Thingpui Politics -I Harh ang u-

February 10th, 2013 9:30 pm by PKfanai

Khawvel mihringte’n kan inhnem ber mai chu ‘Thingpui’ hi ani a. He Thingpui pawi sawilo tak niawm anga lang hian history ngaihnawm tak leh Politics tenawm ang reng tak a nei a ni. He thil atang hian, keini Zofate pawh hian zirtur kan neih a rinawm a, I han bih chiang dawn teh ang aw.
Thingpui kan tih mai hi Chinese ho hmuhchhuah leh chin chhuah nia hriat ani a. Isua Krista pian hma Kum 1500 leh 1000 BC. Inkar vela ‘Shang’ hovin Chinaa ro an rel lai atanga an lo chin tan nia hriat a ni. Chutih lai chuan, ‘damdawi’ anga hman ani thin a ni. Portugese Missionary ho China rama han lut hmasate khan, Isua Pian hnulam kum zabi 16 na vela tang khan an han hre pawh tan ta a, Tichuan, kum zabi 17 vel atang chuan, England ram alo thleng ta a, thil inchi-ah chuan an duh leh ngainat ber mai alo ni chho ta a ni.
Tichuan, English ho chuan, China ram atang chuan an lei ta hem hem mai a, India ram kal tlangin Lawngin an ramah an chawlut ta a ni. Chung hun laia China rama roreltute ‘Manchu’ an tih hote chu an fingin a fimkhur hle mai a, Ram dangmi reng reng rinhlelhna mitin an thlir a, an tualchhung Politics a an inrawlh an phal lo a, ramdang bungrua an rama lakluh pawh an khap tlat a ni.
Sapho lak atang chuan an thingpui manah chuan Dar tangka(pawisa) chauh an dawng duh lehnghal a, Tin, Sapho hian Chinese ho duh zawng tak thil thawnchhuah tur an nei lem lo ve hrim hrim bawk a. Tichuan le, Thingpui te chu a chawrno thar leh zel theih lain, Dar te chu a chawrno ve thei awzawng mai silova, British Lalram hausakna chu China ramah a luang lut ta hiau hiau mai a, British Tangka-In a ruak thei takngial dawnin a lang ta a, Sappui miril ho an buai ta a, an thluak an vawrh tan ta a ni.
Tunhma lamin Portugese-ho khan Opium hi Damdawi anga hmangin Chinese ho an lo tihhmuh tawh a. Mipuiin an han tih tak tak chuan, a ngaih(addict) theih tih an lo hreta thuai a, an Lal ten a hlauhawm zia hriain, China rama lakluh leh zuk te an khap kha ta a ni a, Hei ngei mai hi British ho chuan, Thingpui thleng nan chuan hman an tum ta a ni.
Tichuan, an Lawng lian tak tak chuan, Opium chu a ruk aral deuhin an thawn lut ta nghek nghek mai a, Chinese ho lah chuan, an lo ngaisangin an zu(ngai) nasa ta mai a, kum 1839 khan China ramah Opium addict mi maktaduai 12 chuang zet an awm hman anih chu. Tichuan, chutia Chinese thalai tamzawk te Opium bawiha an tan tak hnu chuan, a phurhna a hla tiin, India rama loneitute chu sum puktirin an duhlo chung chung, sum an bat pung zel si an rulh zawh theih loh avanga Sapho bawiha kun lo theilote chu, Opium(Poppy) chu an chin luih tir ta a, hnai set sawt atangin an thawn lut ta hem hem mai a ni.
Chinese Lalte chuan, Opium-in an mipuite a tihchhiat nasat dan leh zawi zawia Sapho bawiha an awm phah hret hret dan chu an hmuthiam reng mai a, Lawng chawlh hmunah te Duty an insiam a, theihtawpin lo dan an tum a, chutiang tawlhru tute an manchhuah pawh an dimlo nak nak hle a ni. Chutia an Opium phur Lawngte an tan thuap takah chuan Sapho chuan, Sipai chakna hmangin China sawrkar chaklo tak chu an chhu tlawm a, ‘Tihluih Inremna’ an ziah luih tir a, Opium chu Chinese roreltute phal loh chung chungin an thawn lut lui ta a, China ram mihring tam leh ram zau em em mai chu Palianpui zawi hnuang mai leh tha reng reng neilo, mi bawiha kun angin hun rei tak an siam ta a ni.
