It is well(A pawi lo)

April 28th, 2013 10:50 am by PKfanai

Vawiin chu, ‘a pawi lo’ tih hla lo pianchhuah dan lam I han hrut dawn teh ang hmiang.
He hla phuahtu Horatio G.Spafford hi kum 1828 October ni 20 khan, New York a North Troy hmunah a lo piang a. Naupangte niin Dan lam thiam ani a, a hlawhtlingin sum leh pai lamah pawh a hmuingil fu a ni. Kristian tha tak ni bawkin, Sakhaw thilah pawh a inhmang fu mai bawk a, DL Moody-a rawngbawlna pawh a puibawm fo a ni.

Chicago a kan vak hma lawk khan, Spafford-a hian Michigan Dil kama Real estate-ah a sum leh pai peipun tumin Risk alo la(Chiahpuam a tum) a. Chung a sum dah zawng zawng chu, Chicago a kan vak tum khan, a kang ral vek a ni. A nupui leh a fanu 4 te chu, an rilru hahdam nan leh DL.Moody-a rawngbawlna puibawm ni pah fawm turin England-ah an chhungkuaa kal an tum ta a. An kal dawn tepah, rokhawlhna avangin Chicago-a a cham hnufual a ngai a, a nupui leh a fanu 4 te erawhchu, lo han kal hmasa turin a tir ta tho a, S.S. Ville du Havre Lawngin kum
1873 November thla khan England lam chu an pan ta a ni.

Nimahsela, November ni 22 ah chuan thu lungchhiat thlak tak mai an hre ta a. S.S. Ville du Havre Lawng chu British Lawnglian ‘Lochearn’ an tih nen an insu hlauh mai a, minute 12 chhung lekin a pil ta a. Ni engemawzat hnuah, a damchhuak chhun te chuan Wales rama Cardiff Lawngchawlhna an thlen chuan, a nupui chuan thirhrui a rawn thawn ta a, “keimah chauh ka him” tih thu thin thawng tak mai chu a pasal Spafford-a chuan a dawng ta a ni.

Chu thirhrui a dawn veleh chuan, Spafford-a chuan Lawng bawkin a nupui hnen lam chu a pan ve ta a, a fate ho boralna hmun lai vel an paltlang laiin, he hla hi thinlung leh tihtak zetin a a ziak ta mawlh mawlh mai a ni.
He hla hi Mizotawnga lehlin ani tawh a, a ngial angan lo deuhin an letling niin a lang a. Hla ang nilovin, a phuahtuin sawi a tum nia ka hriat dan ka han thai lang ve mai mai ang e:-

1. Thlamuanna leh hlimna te chu lui anga ka kawnga an luan dam duai lai ngei chuan, Tuifinriat tuifawn hlauhawm tak angin Lungngaihnain min rawn chim buan buan ta mai si a. Nimahsela, nang chuan, “Ka thlarau tan, A pawi lo e” ti zel thei turin min lo zirtir tawh si a.

2. Setana kutthak hnawihna ka ni emaw, fiahna leh harsatna khirhkhan tak tak pawh tawk thin mah ila, kei michaklo tak min chhandam nan hian, Pathian fapa Isua Krista thisen hlu tak chu leihbuakin a awm tawh a ni tih hriatchianna hlu ber mai hian ka nun a thunun tlat chuan, “Ka thlarau tan a pawi lo ve.

3. ‘Ka Sualna’, Ka sualna zawng zawngte hi, a then a zar chauh nilovin, a vaiin, a zavai takmeuhin, Krawsah khan alo khengbet tawh ani tih ngaihtuahna hian min va han ti lawmin, min va han ti thlamuang thin tak em. Chuvangin, Aw ka nunna Lalpa chu fak rawh.

4. Tichuan, Lalpa ngei chuan, amah ka rin tlatna chu ala rawn tilang fiah ang a, Van chhumte khi pher angin ala zial bo hunah, Vantirhkoh chungnungber Tawtawrawt ri nena hnehna hla puan chhuaha a awm hunah ngei chuan, Ka Lalpa duhtak ngei chu lo chhukin a hmel chu ka la hmu dawn si a. Chuvangin, engpawh tawk mah ila, “Ka thlarau tan chuan a pawi lo, a tha vek e”.

Hetiang ang vanduaina rapthlakin an chhungkuaa ro a rel lai pawha, chu a vanduaina lam dah lian tlat lova, Pathianin a awmpuina leh, a tana alo tuar sakna lam; chumi avanga nakina beiseina nung avanga ala chan tur ropui tak lam thlir tlat chunga, “Ka thlarau tan a pawi lova, a tha vel vek e” a ti thei tlat mai hi a ropui em em mai a, Kristian ringtu dik takte tan, chona leh entawn tur ropui tak min hnutchhiah a ni.

Similar Posts:

Recent Posts:

20 Responses to “It is well(A pawi lo)”

  1. 1
    Chhuaklinga Says:

    A bengvarthlak thin hle mai. Engpawh ka chungah thleng se hrethiam tur leh ka bula awm reng tura dil hi ka tawngtaina a ni thin.

