NAZARETH ISUA KRAWS-A AN KHENBEH KHA A THO LEH TA (Easter Sunday Sermon)

March 31st, 2013 6:12 am by CFL

by Rev. Lalzuithanga

Bible : Luka 24:1-12

Lal Isua Krista khawvela a len lai khan Puithiam lalte leh lehkha ziaktuten an man tur thu te, ni thum nia a thawh leh tur thute a lo sawi tawh vawi hnih vawi thum lai a sawi thin a. Mahse chu thawhlehna thu chu khawvel hian a hrethiam lo mai ni lo-in, khawvel nih phungah Isua thawhlehna ang hi a awm lo hrim hrim a ni. Mitthi tawh lo nung leh erawh hi chu an awm tih kan hria. Amaherawhchu thi tawh, thlana phum tawh; taksa thawhsan vek, mahse thawhsan taksa hmuh tur awm chuang lo. Thawhlehna taksa chu mihring taksa ang ni tawh chuang si lo. Chuti ang erawh chu leilung pian tirh ata Isua thawhlehna bak a la awm ngai lo a, a awm leh tawh dawn bawk lo a ni. Chu thawhlehna thu chu a zirtirte hnenah sawi thin mah se la, a zirtirte pawh hian engti ang taka thleng tur nge an hrethiam lo a ni. Tin, Lal Isuan ‘ni thum ni-ah’ a tih te, ‘ni thum niin’ tia a thawh leh tur thu a sawi hi eng nge ‘ni thum’ a tih kherna hi ngaihtuahnaah a awm thei. Pathian thu-in tarlan a tum nia lang chu, mihringte chu ni hnih khat te emaw unconcious-in thi anga awmin an awm thei ang a, an la tho leh thei pawh a ni mai thei. Mahse, ni thum zet thlana awm tawh hi chu khawvel thiamna emaw, thil nih phung hrim hrimah thi chiang bal sawina ni turah a ngaih theih a. Thil danglam a nih loh chuan thawhleh ngaihna a awm tawh lo. Chuvang chuan ‘ni thum niin’ tih te, ‘ni thum ni-ah’ a tihte hian a thi chiang dawn hle a ni tih a tarlanna niin a lang a ni. Chuti ang chuan Lal Isua hian thihna a kal tlang tur thu leh thihna atanga a thawh leh tur thu hi chiang takin a lo sawi lawk tawh a ni.

Ni kin nia Pathianin mitthite a kaihthawh leh tur thu hi chu thuthlung hlui hunah pawh kan hmu a, khawvel tawp hunah mitthi te an thawh leh tur thu zawlneiten an sawi a ni. Tin, Isuan Lazara a kaihthawh dawn tum pawh khan a farnu khan ni kin nia thawhlehnaah chuan a tho leh ang tih ka ring, tiin a sawi a ni. Mahse Lal Isuan thawhlehna a sawi tak leh amah hi a tho leh dawn a ni tih a sawi te leh amah tak a thawhlehna hi chu ni kin nia thawhlehna ni lo, amah ngeiin mitthi a kaih thawh lehte emaw ang ni lo ‘Thawhlehna’ a ni.

Kan hriat angin Lal Isua Krista chu kraws-ah an khengbet a, a thi a, thlanah an zalh ta tih kan hria a ni. A tuk chu Sabbath ni a ni a, chawlhni a ni. A tuk leh ni kha ni sarih ni hmasa ber tia kan Bible-in a sawi, chawlhni zawh tuk tak a ni a. Chumi ni-ah chuan hmeichhiate Isua thlana kal a, a ruangte rimtui va hnawih turin an va kal a. Thlan an va thlen chuan thlan kawngka a lo inhawng tlat mai. A chhung an han bih khan Isua a lo awm lo a, an mangang hle a ni. Chutia mangang taka an awm lai chuan an kiangah mi pahnih, puan mi en khalh thei sin an lo ding ta a. Chung mite chuan thil awmzia an lo hrilh ta a ni. Lalzara a kaih thawh dawn tum a, ‘Lung hi lum sawn rawh u’ tia thu petu leh kai thotu kha a thi a, tih hlumin a awm a, ‘Ka tho leh dawn a ni’ titu kha lunga chhin hnan khan a awm tlat mai a ni. Khawvela a len laia a zirtirna leh a chunga Pa rorelna lo thleng mek leh thleng zel tur han thlir khan a kawng zawh a letling a, nunna petu an khengbeta an tihlum, tih pawh hi thil letling tawp a ni a, ‘Thawhlehna ropui chu thlanah an phum ta’ tihte hi khawvel mi chhiarkawpah chuan belh dik theih a ni tawh lo a, chawh dik rual a ni ta lo. Mahse thawhlehna ropuia thlana an phum, lunga an chhin hnan ngeia kha – Thlan kawngka a inhawng a, a chhungah ‘Thawhlehna ropuia’ chu hmuh tur a awm ta lo a ni.

