Zu factory, in tlawh zuai teh ang u!

February 11th, 2013 5:00 am by Athana Chhangte

1995 a Mizoram Liquor Prohibition Act puan a nih atang khan vawiin thlengin he dan hi kan la kalpui ta zel chu a ni a.

Zu khapna dan hlawhtling taka kalpui ngei tumin sorkar leh tlawmngai pawl, YMA pawhin tan an la a. Tactic hrang hrang lah an hmang hnem tawh e. Mahse Zu zuarte hian tlawm an tum tlat lo tih hi chu hai rual a ni lo. Zu zuar berh ve tak pawhin dante hi an hre em em zel a. Exise force lam pawhin ‘neitu awm lo zu’ mihring tel lovin an man ta reng mai a nih hi. Man an tawh pawhin aiawh tang thei tur an nei thei mai zel bawk. Tin, court-a an mahni dinsak tur ukil te lah an duh duh rawih tur an thlang thei bawksi nen. Zu hi kan buaipui tlang ta luih luih a nih tak ber hi.

Tin, Zu zuarte hi an inhlawm khawm tha em em mai bawk a. Chhiat, that pawh tawk se an inbuaipui tlang liam liam thin. Sumdawnna a inhlawm khawm that a tulzia hi an hrechiang hle a. Zu siam dan awlsam, zu tihtak dan, thuhruk dan etc te hi a tih dan thar an hmu chhuak zung zung mai bawk nen. Cell phone rawn chhuah hnu phei hi chuan information rang tak takin an inpe tawn zung zung thei ta a. Man har tak an nih zual phah ta a ni.

ZU FACTORY: Zu sakna factory hi economic term takin Private ownership factory a ni ber a! Factory chu ramhnuai hla takah biru theihtawpah siam thin a ni a. Factory hian tui a mamawh tam avangin, tui awmna kawr bul remchang laiah siam a ni ber thin, Mahse a mantu lampang ten tui awmna lai hmun dap nachang an hriat ve lehzel si avangin, pipe in hla taka mi tui an la a, an duhna hmun hmunah factory chu an siam ta mai thin a ni. Tui an lakna atanga pipe kal chu an chhui theih loh nan leiah an phum vek thin.

Factory ah hian zu bilhna tur zem, dapin an tah bial a, a chhung lamah silpoulin-in an tuam leh vek thin. Hetiang zem hi tui dah nan pawh an hmang nasa hle. A tlangpuiin buhfai quintal khat leng tawk velin an kual tlangpui thin a. Zem an kual loh chuan lei an lai khuar a, chu chu silpouline in an zuk thuah a, a chung an khuh vek hnuah leiin an chhilh leh vek thin. Hei hi chu a hautak deuh a, mahse hmuh mai mai har tak a ni thung.

Factory a zu siam chhuah (production!) hi a tam tham loh chuan a hlawk lova ngaih a ni. Chuvangchuan zem enge maw zat an tlar dul thin. Zu bilh tho hmasa apiang chu an chhuang nghal zel a, An chhuan hmasak chu chhuan nawn leh turin zemah an bilh tha lehzel a. Vawi enge maw zat an bilha, an chhuang nawn thin. Chhuan vawi khatna hi ‘direct’ an ti a. Chhuan nawn lehna K1, vawi hnihna k2 chutiang zel chuan..haha.

Meihawl: Zu chhuan nana meihawl an hman hi meihawl pangai aia chang leh a man pawh to zawk a ni a. Meihawl an hman hian thing tuah anga a khuk ve loh avangin hmuhchhuah har tak a ni. Thing hman aichuan vil a nuam zawk bawk. Tin, mi huanahte zu hi sak thin a nih avangin thing hman tur hi a vang ve hrim hrim bawk. Meihawl chang tha bik hi Mizoram khawchhak lam atanga rawn phurh a ni a. Zu avang hian kan thing tam tak chu a rawh ral mek zel a ni.

Thawktute: Zu sak hi hna hahthlak tak leh dawhtheihna ngai tak a nih avangin, Mizo zu chhuang tur factory neitute hian an hmu zo ngai lo. Chuvangchuan Burmese labour ho vek chhawr an ni, ti ila kan sawi sual tampui lovang. An chhuan chhuah litre zat zel hisapa inchhawr an ni tlangpui a. Man an tawk anih lem loh chuan hlauh tur em em an nei ve hran lo. Foreigner te hian kan pawisa an rut tawk tawk ta mai a nih ber hi.