Kan Ram leh hnam hi ilo thlir ve ta Ila. Kum 1960 chho velah te kha chuan, Central Service-ah te khan Mizo-te kan tam thin a, Sipai Lal tak tak Brigadier te hial te kan nei nual a, Tlangmi zingah Central Service a inziak tling ngah lawt lak kanni awm e. Amaherawhchu, tunhmaa kan la hmelhriat ngai loh, Zu nilo ruihhlo dang(Drugs) te kan ramah nasa taka tawlh luh alo ni a, kan Rawlthar leh Tlangval ten, an ngai(addict)a, an rilru leh tha a zawi zova, Central Service inziak tling kan tlem ta raih raih mai anih hi.
Kan thiam ve reng tur, kan hnathawh ve theih reng turah te, Vai Mistiri ho kan rawih a ngai a, Kan in tha zawng zawng bakah, kan Pathian Biakin te thlengin min sak sak kan ngai ta anih hi; Ava rapthlak em!
Sawi tur a tam lutuk; mahse a sei tawh lutuk si. Hetia kan tlangvalte lam ruihtheih thilin a tihchhiat nasatem em mai lai hian, Kan Nulate lam chu an la chhuanawm viau mai a, Competitive exam-ah te HSLC exam-ah te mipa aia toppers an tam zawk bakah, mahni thawhchhuaha inchei leh Scooty lei te an la tam a, kan la lawm ve viau a. Amaherawhchu,Korean Films-in min rawn run leh a, Kan Nula/tlangval ten, an pianpui nihna an sit phah a, Korean an an chak a, khawchhakho Fb group-a han tel ve ringawt te kha, thil ropuiah an ngai a, an han nawi kual vel a. An sam rawng an hnawih danglam a, tuai an pun phah hluai a, Nula lamin damdawi hmanga intihcher leh ngo(dawl-dan) an tum a, Doctor chawh anih loh avangin, a chin tawk an hre si lova, Over dose an awm ta reng mai a, Doctor te chhan hman hram an awm nual laiin, chhan hman lohva mualliam an va tam ta em!. Hetiang zawngin Ram Ropui kan thleng dawn lo ve. Pathianin he leia a tum ber chu, Setana Ram lak let leh a, a Lalna ram din hi a ni. Chumi hna ngai pawimawh leh thawh hlawk tur apiang mal a sawm a, a tichak mai a ni. Rome ho mal a sawm a, Khawvelah Kristianna alo zalen a, Khawvel alo dap ta a, Rome-ho tluk chhiat hnuah English-ho leh German hoin an chhunzawm a, Khawvel sawrkar chak an lo ni a. Anni an lo chauh deuh hnuah America(USA) in nasa takin an chhunzawm leh a, tun thlengin khawvel ram chak ber an la ni fan anih hi. Tun dinhmunah hian Khawvela Kristian tam berna ram(Percentage nilovin, a number tam hrim hrim zawng-in) chu China hi ani mauh mai bawk.
Keini Mizoram, engmah thil hlu laihchhuah awm si lo, Phaizawl Leilet hmun tur awm bawk si lo heti taka malsawma kan awm te hi a chhan I ngaihtuah chiang ang u. Bumna avanga hetianga nghaisak retheiha awm lovin, I harh thar leh I la, Kan tih tur dik tak leh kan buaipui tur dik tak hi I buaipui leh zawk ang u; chu chu kan Ram DAMNA tur chu ani si a.
“I rawng bawl duh lo hnam leh ram chu a boral dawn si a; chung hnamte chu tihchhiat hlauvin an awm ang.” (Isaia 60:12).

