In Lung a leng ve thin em?

February 19th, 2013 10:38 pm by PKfanai

He Khawvela ka hun tam zawk chu Mizoram pawnah ka lo hmang ve ta reng mai a. Naupan lai hun zawng zawng leh, Rawlthar chhuah thlenga, Mizoram chhunga nu leh pate kianga awm leh seilian ta chuan, chung ang huna kan thil lo tawn tawh ang tak te han tawn leh chang hian, Lung hi a awm hle hle thei ta thin lova, panlai nun ngai hian a lo kur leh diam diam thin a, a lo leng bo leh veng veng thin!. Chutiang lung tilengtu lah chu, thil danglam tak engmah a awm hran lem si lo. Post tlem lai hian han puak ve pawp pawp mai teh ang aw le.

Ar khuang ri: Ka Pian leh sel seilenna khua hi, Motor kawng kama khaw lian ve tawk tak, in pawh sangkhat chuang zet kanni ve na a, Thingtlang khua, khaw 10 lai mai sawikhawm kan nih avangin, in tin hian ‘ar’ hi kan vulh far mai a. A khaw laili takah hmun tha lai deuh berah compound zau tha tak mai kan nei a, kan kawmthlang zawlah Ar-in pawh kan nei ve a. Zing khawvar muttui lai tak mai hian, vengchhak, tlangchhip sang lai deuhva awm Arpa chhiarkhuan kha a rawn khuang ta al al mai a. Chutah le, kan arpa chhiarkhuan, ka arpa hluisen chuam ngei mai, Kg-5 vel zeta rit, a siak pawh naupang kutzungtang chen zet mai, zum tha em em mai nei, kan huan chhungah na na na chuan, arpa dang ngamloh nei ngai miahlo chuan, a thla a han khawng/zap ri pup pup mai a, ring em em maiin a han chhawn ta a. Kan awmna a laili bawk a, a hre phak ho zawng zawng chuan, an rawn chhawn ta thliai thliai thin a, ka ngaithla kar thin ani. Zan lamah mumang thalo leh hlauhawm deuh man chang phei chuan, ‘thawk sawng sawngna’ ani thin.

Mak tak main, Mizoram pawna ka awm hnu hian, hetiang ar khuang ring tak tak inchhawn hi ka hre ngai ta reng reng lo mai a, Ka khua a har ru hle thin a ni. Ka arpa chuam khuang, “Tumah cho loh ka nei bik lo” ti al al thin, ka zan tawnmang, phung leh huai inlar fo thinna lak atanga min thlamuana, min chhanchhuak thintu kha ka va han ngai thin em.

Biakin dar ri chuah chuah: Kan In awmna a laili ka tih tawh kha. Pathianni zing alo nih hian, Arkhuangin min kaihthawh hnuah, Kristian Naupang inkhawm dar alo ri chiah chiah a, ziaklohbu pawt thlain kan han khawr a, fairel bela buhfai thum khat vel kan dah a, biakin kan pan sang sang thin.

Tukthuan eikhamah, chawlhni kawr ka nuin a sukfai chu hain, kan insiam map map a, chutah le, UPC dar vawi 7 zela vuain a rawn ri ta mang mang a, mual kama Chhandamna Sipai pawl chuan, Truck ke thir an khai chu an han vaw ri bul bul bawk a. Chutah veng hrang hranga Mission ho dar chu a ri ta chuah chuah mai thin a, Pathianni tih a chiang thin hle a ni.

Mizoram pawna kum 25 vel zet ka awm chhung hian, hetianga Sunday-a biakin dar ri hi ka hre ngai ta reng reng lo mai a, Dar 9:30 ah Praise and Worship tan tur a nia, dar 10 ah chiah Inkhawm kaihruaitu a ding ngei tur ani tih ngaihdan kan nei vek a, Sana kan ring a, Biakin dar kan mamawh ve lo a ni. Mahse, a khawhar thlak ka ti tak meuh meuh thin a, ngaia neih a har ka ti hle mai.

