FA-LAK NUN (Adoption awareness atan)

March 4th, 2013 9:00 pm by BigDaddy Hmahmatea

FA-LAK NUN { True Story }

************************

Adoption awareness atan.

Keima thian bulhnai te ngei in an mahni thil tawn leh dinhmun min hrilh atangin fa-lak ‘adoption’ chungchanga thil awm thei te ka rawn sawi chho ve dawn a ni. An mahni nihna leh hming leh veng erawh chu tarlan a rem lo anga, chuvangin hming leh veng erawh ka rawn sawi lang lo thung ang.

KA THIANNU CHU: Ka thiannu pakhat chu nausen te kum hnih pawh ala tlin hma atanga a nu leh pa te harsatna avanga mi hausa tak chhungkua ina fa atana an lak a ni a. Amah hi thla kimlo a piang a ni nghe nghe a. A la tu te chungkua hi chhungkaw awmthei tak mai a ni a. a duat pawh an duat a. A mamawh ang apiang an tih sak a, tlakchham neiin an siam lo reng reng ani. A te te atanngin engkimah mi aia tha ber zel an tih sak a, mahni fa tak tak ang chiah in an hmangaih in an enkawl a, a duat pawh an duat nangiang mai. Amah chu an adopt ani tih pawh an hrilh duh miah lova, an mahni rila rah ang tak takin an hmangaihin an enkawl seiliana mahse he kathiannu hian tlakchham a nei tlat mai le…

A tette atang chuan an buaipui em em a, amah thlakimlo a piang a nih bakah lung lam thatloh nei a lo ni bawk si a, a damloh te, a nat te, engemaw tlang hri leng hlek a kai te hi an hlau em em a. Chumi avang pawh chu a ni maithei a , thian a kawm te , pawna han infiam te leh naupang dangin an tih thin ang hi engmah a tih an phal tlat lo mai a, a nihna takah chuan an ‘over caring’ a ni ber mai. Mahse ka thiannu chu mihring pangngai ve tho anih avangin thian han kawm ve te, naupang dang zinga han infiam ve te, ama sawi dan takin balu a han chen ve te, tui hawk han khuah ve te  pawh a chak ve em em thin a mahse chung zawng zawng chu phal sak a ni ve tlat lo mai. Eitur pawh nise naupang dang in khawlai a an thil ei ang te pawh ei phalsak ani ve lo a, inchhung ami, a nu leh pa ten a thianghlim tawk, a tha tawk a an ngaih bak a ei an phal ngai lo a, naupang dang angin alu leh papawr te pawh a ei ve chak thin tho, vai vur zawrh te pawh a ei ve chakin mi theihai lawh ruk te pawh a chak ve thin, mahse chung zawng zawng chu a tan a thiang ve lo. Khappbeh a ni tlat. A tan chuan naupang dang angin naupang nun hlimna enjoy theih a ni ve lo.

Chutiang chuan ka thiannu chu a lo seilian chho ve zel a, nula hleitling leh hmeltha tak mai , lehkha pawh thiamthei tak mai a lo ni chhovin nulat a rawn hre chho ve tan a. Thnenrual han kawm a, thian han kawm te, ngaihzawng han neih a han in date ve te pawh a chak ve thin, mahse a tan chuan chu chu a theih ve tlat loh mai. A nu leh pa ten an hmangaih loh vang a ni reng reng lo. An hmangaih lutuk a, an duat a a duhzawng apiang an tihsak thei..mahse mihring hi kan inang lo tlat mai a a lungnatna chuanlamin an ‘over-carring’ tlat mai.

Engemaw hlek ah a nat an hlau a, a hunbi teah lo chuan a tan engmah tih theh a ni lo. Tui khawih hun, mut hu, TV en hun, computer khawih hun, inleng a neih ve pawn, a kawm hun chhung tur thleng a bithliah sak thlap ani tlat. Tin social networking lamah te pawh a tui ve in nuam a ti ve em em thin a, mahse a thian te a biak thin te nene pawn lama an inhmuh te phal sak a ni lo a, a chhuah chuan chhung kua a chhuah chauh phal sak a ni a, an tel lova a chhah chuan engtin emaw awm dawn tlatin an ngai a. Inleng te pawh han nei ve thin mahse a inleng te hnenah a hrisel loh thu te, pawn boruak a zawh ve loh thu te, a thawmhnaw hak tur, a mut hun thleng a an bithliah sak thlap thu an lo hrilh thin avangin tu tan mah han rim ve fo ngam chi a ni hek lo. He ka thiannu tan hian nun zalenna a awm ve lo..a khawvel chu zim tak a ni tawp mai a, jail tenauah a tang a ni deuh ber mai.