    ‘It is well’ tih hi ‘A tha e’ ti a lehlin ve mai awm, te ka lo ti ve mai mai a(a thu in rhym dan an ngaituah vang a ni chek a ni ang chu maw). A pawi lo tih hi chuan pawi a awm tihna an ti thin si a.

    tren tren

    Report this comment

  2. 2
    mate ainawn Says:

    a NGAIHNAWM THEI TAWP..Ka vel lovang che Dingte,

    Report this comment

  3. 3
    Ruata 4 Cabin Says:

    Pk-a: ka hnuk a ulh, ka mittui a hnam..thlarau thianghlim hriak thih hla phuah hi chuan a mi khawih dan a dang zar zel..he hla hi ka hla duh ber pawl a ni..Kutless ho in an sak te kha ka ngaithla kham tei thn lo..hla tha tak i rawn sawi zau avang’n mimal takn lawmthu ka hrilh a che.

    Report this comment

  4. 4
    sheldon Says:

    A bengvarthlak in a va ngaihnawm tak. Hla ropui, thinlung khawih phak ani (Y)

    Report this comment

  5. 5
    Chemtatrawta Says:

    He hla hi Pu Lalchuangliana, Delhi a awm hmang hian Lalpa’n Mizo tawnga lehlin a rawn pe a….

    1. Ka nun kawng muanna in a tuam vel lai leh,
    Lungngaih tuipui fawn karah pawh;
    Chantawk khuarel zawng eng ang pawh lo ni se,
    Ka thla damna min zirtir tawh si.

    Hah a dam! Lung a awi!
    Ka thla nun nuamin a leng tawh si.

    2. Setan doral lian chu lo hrang thin mah se,
    He muanna thuruk hian min vawng;
    Lal Isuan ka chauh leh pachhiat min hriatpui,
    Ka nun nan a thisen hlu a luang.

    3. Ka sual man a tlak zo ka zalen ta e,
    Ka fak ang kross hnehna ropui;
    A pumin a khengbet ka phur leh tawh lo’ng,
    Aw ka thla, i Lalpa chu fak mai rawh.

    4. Jordan tuipui fawnin min chim vel mah se,
    Ka nun Krista a ni tawh si.
    Ka rilru a muang, thih leh dam karah pawh,
    I thlamuanna aw maiin min hnem.

    5. I lokal hun thlirin Lalpa kan nghak che,
    Thihna hneha kan zai hun tur;
    Vantirhkoh au thawm leh ka Lalpa aw mawi,
    Ka nghahfak ka thla chawlh hlenna tur.

    6. Lalpa rinna lawmman ka hmuh hun tur chu,
    Lungngaih chhum pui zing kian hun tur;
    Tawtawrawt ri nen Lalpa a lo lang dawn,
    Chutah ka thla a chawl hlen tawh ang.

    Lalpa fak nuam vek ule.!!

    Report this comment

  6. 6
    PKfanai Says:

    Pu Lalchuangliana Lehlin dan chu a dam nalh zaih zaih hle mai. “Khawvel hrut chhuak ila” tih hi a thu dang daih, a thluk in ang si ani thei ang em aw?

    Report this comment

  7. 7
    Chemtatrawta Says:

    Pu Pk, i sawi dan hi ka hriat dan a ni.

    Report this comment

  8. 8
    century child Says:

    (Y)

    Report this comment

  9. 9
    PKfanai Says:

    A thluk siamtu hi, Philip Paul Bliss a nia, Pu Zosapthara(Rev Edwin Rowlands) hian a hla thluk hmang chuan, ama irawm chhuakin a phuah niin a lang. Tin, HG.Spafford hi chu a rilru delh rittu Tuifinriat fawn hlup hlup mai kha a rawn chham chhuak a, “When sorrows like sea billows roll” tiin. Zosapthara mizote leh Mizoram hmangaihtu pawhin, “Kan ram timawi, tithianghlima’n” tih a bilh tel hram hram a ni.

    Report this comment

  10. 10
    Dr John Says:

    (Y) Post tha hle mai. He hla hi chuan min hneh ngang mai. David Phelps-an nalh turu lutuk a, duh-tawk aia sanga a han sak phei chuan… hmulthi a ding ur ur a, mittui a rawn hnam tiam tiam thei alawm le, Amen!

    Horatio G. Spafford-a original words hi chu tha taka lehlin ngaihna a awm ngang lo ni berin ka hria,

    When peace, like a river, attendeth my way,
    When sorrows like sea billows roll;
    Whatever my lot, Thou has taught me to say,
    It is well, it is well, with my soul.

    Pathian pek hi chu a va ni chiang em aw….

    Report this comment

  11. 11
    ChhanaPa Says:

    A va tha em..

    Report this comment

  12. 12
    son of God Says:

    Ava ropui ve..

    Report this comment

  13. 13
    Awmtea Leo Khiangte Says:

    (Y)

    Report this comment

  14. 14
    lr hlonchhing Says:

    Post ropui tak a ni…

    Report this comment

  15. 15
    Sihtea Says:

    A beng var thlak hle mai.
    In lo va han ril hlawm em.

    Report this comment

  16. 16
    Natala Says:

    A va han tha tehlul em…

    Report this comment

  17. 17
    chhangteval Says:

    Synod HSS a kan luh lai khan kan principal khan a uar tlat tlat khawp mai ah he hla hi :-D

    Report this comment

  18. 18
    appy thianhlun Says:

    A va han ropui tak em!!

    Report this comment

  19. 19
    misualcheetah Says:

    a va han ropui tak em.

    Report this comment

  20. 20
    IT IS WELL | Mzvision Says:

    […] Main Source: http://www.misual.com/2013/04/.....a-pawi-lo/ […]

    Report this comment

Leave a Reply

You must be logged in to post a comment.