Funte: Zu an chhuan zawh chu tui pawlh lohin, plastic litre 10 burah an dah ta a. Hei hi ramcial (Ramhnuai special) tih a ni, Chu chu a zuartu(theka) hnenah pe chhuak turin, hnamin an phur chhuak ta a. A zuartuin tui te pawlhin, a tih tak nan chawl (yeast) te a lo thlak belh ve leh a, sarang sei zit zet 450 ml vel dawngah a lo fun chhawng a. Tichuan, a hmingah Local or Funte tih a lo ni ta a ni.

A man: Zu (local) funte hi 450 ml vel a ni a. Tuipawlh ngai lo tura ‘ready to drink’ a ni. Funte khat hi cheng 40, funte thum cheng 100. Tikte khat an tih chu funte 4, cheng 150 a zawrh a ni. Zu zuar hian an hralh tam loh chuan an hlawk loh thu an sawi thin.(Hei hi Aizawl leh a chheh vela zu rate ka hriat a ni a. Hmundangah chuan a dang ve thei tho bawk)

Tunlaia zu sak dan awlsam chu:

1.Buhfai chhuma bilh lovin, chini quital khat vel leh chawl (yeast) chu zemah chuan an chawktui vek a. Yeast an thlak tam dan a zirin zankhat an up pawhin a tukah a chhuan theih mai thin. A fe a awm ve loh avangin chhuan nawn theih a ni lo. Yeast hi an thlak tam poh leh a tho hma a ni mai. Chini tui chu a khak fak hunah an chhuang mai thin. A awlsam a, a rang bawk a. Mahse tuipawlh a ngam ve vak loh avangin, a hlawk tehchiam lova sawi a ni.

2.Zu bilh tura buhfai chhum chu chini, buhfai zat (50+50) in an chawhpawlh a an up mai thin. A chhuan nawn leh turah pawh chini an pawlh zel mai. Hei hi chu a chhuan a chhuan nawn theih avangin a hlawk zawk a sawi a ni.

Aw le, Zu khap burna ram kan nichungin a inmi ten in an thulh lem chuang si lo. Zu (local) hi ramhnuaia, man hlau reng reng chunga siam a ni a. Zu bilhna zemah hian sazu, rul leh rannung dang te an tla lut fo thin. Tui thianghlim leh hmanraw thianghlim aichuan sum hmuh tam theih dan tur kha an thupui ber a ni tih hria ila. Zu tih tak nana chawl (yeast) an hmang teuh teuh mai te hi thil pawi ava ni em!

Zu siam dan hrisel leh thianghlim chu tuma control theih leh sawisel theih a ni lo. A ruka zu satute kutah a innghat tawp mai a ni.

Similar Posts:

Recent Posts:

30 Responses to “Zu factory, in tlawh zuai teh ang u!”

  1. 1
    no_nick Says:

    Ka thil hriat chak zawng tak i rawn post a.. A va informative tak em…! “Standing” ho chet dan te pawh rawn sawi tel laa

    Report this comment

  2. 2
    buhtlei Says:

    Tuk chhuah nuam vek u le

    Report this comment

  3. 3
    PKfanai Says:

    A bengvar thlak hle mai. Hetia an tih reng tho si chuan, State pawn lam atanga lakluh(Import) ai chuan, A hrisel that dan lam hi ngaihtuahpui zawk mai chi ava nih hmel ve aw.

    Report this comment

  4. 4
    sheldon Says:

    Vawiin chu helai site ah hian kawlhawk dan tak ah tawm kuk mai teh ang :-)

    Athana hi zu factory te i rawn sawi a, kan ram hi zu khap burna ram, zu awmlohna anih hi. Kan Sorkar leh Kohhran mawng i hlim ania aw :-P :-P

    Report this comment

  5. 5
    chhangteval Says:

    I va han hre chip chiar e, ka ringhlel rum rum dawn che lawm le (H)

    Report this comment

  6. 6
    Athana Chhangte Says:

    Zu hi a in ve lote hlei hlei hian kan buaipui nasa ta mai a nih hi. haha.. Typing mistake ka nei nual, ka thuziah chhiar a har bawk. Ka thiam loh a ni e,First para a Total ka hmaih palh khi ka tihluih ni lovin, ka tihpalh liau liau a ni e.