He khawvel thil nawmsakna kan hmuh phak ang ami hi chu neih phak loh a nei bik lo. A nu leh pa te chuan a ngen apiang an tihsak thei..mahse a nun ah chuan ruak a awm tlat. Mihring pangngai a nih ang a mihring pangngai nun ‘social life’ chu enjoy ve aia thlakhlelh a nei lo a ni. Amah hi an adopt a ni tih hrilh an hlauh  leh duh loh em em laiin tlangkam atangin a lo hre ta tho a. A nu leh pa te pawhin na an ti ngei mai, mahse an hmangngaih ngai rengin an hmangaih a, tin amah pawhin engmah en hranna a nei chuang lo. A nun erawh chu an hmangaih loh vang leh an tihduhdah vang ni miah lovin, an duat leh care lutuk avang zawkin chep takin a awm ta a ni.

Thil eng pawh lo ti in thil eng pawh lo eiin in sela, engemaw tlang hri leng hlek lo man palh se, “ I chumi khami tih vang anih kha,” tih a hlawh zel bawk si a. Engemaw han ti dawn in len te pawh han leng chhuak ve dawn in, a chak ber mai thian te pawh han kawm ve dawn se, “ I chuti ang i kha ti palh ang,” tih a hlawh zel bawk si..ama nih phung pangngai bakah an duat a an care lutuk na lamah mentally leh psychologically in an ti damlo a ni ringawt mai a. Tunah hian engkim nei thei siin nun khawhar leh ruak tak siin a hun a hmang chho mek a ni.

 

KA THIANPA VE THUNG: Ka thianpa pawh hi a nausen tet atanga a nu leh pa hian fa an neih theihloh avangin fa atan an lak a ni a. Amah hi hnamdang a ni a a hmelah pawh a hriat khawp mai a. Fa dang an neih chuan loh avangin a nu leh pa hian an duat em em mai a, naupang te a nih lai atangin a duhzawng engkim an tih sak a, an mahni an lo khawsa thei ve bawk a rual awt deuh in an siam ngai lo hrim hrim a ni. A tet lai atangin a duh tinreng an tih sak a, a ngen apiang an lei sak a, a lo sei len pawhin mi sawi dan takah an duat sual ta reng a ni. Bike a duh leh bike an lei sak a , motor a duh leh motor an lei sak a, a awh zawng a neilo ang tih hlau reng reng in an buaipui thin a. Ani pawh hi tlang kam atangin adopt a ni tih a inhre phawt a tichuan tlang takin an hrilh ta law law a.

Mizo hi kan lo mak khawp mai a, kan tan a tangkaina awm miah lo leh , mi tana hlawkna awm miah lo hi kan lo sawi peih hlawm khawp mai a, tin mi hmusitte, an nihna ang tak a tawng khum te hi kan lo ching khawp mai a, hei tak hi a ni ka thianpa pawh hian harsatna a tawh tak na chu. Thiante ni a a ngaih te,thenrual tha ni a a ngaih te pawhin a nihna ang khawl khawl in tawng khum a tawk fo mai a. Social Networking lam te pawh hi nuam a ti ve viau thin a mahse na deuh deuh a lo ti tawk hi an lo awm leh thin a, chu chuan a nunah nasa takin  nghawng a nei tlat mai a. Mahni in ngaih hniam na  te a siam in rilru na tak tak in a awm phah fo thin a.

Chutih laiin a chen pui te ni lo chhung leh khat hnai lam atang thlengin hetiang tawngkam hi a dawng thin a ni. Ka thianpa hian min ring tawk a , a thuchhia- thutha engkim min hrilh ve thin a, vawi tamtak hetiang thil avang hian buaina kan tawk dun tawh in court lam te hial pawh thlen kan tum ve thut thut fo tawh thin a ni. He a nihna avang hian ro khawm chungcang thlenghin harsatna a tawk chho ve mek a ni.

 

KA THIANNU DANG LEH: He ka thiannu pawh hi kum khat leh thlaruk mi a nih a an lak a ni a, tunah hian kum 18 vel a ni ve tawh a. A nu leh pa te hi khawsa thei vak a ni lemlo a, mahse Pathianthu awih tak mai, kohhranah pawh rawngbawltu hlun an ni a. An fanu hi an theih tawkin an duat ve in an mahni hian fa dang an neilo a. A ni pawh hi tlang kam atang bawkin adopt ani tih a inhre tlat mai a. Mahse ani hi ala naupan ang hu ah a fing fel ve angreng a, a nu leh pa te lakah hian an fa tak anilo tih hria angin a awm lo in, a lan tir lo hrim hrim a ni. A nu leh pa te pawh hian a hria tih hi an hre lo a ni. A ni pawh hian Thiante leh midang lak atangin tawngkam rilru natna tak tak a tawng fo a a tawng mek bawk ani.

