Zet-u-zu (Hetiang zawng hian)

February 22nd, 2013 6:30 pm by lr hlonchhing

Wriiten by-L Vanchiau

Buhfai umtawih, vai dawidim phut a chiah zawp tawh hnu, umtawih firiau leh kawi nuai mai; Sazu nghal fal deuh liluh chhuak zo lo in a tawihhnan buhril var paw phut mai chu mei thil-tih-theihna hmanga chhuan so a awmin, ngaiteh bel a so liam ni hauh lo a, dawnthleng a rawn far ngei tuifim tak rawn far chhuak a thiltihtheihna ropui tak a ni.

Zu kan tih tak hi lo ni chuan. Thiltihtheihna (power) ropui tak nei a, mi tam tak nghawng a hrui vet a damlai nunkawng ngil lam a kaih kal lo zawng a hruaitu chu zu hi a lo ni reng chuan. Chu tuifim rawn dir chhuak tar tar chu maw sual hlawm leh tenawm tak zawng a lo ni.

Zu hi a lawnga a awm hi chuan sual anih hi ka hmuthiam ve hauh lo mai pek chuan. A tawnah erawh pumpui a luan thlen a, thluak a fan raih tawh hnu ah erawh lu a kai chiai chiai in a hai chhalh a, chu hunah meuh zawngin thlarau rawn thawk chuan ropui bera te, thiltithei bera te, chak leh huaisen ber ni thei tur in huaisenna a pe ta thin a. Tha leh thisen a thunun hnuaiah chuan a ni thlarau chuan a awmpui thin ni.

He thiltihtheihna chakna leh ropui tawh chunga ropui lehzualna thlarau neitur hian Fentiali fen hnan hmak tur sum tlangtial chu neih erawh a ngai miau a.Chu sum tlangtial hmuhtheihna tur dapin i thluak erawh i sen a ngai ta ani. Chhungte awm loh hlan chuh a finthlak lai chuan, i mitmei ah an harh ve hra tih chu i beng ni lo in, i thinlung a hriatna chuan a hmu tlang vek si a.

Chhungte thil dahthatna bawm te chu hmanhmawh tak a lak dan thuruk i zir hmasak loh zawngin, i buai fo dawn si a. Chhungte kawngkalh chung pawh a a ruk a luhna tur dan i hriat erawh chuan pawisa i neih loh pawhin a thlengna tur tal zawng sihchhuah dan i thiam tawh hle kha maw ! Chutiang chung pawh a i hmuhtheih loh chuan pawisak neih loh dan leh a ruk a ral a mi ta neihsak dan thuruk i rel zung zung chu i hmabak i ko a in nghat tlat ani si a.

Harsatna awm thei tur i paltlang theih tak hnu chuan mi hnuvai pawh ni hran lo chuan, atlawmna mual lam veng tlabirh lam hrutin, kan sawi tak nuthlawi Fen\iali te zu ngei mai chu dawn tur chuan hrehawm sawi hman lek lo in i kal phe vawn vawn tawh mai dawn a ni. I han lam zet a, an rinhlelh vang che chuan an pe mai lo tawp ang che. Mahse no khat man i ip a tanga i han phawrh tak ah chuan, vawkin hnuai a mi an thuhruk ngei chu phawrh chuan i lam zat chiah chu Fentiali ngei chuan a han thlitsak ang che. I han lem anga, hman hmawh turin a tur chhen karah chuan thei i seh keh karh karh anga, thlarau erawh chuan hna a la thawk mai rih lo ang.

Chutia i han in zawh a ruai ah chuan i bing ta chuai chuai anga, i lu a hai deuh chhalh pah chuan i kai muai muai ang. I hrawk bawk a tawm khawm ni awm tak mai chu i sawi lan ngai mang hauh loh thil chu i chhak chhuak zawt zawt mai tawh anga, thu ngai erawh vawi tam tak hmun tam tak i sawi ang.I zu in chuan English leh vai tawng a pai tel a ni mahna, politic leh kohhran upa i khei tan anga, i thenawm pa party pawh i sawt pah tho ang. Ram leh hnam tan i tlak zia chu i sawi kur nguai anga, vai velh chak in i ter et et tawh ang.

