An dinhmunah hian ding ta la, engtinnge I tih ang? {Sunday Pual}

March 3rd, 2013 4:30 pm by PKfanai

# Thuhriltu rethei bakberh deuh mai hi ani a. Fa lah chu grape rah duhmi ang maiin an hmuingil phian mai a, 14 ngawt mai an nei tawh a. An nei tawh dawn lo amaw an tih hnuah, annu chu a rai leh ta tlat mai le. An fa neihsate pawh chaw nghei tir lek lek tawh nupa te chuan an fa lo piang leh tur chu titla mai se awm I tihpui em?,

## An Pa ber chuan thawhah a vei a, an nu ber lah chuan T.B. natna khirh tak mai a vei mek bawk si! Fa 4(pali) an nei tawh a, pakhat chu a mit a del a, pakhat dang chu tawngtheilo ani a, a pathumna chu bengngawng ani bawk a, a piangsuallo chhun ber lah chuan anu atanga a kai T.B. natna a vei bawk si. Chutih nak lai chuan, an nu ber chuan nau a pai leh ta tlat mai; an dinhmun harsat leh khirh zia ngaihtuah chuan, nau titla mai turin thurawn pek mai tur emni ang?

### Mingo papakhat hian midum tleirawl a pawngsual a, a rai ta lehnghal a. Chu tleirawl nu leh pa chu ni ta la, a nau pai chu tihtlak mai I duh ang em?

#### Tleirawl chuak zet zawt, hmeltha ang reng tak mai hi ani a, Pasal ala nei lova, Pasal hual erawhchu a nei mek a. A pasal hual lah chu, a nau pai lai ‘Pa’ chu ani si lo; a dinhmun ava han khirh teh reng mai em! A rai tih a lo hriatin, a pasal hual lah chuan ban a duh rum rum hial mai si a. Chu tleirawl chu ni ta la, I pasal hualin I rai tih a hriat hmain I nau pai chu I titla mai duh ang em?

• A hmasabera chhangchhe nupate khi an naupai chu titla mai turin hrilh ta la, lo titla ta se chuan, Kum zabi sawmpakuana a Pathian thusawi thiam hming thang John Wesley-a Khawvel eng a hmuh hmain I that tihna ani ang a, amah avanga thlaraubo tam tak chhanchhuaha awm te, hnungtawlh kir lehte leh, kawng dik zawh phah zawng zawng te tan ava pawi nasa dawn em.
• A dawttu a, T.B. vei nu khi, a nau pai lai chu titla mai turin hrilhin lo titla ta se; Khawvela rimawi phuah thiam hming thang Beethoven-a I that tihna a lo ni ang a, a music mawi tak takte hi khawvelin a hre ngai dawn lo a ni.

• Tin, a pathumna khi pawngsual ani bawka, pawm chi ani lo ve” tiin lo tih tlak tir ta la, Gospel Singer lar tak Ethel Waters I that daih tihna ani bawk ang a, a zai mawi tak kan hre ngai dawn lo a ni.

• Tin, a tawp bera tleirawl khi lo ni ta la, I pasal hualin a hriatchhuah hmain, I nau pai chu lo titla ta daih la; Mihringte chhandamtu Isua Krista I tihlum tihna ani dawn a ni.

Kumthar kan lo chuangkai a, thla thumna kan lo thleng leh tareng mai. I rilruah hetiang thil alo luh apiang hian, heng miropui tak takte an nu ten an pai laia, an dinhmun khirh zia leh tihtlak mai a awl dan tur zia hi ngaihtuah thin ang che. I nau pai kha ram hruaitu ropui tak nitur emaw, miropui tak leh Pathian hmanraw ropui tak tur ani mai thei asin.

Similar Posts:

Recent Posts:

23 Responses to “An dinhmunah hian ding ta la, engtinnge I tih ang? {Sunday Pual}”

  1. 1
    ulawng Says:

    Chhiar ila

    Report this comment

  2. 2
    ulawng Says:

    A thain min va hneh kher em.

