Kan Sikul

March 2nd, 2013 4:36 pm by Dr Mahminga Sailo

Thinlai mu hnu lunglen a tho
Khawvel changkanna zarzova ka hman tangkai em em leh, ka khawvel pakhat ni ta hial facebook group pakhatah kan Sikul thlalak ka hmu hlawl mai a. Ngai teh, kan venga in lian ber ni thin, khawtlang puipun leh awm-ni-kham apianga mipui dawltu; thiamna zira nitin hun kan hmanna chuan lunghlui a tileng vawng vawng nia. A ni, engto nei miah lova thiante nen lungruala kan nuih thler rawih rawihna run kha, tunah zawng mi tlemte in an luah lum a. Hmun khawhar a chang zo ta.

DVR
Paimaari sikul kan kal hma leh kan kal tan ve a kan hriat lar tak chu DVR a ni. Thil ropui tak a ni lo na’ngin kan zikul atanga kan zirtirtu a lo lan vel leh Dar Vaw R’u tih nan DVR an ti mai thin. Veng thenkhat naupang te chuan kan veng (Dam veng) min fiam nan Dam Veng Ar an ti bawk thin. Thingtlang mawngpinga khawsa kan nih avangin kan zirtirtu leh mi vantlang chunglam deuhte’n Sana an neih phak chauh avangin, zing dar a rik hun kha chu kan zirtirtupa hmel lo lan hun hun kha a ni mai

Pindan bang langtlang thei!
Ka la theihnghilh ngailo. Zirtirtu nei ve nual mah ila, khawdang atang lo thawk an tam avangin kan zirtirtu pakhat hian min enkawl chang a awm fo va. Pindan (room) hrang hrang kha inping dang thliah ni se, zirtirtu pakhat tan naupang khati zozai (ti ila zirlai 40 chuang bak kan ni ngai law) buaipui kha thil theih a ni lo. Chuvangin, kan zirtirtupa class pakhata a awm tawh chuan, pindan langtlang thei avangin class dang a mi kan inhlei ngam ngailo.

Ual Kap
A hunlai a zir zel hian thil hi kan hlutin kan ngai ho vel mai mai a lo ni. Kum 1994-a World Cup kan han en zo kha chu, ban lawk a nih tawh phawt chuan, kan zinga zirtirtupa ngam deuh berin ball pet a va dil a. An phal tawh kha chuan, phur takin kan inkhel nasa thin. Kan ziritirtupa’n min chawk phur thiam si. Dunga, Bagio, Valderama, adt hming a’n phuah diat diat a. Kan veng ual kap kha chu kan khel ve thin ngei a ni. Kei erawh inkhel thiam lo pawl ka ni tih in laka zep ruk ka tum lo.

Thlan tla hluama kan inkhelh laiin, banlawk a’n zova. Class room-ah kan tlan lut rawk rawk a. Uite rim nam thar thar tur kha chu kan ni ve chiang!

Chhuanlam fing leh tha lo tak si kha!
Pawl li kan zir kumin kan class-ah zirlai panga kan awm a. Board exam tur kan ni, kan zirtirtupa a tang si. Mathematics har kan titlang, kan zir tlem a, kan thiam thei lo bawk si. A chang chuan kan zirtritupa thin thawk insum zo lo khan min hrem fo mai a. Kan pawlpui pakhat thluak kan hamng tangkai pek a nih kha

Ningani chawhnu lam hian, pawl nga-ho a zirtir hnuin kan zirtirtupa chuan mathematics class min zirtir thin a. Chawhnu lam a ni bawk nen, kan thianpa chuan, ‘kan zirtirtupa lo kal loh nan, kan class hi tifai ang u’ a ti a. Keini’n kan thlawp tha em em.

Kan room kha cement zut ve thlap ni mah se, han phiah ralah chuan a khu nasa thei khawp mai a. Kar hnih khat chhung chu kan project a hlawhtling viau. Mathematics period a thlen dawn vel leh chuan inteifel tawkin kan room kan han phiat khu tak tak thin a. Kar hnih vel a vei hnuah, zing sikul tan hmaa kalkhawm (in-line kan ti) ah kan zirtirtupa chuan fiah leng lawngin, ‘Pawl li zirlai ho hi, zing lama in room tifai ngai hlei lo, Mathematics period thlen dawn vel leh hmun in phiat khu vak zel mai’ a’n ti mai chu(h), hmai a uang lo teh a sin! Kan ngawi thap.. :-D

Sawi tur a tam, tawk phawt teh se… ;-)

Pawl sarih thleng ka kalna ‘Kan sikul’ chu. Khaw hrang hranga kan pem tak avangin, tunah erawh Primary sikul chiah a awm ta.. :-(

Similar Posts:

Recent Posts:

12 Responses to “Kan Sikul”

  1. 1
    ulawng Says:

    Lut ila….

