Jona Vang Emni Ninevi Khua Kha An Sim? {Sunday Pual}

March 3rd, 2013 6:00 am by Dr John

Thuhmahruai
Assyria mite sual turu dan hrechiangtu mi tam tak chuan, an sualte sim-a Pathian hnen lama an kir theih mai an ring ngai lo. Mahse, Assyria khawpui, a hunlaia khawvela khawpui lian ber ni hiala chhal Ninevi khuaa mite chuan Jona’n tlân pah-a Pathian thu tawi te a sawi chu an bengkhawn a, an ngai pawimawh a, an sualte simin Pathian lam an hawi phah tlat a nih chu! Jona Pathian thusawi (preaching) chauh hi nge an nunah awmzia nei a, thildang a tel ve? tih lai hi rilru-ah zawhna a lut nghalin ka ring, a pawimawh reng a ni. A chhan chu Pathian thu-in “an ţhatna turin engkimin a thawhsak hlawm ţhin” tiin min hrilh tlat a (Rom 8:26-28), hmanraw dang pawh Pathianin a hmang tel thei tih a chiang a ni.

Jona Thusawi Kha a Pawimawh Lutuk
Pathianin Jona hnena tih tur a pek chu “Tho la, Ninevi khaw ropui takah chuan kal la, anmahni kalh-in thu va sawi rawh” (Arise, go to Nineveh, the great city, and preach against it) tih a ni. Jona chuan Pathian duhdan ang takin thu ava sawi ta a, a thusawi hi a tawi ţek ţawk hle mai, “Tun achin ni 40-ah Ninevi hi tih boral a ni dawn e…” (Jona 3:4) tih ringawt a ni. Mahse, Jona hian Pathianin sawi tur a tih chin chiah a sawi avangin, a thusawi hi a thawk nâ êm êm a, Ninevi khuaa mite hian Jona thusawi lai tak hi hmu vek lo mahse, an inhrilh chhawng nasa a ni ngei ang tih a chiang a ni. Pathian thu ang zela kan nun te, thu kan sawi te, Pathian thu milh zela thil kan tih hian Thuneitu Pathian chuan mal a sawm ţhin a lo ni. Mi tam tak chuan Pathianin sawi tur min pek bak hi kan sawi thin a. Thlarauvin tih-tur min pek piah lam hi kan ti ţhin. Chuvangin, Pathian sawi tur hi kan sawi khalh a, Pathian tih tur hi kan tih khalh a, kan ropui khalh ţhin a, miten Pathian malsawmna tluantling an dawng thei ţhin lo. Pathian ropuina tur leh Pathianin thu min pek ang chin chiah chiah zelah hian kal ila, Pathianin chawimawina a channa-ah chawimawiin kan awm ve dawn a ni, “Ropuia alan hun apiangah ropuiin kan lang ve ang” (KHB No. 398).

Assyria Mite Din Hmun Kha A Lo Chhe Lutuk Alawm!
Sawi tawh angin, Ninevi khua hian harsatna tam tak an lo tawk a, an tawk mek a ni. Jona’n Ninevi khuaa Pathian thu a hrilh hma kum 773 B.C. khan Ninevi Khaw Lal Shalmanesar IV, Lal chak leh ropui tak chu kum la naupang takin a thi a. Fapa, amah thlaktu tur pawh a nei hman lo! Hei hian Ninevi khua chu hruaitu ţha nei lovin (political instability) a awm a ni. Kum 765 B.C. khan Țampuiin Ninevi khua hi a nuai tawh bawk. Kum 763 B.C. khan Indonaah an chak lova, hemi kum vek hian Âwkin Ni a lem zui bawk.

Assyria mite chuan  Ni-âwk lem hi Chhiatna thlentu (ill-fortune)-ah an ngai a. Hemi kum vek hian Tui a lian vak bawk (Tigris lui kama awm a ni). Kum 759 B.C. ah Țampui an tuar leh a. Țampui mitthi an tawrh vanglai tak hian Lir nâ takin a nghing bawk. An chunga thil thlengte leh an thiltawn-te avang khian, Ninevi khuaa awm-te chuan Jona Thuhril an hriat khan, “Pathian aw, Pathian warning a ni, zawm ngei ngei a ngai” tih an in-hre nghal a ni. Chuvangin, Pathianin, Ninevi khuaa mite thiltawn leh Jona Thuhrilh hmangin mipuite thinlungah nâ tak leh thûk takin thu a sawi ta a ni.

