ISUAN KAN TAN A TUAR (Good Friday Sermon)

March 29th, 2013 4:58 pm by CFL

by Rev. V.L. Krawschhuanmawia

Isaia 53:3-6

Isaia chuan “Ani chuan kan natnate phurin, kan lungngaihnate pawh a phur ngei a… ani chu kan bawhchhiatnate avângin hliamin a awm a, kan khawlohnate avângin vuak thitlinin a awm” (Isaia 53:4,5) tiin kan aiawha tuar a nih zia a lo sawi lang tawh a. Eden natna leh lungngaihna, bawhchhiatna leh khawlohna zawng zawng chu a chungah nghahin a awm. Chuvang chuan Gethsemani-ah lungngaihna vawrtawpin a bual a, a siam mihringte ngei vuakin, nuihzat leh chil chhak khumin, hlinglukhum khumtirin awm a, khawvela thihna rapthlak ber kraws-ah khenbeh a ni ta. Chung zawng zawng chu keimahni sualna vanga tuar a ni. Kan Lalpa hian ti hian tuar lo se keimahni ngeiin chu tuarna chu kan hmachhawn tur a ni si. Vawiin Good Friday-ah hian Gethsemani-a kan Lalpa lungngaih zia te, Pilata hmaah nuisawha a awm zia te, Krawsa a tuarnate thlir chungin Pathian thu kan ngaihtuahho dawn a ni.

1. Keimahni avanga lungngai a ni :

A lungngaihnain a vawrtawp a thleng : Rawng a bawl laia Rabi ropui leh zuitu ngah em em mai kha lungngai mangangin Gerthsemani-ah a rum ta. Gethsemani huana a thlen hma ni li vel bawr chung hian Isua hi lungngaihnain a lo tlak buak tawh a ni mai awm mange a tih theih. “Tunah ka rilru a mangang e; eng nge ka sawi ang aw? ‘Ka Pa, he mi hun lakah hian mi chhandam rawh,’ ka ti ang em ni? Eng pawh ni sela, …, he mi hun thleng hian ka awm chhan a ni.” (John 12:27) tiin a lo sawi a. Hetiang thu hi a hma lam khan a la sawi ngai lo. A tawngkam en hian chu a hmachhawn tur harsatna leh hlauhawmna chuan thlah hauh lovin a delh reng a ni tih a hriat theih. Chu lungngaihna a lo phurh mek chuan Gethsemani huanah a vawrtawp a thleng ta a. Pindan chungnung an chhuahsan dawn chuan Pathian fakna hla nen an chhuak a, tunah chuan hla chu tahna thawmin a thlak ta a ni. Nasa taka thlaphang leh mangangin a awm a, a lungngaihna chu Pathian fapa ni lo se thihpui tham hial tur a ni.

A thlan thisen anga far hian a lungngaih zia a tilang chiang hle. A thlan lian taka far a ni mai lo, thisen pawlhin a far niin a lang. Damdawi lam thiam Galen chuan “Hlauhna nasa lutukah hian thisenin a pawlh rawng sen lam (crimson) chu a lo chhuak thei” tiin a sawi a (C.H.Spurgeon Passion and the death of Christ p.106). Warren W.Wiersbee chuan ti hian a sawi ‘Hetiang hi hematidrosis an ti a, rilru pek nasat lutuk avangin thisen zam te reuhte chu chatin thlan bawmah a lut a, thlan chu thisen angina a lo far ta thin a ni” tiin (Be Courageus p.119). Isua chu lungngaihna nasa takin a tuam vel avangin a vun hnuai maia Capillary vein chu chatin a thlan nen infinin a lo luang chhuak ta a ni ang. Lungngaih avang chuan thlan fimte chu a lo chhuak a ni thei e. Thisen anga far hial khawpa thlan chhuak chuan kan Lalpa tuar nat zia a tilang chiang hle mai. “Ka Pa, rem i tih chuan he no hi ka hnen ata la sawn rawh;” tiin a ngen tlawk tlawk a ni (Lk.22:42).

