Open letter to Ronaldinho

April 24th, 2013 9:35 am by lr hlonchhing

(Ka lo hram tlahawlh deuh a nih pawhin, i mi hriatthiamna ka’n dil hmasa a che)

I hmel hi i inhmeh lo ka ti phal thlawt lo che, nang aiin ka inhmeh lo feeeee zawk. Hmel inhmeh lo theuh theuh-ah pawh nang chuan NLUP beisei hauh lovin, Inrinni zingtin Vawksa leh bekang um i duh zat zat i la ba ngam dawn tih ka hria alawm. Ih e…hmelah buaina tur a awm lo, Aizawl-ah te hian rawn zin ve lawk mah teh, i hmelchhiat loh zia i hre mai ang. Mizoram Premier League lama kan Model hote pawh hian, mi pa pawh ni mah la e-an star hle che ania ka rin tlat ni. Chu mai a ni lo, Sports Writer-Mamuana (Y2 Goal Agencies), Hmingsanga, Tetea leh Zara adt. ho hian an ngaisangin, an thai rang peih dawn em asin.

Vanglaini Newspaper hnunglam khat dul khawpin i lo kal hma leh i hawn leh hnu thleng pawhin, an lo thai rang leh hman pek ang. Gerrarda Pa te’n LPS emaw Zonet-ah emaw LIVE in an han kawm ang che ang a, English khera i chhan a ngai lovang. Mizo Tawng pai tak pawhin han chiri pui ve nawk nawk la, John Cena ang em chuan Mizo a ni kan tih che chu ka rin loh rualin, Mary Kom ang deuh-in kan hauh na fu ang che tih erawh ka ring tlat thung. Rajiv Gandhi Stadium Mualpui, Sipai Lammual leh Thuamluaia Mual-ah te pawh Grass kan phah hring ve dul tawh a, World Cup thlen hi kan la dil lovang tih kan sawi thei hleinem!!

Eng ngati nge “Football ka chawlhsan hun chuan tap chungin ka thlah ang a, ka thih hunah Thlanmual ah emaw min phum lo ula. Football Stadium bulah min phumna tur siam ula, BALL nen min phum tel dawn nia. A chhan chu Football ka hmangaih a ka ‘Nunna’ a ni si a” te min tihsan tak mai le? Chawlh lam chu la sawi duh hauh suh, i chawl dawn a nih rau rau pawhin Mizoram Premier League lamah Aizawl FC, Reitlang FC leh adt. kan nei ve alawm, kan khelh luih tir tho tho ang che. Inkhel.com lam chuan an update peih ngawt ang tih lo ring phawt mai rawh. I awih lo a nih chuan, www.inkhel.com emaw www.zofooty.com lam lo tlawh ve thin la, i hre mai ang.

Ni e, a ni asin…February Ni 6, 2013 zana England lama penalty i pet luh loh kha, na kan tihpui che a, kan lo tuar ve khawp asin. Penalty i pet dawna i thinphu a pangngai loh ang chiah khan, kan thinphu a lo rang ve a. I chala thlantui luang zat kha kan chalah a luang ve a, i pet goal ta silo kha Nilai Zan thupui aimahin kan titi ti tamtu a ni a. FIFA World Player of the Year 2004 leh 2005 kuma i dawn kha kan la theihnghilh phal chuang reng reng lova, i inkhelh thiam zia hi kan la ringhlel ngam chuang reng reng lo asin. I hair style leh i hair style i tawn behna kha kan mitthla a, kan khua phei hi chuan Vanlalsailova Hair Style kan copy tam bik chuang hauh lo.

Brazil, Porto Alegre apiang, i nu Dona Miguelina Elói Assis dos Santos a ni tih leh i pa João de Assis Moreira a ni tih hi MNF leh Congress sawrkar kan hriat chian tluk zetin kan hria asin. Tawngtai thil hre thei i ni lo tih lohah chuan, mi bik i nih zia hi, kum 13 mi lek i nih laia Local Team nena in inkhelh tuma, 23-0 a in chak lai khan goal lut zawng zawng kha i pet luh a ni tih kan hriat atang hian a chiang mai. Barcelona-a i khelh lai kum 2005, November 19 El Clásico ah khan, Madrid fans te tak ngial paw’n Standing Ovation an pe hial che tih leh Europe chhuahsana in khawtual club Flamengo a i khelh tak daih hnu khan, i hlawh thla li chuang an pek duh loh che avanga Atlético Mineiro i zawm ta daih a ni tih thleng hian kan lo chhiar ve asin. 25 February 2005 ah i nupui duhtak Janaína Mendes-in fapa João a hrinsak che tih thleng hian kan lo chhinchiah a, zan tha in hman zana TARA Underpant i hak thleng khan kan hria asin ti ila-Em Em A Che U i ti ngei ang.

Hei tunah kan Uipui Rangi’n a khawlai fa vawi nga na a pai mek a, kan Arpui duat lai Tiali paw’n phir a hrin ngei kan beisei. I lo zin hnu chuan, hnianghnartaka Uisa leh Arsa i ei theih lo inring ngawt mai teh. Mahse, kan ramah chuan MLTP Act kan la hman avangin a sen chi kha chu lo pai ru lo hram la. Hmelhriat tha ka nei nuala, hetah a tih dan dan a awm mai ang. Lo zin hram chu tum la, Zawlaidi te pawh in khuaah a awm ve loh kha, kan dawm dun dawn nia.

Mizoram khawpui bera i ke vei lam i rawn nghah rualin, harhna dila kan tawngtaina aiin nghawng a nei tam zawkin ring mai rawh. Lammuala i pheichheh i rawn show rual hian Cheraw hmanga World Record kan siamna aimah hian kan lawm tikim tu a ni bawk ang. Mahse, hei erawh i hriat a tha ang. In khawpui a chep tih i sawi tur a ni lo. Sawi tam kher ngai lovin, kan buaina tawh tur chu i hrethiam maiin ka’n ring ngawt. Aaaaaa…chutiang lam chu buaipui duh suh, rawn zin ve phawt mai teh…

Similar Posts:

Recent Posts:

10 Responses to “Open letter to Ronaldinho”

  1. 1
    mate ainawn Says:

    Chhiar 1st ila…Feuh feuh a Open letter chu.

    Report this comment

  2. 2
    mate ainawn Says:

    Kuh feuh mahse Football hi chu a englo thenna lam tak a ni tih ka pawm e…

    Report this comment

  3. 3
    caribou Says:

    John Cena hi zohnahthlak diktak, a hming diktak pawh John C Sena a ni an tia ni lawm ni kha!!

    Report this comment

  4. 4
    ZerO Says:

    Ka van nui nasa ve mawle…..

    Report this comment

  5. 5
    Awmtea Leo Khiangte Says:

    hahaha :-D

    Report this comment

  6. 6
    Vladimir Putin Says:

    I open letter chu a chhiar hmel loh. Mahse a lo zin ngiatia chaw nghei (fasting) an la awm mahna.

    Report this comment

  7. 7
    Dr Mahminga Sailo Says:

    Riltam em em laia thingpui senhang in ngawt ai chuan, chini nena thlum, bawnghnute nena pawt ngei mai manhla ang bawkin, i thuziak chu mi(sual) khat manah a manhla e… (Y)

    Report this comment

  8. 8
    lr hlonchhing Says:

    Dr Mahminga, ka lawm e.

    Report this comment

  9. 9
    Dr John Says:

    (Y) Ka nau hi Thu zawng a thiam thlawt a ni e… :)

    Report this comment

  10. 10
    SHauzelSailo Says:

    Lo star ve hle niang aaa (Y)

    Report this comment