    Report this comment

  2. 2
    sheldon Says:

    A thu ka la chhiar hma hauh in thlalakah khian ka luangliam :-)

    Report this comment

  3. 3
    Phivawk Says:

    Ngaihnawm dap dap e…

    Report this comment

  4. 4
    Phivawk Says:

    Tin, thlalak khian lung a tileng…

    Report this comment

  5. 5
    ultimate Says:

    A lunglen thlak hle tak mai. Kum 2003 Feb thla khan khi school kawt ngeiah khian ka nupui neih ruai kan kil tawh a, chumi hnuah pawh kei chu ka kal fo tawh. School kawtah chiah khian tunah in an sa lur mai a, infiamna zawl pawh an nei ta lo. Minister Pu Mama pawh a sa hle a ni awm e.

    Report this comment

  6. 6
    TuaiSialA Says:

    A ngaihnawm khawp mai. Lunghlui i tileng alawm le… Kei ve, Primary School, Middle School leh High School ka kal tawhna an sa tha vek a. Ka hmuh leh chang pawh hian lunglen tur angin a lunglen theih loh! Mahse, kan lo tualchaina thin a nih miau avangin a ngaihawm thin khawp mai. Hmana min lo zirtir thintute an la thawk thap hlawm bawk si a, eng eng emaw khawtlang leh zirna thila inhmuh khawm chang hian an zahawmin kum eng emaw zat liam ta min tingai thin khawp mai. Awi….Pi Chhungi kha… :D

    Report this comment

  7. 7
    Charice_mizo Says:

    Mahminga mipa ka hriatah chuan a lungleng thei pawl tak i ni :) Hun kal tawh leh naupanlai sulhnu ngaihhlut i ti na em em bawk, kan rilru a inang, nostalgic post (W)

    Report this comment

  8. 8
    TuaiSialA Says:

    ^Hahaha (Y)

    Report this comment

  9. 9
    PKfanai Says:

    Mahminga chu ka rin aiin i naupang tlat mai. Ka sikul naupang rual lek ini tlat, Paaimari kha keipawh nuam ka tiin ka ngai ber. Kapa kha kan zirtirtu ani lehnghal a, tuman min tinawmnah ngam si lova, ka ngai thei thin khawp mai.

    Report this comment

  10. 10
    Dr Mahminga Sailo Says:

    @ Sheldon… Kan kawmthlang (ni thin) atang lak a ni a. Ka lung a tileng em mai a. I lo luangliam ve, ka va’n lawm em.. :-)

    @ phivawk.. Ka lawm e.

    @ ultimate.. Chu ti elo? A va zia lo ve aw.. :-( Tipu Sultan, The A-team, Amitabh, te nunchan zira kan tlan kawi zawr zawrna hmun hi ruahsanin ramngaw pawn khuh pawh ni se, chingmitthla’n a fiah reng dawn a ni.. :-)

    @ TuaiSiala… Pathian zara dam chuan, hun hi a kal chak riau a sin. Nikum hmasa ka haw khan, kan zirtirtupa pakhat lo leng chuan, “ka zirtir thin Mahminga kha Dr. tia koh theih pawh ni mah la, kuhva min zuk lei sak hrim hrim teh, i khuva min leisak pawh ka ei khat ta e” a ti a. A nuam dangdai ve riau a sin.. :-)

    @ Charice_Mizo.. Nia, tlangval e ti lo hian, ka kur nasa thei luai luai a nia. Ngawi tak rawh, Lungleia kan haw hunah kan la kur dun dawn nia.. (H)

    @ Pkfanai… Chuti dawn em ni? Inlak-senior nak alaiin a.. :-D Hmanni i thuziah kha ngaihnawm ka ti, ziah tur i neih teuh ka ring e.. (Y)

    Report this comment

  11. 11
    sheldon Says:

    Mahming, DVR i tih khian Rinzova te DTR kha ka hrechhuak :-D

    Naupan lai fate hnena hrilh tur i hre tam bik. I hriatrengna a tha ngawt mai. Lung hi a leng ta fo mai, nang hian i rawn kai tho thin!

    Report this comment

  12. 12
    Dr Mahminga Sailo Says:

    @ sheldon.. A ni dawn tak. Tunge uar hmasa zawk ang i aw..? :-D

    In chanchin lah in sawi ve duh si lo; kei lah hian mi(sual).com hi ka dawt kawm emaw ti awm fahran hian ka dak ang zuah zuah a.. :-D

    Report this comment