A no in tur a hautak em a ni : Chu no chu Pathian laka mihranna no (cf.Mt.26:37,38), Pathian thinrimna no (Is.51:17) leh tuarna no (22:42) a ni a. Charles H.Spurgeon phei chuan ‘Uar lutuk a awm thei lo vang, a no in turah hian hremhmun zawng zawng an chhung lut (distilled) a ni” a ti hial a ni. Chu hremna chu chatuan hremna erawh a ni lo, Pathian a nih avangin kan tan a tuar a ni. Sual hliam hnu piang tawh leh piang lo te pawhin an tuar tur thihna leh hremna chu a no-ah chhun khawm a ni a, na lo thei a ni lo. Kan natnate leh kan lungngaihna te chu keini phurh zawh rual a ni lo. Lalpan min tuarsakin min phurhsak ta a ni. Kan natna leh lungngaihna zawng zawng chu Lalpan a koah a nghat ta. A nghawngkawl chu kan bah ve thiam hun apiangah kan phur pawh a zang zel dawn a ni.

2. Keimahni avangin nuihsawhin a awm

Pilatan khenbeh tura a pek hnuah chuan sualna nei lo kan LALPA chu ram awptu sipaite chuan khenbehna tur Kraws an buatsaih chhungin nuih za siam nan an hmang ta. Sipai pawlho (Cohort- 500-600 awmna) chuan engtinmaha ti let ve thei miah lo tur chu an duh duhin an sawi sa a. a thuamhnaw hlihsakin puan senduk an sin tir a, Hling lukhum khum tirin Luang tiang an pe a, chil an chhak a, an vaw char char bawk a. Chu hmunah chuan awm ve lo mah ila, pawikhawih lo, sualna reng reng nei lo chuti taka han nghaisak mai chu en a va har dawn em. Chu an sawisak ngei chu Kan Lalpa, Isua Krista, kan aia tuara ngei kha a ni.

a) Puan an hlihsak : kan Lalpa chu a puan an hlihsak a, saruak a ni ta. Sual chuan saruak kan ni tih min hriattir a, min ti zak ta (Gen.3:7). Eden huana kan nu leh pa ten sual an tih khan saruak an ni tih an inhria a. Isuan kan sualna chu saruakin a entir a ni. Kan sual avangin saruakin a awm a ni. Pathian rorelna hmaah chuan saruak mai kan ni. Kan Lalpa Isua ngei chuan chu kan dinhmun chu min chan sakin kan lo hausak theih nan rangkachak meia tihthianghlim te, puan kan sin theih nan leh kan saruak zahmawh chu a lan loh nan puan var te, kan hmuh theih nana kan mitah mitna hlote hnawih anih theih nan kan aiah saruakin a awm a ni. (Thup.3:18). Saruak chu Pathian ni lovin kan sualna a ni. Puanvar, thianghlimna puan kan sin theih nan ani chu saruakin a awm a ni.

b) Puan sen duk an sin tir : Puansen duk chuan kan sual a phurh zia a entir a ni. Isaia 1:18-ah chuan Lalpa chuan, “Hawh teh u, i ngaihtuah tlâng teh ang u! In sualte chu sen lâr angin awm tawh mah sela, vur angin a var ang; sen duk angin sen tawh mah sela, berâm hmul angin a awm ang” a lo ti daih tawh. Chu kan sual hmuh hmaih hauh lo tur a, sen lar anga awm, sual nghet tawh sen duk tak mai chu vur anga var leh beram hmul anga a awm leh theih nan ama thisen ngeiah chuan min lo suk fai sak ta a ni.

c) Chil an chhaka an vua : Hnam tihdanah chuan an roreltute chu anzahderna leh an tan an rinawm a ni tih entir nan an fawp thin. Sipaite chuan Lal ber chu zahderna aiah hmusitna chil an chhak ta. Rorelna niah zawng chil an chhak hauh lovang le. Keimahni avang hian a lawm kan Lalpa chu hmusita chil chhak a tuar le. Keimahni vang a ni miten an nuihsawh le.