Lal Isua hmangaihtu leh Lal Isua beiseitu nun atang chuan a thlan lo ruak ta han hmuh kha chuan, ‘Ka Lalpa a tho leh ta’ tia au hluai mai a chakawm hle ang. Amaherawhchu thlana kalte khan Lal Isuan ni thum niah ka tho leh ang, tia a sawite kha an la man thiam loh em avangin, ‘Khawiah nge ka Lalpa chu an kal bopui, heng sipaite hian a ruang hi an thukru a ni ang, an ru bo a ni ang’ tihte ngaihdan a awm a ni. Tah chuan an hnena puan var sin lo dingte chuan, ‘Engatinge mitthi zingah mi nung in zawn, hetah a awm tawh lo e, a tho leh ta’ an rawn ti a ni. ‘Hetah a awm tawh lo e, a tho leh ta’ tih chanchin hi a va ropui em. Khawvelin an tih hluma an hneh tak, thlana an phuma kha thihna hnehin vawiinah hian a tho leh ta, tih sawi hi a va nuam em! Hlaua kimkia, ‘Keini pawh hi min khengbet ve mai ang, min man ve mai ang a,’ tia khurte tan in Lalpa kha a tho leh ta asin, in zirtirtu kha a tho leh ta asin, engatinge mitthi zingah mi nung in zawn? A ropui tiraw u. Ni e, mihring rilru chuan thihna leh kuang, thlan thlengin a suih zawm a ni. Mahse, vawiinah hian thlanmual a rawn inher danglam ta a, kuang pawh tih danglamin a awm ta. Thihna chu a inher danglam a, thil chu a lo inthlak danglam zo ta. Thlanmual, mitthi awmna hmunah khan mi nung a lo chhuak ta.

Tho leh Lal Isua Krista avanga kan dinhmun ropui tak hi kan ngaihtuah nawn fo leh kan hriat thar fo hi a va pawimawh em. Tirhkoh Paula chuan I Kor. 15 ah chuan, ‘Aw thihna khawiah nge i tur chu? Aw thihna khawiah nge i hnehna chu? Thihna tur chu sual a ni a, sual thil tih theihna chu dan thu chu a ni. Nimahsela kan Lalpa Isua Krista avanga khawngaihnaa min hnehsaktu Pathian hnenah ropuina awm rawh se’ tiin min hrilh a ni. Mihring tana tawpna leh hlauhawm ber, hmelma hnuhnung ber kan hmachhawn chu thihna hi a ni, tiin Tirhkoh Paulan min hrilh a ni. Chuti ang taka mihring nuna hlauhawm leh kan tawpna tur ngeia kan ngaih thihna chu vawiinah hian kan Lalpa Isua Kristaah chuan hnehin, ngamin, tih tlawmin a lo awm ta. Thihna-in thihna a hneh a, thawhlehnain thlan a hneh a, chatuan atan nunna ni turin Pathianin a kaitho leh ta a ni. Vawiinah hian Lal Isua a tho leh ta, chu chu chatuan atana mihringten Pathian nun kan tawmpuina tur, Pathian nen nun intawma kan awmna tur atana ‘Thawhlehna’ a lo ni. Chu tak mai chu nang leh kei kan lawmna tur, kan hlimna tur leh kan thlamuanna tur chu a ni.