Zing kara Motor lian ri hum hum ri: Kan awmna hi veng laili bazaar bul mai anih avangin, Bazarni hi chuan, veng tlaberh deuh lam atangin nuho bazaar hmun tha inchuh hi zing khawvar hma atang hian an rawn kal hlawk hlawk thin a, Sa-sat ho lah chuan khawk rum rum khawpin sa an sat ri ang chawrh chawrh a, Chutah, Bazar Bus zing chhuak tur ho lo thleng khawm chu an ri ta hum hum thin a. A hunlaia a bengchhen thin tehlul nen, Zing kara Motor lian ri hum humin min tih harh chang hian, Kan khuaa kan in kha amaw ka ti thin a, ka han harh a, Mizorama kan khua chu hlatekhua alo ni thin si a, hrilh a haiin, lung a leng duh hle mai. Tlangvallai te khan, Kan run inchhung leh ka nu leh pa thlazar hnuai muanawm tak kha ka ngai vawng vawng fo thin.
Favang thlifim: Phai hmun lum ang reng taka awm kanni a. Favang boruak alo nih tan hian, Mizoram boruak ang vela nuam alo nih tan chang hian, muhil han thangharh chang hian, Mizoram emaw ka ti fo thin a, anilo tih han hriat leh hian, Lung a leng duhin, hrilh a hai duh thin hle.

Favang thla bial zan: Favang thla a han bial kung mai hian, Kan naupanlaia, kan veng naupangho zanah kan han chhuakkhawm a, enghelh leh Lungkham reng neilova, hlim tak maia kan pawnto thin lai ka hrechhuak fo thin a, Lung a leng ru fo thin. Tin, zai ngaina ve ang reng tak ka ni a, Sap hla Love song chi hrang hrang ka sak thin leh, bialnute hriat tur ngeia an kawmchhaka kan play thin lai te kha rilru mitthlaah alo lang leh uai uai thin a, tunlai tawng takin, ‘Lung a leng ve det’ thin.

Phunchawng Par vul lai: Kan kawmchhakah hian Phunchawng kung lian em em mai hi a ding luah mai a, a kung bul hi Patling pathumin an pawm zo tawk vel ani mai thei a, a san lam phei chu feet 100 vel lai asang ani awm e. Sikul chawlh lai leh Sikul kalloh laite hian, a bul thlar duai mai velah te chuan kan inkhualtelem thin a, nuam thei thin tak a ni. Nipui tantirah hian a Par khat tlat mai thin a, Sava chi hrang hrang hian a par zu an tlan bawk thin a. Lo hal lai te hian, Primary sikul kan han bang a, a hnuaia kan kal lai hian thlifim a thaw heuh heuh a, Savaten a par an rawn ti tla thin bawk a, kan chhar thin a, Khawchhak lama tlangte chu Lohal khu leh Romeiin a bawh paw chuai thin a, khang hun kha mitthlaah ala lang chiang si a, Lung a leng duh thin khawp mai.

He Phunchawng hi a san leh a len em avangin, a bul hnaia in leh a hnuaia mihring kalte tan a hlauhawm deuha an hriat avangin a satthla ta vek a, ka ui tak zet zet thin a, Kan naupanlai nunhlimawm tak kha a chuai ta ruai ruaiin, koh kir leh rual lohvin an liam ta ruai ruai hian ka hre thin.

In lung tilen thintu, han sawi ve hlawm teh u le.

Similar Posts:

Recent Posts:

26 Responses to “In Lung a leng ve thin em?”

  1. 1
    VaiVa Says:

    Favang thlifim hian ka lung a ti leng ;-)

    Report this comment

  2. 2
    Jacka Pi Says:

    ka lung ti leng lo tak tak hi a awm lo a ni awm e :)

    Report this comment

  3. 3
    Eve Says:

    A va leng vawng vawng ve rauthla chu…pu PK?

    Kei chu tunhma hun ngaia lunglen loh hram hram ka tum ve ngar ngar thin….

    mahni chauha han awm hi chuan lung a lengin khua a va har thei vawng vawng tak thin em….

    Report this comment

  4. 4
    century child Says:

    I ziah/type pahin i mitthla uar2 ang a, lungleng tak chunga i ziah ka ring.
    Lungleng mi ka ni lutuk lo a, ka lunglen paw’n ngaihzawng lampang vang ni loin naupan lai a ni zawk zel.
    Thiante hnenah ‘naupan lai kha a ngaihawm e’ kan han tia, ‘nia ngaihawm khawp mai’ an lo ti ve mai a, mahse ka lunglenna min tawmpui phak tak2 lo thinin ka hre thin, min tawmpui se ka ti rilru em2 thin ;-( lunglen a rual kher thin lo bawk nen.
    Tlai tin sawww ta tanga ‘Allaaaahhh’ an rawn ti luah2 te saw ka la ngaiin ka ring. :-S
    Mihring te hian kan ‘tun hun’ hman mek nawmzia leh hlutzia hi kan hre lo thin, a hnuah alo nawm leh hlutzia kan hre chauh zel ni berin ka hria.
    (tun hnai chu ka comment sei thei hle mai a)

