DRUGS ADDICT PAWIZIA CHU – Afaka

March 28th, 2013 8:15 pm by Afaka_saron

Thuhma : Tunlai hian Ruihhlo ngawlvei kawlaiah hmuh tur an tam leh ta khawp mai a, midangte pawh zah zo lovin khawlaiah Denrite an hip a, Zu an in bawk a, thenkhatin min inchiu khum ngawng ngawng bawk a, engtin nge kan tih tak ang? Tan kan lak ava ngai tak em.

Enkawl thiam an har a, enkawl loh tawp chi lah an ni bawk si lo, N.G.O. te leh Kohhran hrang hrang pawh hian, heng mi te’n nun kawng dik an zawh ve theih nan theih tawp kan chhuah ve tak zet a, kan duh ang chuan hma kan sawn chak hlei thei lo a ni. A enkawl dan kawng kan hriat dan in ang lo tak tak chu kan hmang kim ve ta khawp mai a, tha chhuak ta sawi tur pawh an awm nual ngei ang, duh thu erawh a sam tak tak thei lova, indem ngawt theih pawh a ni lo, enkawl thiam an har tak zet a ni e.

Hriat ve mai mai atan : International-ah hian Drugs hi chi hrang hrangah an then a, Central Nervous system-a a thawh dan atangin an then hrang a, eng Substance pawh kan taksaa kan lakluha kan awmphung a danglam dan a zirin an then a ni.

International-ah hian Alcohol hi Drugs-a pawm a ni a, Mizoramah erawh Zu leh Drugs chu kan then hrang daih thung niin a lang. Ruihhlo hi miin a lo Addict chuan a thluak a khawih a, a rilru 75% a nghawng a, 25% chauhin a taksa a nghawng thung. Doctor hnena inentir dawn paw’n rilru lam Doctor chan an ni a. Taksa a nghawng aimah chuan rilru lam a nghawng hi a pawi ber lai chu a ni.

Ruihhlo ngai 70% hi hnathawh mumal nei lo an ni a, miin hnathawh mumal tak an neih loh chuan Addict-na chance a sang a ni. 70% bawk hi chhungte belh tur nei an ni a, a bak chu chhungte belh tur mumal nei lo an ni thung.
Drugs Addict pawizia mai chu : An mahni maiin an tuar lova, an chhungkua leh khawtlangin kan tuar a ni. Engtiang takin nge kan tuar, a mihringa zir a ni teh meuh mai a, tunah chuan a tlangpuiin kan kaikhawm ang.

Chhungkua-ah
1) Bungrua an hralh
2) Inlaichhinna an tichhia
3) Zahna nasa tak an thlen, mizingah Inthlahrunna an neih nasat phah
4) Sum leh pai an ti hek
5) Tahna nasa tak an thlen a, an rilru a hliam a, an nunphung a hniam phah thin.
6) Helna an chawkchhuaka inremlohna nasa tak a awm phah.
7) Khawtlangah thil bo a tam a, mipui an ralmuang lo.

Ka’n tarlan tak khi a ngawng pawi tlangpui a ni a, hei chauh pawh hi pawi tham tawh tak a ni. Drugs Addict-a khan amah maiin a tuar lova, a chhungte’n an tuar nasa em em a ni. Drugs Addict-a aimah khan thenkhat phei chuan an tuar nasa a, an rilru a tihahin a tihrehawm a, an hriselna thlengin a nghawng pawi thei a ni. Chutah tak mai chuan ruihhlo ngai tluk zet khan buaipuiawm an lo ni ve thei reng mai a, chuvang chuan an rilru hrehawm leh buai thawpik lutuka ta chu an inchhuah zalen thiam ve a pawimawh em em a ni. Tihdan tha ber chu ka hre hauh lova, pakhat ka pawm em em mai chu, “Ruihhlo ngaia kha i control thei tawh lova, a tlai lutuka tihngaihna a awm tawh lo a nih chuan mahni in-control tum zawk tur” tih hi a ni. A awmzia chu ruihhlo ngaia kha buaipui tawh lo tawp rawh tihna lam a ni lova, i rilru put hmang buai mangang leh nangmahina i tuar phahna zawng zawngte tinep turin incontrol rawh tihna a ni.

Addict ngei tan hian ava pawi em
1) An hun hlu tam tak an hlauh
2) Mi ang lovah an insiam, mite tan hmuhsitawm an tling
3) An taksa hmel mawina leh an hriselna a tichhia
4) Dawt sawi, mi bum leh thil ruk an hrat
5) An rilru nasa takin a hliam (Mizinga inkiltawihna, mahni inhmuh hniamna etc.)

A dang tam tak la awm mahse, duh tawk phawt teh ang, khi chuah pawh khi dam leh tur chuan thapui chhuahna tham a tling tawh a ni. Ka’n sawi tak ang khan 75% in an rilru a ngawng kan tih tawh kha, a pawi ber leh a dam har ber lai a chu a ni ta a ni. Rilru lam a nghawng nasat em avang hian nunkawng dik zawh leh thei tur chuan, ruihhloa kha ti lo ngawt thei mahse, an rilru lam enkawl zui a ngai tlat a ni. Entirnan : Ruihhloa kha a lo thlah ta a, mahse, a chhungte’n an hauh vang te, a bialnu’n a ban emaw intihthiam loh vang te, Kohhran emaw K.T.P. hruaitute’n tawngkam thlum lo deuh an neih vang te, thihna avangte leh hlawhchhamna engemaw deuh an neih vangte’n an ti leh mai thin a, hei lo pawh chhan tam tak a awm thei ang. Ngaihtuah la, chutiang avanga ruihhlo han tih leh ngawt mai chu, ruihhlo an chak vang hrim hrim lam kha a ni tawh lova, thinrim vang te, mangan beidawn vang a ni tawh zawk a, chu chuan rilru lam a nih zia a tichiang em em a ni. Chuvang chuan alawm Addiction hi a dam thei tawh lo an tih ni. Engemaw hlekah rulpui muhil a rawn tho leh at zel a, chu chu reh thei tawh lo mahsela control theih a ni.