Lal Isua kha Pathianin ni thum niin ropui takin a kai tho a, Tirhkoh Paula chuan chu thawhlehnaah chuan, ‘Ama rual vekin min kai tho’ a ti a, Isua avanga hnehtu, nunna neitu, thawhlehna tawmpuitu kan lo ni ta. Hei tak hi a ni ropui chu. Thlarau lam nunah rinnaa tawmpuitu kan nihna avangin tho leh kan ni e tih hi kan sawi ngam a, kan sawi mai a ni lo a kan nun hian a takin a chang a ni. Thihna kawr ruam mihringin a zawh mek lai pawh hian tho leh Krista avanga mi nung nihna rinnaa tawmpuitu te tan kuang chu ruang tawih tur awmna mai chauh a ni a, thlan pawh ruang tawih tur dahna mai chauh a ni. Chutah chuan mi nung an awm tawh lo. Engatinge mitthi zingah mi nung in zawn? Krista thawhlehna avanga mi nungte chanvo chu Lal Isua Krista avangin he thihna lui ruam hi kan dai kai ta a ni. Khawvelah hian in leh lo nghet kan nei lo a, ram nghet kan nei lo. Thih hnu piah lamah pawh beisei tur ram kan nei lo. Chuvangin he chatuan khawvelah hian mikhual leh khualzin maiin kan vak kual thin a, kan teihawi thin. Amaherawhchu Lal Isua Krista Pathianin a kaih thawh tak avangin chu thawhlehnaah chuan kei hi khawngaihna avanga chhandam ka lo ni ta a ni.

Unaute u, engatinge mitthi zingah minung in zawn? Hetah a awm tawh lo e, a tho leh ta. Nazareth Isua, Kraws an khehbeha ngei kha a tho leh ta. Harsatna chi hrang hrang leh natna avanga rah beha rum mekte u Isua chu a tho leh ta. Khawvel damna tur atan, chatuan nunna tur atan, khawvel thiam chantirna tur atan Isua chu a tho leh ta. Chutah chuan damlote tih damin an awm a, nun nei lote nun neiin an lo ding chhuak a, mi dawihzepte tih huaisenin an awm ta asin. Tunah hian eng nge harsatna i neih? Hei hi ka hrilh duh che – I Lalpa Krawsa an khenbeha kha Pathianin a kai tho leh ta. I nunna ni turin, i damna ni turin, i thlamuanna ni turin, i hausakna ni turin, i chatuan nunna ni turin Pathianin a kai tho ta. Chutah chuan sual a tel tawh lo, thiam loh chantirna a tel tawh lo. Mi thianghlim nihna dinhmun, van khua leh tui nihna dinhmun a lo ni ta. Chu mi nun duhawm leh ropui, thlakhlehawm, lungawithlak leh thlamuanthlak taka chu he Easter Sunday-ah hian kan hnenah a rawn puang thar leh ta a ni.

Kun reng kha lo tho la, lungngai hrehawm mittui tla kha lo dak chhuak rawh le. I Lalpa Krawsa an khenbeh kha i tan, chatuan atan a tho leh ta. Eng nge i hlauh? Tho la, ding la, ‘A tho leh ta ‘ tiin au chhuak rawh. Tho leh Lal Isua Krista, vawiin ami hi i chanvo a ni. Chatuan atana i chanvo ni turin Pathianin a kai tho leh ta a ni. Lalpan a thuchah kan han sawite kan za atan mal min sawmsak rawh se. AMEN

Similar Posts:

Recent Posts:

9 Responses to “NAZARETH ISUA KRAWS-A AN KHENBEH KHA A THO LEH TA (Easter Sunday Sermon)”

  1. 1
    Awmtea Leo Khiangte Says:

    Easter Sunday Chibai vek u.

    Report this comment

  2. 2
    mr.Duhlova Says:

    Nangpawh le !

    Report this comment

  3. 3
    lr hlonchhing Says:

    Ni 3 leh zan 3 lei kawchhunga awm hman lovin, kan kai tho leh ta maw?

    Report this comment

  4. 4
    PKfanai Says:

    Nikum(2012) Good Friday leh Easter Sunday khan, Pathian thu lam post kha a tam lutuk deuh ni anga complaint deuh a awm vang kha nge ni? Kumin lam hian, kan inringthul deuh niin a lang a. Cfl an i rawn ti hram hram hi a lawmawm ka ti tak meuh mai. (Y)

    Report this comment

  5. 5
    Charice_mizo Says:

    Engahnge mitthi zingah mi nung in zawn? tih laite mai hi a ropui ka ti.

    Good sermon, God bless!

    Report this comment

  6. 6
    Rinzova Khawlhring Lalhnam Says:

    Va rawn sawi sàng ve reuh tawh ve!

    Report this comment

  7. 7
    Sihtea Says:

    A ro pui hle mai.

    Report this comment

  8. 8
    Hotunu_pasal Says:

    Ngaihnawm khawp mai! Kha hmeichhia kha chuan “Ka Lalpa an kal bopui ta. An dahna chin ka hre si lo” a ti a. Keini erawh chu vawiin ah hian a awmna chin hretute kan ni e. Ava ropui em!

    Report this comment

  9. 9
    Dr John Says:

    (Y)

    Report this comment