    No nick, standing ho hi an hlawk lo ras. PK fanai, import chu sawi loh, ZU hi nuaibo vek kan tum hahaha. Sheldon, kei misual hian an mawng chu sawi loh, an curtain pawh hlim phak ka ni hleinem lolz. chhangteval, min rinhlelh lehzual ka hlauh avangin Burma yeast pawh ka sawi chiang ngam ta lo.

    A thui deuh avangin pic ka dah tel ta lova. Post hranah, a rem a nih ngai chuan ka rawn dah dawn e. Ni hman nuam vek u le

    Report this comment

  7. 7
    sheldon Says:

    Pu Pka comment #3 khian min ngaihtuah thui tir. Ka post pakhat min ti hrechhuak. Zu quality tha, a in duh te tan a ngaihtuahsak hi a tulna chen a awm.

    Report this comment

  8. 8
    saint sammoo Says:

    Zing zu rui ang aw…
    post tha tak a ni……………

    Report this comment

  9. 9
    lr hlonchhing Says:

    I va lo hre ril ve aw, rinhleh numero 1 i ni tlat :-P
    Abraham Lincoln chuan kum zabi 19-na daih tawh khan zu chungchang sawiin ‘used by everybody, repudiated by nobody’(Mi zawng zawng hman, tuman an hnawl duh loh!) a tih hmiah kha.

    Report this comment

  10. 10
    Dr Mahminga Sailo Says:

    Bengvarthlak hle mai.. (Y)
    Zu in sawi takah chuan, nizana ka tem ve ngawt kha a va’n tui lo pherhhrep tak. Hrawk a sa hut hut ringawt… :-P

    Report this comment

  11. 11
    Amah Charice_mizo Says:

    Keipawh he thil hi ka hriat chak reuh reuh thin kha ania, i rawn ziaka, i tilawmawm e. I sawi inthlahrung nge, an zu factory ah hian tihpalh thila rul, sazu etc lo tlalut palh chu sawiloh, tihluih liau liauin silipar chhiate an thlak thin tihte ka lo hriaa, a rilru chhiatthlak mang e. Mahse a in mite chuan heng zawng zawng hre vek hian an sim thei silo, zu hi chuan mihring chhia leh tha hriatna hi a van khawih buai chiang tak.

    Report this comment

  12. 12
    I am0 Says:

    Post tupa in chhuan leh dawn hunah min lo hruai ve aw

    Report this comment

  13. 13
    Athana Chhangte Says:

    Sheldon, i post chu ka va chhiar ve chak em? Saint sammoo,%2

    Report this comment

  14. 14
    Borat Says:

    Sazu thi leh slipper chhia telhna zu in tawh lul suh u. Tui pawh a tui lek lovang. Johnie Walker Blue label te, Dom Perignon te in afford loh pawn Seagram Blender’s Pride tal in rawh u, slipper hlui leh sazu thi ai chuan an tui zawk hrim hrim.

    Report this comment

  15. 15
    Athana Chhangte Says:

    Net chhe latuk. ti tha leh mai ang hehe. Sheldon, i post chu chhiar ve chakawm hle mai? saint sammoo, thanks. lr hlonchhing, min ringhlel sah haha. Dr Mahming keipawhin ka dawlh thiam lo a nia. Amah Charice, Zu bilh tih thawh hma nana an silipar leh khaini telh hi chu an tang ve nasa mai, min chhang tha duh vak lo. A intute hian a siam dan that lohzia chu an hre ve tho, but no choice. I am0, lolz. Borat, a inmite hian duh thlang thei se chuan zu tha in chu an duh ve ngei ka ring e.