Kan nu leh pa khan Eden huanah Pathian thuaiwh aiin anmahni duhdan zawm an lo thlang ta a. Pathian chu chil an lo chhak khum ta. Vawiin thlengin Pathian aia keimahni duh dan leh khawvel thil kan thlan hian ama mite chuan a hmaiah chil kan chhak reng a ni mai lo maw. Amah zah leh atana rinawm zel aia amah do zawnga chet chu ama chunga chil chhakna ang anih chu. Pathian ngei chuan kan sual sen lar anga sen tawh te vur anga a var lehna tur te, kan bawlhhlawhna te chu silfaina tur te, kan sualna zawng zawng ngaihdamna tur tein amah ngeiin Krawsah a tuar ta.

I ngaihtuah chiang teh ang. Kan sualna zawng zawngte chu a chungah nghaha a awm avangin chilchhak khum tlak, vuak thitlin tlak a ni reng a ni. Chil an chhak khum leh an nuihsana kha amah Pathian a ni lo, kan sualna zawk kha a ni. Kan sualna chu tisain he khawvelah ngei hian mihring mithmuhah hrem a ni ta a ni. Kan sual phur tura a fapa neih chhun pawh ui lo va minpekah hian Pathian hmangaihna thuk zia pawh kan hre thei (I Joh. 4:9). Kan tana a tuarna hian a hmangaihna chu thu chauh ni lova, a taka a hlen zia te min hriattirin, a hnen lamah min hip khawm a ni. Chu hmangaihna thuk chu kan hnar phal dawn em ni. Chil chhak khumin lal anga lal lukhum leh luang tiang te pein chibai kan la buk der phal dawn em ni.

d) Hling lukhum leh lal tiang an pe :
Hling lukhum hian khawvel lalram chu Pathian anche dawng ram a nih zia min hmuh tir a, Hling chu Pathian anchhia entirna a ni, sual avanga lo chhuak a ni (Gen.3:18). Sual avanga Pathian anchhia kan phurh entirna a ni. Isua chuan sual vanga Pathian anchhia kan dawn chu a lo phur ta. Keimahni avangin anchhe dawng a ni; anchhia lak ata kan chhuah theih nan “Krista chu kan aia anchhe dawng lo niin, Dan anchhe lak ata min tlan chhuak ta; (‘Thinga khaikan apiang chu anchhe dawng an ni,’ tih ziak a ni si a;)” (Gal.3:13) tih ang khan.

Lal tiang atan luang an pe hian sual lal ram ngheh loh zia a entir (Mat.11:7). Sual lalna hmun keimahni ngei kha entirin, kan ngheh loh zia leh rintlak kan nih loh zia min hmuh tir a, chu nihna ngei chu amahin phurin Lal ram tha zawk min din sak turin chung ram reh zawng zawng chu min fan chhuah sak ta.

Vawiinah hian Lal Isua meuh hling lukhum leh Laltiang an pe hi awm lo kan ti mai lo maw? Mahse a awm lo titute hian hling lukhum kan khum tirin Lal tiang atan luang kan pe ve mai em? Krista lal a ni, engkim chunga thuneitu hnehtu leh chak ber a ni titu ni si a, amah zahna leh amah tihna nei chuang lo te hian a derin chawimnawina hlinglukhum kan khum tir a, a tak ni lovin lal tiang kan pe thin a ni.

e) Lal angin chibai an buk :
A hmaah an thingthi a, “Chibai, Judate lal!” tiin nuihza siam nan an hmang a. Kaisara chibai an buk dan chuan an buk el vel a nih chu. A thih dawn hmunah Lal dik tak chuan chibai bukna a dawng a. Tunah nuihza siamnan min chibai buk mah se, chung nuihza siam nana chibai buktute chuan khup tinreng ahmaah an thingthit hunah chuan chu Lal hma ngeiah chuan an khur chunga dingin chibai an la buk dawn; chumi hunah zawng an nui tawh hauh lo vang le. (Phil.2:9-11)