Similar Posts:

Recent Posts:

8 Responses to “Thingpui Politics -I Harh ang u-”

  1. 1
    chhangte_ll Says:

    Rome-ho tluk chhiat hnuah English-ho leh German hoin an chhunzawm a..

    Arab ho kha awmlo selang chuan Rome thil thiamnate kha a bo vek awm si a, Germanic Tribes ho kha chuan ‘Dark Age’ mai mai khawvel an luhpui si a :-S

    Report this comment

  2. 2
    sheldon Says:

    Post bengvarthlak. Mahse maw Pu Pk, i para thenah khian vawikhat enter han hmet keuh la chu en leh chhiar a nuam sawt ang mawle. Anyway Good post (Y)

    Report this comment

  3. 3
    bucko Says:

    Tha hle mai….
    Kan Ram leh hnam hi ilo thlir ve ta Ila.
    I harh thar leh I la

    Heng thu 2 te hi dik phei se chuan chhiar a nuam leh zual ang (Y)
    chua engah nge a hnuai a smileys ho hi ka click lan theih miah loh chu le,,,, hetia ka hman theih lohna hi a rei tawh lehnghal??

    Report this comment

  4. 4
    chhangteval Says:

    Ngaihnawm leh pek e. Thangtharte hian hranghlui ho kha kan tluk lo sawt khawp mai tak a.

    Report this comment

  5. 5
    Amah Charice_mizo Says:

    He thuziak chu ka van duh em! hetiang thu puitling leh ngaihnawm bengvarthlak deuh hi chu lengzem magazine vela chhuah atan a itawm, readership zau zawk neih nan.

    Chuan thil pakhat, Korean film chungchang hi vawi tam fakselna ka lo chhiar tawha, heti tak hian a ni maw Mizo thalai nun alo nghawng le? I had no idea….a sawiseltu tamtak hi chuan Korean serial film an nin satliah vang mai mai emaw ka lo ti thina. Inenfiah ava ngai em! Engtin emaw hmalak ngei chu a ngai a ni, a khawtlang huapin kan buaipui nasa tawh em mai.

    PS: Ka haw lai pawh khan sam rawng dang leh vun var hling hleng an tam ka ti reng a ni. Mizo thangtharte chu an hmeltha hlawm lutuk tiin kan lo chhuang ve em ema!

    Report this comment

  6. 6
    PKfanai Says:

    Charice, keiniin kan vun sen uk khak mai hi zawlaidiah kan lo hmang thin a, kan lo chhuan thin tehlul nen tiraw :-P Inkhel en zawhah chuan mut a chhuak tawh riau a, naktuk lamah tha tharin aw ni ang.

    Report this comment

  7. 7
    Amah Charice_mizo Says:

    Ni ngawt mai Pu Pk, Black hote hi ngaisang ta zawk ila a pawilo phian ang a hihi :-D

    Report this comment

  8. 8
    Athana Chhangte Says:

    Ziah ngaihnawm mai bakah, tha tak a ni. Opium war chhuah chhan pawh ngaihnawm e.

    Thalaite hian eng vangin nge Korean film kan ngaihsan. E le, kan nu leh pa leh mi pangai tak nia kan hriatte pawn an ngaisang ve tho a lawm. Sawi ho ta ila a vawrh lartu cable operator lam pawhin sawi fe tur an nei ve thoin ka ring.

    Thalaite hian ngaihsan tur (Hero) hi an zawng reng a ni tih hi hre thar leh ila. Kohhran pawhin Lal Isua hi kan hero a neihtir min tum ber tur a ni lawm ni

    Tleirawlin vengchhungah leh tualchhungah HERO tur an nei ta lo tihna te pawh, he Korean serial hian a tilang a ni thei mai thei a sin? hehe

    Report this comment