Ka rawn sawi duh ber chu, adoption chungchangah hian Mizo te hi kan la hniam angreng viau mai a. Fa nei thei lo ten fa an awt a, an han la emaw, khawiah emaw nausen khawngaihthlak tak mai an hmu a fa atan an la a ni emaw a enga pawh lo ni se in enkawl dan chungchangah te, thi a mipui vantlang lamah pawh lo in dawnsawn dan chungchangah te hian kan thiam hi a ngai em em in ka hre ve thin a. In duat pawn chintawk a awm a, in ‘care’ pawn in ‘care’ dan chintawk a awm a. Mihring mi pangngai ve tho an ni a mahni ril a rah fa hrin in an mamawh ang zawng zawng kha an mamawh ve vek a, chu mai nilovin hei ka thian nu chungchang angah te phei hi chuan social life nei hleitheilo khawpa duat a care in amah ah nun ruak, nun khawhar nei hial khawpin an siam a ni a. Tin ka thianpa chungchangah lah hian a mipui vantlang lam leh chhung te hnaivai in rilru na in kan siam fo thin a lo ni.

Hetiang lamah hian Mizo te hi kan harh chhuah a hun viau in ka hre ve thin a. Hetiang Fa-lak, adoppted ho reng reng chu an mahniin lak an ni tih an inhriat tawh chinah phei hi chuan, engkimah an rilru te hi a na hma bik a, an mahni an in ngaih bel hma a, chuvangin an bula tawngkam hman te, hawiher , mitmeng leh chetzia thleng hian an chhungte leh mipui vantlang lam te, an thiante pawh hi kan fimkhur em em a ngai a ni tih hi kan hriat tlan a tha awm e.

Tin nakin zelah fa lo la adopt tur zel te tan pawh fa awh vanga a remchang ang ang la mai lova, mahni ngun taka in ngaihtuah hmasa a, an in hriat chhuah hunah harsatna a awm thei ang em, rilru dang lo pu se kan rilru a na ang em, kan ril a rah te kan hmangaih ang tak in kan hmangaih thei ang em tih zawng zawng te leh harsatna an hmachhawn tur awm thei ang zawng zawng te ngaihtuah chiang hmasa phawt thin ila a duhawm khawp mai. Tin a mipui vantlang lam pawh hian kan sawi loh tur sawi te, an laka kan rilru put hmang ang ‘ an fa-lak a nia’ tih ang chi te, inhre miah lo tur kan tawngkam leh thu sawi avanga an inhrechhuak thin te hi sim in changkan a hmasawn lam i pan ve teh ang u.

Fahrah an la piang zel dawn, fa nei theilo an la awm chho zel dawn, mihring hian kan hma hun kan hre lo a, i fa kha adopt ngaiin a la awm ve thei, tin, nang pawh fa nei thei lo a fa lak ngai in i la awm ve thei…Kan Pathianthu chuan “ Thil engpawh miin i chunga an tih a i duh tur ang bawk chu, mi chungah pawh ti ve rawh,” a ti a nih kha i hre reng ang u.

BigDaddy Hmahmatea

(R.Lalhmangaiha)

Kulikawn

 

 

Similar Posts:

Recent Posts:

13 Responses to “FA-LAK NUN (Adoption awareness atan)”

  1. 1
    aikon Says:

    a va sei ve..nakinah chhiar ang

    Report this comment

  2. 2
    sheldon Says:

    Nu leh pa kara fa diktak nih loh chuan ‘engemaw’ hi chu a awmlo theilo. I thiante chu an vannei viau zawkin ka hria. Thenkhat chu fa anga adopt ve thlap, an lo puitlina awmpui anga treat tak tlat te pawh an awm ania :-S

    Report this comment

  3. 3
    Leo dtea Says:

    3rd 8-) em oo
    Mizo society a tawng chuangthlai kan cheh hnem lutuk hi chu a pawi thin zawng a ni e..
    Engpawh ni se i thian te chan chu sheldy sawi ang hian a la tha zawk mah e.

    Report this comment

  4. 4
    Awmtea Leo Khiangte Says:

    Chhiar dawn ila…

    Report this comment

  5. 5
    Phivawk Says:

    Tha dap dap khawp mai.