Vawiin thleng hian thlarau leh tih tak zetin Lal anih ang hian chibai kan buk ve em? Khawvel lal ai pawh hian kan hlau lo zawk a ni lo maw? A huhoa Pathian tih a, amah chibai buka, a fala awm leh hlawkna a awm dawn veleha Pathian theih nghilh leh si kan nih chuan Lalpa chu fiamthu ang lekin chibai kan buk tihna a ni ang.

Lalpa lungngaihna niah hian kan tawrpuiin kan tahpui fo thin. Eng nge kan tah chhan? Kan tahpui chhan tur chu kan sualna leh chungpikna a ni tur a ni ang. Isuan “Nangmahni leh in fate tan tap rawh u” a tih kha. Kan sualna leh chungpikna phurtu Isua tahpui aiin kan sualna leh chungpikna chu kan tah chhan tur a ni. Thinlung lungchhia leh inchhir ngawih ngawi chu a hmusit si lo. Kan sual vanga lungngaihna leh inchhirna chuan Krista hmangaihna min hmuh chiantirin a tana inpekna nunah min hruai lut dawn a ni.

3. A vuakna vualtea tihdamin kan awm ta

Kum za vel kal taah khan sipai thuawih lo te an hremdan pakhat chu savun kawnghren ang, hling ang deuh hian an vaw thin a. Thisen a chhuak zawih zawih thin. Vawi khat chu sipai pakhat hian pawisa a ru a. A rutu chu a inpuang duh lo va, a rutu chu an hriat chhuah theih loh avangin an Oficer chuan a sipai zawng zawng a dintir a, nasa tak hrem turin thupek a chhuah ta a.

Sipai zinga la naupang deuh Willie chu a lo chhuak a. Officer hnenah chuan “Ka pu, “Sipai zawng zawng hrem annih ai chuan keimah hi min hrem mai la, ka tuar mai ang e. Pawisa rutu chu ka ni lo va, a rutu tuar ai ka tuar sak mai ang” a ti a.

Officer chuan Willie-a chu an en thin a, a chak loh hmel si a, a hrem chuan a dam zo lo mai ang tih a hlau hle a. Mahse, amahin midang tuar ai tuar a huam tlat avangin hrem a ni ta a ni. Thingah a phuar bet a; savun hrui chuan an hlap ta thuai mai a. An hlap leh thuai chuan thisen a lo chhuak ta zawih zawih mai a. A vawi thumna atan a hlap dawn lai tak chuan pawisa rutu sipai chuan a lainat lutuk a, a rawn zuang chhuak a. “ti tawh suh u, ti tawh suh u. Keimah hi pawisa rutu chu ka ni a, keimah min vaw tawh zawk rawh u” a rawn ti ta a ni.

Officer chuan pawisa rutu chu a han hrem dawn a. Willie-a chuan “A aiah min hrem tawh a, ani chu inhrem thei tawh lo vang, ka tuarsak tawh a lawm” a ti a. Pawisa rutu chu hrem lohin a awm ta a. Willie-a erawh chu a hliam nasa tak avangin chu mi zan chuan a thi ta nghal a. Rukru pa leh sipai zawng zawng tuar ai tuarin a thi ta a. Rukru pa chu a inchhir em em a, Engmah a ru tawh ngai lo a ni an ti.

Kalvari tlang i thlir teh ang. Chutah chuan keini rukru thin, tlan bo thin, hel thin chung pawha mahni inthup thin aiawhin kan Lalpa an khai kang. Tanpuitu pakhatmah a hmu lo. Nimahsela, Lalpa chuan kan khawlohna chu a chungah a nghat ta a; ani chu kan bawhchhiatnate avângin hliamin a awm a, kan khawlohnate avângin vuak thitlinin a awm a: kan thlamuanna tûr thununna chu a chungah a tla a; a vuakna vualtea tihdamin kan awm ta.

