tel ṭeuh a ngai ṭhin.

Tûna kan inneih dân kalphung en hian sum leh pai hautakzia te, kohhran mipui kan tihhahzia te, chhûng khat laina tâna phurrit kan siamzia te, ṭhiante tha leh zung kan sên raltîr hnemzia te hi chu sawi lova lum ni ta sela, sawi pawh ka tum hek lo. Ka sawi tum tak zâwk chu, HLIMNA NI ni si, a inneia te tân hlimna tûr hun awm mang si lo hi ka vei a, ka rawn hring chhuak ta a nih hi. Vai pathian aia hmaa thawh a ngai a, khuan-te-vîk pawh a khuan hma aṭangin buai rêng rêngin hun kan hmang a, thawmhnaw a ropui leh to thei ang ber kan inbel a, make-up a chhah thei ang berin kan invawm bei ṭhin. Ruah phing-phi-siau pawh si se, a bum theih chhûng chu bum kan duh a, kan hlau dui tawh ṭhin; thli thaw hlek se, kan hair-style a chhêm chhia ang tih hlau rêng rêngin kan rilru a hah a; ni lo sa se, thlan a tla anga make-up a tipherh ang tih kan hlau leh si. A hahthlâk a ni ti rawh u?

Inkhâwmnaah a urhsûn thei ang berin hun kan hmang a, chham sual kan hlauh ang ngeiin a ṭhen chu kan han phun sual khut a. Mipuite lah hi hlim avanga nui ni lovin nuihzat type-in kan han nui huk a. A inneia te tân hian inneih inkhâwm chhûng darkar khat pawh tling ṭha ṭhum lo hi chauhpui hnawkna tham a tling âwm e. Pastor-te lah hi mi tam tak an inneihtir tawh avangin inneih kalphung an thehlei thing thiam ang zel a, chutih rualin ‘he mite hi an vawi khat inneihna a ni’ tih hre lo niawm fahranin eng kim zei êm êm vek tûrah an ngai emaw ni. Rehearsal-naah te lah hian an han sawi zung zung a, vawi khat vêl an tichhin thuak thuak a, bel hle tûra an ngai nghâl ngawt te hi a inneia te tân rilru hahthlâk deuh tûr asin. Vawi hnih vawi thum innei tawh tân chuan thiam leh zei taka chêt vêl pawh a awl mah na; mahse, a tam zâwk te hi chu vawi khat inneihna an ni ngei âwm si a!

(more…)

CFL HMINGTHANGA – MITTHLA A LANG HLIMTHLA

Thursday, May 30th, 2013

Aizawlah Chuan (Ram leh Hnam Humhalh Version)

Wednesday, May 29th, 2013

1. Kan nula ten hnam dang pasal min neih san a thinrim em em thin thalai ten, ram leh hnam humhalh nan kan thawh peih loh thawktu ram dang mi leh hnam dang hnawt chhuakin, an permit kan check sak thin.

2. Thenkhatin zu tel loa khawpui nuam tak siam theih an rin laiin thenkhat ve thung chuan Biakin mawi inneih siak a Pathian ropui zia lantir theih an ring a ni mahna. Kan thiat, kan vua, kan hnawt chhuak thin.

3. Kohhran enkawl tura Pathian rawn chunga kan thlan tlin, kan kohhhran upa ten politik tuinu siam tha tura MLA leh Cabinet Minister te hial min nih san fe hnu pawhin party mi duhsak leh MILEM BIAK thu tho kan la buaipui.

4. Kan hotuten hna van vang a, private company hnuaia state dang leh foreign a thalaite inhlawhfak an sawi mawi mek laiin Bihari leh Burma mutia-te chuan nikhatah cheng 500 atanga 1000 te an lalut reng thei lawi si. Karimganj Bengali mistiri te lah chuan an duh duh hun a, an hlawh an san chung pawhin thawh sen loh hna an hmu reng bawk.

5. Kan bazar hrang hrang a bazar seat leh sumdawnna dawr te, thenawm state a mi leh ramdang mi ten an luah tam tawh zia, nitina hmu thin tuten khawpui daifem a zu satute dap in banga rawng sen thai kawkalha, hnawhchhuah chu ram leh hnam humhalhna atana tihmakmawhah kan ngai.