    Report this comment

  5. 5
    chhangteval Says:

    Naupan laia kawra kal a sangha hrut leh vuak vel kha a nuam hi ka ti ber mai :-)

    Report this comment

  6. 6
    PKfanai Says:

    Nizan ka mut tawh hnuah alo chhuak ani maw. Tunah tak hi chuan, Nupui fanau te kan lo nei ve ta bawk a, lunglen vawng vawng ka nei ta lo viau mai. In lung tileng thintu han sawi ve teh u. Nipui laia, Rengchal leh Ngirtling hram veng veng te, Lelte han kiu riai riai te pawh hian, lung a tileng thin. Herawt ri te kha aw…

    Report this comment

  7. 7
    Awmtea Leo Khiangte Says:

    Mi lungleng mi tan chuan hnahthlel ro tla ringawt pawh hian hnuk a tiulh thei alawm..

    Report this comment

  8. 8
    sheldon Says:

    Lungleng em em chi chu ka ni lo na in engemaw chang hian a leng thut thin! Ar khuang tak hi chuan a tileng em em pawn ka hrelo. Chu ai chuan khua a lo hnim a, ruahsur tum, kawlkila a khawpui a rik kual ruih ruih hian ka lung zuk tileng tlat thin a.

    Lunglen hi a chang chuan a nuam a, mahse an len deuh tak tak hi chuan a hrehawm. A chang chuan inrin loh lai tak hian lung hi a leng thut thei. Naupan lai a ngaihawm duh.

    Report this comment

  9. 9
    mama Says:

    A ngaihnom hle mai. Kei hi lunglen hre vak lo ka nia, bialnu te ngaia lunglen bak hi lunglen ka hre vak lo :-D

    Report this comment

  10. 10
    Amah Charice_mizo Says:

    Keichu mumang tha deuh neiha, zingkara harh hlawl hian lung a leng vawng vawng duh ka ti, 25 years outside Mizoram? where, i wonder ? :)

    Report this comment

  11. 11
    PKfanai Says:

    Meghalaya and Arunachal @ Charice.
    Thangthleng kam hrat ve tak kani thin a, Ramngaw leh rahtlan ka hmuh chang hian, Thangthleng hum tur ka lo suangtuah leh ruk ruk thin. :-D

    Report this comment

  12. 12
    Manuni Tlau Says:

    Mi lung leng chi nih chuan, ka lung chu leng ve thin tehreng e. Mahse Thereng hram (ka hriat khat tak em em) tluka ka lung ti leng hi a awm em aw ka ti thin! Tlai ni tlak dawn a ka zin chhuah a ngaih hian ka lung a leng ngei ngei bawk. Hnahsin (Cosmos) par ka hmuh pawh hian min ti zawi ve thei khawp mai nia. A tam mai ka sawi tawh lo mai ang, ka in ngaihtuah lungleng zo dawn!!

    Report this comment

  13. 13
    Athana Chhangte Says:

    Ziak ngaihnawm thiam hle mai. Lungleng chi ka ni lem lova, Mahse min tilungleng ve det mai. Ar khuang ri inchhawn thliah thliah mai khi kei ka hriat ve phak a nia. Hriat lehchhin ka chak khawp mai.

    Report this comment

  14. 14
    schmooze Says:

    zing han zin chhuah a tlang kara romei zam, boruak thiang lutuk fim ral mai, ni a han tlang sang deuhva han hawi vel ila tlang han hring pawl dup mai (thing rawng hi a hring a ni tih pawh hriat loh hmuh fo ai chuan), behliang mun hun vela khua reh dap mai, a chang changa zin veivak motor tlan ri chiah hriattur awm, “thereng” hram..yes thereng hram ral ral mai, tlai tlang karah zawite a ni tla han thlir liam riai riai mai(building sang kara tla ngawt ai chuan) a hmuhnawmin lairil a fan dan a dang zar mai….chuvangin “kan zotlang ram nuam” nge nge hi chu a lo sipisial e..”Mizoram” han tih ringawt pawhin a tek chhuai theih alawm le….

