Enkawl hlawh lo, vantlang zun in

February 9th, 2013 11:15 am by Athana Chhangte

2013, January thla tir a ni a. Masi leh kumthar lawm pawh a zo ta. Mitinte mahni hnaah theuh kan bur leh a ngai ta si a. Keipawh Airport road lam panin ka in khalh thla tan leh mek e.

Ka tum ram hi suangtuahna a kal fuh deuh tum chuan darkar khat vel tlan a ni a. Mahse Kohhran, NGO leh Politik inkungkaih dan vel ngaihtuah chunga tlan chuan minute 15 vel belh a tul thin. Tuna ka tlan mekna NH- 54, Mizorama kan kawngpui neih that ber zingah hian truck lian ketaminu, Sumo(maxi cab) leh Sairang balu phur 407 tipper, airport atanga rawn thleng hlim private car leh taxi, zu phur taxi leh local drinker two wheeler te nen kan inpel thla leh suau suau dawn tih ka hria. Kan vei leh ngaihtuah zawng a inchen loh ang bawkin, kan thil tih thinte pawh hi a inang lo nuaih mai a nih hi maw!

KAWTCHHUAH, RV & PHUNCHAWNG: Aizawl kawtchhuah pakhat Airport kawngah hian Mizoram ziarang lanna tam tak hmuh theihin a awm ve a sin. Chenna in bula vawk vulh, kawngsira ran talh leh puan pho, khap rem theih loh zu leh zu zawrh te hi a rim chauh pawh ni lovin, engtik lai pawha hmuh theih a, pholanin a awm a sin. He hmun hian hnamdangte mithmuha thlanlung hnawih var mai kan nih zia chauh pholangtu ni lovin, kan sorkar chak tak zahna kawna dintir mektu pawh a ni tel bawk a sin.

Thli vawt leh THIL rim nam huk huk kara, ‘He kawnga awmte hian voter identity card nei vek tak ang maw? Nge voter ID aichuan 24×7-a cell phone signal kawr ruamah pawh awm thei, an mamawh zawk?’ tih vel mai mai ngaihtuahin ka sikuti khalh mek chu ka’n raise thla ve ham ham a. Vawiin hi Sunday a nih loh hlauh avangin kawngkawia biker min pel fua fua thin ho tawh tur ka nei tlem dawn tih ka hria a. Kawngsira zurui kal pai tak tak kara excise zu check, kawng chhak hnim lo keu mekte leh hnathawh thawmhnaw haa, gallon var pu bawr teuh chunga ram lam pan mekte chu intifel takin ka bye bye lo chauh a ni e.

CHAWLH HAHDAM LO, CHAWLHBUK: Ka thleng hla tulh tulh a, kawtkai vela two wheeler leh taxi inhung pawh a tlem thla tial tial zel e. Sairang luh dawna chawlhbuk sitandat lem lo tak, awn bui tawh maiah chuan phone hmangin ka chawl ta a.

Reivak lo ka thut hnu chuan, airport atanga rawn thleng hlim niawm tak car hi ka chawlhna bulah chuan rawn dingin, a chhung atang chuan mi pakhat hi kun hlau hlau chunga rawn tlan chhuakin, ka chawlhna bul maia awm vantlang zun in, lun loh ve hmel tak chu a pan nghal chat a. Mahse kekawr zipper vuan chunga zun in luh a’n tum chu a rawn tawlh let leh rang kher mai! huihamz – Kan vantlang zun in zet chuh han zunna chi lah ni mawlh lo chuan! A chhungah chuan ek thing, bottle ruak, sarang leh bawlhhlawhin a khat a ni si a. Zun in mai ni lo, a bul vel zawng zawng pawh chu hnawmhnawk tinreng a inzap darh neih nuaih bawk nen. “Naaaa.. Ka zung leh lo mai ang” tichungin hmanhmawh zetin car chhungah chuan a lut leh ta a. Engtin awm ta zel ang maw!