Chutih pah chuan i lam belh leh anga, pawisa i phawrh mai loh chuan a pe chuang hauh lo ang che. I kai muai tawh a vang chuan Fentiali nena damlai pialral chendun chu i chak thar hle bawk anga. I han bem kual vel tan tawh ang. Vanneih thil tih meuh turin i pawisa chuan a la daih hram vang chuan no khat tlem a dal deuh hlek chu an thlit sak ang che . I phul hlut anga, thusampek ai a sei daih mai chham in, politic leh sumdawnna te nen , i luck zia te thleng chuan i han vai vir hluah anga. Mahse maw, in neitu chuan a ning tan tawh hle ang che.

I zu no chu i tlak hma ta viau mai si a leh, lamna turin pawisa engmah i nei tawh teuh silo a. No khat i han lam leh zet chu, chhuak tawh rawh ti a kut zungchal a kawk chein , i tan chuan chu hmunah chuan mi dang i dip ani tih i hriat loh khan hnawksak mai i lo ni ta si a. Fentiali i bemna chu a pamtul ta chu ani phawt mai a leh. I ka chu i hmang tangkai ngang mai bawk a le, saptawng leh vai tawng i thiam ngai miah loh pawh in i mamawh chu i han phuh kur luk zet hnu ah i lam ngai bawh zu no khat chu bat tumin i han lam leh chu, Fentiali thinrim chuan a nuta kuttum chum biang buang leh an thian te in hawr chuan i lu chu an kuttum chum buang mai chuan an hnawm hlek ang che. I vannei hlauh a, an theh chhuah hnu ah che chuan le, Vawkin leh kawngpui kar tawn chungin i thle chho bawk bawk tawh ang.

Veng laili lam i la pan ta chher cher mai chu, kawtthler kawngpui ah chuan i khat phei mep mep ang a. kawng a i tawh te a piang mai chu i cho pah zel ang. Kungfu thiam i nih hre uk lo te hnenah i thiam zia te chu i chham pah chuan i hawi pir hle ngawt anga, tuman an uksak lem lo ang che. A chhan chu maw, zurui thu hla tih leh, i hlauhawm loh zia an hmuh a , an hriat vang chauh ani. Nang erawh chuan champion ni ah i in ngai in, i au tial ruan ruan ang a, mawl an ti hle ang che.

I in chhung i han thleng anga, i nupui chuan a be chak vak lo ang che. a chhan chu maw, tlai chhum tur buhfai leina a dah kha i lo hman daih vang ani a. Thim thet thet ah pawh chaw chhum tur nei lo in an lo nghak thap mek che tih chu hre hauh lo chuan, Minister bial fang ang mai in lo hmuak turin i beisei ani tih chu i nupui chuan a ngaihdan a ni ve hauh lo mai. Chaw chhumtur an neih loh an sawi dek dek a, i kungfu thiam zia i phochhuah chak tawh zia chu i han shaw tan dawn ta. Huat tur i han dap chawp ti tih chuan i nupui chu i han vua te tuar tuar phawt a. I fate hlau leh innu tap chuan an chhuahsan hlawk hlawk ta che chu, i inchhungah i in hrosa kuk kuk ang. Riltam hauh lo chuan, chaw ei i han tum anga, belruak mai chuan i lung a ti awi ta hauh lo mai chu le, i bel chu kawmthlang lamah i thlawh lawng lawng mai ang.

I in hrosa chuan, i bungrua te chu i han theh leng tak lawp lawp hlawm anga. thleng te pawh thlawhchhuah hmasak inchuh ni awm in an awm tak dil del ang. i inhrosa leh i thawm velah chuan i thenawm te chuan ‘enge ni ta’ pawh an rawn ti hauh lo chu mak i ti let ling hle ani mai thei. I tih than em thin vang a nia. Chutia tha nena i chet tak buan buan a vang chuan, i awm vel chuan i hrawk ah i zuin ngei leh i pumpui a mi te chu chhuah chakin an rawn in tam tan tawh ang. Chhuat ah chuan i luak tak teuh anga, i chau leh luhai chuan chhuat daiah chuan i let in i muhil nghal titih mai ang. Chutah i luak pawm tun chuan i hnar i chhum burh burh tawh dawn si a.