    Report this comment

  15. 15
    H.Vangchhia Says:

    Lung iti leng e a

    Report this comment

  16. 16
    Lamji Says:

    Halpuah hal leh lui kal thin lai a ngaihawm ka ti. :)

    Report this comment

  17. 17
    Puii Says:

    Fam chang tawh te ngaia lunglen hi a na vawng vawng, mahse lunglen ban tir a phalawm thin si lo va…..

    Report this comment

  18. 18
    mate ainawn Says:

    Leng thei lutuk kei pawh

    Report this comment

  19. 19
    dtea Says:

    Ziak thiam hle mai (Y)
    A mawl last batch tih takah; sikul fawm kawrhma ipte khat trun a chini ka’n ak chhuak thin kha chu nuam tak ani, nuam tak!
    Pa Vena’n acid min hipchhuah tir te kha manhla kan lo va ti thin em! (ka in type tui lutuk dawn tlat)
    Lungleng bee oooo… :-D

    Report this comment

  20. 20
    PKfanai Says:

    Rawn inbunchhuak vehote, in tilawmawm khawp mai. Han inshare tlan te hi a nuam thin. Naktuk lam chu Guwahati leh Shillong kal kan tum deuh a, rawlthar chhuah hlima lo tal vena hmun kha a nia, lung a leng leh det dawn a ni. Tunlai, nipui thaw tir, thlifimin thinghnah tlakawlh a han chhem til seng seng mai te hi, a lunglen thlak thin e.

    Report this comment

  21. 21
    muantea Says:

    Tlem ka lo share ve ang che u, PK Fanai hi a lung a leng a nih hi :)
    Inrinni tin Nghasih-ah tuicheng turin kan kal, kan inbual nghal zel chu a ni mai a, tunah zawng….

    Nghasih kawnga hnaha bet Khaukhim hang tui em em mai angte kha ka hmu leh ngai ta lo. Saihmarthur mawng nen kan han hmehpawlh thin kha a nia, a rei ta a ni….

    Thang kam leh sava veh ka hrat….. rilruah awm mahse ka sim hnan tawh si….

    Mihring ek ngat a mi Sephung chal tha tak ka neih tuma ka hawi sanzia kha…

    Ka insawi lungleng ve ringawt dawn tlat, sawi tawh lo vang.

    Report this comment

  22. 22
    nupuiipa Says:

    Lung leng em em thin a..tunah pawh ka awmnain a zir/ zirloh vanga tukverhah pawh dak tha duh lo ka ni leh ta….Nupui fanau te kalsan a eizawnna avanga “eng a?” tih pui tur awmlohna hmunah han awm kurh kurh chu thianpa nena inbangdana kan awm dun lai te a ngaihawmin NUPUI te kan be ruai ta mai anih hi..SCHOOL ral a HULHU kunga chen pawh nuam ve mai mai tak a ni ….

    Report this comment

  23. 23
    keimah Says:

    Sava veh nuam ti thin ka ni a, zing thawh ruala Tlaiberh, Kawlrit leh Tukkhumvilik tih vel hram han hriat nak nak thawh chuan tha hi a tho at tawh thin! Tlangsam bawh en te kha a va ho nuam si em!

    Thangthleng kam te, tawlailir chuan te, lehkhachaih chaih te…… E khai, sawi sen a ni dawn lo tlat! Sephung laih lai Hun KHA chuan Muante sephung aia huai khi ka lai chhuak thin!! :)

    Report this comment

  24. 24
    PKfanai Says:

    Tunlaiah chuan sephung laih tur pawh a awm tawh meuh lovang a? Vawk kan khung vek tawh si a. A hunlai kha chuan, thil nuam leh atchilh theih tak chu ani ve tlat. Ka hrat ve chiang kuang.

    Report this comment

  25. 25
    schmooze Says:

    van boruak thiang tak mai leh dumpawl raih mai…hmuh a khat em mai….

    Report this comment

  26. 26
    Dr Mahminga Sailo Says:

    E khai, lunglenpui ka neih belh ta tlat mai. Nang phei chu, Mizoram atangin i awm bo rei tawh si a, lung a leng duh ngawtin ka ring. A ngaihnawm hle mai.. (Y)

    Chutih rualin, thuziak a sei deuh hi chuan, point pek emaw, a karawl (space) hi dah thin ni se. Thuziak chhiar a nuam leh zual ngei ang.. :-)

    Recent commnet-ah tlar thla dul mai te’ng, ‘nge ni vei ni.. :-D

    Report this comment