    Thanks

    Report this comment

  16. 16
    sheldon Says:

    Athana Chhangte #13, ka post chu ‘MLTP Act leh a nghawng’tih niin ka hria, a link rawn dah zaih ila chu tha tur :-D Lr hlonchhing in min rawn dahsak mai ang :-P

    Report this comment

  17. 17
    century child Says:

    A senchi 150 a lakna ka hria ah, nghe3.
    Vawi singkua pawh piang nawn ula in nuai rem dawn lo nasa lutuk.
    Vaihoin zu dawr engatan maha ngai loa an kalpel ang hian future generation ten kalpel ve thei zawk se tih nak laia. :-S

    Report this comment

  18. 18
    Athana Chhangte Says:

    Sheldon, link chu aw!
    century child, kan ram hi chuan nuai rem theih kan inring tlat si a, he dan pawh hi tunthlenga la hmang kan nih hi maw le.. hehehe

    Report this comment

  19. 19
    Jacka Pi Says:

    zu post ah kawmen a tam ber , tin, smiley hi ka hmang thei ta reng reng lo, chhut chawp zel a ngai ta :(

    Report this comment

  20. 20
    Chhuaklinga Says:

    Athana Chhangte@18, hawh awi, a link chu, lr-a hi a rawn che har em mai. :) http://www.misual.com/2012/11/.....a-nghawng/

    tren tren

    Report this comment

  21. 21
    sheldon Says:

    @Chhuaklinga, thank you

    tren tren

    Report this comment

  22. 22
    buh-duha Says:

    A ngaihnawm hle mai…Ram chin hre deuh tan lo chuan hetiang khawpa chianga ziah chu a har ve ngawt ang le…

    Report this comment

  23. 23
    Athana Chhangte Says:

    Jacka pi, zu hi a in lote pawhin kan rui tlang a nih ber hi hehe. chhuakling, thanks, ka chhiar nghal ang. buh-duh, misual kan ni tlat. hehe. Keipawh smiley ka hmang thei lau.

    Report this comment

  24. 24
    dtea Says:

    Paws BVT hle mai (Y) ha3
    Zu chhuang zinga thenkhat te chuan mombati te an telh thin, a phul loh nan an ti. In lama mahni in tur siam thin te erawh chuan, ‘bel mawnga dekchi chhin kan dah a, buklung kg 1 in kan delh a, a phul ngai lo’ an ti thung.

    Report this comment

  25. 25
    рдпģŤіСHAЩЯ Says:

    In ila ni mai lawm

    Report this comment

  26. 26
    Pluto Says:

    Ka thil hriat chak zawng tak

    Report this comment

  27. 27
    Athana Chhangte Says:

    #24 dtea, thanks, chhuan laia excise lo kal thawm hriat hian tih phul a awl an ti haha. #25 hahaha. #26, thanks.

    Ni hman nuam vek u le

    Report this comment

  28. 28
    Phivawk Says:

    Post BVT (Y), pic han tel thei phei se chuan awwww….

    Zu vanga harsatna hrang hrang enkawl / hmachhawn nan thil pathum pawimawh deuh deuh a awm a, heng thil pathum (ahnuaia tarlante) hi mizoin LUNGTHU kan tih ang maiin an tanrual thap a ngai bawk ang (ka ngaihdan mai mai)
    1-na : DEMAND REDUCTION (E.g., Zu thatlohna, a pawizia, etc., inzirtirna; a intawhte leh ngawlveite nghei thei tura enkawlna pek, etc..)
    2-na : HARM REDUCTION (E.g., Zu ngawlveite’n vawi lehkhatah an nghei thut thei thin lova, chuvangin zu in lo theilote’n zu chhia an in loh nan zu tha chauh pek chhuah, chu pawh dan mumal tak hnuaiah nise…huiz a har ngawt ang?? Mahse tum tak tak ila kan thei ngei ang)
    3-na : SUPPLY REDUCTION (E.g., Dan in a phal nilo Zu supply reng reng man hmiah hmiah, local zu factory tihchhiat, etc…)

    Tichuan, Zu in lo theilo te hriselna rei zawk vawn that a nih theih nan bakah engtikah emaw chuan hrisel zawka zu an nghei theih nan(chu chu HARM REDUCTION in a tum pakhat a ni)dan leh hrai mumal tak hnuaia enkawl ZU THA KAN MAMAWH TAKZET….. te ka tia.

    Report this comment

  29. 29
    Awmtea Leo Khiangte Says:

    A va bangvarthlak reuh e. (H)

    Report this comment

  30. 30
    Athana Chhangte Says:

    Phivawk, thanks, Pic hi post dang siam hunah aw. I sawi tum ka pawm e. Awmtea, i lo chhiar a ka lawm e

    Report this comment

Leave a Reply

You must be logged in to post a comment.