6. Hman ata tawh tun thlenga kan la chin, kan hmeichhiate thuam chhawm Mizo EM chu Tuikuk pa tah, an puan bih pawh Burma hmeichhe tah deuh vek a ni tawh. Inneihni tlaia an lawina in chu Vaipa kuta sak deuh vek a ni ve thung.

7. Aizawl pa thahnemngaihna leh huaina ber niawm a lang chu hmun awl apianga in sakah a ni. Khampanga uai tang fir fer chungin leimin vanga chhiat tawh chhanchhuah hna thawk lai cable TV-ah live ngatin kan thlir thin.

Zofa ten khawvel tlangsang ber Mt.Everest (8,848 m (29,029 ft) kan lawn chhuak ve ta

Wednesday, May 29th, 2013

Mt Everest (From Tibet)
Pu David (left) & Pu VLa (right)
Pu David (left) Pu Vla (right)

Manipur sorkar bultum-in First North East India Mt. Everest Expedition Team, chuan Mt Everest (khawvela tlangsang ber) an lawn chhuak ta. Heng zinga hian Mizo pahnih Pu Vanlalliana Maubawk (Aizawl) leh Pu David Zohmangaiha Republic Veng (Aizawl) te an tel a, Pu David Zohmangaiha hian, Mizote zinga Mt.Everest (8,848 m= 29,029 ft)lawn chhuak hmasa ber ni turin 18 May, Inrinni zing dar 5:30 (a.m) ah a lawn chhuak ta a ni. Mt Everest chhipah hian Bible a hnutchhiah bawk. Pu Vanlalliana hi hotupa (Leader) niin, Base Campah information pe chhuaktu leh lo dawngtu ah atang thung.
(more…)

EIRU LO CHUAN DENG RAWH SE

Tuesday, May 28th, 2013

A chhun mut hahdam a hun dawn tep tihah chuan a thutna thingbuk daihhlim lam rawn pan chuan mipui au thawm a hria a, thawm chuan a rawn hnaih zela,  chutiang ang huna mipui rawn pungkhawm tur chu mak a ti ang reng hle a, chil vawi tam lem pawh a ni lo ang tihah chuan a thutna thingbuk bul vel khat tlat chuan mipui chu an rawn pungkhawma, zirtirtu hmaah chuan kawrchung ha, a in a chhuahsan dawn chuan inchei fel tak tur tih hriat theih, pawr deuh fuap hi an rawn din tir a.

Mipui zinga an hruaitu ber chuan an mi man kawk pah chuan , “Ziritirtu, he pa hian mipui chanai a eirua, vawiinah a eiru lai ngei kan man a ni, a chunga I rorel dan he turin I hmaah hian kan rawn hruai a ni” a han ti a. A tawng dan velah chuan thil tha tak ti niin a inngai tih a hriat theih hle a, a thusawi zawnga a han hawi kual vel pawh chu a zam lo hle mai. Chutia an hruaitu ber a han tawng chuan mipui lam thawm chu a tha hle maia, “Khai hlum tur” “A nung chungin a vun lip ang u” ti a lo aute an awma. Zan lama zu rui zet, a nupui pawh kut thlak nghek tu, vengthlang pa pawh chu a au pawr ve hle a, kil khat atangin “Hal hlum ang u” tiin a lo au ve nasa hle a.

Sipai an lak tuma san zawng pawha tling lo, a latu thenkhat thuneihna avanga tling te phei chu chutianga mipui zinga au ah chuan a au phur ber berah an tanga. Amwze nei manga lo a mipui an au avang chuan ziritirtu chuan ngawi turin a han ti a. An mi rawn hruai chu a mit chak tak chuan a han en vanga vanga, a hmel atang chuan a ngaihtuahna thuk ber a kawm tih hai theih a ni lo.