A tuarna hmuchiang apiangin Pathian hmangaihna thukzia an hmuchiang thin. Krawsa an khenbeh chhung khan mipui leh sipai za hotu te, Lal Isua hmelhriat te zawng zawng leh Galili ram atanga rawn zuitute khan thil thleng zawng zawng an hmuh hmaih lo. Lal Isua, an khenbeha hmelah ngei khan tuarna hmel aiin hnehna leh hmangaihna hmel an hmu a. An sual zia leh chungpik zia chu darthlanga kan hmel kan hmu aia chiang mahin an hmu ta. Inchhira awm chum chumin an inlam an pan a. Hnai taka hmutu, an tih dan zawng zawng hmaih nei hauh lo a report lehtu tur sipai za hotu ngei mai khan “He mi hi matheilovin mifel tak a ni phawt mai,’ tiin Pathian a fak ta hial a ni kha. Vawiina Good Friday hmangtu zawng zawngte hian Kraws-a Isua tuarna hian kan sual zia leh chungpik zia min hriattir ve se, Pathian hmangaihna hmelmawi tak chuan kan thinlung leh nunin amah min fak tir ve se a va duhawm em!

Phar natna vei ten an lo dam lehin inthen nan sava pahnih hlan atan an rawn keng thin. Sava pakhat chu thatin a thisen chu belah emaw an dahkhawm a; sava pakhat chu thisenah chuan an chiah a, thisen kai hnuang chung chuan pawnah an chhuah zalen tir ta thin a ni. Sava thah tak chuan Chhandamtu, vuak tuara chu a entir a, sava pakhat anga tupawh rinna hmanga chu thisena inchiah a, an puante sufai apiangte chuan an thlarau chu Pathian hnen lamah thlawkin, sual avanga zalenna avangin lawm takin an tlantu chawimawina hla an sa ta a ni. Vawiian hian sual vanga Pathian vuakna leh hremna tuar te, lungngiahna leh nuisawhna zawng zawng te phurin kan tan a tuar ta. Chu a tuara chu misual zawng zawng tena an tuar tur hremna anih avangin a na a, thihpui tham hial a ni reng a ni. Chu sual natna lak a ta chu min chhanchhuak a, zalenna mak tak min pe a. Harsatna leh manganna karah te, tihdamtheih tawh loh natna hmunah pawh hah lo vin thlain min thlawh tir a, chau lovin kein min kal tir ta. a ni. Chuvangin, vawiina hian Lal Isuan kan tan a tuarna zawng zawng chu hmaih nei hauh lo turin ngun takin thlarau mitin thlir ila. Sual avanga kan chungpik zia te, Pathian hmangaihnain sual min hnehsak zia te chiang takin kan hmu ang a, Lalpa kan fak thei dawn a ni. AMEN

Similar Posts:

Recent Posts:

6 Responses to “ISUAN KAN TAN A TUAR (Good Friday Sermon)”

  1. 1
    lr hlonchhing Says:

    Chhiar ang aw…

    Report this comment

  2. 2
    chhana Says:

    Sipai rukru an tawrhsak chungchang hian min hneh takzet a ni. Lal Isua min tlanna hi ka hrethiam emaw ka lo inti reng a; tunah chuan ka chiang lehzual ta. Ka lawm e.

    Report this comment

  3. 3
    misualcheetah Says:

    chhiar a nuam in rilru a khawih khawp mai a.

    Report this comment

  4. 4
    Sihtea Says:

    Chhiar a man hla in, ka rilru a khawih hneh hle mai.

    Report this comment

  5. 5
    Awmtea Leo Khiangte Says:

    Lalpan kan tana a tuarna hi chu sawiin a siak lo ve. (Y)

    Report this comment

  6. 6
    caribou Says:

    Post tha leh hlu tak anih hi.

    Report this comment