Em em a, in ti a ni mai thei e. Zu hi keini mizo nunah chuan a mikhual hauh lo mai a. Ruih thiam lo fe fe, zu a vanga nupa inthen, buaina siam ching leh mi tan a hnawksak kan tam hle mai. Zu hi sual anih loh lai hian, kan in erawh chuan kan pumah lo alh chhuakin sual ah kan siam ta ani tih hi ka pawm ve dan tlang ah ka tar ve va nia.

Similar Posts:

Recent Posts:

14 Responses to “Zet-u-zu (Hetiang zawng hian)”

  1. 1
    Chhuaklinga Says:

    First phawt ang. (D)

    tren tren

    Report this comment

  2. 2
    Chhuaklinga Says:

    Tunlai rakzu(local) chauh a huap a nih hi a. (B) Zoram pawn lam zu siam chu a sawi tel hauh lo mai. :)

    tren tren

    Report this comment

  3. 3
    zualbonez Says:

    Fans chu nei tam ve maw ! :p

    A visitor from Patna, Bihar
    viewed “Henry Vangchhia: Sapram zawlbuk!” 1 hour 48 mins ago

    A visitor from Kundan, Jammu and Kashmir
    viewed “Henry Vangchhia” 4 hours 41 mins ago

    Report this comment

  4. 4
    Nirvana Says:

    Zu in thiam lo chanchin pawh chu in va hre kim dip dap ve.

    Report this comment

  5. 5
    Jennifer Lo Says:

    a va nih duh hmel tak tak ve mawle :P
    pa 1 nupui tlan haw duh silo pon thikthu te kha an tichhe leh em em sia,a nupui tlan haw duh bawk silo tih ngaihna hrelo khan zet-u-zu a inrui sauh sauh a mi zing ah a nupui kha,’ka duh duh a ka tih hnu i nih kha’ te a va ti vel mawle,, :$

    Report this comment

  6. 6
    Sihtea Says:

    Zu in dan chin tawh hrelo chan chin
    a nih khi a.

    Report this comment

  7. 7
    lr hlonchhing Says:

    Zu definition khi ka duh lutuk. Tha tak a ni (Y)

    Report this comment

  8. 8
    Athana Chhangte Says:

    Chip hneh hle mai a. Ka rui ve tep a ni.

    Ruih tum tlat Zofaten zet-u-zu rui ang aw..haha

    Report this comment

  9. 9
    sheldon Says:

    Lr, a va’n thui em em! Ka chhiar kim lo zep lovah chuan. A thu ken hre tawk velin ka chhiar :-D

    Zu thatna hi chu sawitur a vang khawp. In thiam leh ruih thiam tak tak lah awm theilo. Mahse khawvel awmchhung chu a awm ve tlat dawn si a le.

    Aw Zoram engtinnge i tih dawn? Zet-u-zu hi i chhuah zalen tawh mai dawn em ni? Nge thlung bet zo mang silo hian a kawlh tawk lek hian i chaih dawn le???

    Report this comment

  10. 10
    Puii Says:

    Hetiang zawng hian i va ziak thiam ve maw le….

    Report this comment

  11. 11
    saint sammoo Says:

    kú sheldy komen ka like e………

    Report this comment

  12. 12
    Awmtea Leo Khiangte Says:

    Zu hi chu aw… (B)

    Report this comment

  13. 13
    dtea Says:

    The power of zet-u-zu zet chu le! Pui rem rem ve le.
    Chhungpuinu thlunglu zawng a hai ve ngei ang le.

    Report this comment

  14. 14
    Dr John Says:

    (Y) Ziak tha khawp mai.

    “Zu Thatna” lam hawi deuh ka ziak ve ang ka tih lai takin… Ka thulh mai dawn mawni le :-D :-P

    Report this comment