Ruihhlo chu thlah fel ta tak tak mahse, rilru lamah insitnain hmun a chang lian zui hle zel thova, a thil lo tihsual tawh zozai kha zahna tham chu a tling hle reng a ni. Mipangai thiante a lo kawm ve tan ta a, ruihhloin a taksaa hnuhma tha lo tak tak a neihte avang chuan a ruk takin a inzahpuia a rilru lamah ngawng lian tak a nei a ni. Mi tam takin an la ringhlel hle zel thova, a chhungte ngei paw’n rin chu an duh a, mahse, rinawm loh thin a nih miau avangin rin tak tak a har tawh a ni. Amah ngei pawh chu damkawr a nih avangin a rilru lama fello tam tak awm chu a tihreh a ngai a, vawilehkhata reh thei a nih loh vangin zawi muanga incontrol a ngai a ni.
A venna lam aiin Treatment kan uar zawk em ni? : Prevention aiin Treatment kan uar zawk hi a pawi khawp mai a, kan hriatna la hniam vangah te pawh a puh theih awm e. Ruihhlo ngaite enkawlna kawngah hian ngaihdan thar leh chhindan thar a pawimawh em em a. Tunah hian Mizoramah Ruihhlo ngai enkawlna 40 vel bawr kan nei a, ka chiang ngam ta chiah lova a zat fak sawi tur chuan mah se, ka sawi sual a nih paw’n ka sawi sual tamin ka ring lo. An inenkawl dan pawh a inang lo nuk mai, Pathian thu lam hawia inenkawlna kalpui an awm laiin, thenkhat chuan mithiamte duan chu Mizoram mila siam remin leh Pathian thu nen kaikawpin an enkawl a, a that dan pawh a inanglo thei hle awm e. Addict Centre leh Drop-in Centre kan ngah ang hu hian a venna lam hi kan uar lo hian ka lo hre ve mai mai a, a vendan lam hi kan hre lo nge ni ka hre hauh lova, tuna kan kal danah hi chuan Prevention lam aiin Treatment hi a ri ring zawk tlat a ni, Treatment hi chu a awm ngei ngei tur a ni a, a venna lam hi tun ai hian uar i la, buaipui ngai hi kan tlem tial tialin a rinawm. HIV & AIDS pung zel tur erawh kan veng thiam hle si a, ngatinge Mizo thalaite ruihhlo ngawlveinaa an lut tur hi kan ven thiam loh, ngaihtuahna hman a tul tak zet a ni.

Tlangkawmna : Ka’n sawi tak zawng zawnte khi ka experience leh he lama training ka lo kal ve tawhnate khawnkhawmin ka rawn ziak ve a ni a, ka experience leh training te erawh ka chhuang hauh lova, chhuan tham pawh a tling hek lo. Ka hriat tlem ve teh lul nen ka vei ve si a, ka hriat ang chhun chhun ka’n thailan takte khi a mamawhtute tan hlawkna nise ka va ti em.

Similar Posts:

Recent Posts:

9 Responses to “DRUGS ADDICT PAWIZIA CHU – Afaka”

  1. 1
    Borat Says:

    A va pawi ve. Engtia han tih chi nge ni dawn aw? Engemaw ti zawng chuan Holy Week (Passion Week) laia post awm reng anih hi. Pope Franis I in tleirawl convict ho ke a sil dawn an tih leh Afaka_saron attitute hi a in zul riau in ka hria

    Report this comment

  2. 2
    Atom c Says:

    Tha hle mai. (Y)

    Insum thei mi leh huaisen tan chuan inhai chhuah harsa em em a nih ka ring lem lo, drugs a ni emaw, nilo emaw, mi tamtak sawi tur pawh an awm ang. Dawihzep leh insumtheilo bawk hi tal buai tur chu kan ni mai ang.
    Inven dan leh inenkawl dan hi a pawimawh double bawk. Hetiang lama tan lak nachang hriat hi a hlu takzet.

    Report this comment

  3. 3
    chhangte_ll Says:

    Eng Addict nih mah hi a tha lo, misual.com addict nih tiamin. Mahni in tumna nei si lo buaipui leh vei chiam hian awmzia a nei thuilo khawp mai. Hard Labour Camp ah a reilo ber a kum 3 tal khungkhawm vek chi.

    Vawin ka inlengpa nen kan sawidun chiam.

    Report this comment

  4. 4
    misualcheetah Says:

    A bengvar thlak khawp mai i thil post hi i ngaihdan hi ka pawm zawng tak ani, hetiang zawng hian kan ngawlveite hi enkawl ta ila hma kan sawn ka ring tlat.

    Report this comment

  5. 5
    Sangpuiipa Says:

    Post tha tak a ni.

    Report this comment

  6. 6
    lr hlonchhing Says:

    (Y)

    Report this comment

  7. 7
    Awmtea Leo Khiangte Says:

    Tha kher mai…. (Y)

    Report this comment

  8. 8
    caribou Says:

    Good post

    Report this comment

  9. 9
    Sihtea Says:

    A tha hle mai. Kan Lal Isua hi Addict
    theuh i la, a hah dam thlak ber ang.
    Cha tuan nun neih na a la ni zui.
    Hlep hlang hlep hlang a ni mai.

    Report this comment