‘D’ Zunzam

March 5th, 2013 6:09 pm by Dr Mahminga Sailo

Khua ka chuan a
Thlal khaw romeiin tlangtin a bawm paw chi chiai a. Mi tin mai chu an hnathawhna hmun panin hmanhmawh takin an liam zung zung a. Kei erawh exam zo chawlh kan hman lai a ni a. Mahse, kan khuaa ka haw ve theih loh avangin hostel run reh ruih ka nghak thung.

Amarawhchu, nghah ka neih avangin chu hmun khawhar leh reh ruih chuan ka nun khawhar chu min hnem zawk emaw ni! Ka chenna ep chiah tlanga tuahpui par sen hlar mai te, vaube par buk leih mai, thlifimin an chhem bu leih leih te chu hmuhnawm ti takin ka thlir a. Khawvel mawina chu sawifiah thiam lo mah ila, ka nghah tleitiri mawina nena hmehbel velin, khawhar ang reng takin ka hlim veng veng lawi si. A ni, khawvel chuan ngaihno a bei ngawih ngawih a sin.

Ka nghah chu
Thiamna run belin thla thum emaw lai hmun dangah min awmbo san a. Ka va’n ngai thin teh reng em! Tunlai angin inbiakpawhna hmanrua kan nei der si lo. Thaikawibawngte tir dawn ila, hostel-a awm a nih avangin tih chi rual a ni si lo. Dam leh hrisel tha tak sia, thla thum ka hman tawh a zawngah, kha hun kha a rei pawl tak a ni awm e.

Mahse, a chhia a chhiain han dam ve phawt ila, hun chu a lo liam ve zel mai a lo ni. Hostel atanga a lo chhuah hun chu a lo thleng ta mai chu a ni kha.

Ka hmangaih che
Kum chanve dawn lai kan nih ve tawh avangin kan innel ve tawh viau a. Engkim kan inhrilh tawn ve thin. Fehrehsan hun a pel hret tihah chuan an dawrah ka va leng a. Vanneithlak takin a nu te’n dawr bungrua an lak avangin ama’n dawr a lo nghak a. Nghakhlel taka ka lo nghah chu, a hma aiin a tha leh zualin ka hre lehnghal. Innel tawh viau e ti lo chuan ka lai thar leh deuh te’n ka hre thul. A, a hmel hmuh ngawt pawh khan ka mur chiai chiai a ni ber awm e. Nula lian teh chiam ni lo mah se, thiltihtheihna erawh a nei chiang a ni.

Kan titi dun a. Chutah chuan hmeichhe nihphung ka hrethiam ve chauh nia. Kei aia nau zawk ni si chuan, hmangaihna a lo hre ril zawk niin. ‘Kum chanve dawn ni tawh mah ila, ka hmangaihzia che hi, vawiin hian ka hrechhuak chiah’ a’n ti mai chu(h). Kei rawlthar ngaihdanah kha chuan, ka bem nia yes a tih khan min duh em emin, min hmangaih ve bur turah ka ngai ngawt a. A ni der lo! Min hrilh tirh phei chuan ka lung a awi lo tep.

Ani chuan, ‘tlangval min bemtute kan yes ringawt hian kan duh tihna a ni miah lo. In nungchang leh mizia kan thlir ru ve reng che u a. Chuta tang chuan duhna leh hmangaihna che u a piang ve chauh alawm. Tlangvalin in duh duh in bem a, hmangaiha in inngai ringawt ang kha kan ni ve hlei nem a ti a. Englekhawle, thudik vaklo pawh sawi se, ‘a dik alawm’ tih mai kha a awl riau; a thusawi chu ka lem duak duak a ni ber e.

Khuanu themthiamzia hi
Inhmuh a zin poh leh kan inthlahlel a. Engemaw avanga nula dang thik a, a’n tihtauh te hlei hlei khan a nuam emaw ni. He leiah hian a piang ve tih pawh ka hriat miah loh; a sakhmel ka tawn hma atanga tlangkam atang ngawt pawha hmuh ka chak, ka tawng ta cheng a, ka bawhzui ruak ruak kha a ni a. Chinlem nei lovin ka virpilh lo chauh a nih kha le. Nula dang tam tak, ani aia lian leh no tak tak paw’n ka taksa leh rilru an khawih danglam loh nen, ani erawh a hmel hmuh lohvin thinglung a luah a, a bula awm lahin kalsan mai a har bawk si.

‘D’ zunzam hi zawng a mak ngawt mai. Eng eng formula hi nge inchawhpawlh ber ang le?

Similar Posts:

Recent Posts:

10 Responses to “‘D’ Zunzam”

  1. 1
    chhangteval Says:

    Ziak thiam hle mai (Y)

    Report this comment

  2. 2
    Awmtea Leo Khiangte Says:

    Chhiar dawn ang.

    Report this comment

  3. 3
    century child Says:

    Ngaihnawm e. (Y)

    Report this comment

  4. 4
    saint sammoo Says:

    uite atangin nula…. Kan thianpa hi a romantic sawt riau mai..
    Next post chu nupui neih lam lo beisei teh ang..haha..

    Report this comment

  5. 5
    Dr Mahminga Sailo Says:

    @ saint sammoo.. Thu leh hla atang tala kan beih tan loh chuan, mi hnungah kawl ek ka thai phurh phurh ang tih ka hlau ve deuh a.. :-D

    Sik leh sa a zir hian, lunglen pawh a lo danglam ve zel a nih awm hi maw.. :-)

    Report this comment

  6. 6
    Jacka Pi Says:

    A ti deuh tan tak tak tawh a ni awm e :)

    Report this comment

  7. 7
    chhana Says:

    I post hi nizanah kan nun a hawng a; ‘Mahminga hian nula a duh awm hle mai’ a ti che. Mahse, ngaihzawng i neih reng thu ka sawi chuan a ngawi ve mai bawk a. I chhas kha ka hre rin ran a nia. he he he.

    Report this comment

  8. 8
    vakul Says:

    Ngaihnawm hle mai. Mahminga hi i luang liam thei reng a tluk loh rim i nam.

    Report this comment

  9. 9
    mama Says:

    ngaihzawng neih hi a nuam a ni

    Report this comment

  10. 10
    Dr Mahminga Sailo Says:

    @ Jacka Pi… Ka tan tak tak tawh dawnnn.. :-)

    @ chhana.. In nu chu a fel hle mai, ka mamawh a hria.. ;-) Chhass ka nei teuh a, min chhass ve lo hi a rilru natthlak.. :-D

    @ vakul… I tilawmawm thin e. Kan luangliam zawih zawih reng chu a nih hi.. :-)

    @ mama.. Chuvangin ka nei ve vat dawn… :-)

    Report this comment