Kan ramah hian tourism promote dan turte kan sawi a, workshop te kan buatsaih thin. Tourist lodge-te lah kan sa mek zel bawk a. Mahse inthiarna mawlh mai te hi a ni buaithlak ta chu! Keini angin ramdang tourist te hian vantlang zun in kan neihahte hian, zun in bang zunkhum per sung sung chungin kuhva hring an hawng ri ve ruap ruap duh dawn lo. Lo duh ta pawh nise, enkawl loh zun in hing tak chhawpsak hi kan mualphona a ni ve tlat a sin.

A hrim hrimin keini ho hi hmun awl ngaithei lo tak hnam kan lo ni. Kawr zawng zawng deuh thawah bawlhhlawh chhun khah phet kan tum a. Hmun awl remchang lai apiangah ‘enkawl loh, vantlang zun in’ kan han hung leh tawrh a. Chutah chuan, zun hing teu tak hnim chungin kan han zung per sung sung a, chhuah paha hmelhriat kan hmu hlauh a nih phei chuan kan han inchibai leh lawp lawp mai zel bawk a. Tlin vel tak hi kan ni e!

Puipun nikhua a, zawng rual tlatna ang maia kan sulhnu kan hnutchhiah thinte hi, TV serial kan en thin ramte awmdan nen chuan a inang thei mawlh lo! A hmun lova kan bawlhhlawh paih rukte hi, pawl anga hnatlangin kan han thianfai ho leh dial dial zel mai bawk a. Kan dream leh atak ram hi chu a la inmil thei chiah lo a ni ber e.

Mahse maw, inti teh ang. Mizote hi hmanni lawk a hmawlhte hmanga mawng thiar thin, “Kawng chhakah e la, kawng thlangah zung rawh” titute thlah mai kha kan ni a. Mite pen ruala chak taka pen tum ve nghal pawh hi a fuh ber chiah angem? Thil tha kan hmuh leh hriatte, chawplehchilha tihhlawhtlin nghal duh zel mai pawh hi a fuh ber chiah lo thei a sin. Tharum, tawngkam dengkhawng tak leh mite rilru tina chunga fai tum aichuan, Thianghlimna pawimawhzia kan inchhung theuha inzirtir chung zelin leh thenawm khawvenga lantir zelin, riru dam takin kan la fai tlang zel mai ang chu. Rilru hneh si lova, inhneh hlawk loh zia hre tur chu kan ni tawh lawm ni.

Khai aw!… Sihhmui restaurant-a ka chow ei tur pawh a dai zo tak ngial tawh ang. Keini ve hi zawng resturant-a tho zap kiang lauh lauh chunga, balu lak tur tlem tawhzia, rel rawn luh huna mutiaa tan nge ketli khaia Chai(thingpui) zawrh hlawk zawk ang, tih vel mai mai ngaihtuah hi kan phak tawk a ni si a. Public urinal changkang zawk ngaihtuah te chu kan tih tur pawh a ni chiah love.

‘A ngaihtuahtu tur dik takten, an la ngaihtuah fel thuai mai ang chu’ tih rilrua dah chungin, ka inkhalh liam ve ta a.

Similar Posts:

Recent Posts:

13 Responses to “Enkawl hlawh lo, vantlang zun in”

  1. 1
    chhangteval Says:

    A dik khawp mai, mizoram hi ziak leh chhiar thiam tamna ber state e ti lo chuan hetiang lampangah hian kan hniam fu lawi si, kan hnam la nopan vang nge mawni dawn ni.