    Report this comment

  3. 3
    Phivawk Says:

    (Y)

    Report this comment

  4. 4
    Charice_mizo Says:

    Nangma ngaihtuah chhuah liau liau anih chuan thuziak thiam tak i ni. Ka mur sung sung thei, great story!

    Report this comment

  5. 5
    PKfanai Says:

    Charice, hei hi chu ka ngaihtuah chhuah ani lo tlat. The Speaker’s quote book ami behchhan deuh reuh a, a ngial a ngan lo deuh siin, a ngaihnawm tur leh mi rilru hneh thei tur nia ka hriat danin, ka thiam ang tawkin ka han bual phuan ve a ni.

    Report this comment

  6. 6
    saint sammoo Says:

    ka tum loh lam daih……..good post………

    Report this comment

  7. 7
    PKfanai Says:

    *bawl phuan* not bual phuan.

    Report this comment

  8. 8
    chhangteval Says:

    Pakhatna hi contraception failure vang anih chuan tih tlak a pawina ka hre lo.

    Pahnihna khi chu nau a pai vanga a nu hriselna in a tuar phah dawn emaw, an fa neih tawh dante en a piangsual fa neihna chance a san viau chuan tih tlak mai a him zawk bawk.

    Pathumna phei khi chu tih tlak ngei ngei chi!

    1, 2 leh 3na te khian nau ti tla lovin an pai tlang a, mi ropui tak tak an hring chhuak reng a, amaherawhchu heng mi ropui tak tak lo pian chhuahna chance hi a tlem hle in ka hria. Chuvang chuan hemite avang hian midang hetiang dinhmuna ding ve te fa ti tla ve lo tura infuihna atan a hman chi lohin kha hria.

    Palina khi chu no comment.

    Kan ramah pawh hian nau tih tlak phal ani a, naupai vang nu hriselna in a tuar phahna tur anih te, note piangsual tur te, tin pawngsual avang rai te, indanna hmang reng chunga nau pai palh te, nu hrisel lo te, etc..

    PS : Kristianna tlang lo lampang atanga ka thlirna nih khi.. :-D

    Report this comment

  9. 9
    Chhuaklinga Says:

    A pali-na ngei mai khi..^ :) Isua nu Mari chan kha a nih duh hmel. (H)

    tren tren

    Report this comment

  10. 10
    Nirvana Says:

    Naute lo paih se chuan John Wesley, Bethoven, Ethel waters (ka hre ngai chai lo) an lo pian loh phah ang, tih khi chu Mizorama compensation an beisei dan min ti hre chhuak. Thing to tir (sappling) pawh thing puitling rah duah duah anga compensation an lo lak thin vang ania tun thlenga hydro electric power lian tham kan neih loh.

    Sunday mah nise ka han sawi dawt teh ang. Mizoram Kristiante hian sorkar dan kalh sual (e.g. corruption nepotism, cronyism) aia moral code (sin) lam kan buaipui zawk chhung chuan kan ramin hmasawnna a hmu ngai lovang.

    Report this comment

  11. 11
    H.Vangchhia Says:

    Good one (Y)

    Report this comment

  12. 12
    Sihtea Says:

    A lo ni maw.

    Report this comment

  13. 13
    PKfanai Says:

    Nirvana, moral ber a corrupt tawh te chuan, Corruption do rem chu a harsa viau lovang maw? Moral value system hi dik sela, kan kal dik zawt hì ka va ring zawk em. Sawrkar dan leh mita kan in sawi/ziah fihlim theih chhung chuan kan inthiam chawp zel a, Ram leh hnam ro thil tling tham long term plan lian tham kan nghak peih lova, chhungkaw tam zawk pawh, cheng sing hnih/thum lek lekin kan inhralh vek ani zawk lo maw?

    Report this comment

  14. 14
    Nirvana Says:

    #13. Abortion chungchangah hian sorkar dan a awmsa der a.
    Chumi aia strick a moral code hman tum phet lai sorkar dan zawk ngai pawimawh miah si lo tura inziritir hi ania ka han sawi kher. Isua khan a ziritir ber chu midang laka thil kan tih (relationship) ani a. Mahni taksa chungak an tih lam a pawimawh ber lo.
    Post tu han sawi case ah phei chuan CONDOM hmang turin inzirtirna a rei tawh a. Lo ngai pawimawh lo an awm chuan a pawi khawp mai.

