THAWHLEHNAA TIHNUN KA LO NI TA

March 31st, 2013 9:25 pm by

Lalpa Isua Krista krawsa a thihna leh, thihna ata a thawhlehna avanga lei leh vana thil ropui ber lo thleng chu,’MIHRING CHU MI NUNG A LO NI TA’ tih hi a ni. Tunah chuan Krista Isuaa thi tawhte zawng zawng chu KRISTA-ah chuan LALPA-ah kan lo nung ta a, thi thei tawh lo nun neitu kan lo ni ta a ni. Adama bawhchhiatna (sual) avanga thi kha, tunah chuan sual avangin kan thi leh dawn tawh lo va, KRISTA avangin sual lakah kan thi ve tawh zawk dawn a ni! A hming fakin awm rawh se.

Kraws-ah khan:
Lal Isua chauh kha thihtir lo la, Lalpa Isua thihnaah khan nangmah ngei, Adama bawhchhiatna avanga PATHIAN laka i thihna leh SUAL-a i lo nun takna kha tihthihin a awm ta a ni tih hi ringhlel suh la, Krista thihna kha Pathian chuan i tan sual laka i thihnaah a puang tawh a, “A kin ta” tih a hrilh tawh che a ni. Chu chu ringhlel suh la, tichuan sual laka thi tawhah inruat ve tawh ang che. Chu mi tur atana Kraws- a thi kha a ni si a.

Thawhlehna chu:
Sual laka thi i nihna leh, khawvel sual laka phumbova i awmna leh NUN THAR nei tura kaihthawha i awmna chu a ni. Krista thihnaa
thi ve tawh i nih chuan i mihring hlui, Pathian hmelma nun i neih kha thlana phum bovin a awm ve tawh a (Rom 6:4), tin, ropui taka kaihthawh i ni ta tih Bible hmangin Pathianin a hriattir che a ni. Chu a hriattirna che chu vawiin thlengin Pa thinlungah a awm reng a, nun thar nena kaihthawh i lo ni ta a ni. Aw ni e, Krista thihna
kha i thihnaa i pawm a nih chuan thihna ata a thawhlehna pawh chu nangmah ngei, Pathian laka nung leh tura kaihthawha i awmna a ni tih i pawm a ngai a ni. Chu chu i pawm tik apiangin sual chuan a ngam ngai lo vang che.

Ropui taka kaihthawh ka nihna chu(?):
Rul thlah (Luka 3:7), Diabola fa (Joh 8:44) tih hiala LALPAN min hmuh hnuah, chu rul thlah, diabola fa tia a sawi chu Ama siam, a duh takte an ni si a, chu chu suala an nun tak avangin ‘Sual man thihna (Rom 6:23)’ chu Krawsah a takin Krista hmangin a tifamkim ta a. Min
tihlum ta a, sual laka thi ni turin. Tichuan, Diabola fa chu Kraws thihna hmanga tihlumin, Krista thawhlehna hmang ngei chuan ‘PATHIAN FA’ ni tura kaihthawh kan lo ni ta a ni. Tunah chuan diabola fate ni tawh lovin ‘PATHIAN NUNG FATE’ tiin min tinung leh ta a ni (I Joh 3:1). A hming fakin awm rawh se.

“A Thihnaa ka thih vangin
Thawhlehnaa tihnun ka lo ni ta.
Thihna lui ral ka lo kai ta, khawvel miten an hrethiam lo, he lei in hi ral mah sela ka nunna chu ISUA a ni.”

A thihna anpuiin amah nÊn kan inzawm tawh si chuan a thawhlehna anpui pawhin kan inzawm bawk ang. Heng hi hria ila: kan mihring hlui chu a hnenah khenbehin a awm ve ta, sual pu taksa chu tihborala a awm theih nan, tun achinah sual bawiha kan awm lohna turin. Tupawh thi tawh chu sual lakah a chhuak tawh si a (Rom 6:5-7).

Chutichuan tunah zawng Krista Isuaa awmte tan chuan thiam loh chantirna reng a awm tawh lo. Krista Isuaa Nunna Thlarau dan chuan sualna leh thihna dan ata chu min tichhuak TAWH si a (Rom 8:1,2).

Thlarau ngei chuan keimahni thlarau nen Pathian fate kan ni tih min hriattir thin (Rom 8:16).

Ngai teh u, Pain min hmangaihna chu a va nasa em! “Pathian faahte” min vuah tak hi (I Joh 3:1).

Keini zingah Krista Isuaa baptisma chang apiangte chu a thihnaah baptisin kan awm tih in hre lo emaw ni? Chuvangin a thihnaah baptisma kan chanin, a hnena phum vein kan awm; Pa ropuinain
mitthi zing ata Krista a kaihthawh ang khan, keini pawh nunna tharin kan awm theih nan (Rom 6:3,4).

Similar Posts:

Recent Posts:

3 Responses to “THAWHLEHNAA TIHNUN KA LO NI TA”

  1. 1
    buhtlei Says:

    tuk chhuah nuam u le!

    Report this comment

  2. 2
    Awmtea Leo Khiangte Says:

    Chhiar dawn ang.

    Report this comment

  3. 3
    Dr John Says:

    (Y)

    Report this comment

Leave a Reply

You must be logged in to post a comment.