Ziritirtu chuan eng thutlukna tak siam ang maw tiin mipui chuan an thlir thap maia. An sawi dan chuan Gilbran hunlaiah  pawh  a pu pu leh kha hmeichhe pakhatin “Aw zirtirtu ropui, hmangaihna mak leh danglam engtin nge ka neih ang?” tiin a a zawta ani chuan uipui lian tha tak zawn sak turin thurawn a lo pe a ni. Thlahtu atang rengin mite rawn an lo ni tawh thin a. Chu hunah pawh chuan ziritirtu chungah chuan beiseina an nei sang hle. Eirua an puh a chungah chuan rorelna chhinchhiah tlak leh hremna hriatzui tlak tak a a sawi an ring a ni.
(more…)

Vawk Chanchin I La Hriat Ngai Lohte

Tuesday, May 28th, 2013

By Râlte Kta

1.Mak deuh mai chu zirmi te chhut dan chuan Vawk hi khawvel a ran fing ber a chhiar a pali na ani phak. Chimpanzee, dolphin leh sai te chauh hi vawk aia finga ngaihte an ni.
2. An lei (toungue) hian taste bud 15,000 lai an nei a, mihring hian taste buds 9,000 chiah kan nei thung.
3. Bible-ah vawk hi vawi hnih chauh tarlan a ni.
4. Vawk sa (Pork) hi khawvel a sa ei tam ber a ni.
5. Denmark-ah chuan an ram mipui let a tam vawk a awm.
6. An taksa phu lovin tui chen an thiam hle
7. Kar khat leka upa an nih hian vawk note hi an pian tirh a an rihna letin an rit hman.
8. Mihringte angin sweat glands an nei lova, chuvangin an mahni taksa intih vawh nan chirh (mud) ah an inbual thin (an ṭawp vang hrim2 a chirh a inbual an ni lo tih kan hriat a tha awm e)

Hmangaihna hi enge a awmzia dik tak?

Monday, May 27th, 2013

Hmangaihna hi a saptawng takin ‘verb’ a ni emaw ‘abstract noun’ emaw pawh lo ni ta se, a Mizo tawng zawngin i han hrilhfiah dawn teh ang… phur fe fe in lo awm em? :P

Pu Lalhmingliana Saiawi chuan hmangaihna chu… ‘.. a chhan leh vang chu engpawh lo ni ta se la, kumtluang a daih chuan hmangaihna a ni mai’ a lo ti a. Mahse, hmangaihna a hrilhfiah a ni lo, hmangaih chhan leh a outcome/ results chungchang a ni a sawi ni!

I hmangaih em em a, a tan chuan i neih ang chhun chhun papawr kan pawh i ui lo a ni thei, si ar lak i huam lo a nih pawhin fur ruah tal do chu i inhuam ve ngei turah ngai ta i la…. ‘Ka hmangaih che a sin’ i han tih zawh chiah hian enge chhanna i beisei ve le! “Kei pawh in ka hmangaih che a sin” a lo ti bawih hnap emaw “Ka lawm hle mai a” a lo ti a nih pawhin a ri i ngaithla tawh lo ang, a hmui phun atangin i focus ang a, a mitmeng i mit sir pah ang.

Chutah chiah chuan suangtuahna ramah i lut kual ang a, zan thla eng hnuaiah tu dang ngai lo ten lungrual a leng dunin, zan dang a awm leh dawn tih hre lo in lungchim takin i kuah zui vawng vawng mai lo maw? I han thang harh a, a chhanna thluk chu eng key nge tih i han van ruai a, Minor nge Major key tih chu i thinlung guiter chuan i han perh chhin ve la. A tapah chuan eng key pawh lo ni ta se, a famkim lohna ni a i hriat ve ang chhun chhun pawh kha, a ti famkimtu ah an lo chang hman tawh si! “Naktuk hi ni lo mai se” i ti rilru em?

Mak tak maiin a tuk khua a lo var a, a ngaite bawkin hmangaihna hi enge ni ta? tiin tapchhak tlawh tur i neih loh pawhin thenawm hnai kuhva dawr bang tlawh chhanin i khup i sai hlarh hlarh tawh mai lo maw? Zan lam a chiang viau si kha a tuk a lo thlen chuan zanin ah min la hmangaih tho ang em? tih i dawn zui vawng vawng a, zing chaw hmeh anthur tlak hang chauh a lo ni nen, vai buhfai urh rim nen harsa ti takin chaw tlang i lem tawk tawk in ka ring! (more…)