    Report this comment

  15. 15
    century child Says:

    Thenkhatin an tih tlak loh avangin misual tam tak an pianphah ve tho maithei a..
    Side dang atangin ka thlir mai2..
    Post ka kalh lo ania :-)

    Report this comment

  16. 16
    PKfanai Says:

    Sawrkar dan aia kham fet ngaih chang chu a awm teh meuh ang. A la tam chhoh tial tial ka ring bawk. Nau tih tlak te pawh phal ani chho zel ang a, neih in ang inneih te pawh an la phal ang a, mercy killing te pawh. Ka duh dan tak phei chuan, MLA inthlanah te pawh hian, sum sem tawktarh thleng hian MPF hian khap sela a tha ka ti a sin. Anìh loh chuan, chak duh hrim hrim avangin Party dang pawhin an tiam ve ngei ngei angai dawn a, kan ram politics chu, “Khawbung ala ti ta deuh deuh” tih ang chauh a ni ang.

    Report this comment

  17. 17
    Sihtea Says:

    Misual tur hi chu, pian tam leh tlem in a hril lo chiang khawp mai. Fa pa hnih
    khat lek nei a, hneh sawh tak a
    chawm hlum thak an awm tho si a.
    U nau sawm rual lai ni si, suah sual rawng bawl chuang si lo pawh
    an awm tho bawk a. Zir na tha tha a zir chhuak ve si, chhung te chawm hlawm la ngai reng khawp a mi tlak tlai lo lah kum tin in, a za rual
    a sang rual in, kan thar chhuak cham chi reng bawk si a. Mah ni chawm zawh tawk fa nei tur a in zir tir ai chuan, fa te mah ni a in chawm thei tur a, fa en kawl dan kan in zir tir
    a ngai zawk lo maw? Kan fa te kan chawm zawh lu tuk a lam ah, an mah ni kut ke tak ngial pawh in, an ding thei lo chu a nih hi maw le.

    Report this comment

  18. 18
    Awmtea Leo Khiangte Says:

    Challenging tak a ni. (Y)

    Report this comment

  19. 19
    Dr Mahminga Sailo Says:

    Post tha leh awmze nei tak a nih hi maw le. In ngaihdan pawh a dik hlawm viauin ka hria.. (Y)

    Report this comment

  20. 20
    century child Says:

    #17 Pu sihtea, chutia tihah mi fel tur pawh pian tam leh tlemin a hril bik hleinem :-)
    Siamtu ruahman ang thlapin thil hi a kal zel ni maiin ka hria.

    Report this comment

  21. 21
    mama Says:

    Kristian inzirtirna atang chuan tih thlak loh tur a ni mai a, an chhungkaw dinhmun en chuan tih thlak mai chu awm ve tho mahse. An titla lo a miropui tak tak an lo chhuak reng a. Pathian rin ngam hi a lo tha ber zel.

    Report this comment

  22. 22
    caribou Says:

    A khirhkhan hlawm hle mai.

    Report this comment

  23. 23
    Chemtatrawta Says:

    Ngai teh fate hi Lalpa laka kan rochante an ni a. Pathian tih mi chuan “Nausen” nu pum chhunga insiam hi Lalpa laka an rochan a ni tih an chiang a, khawvel mite chuan ‘just another human’ a ni mai reng a ni. Mihring lo piang reng reng hi Lalpa duan sa veka piang an ni a, kawng lakah setana hian a lo bum bo thin mai pawh a, mitin tan hian plan fel tak Pathian hian a nei vek a ni. Lalpa remruat leh plan fel tak a ni tih hre lo tan chuan fa ‘tihtlak’ hi pawisakna an nei lo fo thin a ni. Amaherawhchu, Lalpa rochan, Lalpa ta, Lalpa pek anihzia hrechiang apiang chuan fa “tihtlak” hi Pathian pawisawina a ni tih an hre thin.

    Report this comment

Leave a Reply

You must be logged in to post a comment.