    Naupang adopt reng reng thil hrethiam rual an nih hnuah a latu nu leh pate’n thil awmzia chiang taka hrilhin, a latute rila rah fa diktak an nih lohna leh chuti chung chunga mahni rila rah fa dik tak anga an pawm thu hrilhfiah dap thin nise harsatna tam tak chu pumpelh theih a nih ka ring. Tlang kam atanga an inhriat ai chuan a latu nu leh pate’n chiang tak leh tlang tak maia hrilh hriat pawp mai a that zawk ka ring.

    Report this comment

  6. 6
    nupuiipa Says:

    A tha hle mai..kan mamawh tak tak te an ni hlawm e..tin, thian ineihte atang hian Mifel tak chu ini chiang mai …fak chiam ngai lovin. He thil hi chu han sutkian duak ngaihna pawh a awm chuang lo. tlem a an leikan thil awmzia an hriatthiam hnuah chuan thiam takin Pathian rawna gchung a inhrilh hriat hma a that hmel zawk e…tin i thian nu 1 na khi chu a vannei thlawt e…tiang tak khian enkawl lo se vawini a chanchin tha lam sawi tur leh comment tur kan nei hauh lovang. Pasal tha tak a neih hunah a la inchhir miah lovang ..Tin, ala THIANGHLIM ngei bawk ang tih hian KHUAHKHIRH hlut zia ati chiang lawm ni. Lo fuih sauh sauh rawh aw… A van nei thlawt e. An vanduaina chu an tan chuan malsawmnaah chan tir ni mawlh rawh se. Tin, hringtu nu leh pate aia hrinloh fate hamngih zawk pawh hi a awm theih hle awm a nia. ka lawm e.:
    (H)

    Report this comment

  7. 7
    Dr Mahminga Sailo Says:

    Thuziak hlu tak a nih hi. (Y)

    Nia, i thiante chu an vannei hlein ka hria. Fahrah, enkawltu pangngai nei lo an tam vei nen. Kan sawi loh tur kan sawi fo te, deuhsawh kan tina thei ang reng te hi, sim atan a tha ngawt mai.. :-)

    Report this comment

  8. 8
    Sihtea Says:

    E khai, i thian te chu an van nei in,
    an ham tha thlawt e. Khuah khirh tu
    nu leh pa tha tak Pathian in a pe
    hlawm a nih chu. Pathian leh an mah ni en kawl a, chawi lian tu an nu leh pa te chung ah, lawm hliah hliah tur
    an ni e. Chu ti’ang a en kawl a
    khuah khirh tu, nu leh pa nei lo se la chuan i thian te chuan, tun a an din hmun kha an pha teuh lo vang.
    Mi tu pawh in, kan fa tak te chu

    Report this comment

  9. 9
    Sihtea Says:

    A chung a mi chhun zawm na.
    Tu pawh in kan fa tak te chu,
    an that na tur in kan khuah khirh in,
    kan thu nun thin. Chu ti’ang a
    thu nun a, khuah khirh tu nei lo chu;
    Puala tawng kam tak in, Sawn fa
    an ni mai. I thian te chuan fa tak
    te chung a, nu leh pa in kan tih thin ang an dawng ve a nih chu.
    Mi hring te hi, Beram ang mai a
    mawl mang tak, kan tak sa leh thla rau tan a hlauh awm(tha lo) lam
    pan in, kan kal(peng)lui ngat ngat
    thin si a. Kan duhzawng chak zawng,
    nuam tih zawng ngei hian a lawm,
    lung ngaih na mang an na, bei dawn na a min hruai lut thin chu le.

    Report this comment

  10. 10
    Awmtea Leo Khiangte Says:

    A awmzia raih mai.

    Report this comment

  11. 11
    H.Vangchhia Says:

    Ziak fuh hle mai a (Y)

    Report this comment

  12. 12
    BigDaddy Hmahmatea Says:

    Kei pawh ka ngaihdanah chuan thil awmzia hre rual an nih a mahni ngei in hrilh hriat a, chutih rual a mahni hrin ang tho a kan hmangaihna a taka lan tir a tha ka ti. Hetiang fa adopt nei te hian an fa adopt te lakah hian inthlahrun a na duh khawp mai an ti aa dik ka ring khawp mai.

    Report this comment

  13. 13
    saint sammoo Says:

    Awi… AVSV..mahse chhiarchhuak thlap..
    A bul tanna…ka thian… Ti lova keima thian.. tih khi vai- mizotawng ava ang ve ti rilru chungin ka chhiar zo thak tho…haha..

    Report this comment