    Report this comment

  2. 2
    Chhuaklinga Says:

    Ka va chhiar tui e. I ziak thiam e. Thianghlimna hi kan la vei pha meuh lo chu a ni e.

    tren tren

    Report this comment

  3. 3
    mama Says:

    A enkawltu tur awm miah lo hian vantlang zunin te hi kan siam thrin ve bawk alawm le, a hmangtu mipui lah kan che trawp bawk. Mihring hmasawnna hi Zoramah hian a rual lo em a ni ram dang ang bawkin. Khawi society ah pawh awm se zahpuiawm lo tur mihring kan tam tawh laiin vantlang zunin a e tawk hi kan la tam em a nih hi.

    Report this comment

  4. 4
    ruatruatapa Says:

    A lo nih tak chu

    Report this comment

  5. 5
    Sihtea Says:

    He thilhi ka veina a reitawh khawpmai.
    Kan Aizawl khawpui zunin tawp lutuk
    te hleihlei hi a lawm, mang an thlak chu le. Zun chhuak lu tukin kan han pan ve a, ek-damdawi ruihthei chi
    burruak nen- pehteh kuhva ei na
    an chhaksen luai bawk a, sarang
    bawlhhlawh hnawmhne tin reng,
    khai khai khai, a hingtur nghur bawk.
    Heng hi eng tik ah tak reh ang maw.

    Report this comment

  6. 6
    sheldon Says:

    Ka chhiar chhuak parh. A dik khawp mai. Vantlang thil te chu mipui te hi a enkawltu kan ni a, a tawp anih chuan ram mipuite kan che tawp hle ani mai. Tu Sorkar mahin kawngkam zun in enkawl faitu a ruai dawn lo, a enkawltu tur chu nang leh kei.

    Report this comment

  7. 7
    Amah Charice_mizo Says:

    Vantlang zunin/ekin hi khaw kar kawng leh hmun fal deuhah te chuan siam ngei hi a tha ka tia, mahse, buara zar phui leh brick pahnih rem ringawt lo deuh, cement zut ngei, phui tha taka siama, a hnaih ber khua emaw veng emaw ah enkawltu dah zel ni thei se. A enkawltute pawh chu hlawh tlem pek ve thin nise. Chuan mipa leh hmeichhe zunna hi a hrangin siam zel se, bawlhhlawh bawm lian tha tak hi zuninah dah zel nise a tha khawp ang.

    Faina chungchangah hian han sawi belh lawk ila, Mizoramah hian bawlhhlawh bawm hi khawlaia inhung fer fur hi hmuh tur a tam nen, a bawm bul lawka paih talhte hi kan chinga. Chandigarh ah khan bawlhlawh bawm hi hmuh tur a vang khawp maia, a khawpui tual erawh a fai em em thung si. A mak ve ngawt mai. A awmchhunah an paih tha te pawh a ni mahna lolz

    Report this comment

  8. 8
    Awmtea Leo Khiangte Says:

    Hmanni bazar chhunga zunin-a ka zung chu ek a lo pherh nuai a, zun chhuak tawh bawk si, thaw lo leh meng lovin ka zun tak kha! :-S

    Report this comment

  9. 9
    bucko Says:

    Dik chut chut hle mai

    Report this comment

  10. 10
    Hotunu_pasal Says:

    Vantlang zun in hi tuna kan kalpui ang hi chuan siam belh tawh miah loh ka duh. Ram dangahte hian kan ram angin hmun tinah Vantlang Zunin an hung ve lo.

    Report this comment

  11. 11
    Rinzova Khawlhring Lalhnam Says:

    Zuninah ‘E SUH’ tih a lo intar kuau hi chuan zun pawh a inthlahrunawm rum rum zel zawk mai alawm mawle!!!!:-O

    Report this comment

  12. 12
    saint sammoo Says:

    Kan ram leh hnamin kan la tlin loh vang a ni maiin ka hria…
    Zunin bul maiah hian ekin tha tak awm vek se la.. tumah zunin ah kher an e bik lovang te ka tive mai mai thin….

    Report this comment

  13. 13
    рдпģŤіСHAЩЯ Says:

    A entir:

    Zun In ah E suh’

    Report this comment