Kan Nun Atana Zir Tur
Piangthar hlim a tu-a te pawh mai hi an pianthar dan leh Pathian an lo rin tak dan han zawt chiang ila, Speaker (thuhriltu etc.) thusawi an ngaihthlak hma daih tawh khan an nunah Pathian lam hawi duhna leh, rilru lama lo inbuatsaih lawkna an lo nei vek tawh thu-ah hi an in lungrual ţheuh a rinawm. Chuvangin, Thuhriltu (speaker etc.) leh Counselor tan pawh, “Ka thusawi a ţha, a tla nâ tia in-chhuang thei leh chapo thei kan lo ni lo” tih hi hriat reng a ţul khawp mai. Ninevi khua khan Jona Thuhril chauh ni lovin, Pathianin an chunga chhiatna leh harsatna a lo thlen-tir tawh-te khan awmzia an nei a ni tih sawi tur an nei a ni tih a chiang tlat. Chuvangin kha hmanraw 2 kha Pathianin a hman meuh chuan, Ninevi khuaa mite chungah a thawk nâ êm êm a, anni pawhin an ngai pawimawh hle tih kan hria a ni.

Jona ang hian, harsatna leh lungngaihna paltlang mek-te hnenah Krista Chanchin Țha, Thlamuanna thu-te hril turin Pathianin min tir fo ţhin. Simna thu hi khawvel zawng zawnga hril tur a ni a, riangvai te, chanhai te, ţanpuitu leh hnemtu nei lo te, tisa leh thlarauva ţanpui ngai ngawih ngawih te hlei hlei hi Pathian rilru luahtu leh target ber chu an ni. Hei hi “Nazareth Manifesto” tia hriat a ni hial (Luka 4:16-21, Marka 16:15-16).

Chuvangin, Rambuai (political instability) hmunah te, Chhiatna (natural disasters) thlenna hmunah te chuan, mi thinlungah Hnemtu leh Țanpuitu an zawn hunlai a ni a. Hetih hunlai hian, Pathian chu Țanpui vartu hnai reng a nihna lan tir a, khawngaihna leh lainatna nen-a kan ngaihsak a, rawng kan bawlsak a nih chuan an thinlung hneh an awl êm êm a ni. (Sam.46:1). Hetah hian Sum te, Tha te, Thiamna te, Finnate, leh Mahni ngei kal (volunteer)-in kan Thawk thei a. Hetiang hun hi a pawimawh êm avangin Pathianin Jona a tirh-luih hrâm hrâmna chhan pawh kha a ni. He “Pathian Strategy – Misualte, Chanhaite, Lungngaite, Chak lote leh Rilru leh Taksaa Tuar Mek-te Hnen Thleng Phak Chanchin Țha” hi a ţul hun leh a ţulna apiangah hmang turin i inbuatsaih ang u.

Similar Posts:

Recent Posts:

7 Responses to “Jona Vang Emni Ninevi Khua Kha An Sim? {Sunday Pual}”

  1. 1
    Pakak Says:

    (Y)

    Report this comment

  2. 2
    Phivawk Says:

    Tha dap dap e…

    Report this comment

  3. 3
    Athana Chhangte Says:

    Ka Amen e. Kan sawi chhuah thiam loh Jona nun nen tehkhinin i rawn puang chhuak tha hle mai. Sunday pual hi chhiar a nuam. Kan fin phah zel e.

    Report this comment

  4. 4
    mama Says:

    A tha leh hle mai. Jona chanchinah hian Pathianin a hnathawh ropui takah te keini mihring tling lo tak te hi min hmang duha min hmang thin tih hi a lang chiang em em a ni.

    Report this comment

  5. 5
    Sihtea Says:

    E khai ka hriat ngai loh thil ka hriat belh leh teuh mai a. A man hla e.
    Pathian in, Silchar khua ah min tir ve ta se, Burma ram lam a thlan chhe duh zawk kan awm hial lawng maw?
    Eng e maw hlek ah, kan ei hmuh na
    kawng pui dan chah an ching si a.

    Report this comment

  6. 6
    Rascal Crowe Says:

    Jona khan tlanchhe pah khan thu a sawi a. A thusawi chhan te chunga chhiatna thlen lai hmuh tumin tanhmun te a khawh sauh sauh a. Thusawi tawi ber te zinga mi zawlnei thawkrim tak tak dangte aia a hlawhtling kha thilmak chu a tlingin ka hria

    Report this comment

  7. 7
    caribou Says:

    Zawlnei zawng zawng zingah Jona aia luhlul hi an awm ka ring meuh lo. A inla pa ve thiak thiak khawp mai.

    Report this comment