Ma-Eng (i va hlu em)

February 8th, 2013 9:43 pm by Chhuaklinga

Ka insum thei ta ngang lo mai, nangmah avanga thil hreawm leh hahthlak, nuam leh hlimawm ka tawn te hi ka sawi lo thei ta lo a ni. Ka inpuanna avanga min hua a, min do va, min tlawh duh ta lo a nih pawhin tih theih dang ka nei chuang hlei nem. I chungchang engmah ka sawi miah lo chung pawhin, eng ang fakau a nasa pawhin sawm che mah ila  i duh hun teah lo chuan min rawn thlawh ngai chuan loh kha. Kei chauh ni lo mitin mai hian an buaipui che hi a ni ber a, a then lah hian i hriat miah lohvin sum hai luh thur thur nan an hmang che a, thenkhat lah chuan i hming chhalin a nuai a nuai tel teh meuh an lo neih phah rawl nen. Nang lah hian hria awm pawhin i lang der si lo, ‘i a let der a nih hi’ ti rilru vawng vawng thin mah ila, hmaichhanah lah chuan hrilh chi i ni der si lova, rilru zawng i ti buai thin teh e.

Zilh harh theih leh hrilh fin theih chu ni la tuna ka inpuanna hian a tihharh ngei che ka beisei, amaherawhchu nang zawng luhlul, tawng mawh, thu duh leh tumah engah mah ngai ngai lo nun nei kha i ni a, i hlutna leh mi tam tak ten an duh zia che hi i hriat vang nge maw ni zawk dawn le? Kawng lehlamah chuan ka tan hi chuan i hluin i tha thin teh a sin. Zan khawthim khaw vawt, ruah sur hreawm takah pawh nang ka bula i awm chuan chhun eng khawthiang nuam tak ang maiin hun min hman pui thin a. Hunawl khawharthlak taka ka awm lai te leh kawm tur mumal nei lova ka awm lai pawhin nang ilo kal chuan thian tha tam tak bula awm ang mai ka ni thin.

I tel lo chuan hlimhlawp bawlna hmun chi tin reng club, concert, wedding ceremony, party leh eng anga show ropui an neihna hmunah pawh  kal mah ila hmun thim leh reh taka awm ka ni berin ka inhre thin. Ka tan hian i va pawimawh tak em, ka chen ka seilenna In ngeiah pawh awm mah ila i tel lo chuan khua a har ru reuh reuh thin. Hun hlimawm tak thian ho emaw a kan neih a kan rik laih laih pawh hian nangin min kal bo san zeuh hi chuan ka haider thei thlawt lo a ni e.

Tlai khat ka eirawngbawl laia gas a zo ta si, a thlakna tur kan lo nei si lo, ka buai em em laia ka kianga i lo awm ka lawm zia kha aw.. Nang kha ka bulah lo awm ta lo la eirawngbawl kha ka puitlin hauh lovang le. Heti ang tak mai a ka tana tangkai leh tha hi midang tan pawh engti kawng kawng emaw chuan i tangkai ve ngei awm si a, i zar hi mi dang ten an zo dan ve chiah chu ka hre kilh kel lo na a, i zar dik lo tak a zo thin an awm tih lah chu ka hre reng si a, i zar dik lo zo tu tam tak te avang hian tlawh pawh min rawn tlawh khat phah  a ni tih nen. Kan ram hmangaihtu kan khaipate hian i thlavang hi hauhin nun zalen leh nun tam i neih theih nan theih tawpin hma han la teh reng se la aw… ti vawng vawng chungin in thim rip rep atang chuan cheng sawm zawr tak hum chungin mombati lei turin dawrte a pan ta hnu hnu a.    ;-(

tren tren

Similar Posts:

Recent Posts:

15 Responses to “Ma-Eng (i va hlu em)”

  1. 1
    chhangteval Says:

    chhiar ang

    tren tren…

    Report this comment

  2. 2
    chhangteval Says:

    Ziak thiam hle mai

    tren tren…

    Report this comment

  3. 3
    chhangteval Says:

    a vawi thumna pawh kawmen leh law law ang

    tren tren..

    Report this comment

  4. 4
    chhangteval Says:

    Post tren tren tak ani.

    tren tren..

    Report this comment

  5. 5
    sheldon Says:

    E! Tum loh lam daih ah min hruai chu le. Ziak thiam eee. Ma-engi tello chuan a hmei a pa, tu pawh mai hi kan tlei theilo anih hi.

    tren tren :-D

    Report this comment

  6. 6
    Awmtea Leo Khiangte Says:

    Chhiar dawn ang hmiang

    Report this comment

  7. 7
    Athana Chhangte Says:

    Ma-Eng i lova pawimawh tak em! I tel lo chuan thim fate kan ni leh thin hahaha. Tha latuk e

    Report this comment

  8. 8
    Dr Mahminga Sailo Says:

    Chhass chanchin min fah emaw tih nak alaiin, Pu Hawla chanchin zuk ni reng a… :-P

    I ngaihtuah ril raih bik mai a.. (Y)

    tren tren… :-)

    Report this comment

  9. 9
    TuaiSialA Says:

    A thupui khi mihring hming emaw ka tia, phur lutuk tak maiin ka rawn invawrh lut a, (Maengi tih hming pu st*r tawk ka neih avangin) mahse, ka rin loh deuhin Mizoram-a eptu party-te campaign-puitu tangkai, bati siamtute tana malsawmna ni bawk, ÊNG chanchin lo niin! Apa Chhuaklinga’n a ziak thiam ka ti kher mai. Ka invawrhbin leh e.

    Report this comment

  10. 10
    Simplyme Says:

    ‘i zar hi mi dang ten an zo dan ve chiah chu ka hre kilh kel lo na a, i zar dik lo tak a zo thin an awm tih lah chu ka hre reng si a, i zar dik lo zo tu tam tak te avang hian tlawh pawh min rawn tlawh khat phah  a ni tih nen…’ thra hi ka tia..

    Report this comment

  11. 11
    TuaiSialA Says:

    I sakhmingah LALZARZO ka chawi nang che.

    Report this comment

  12. 12
    lr hlonchhing Says:

    I va han reh vang vang ve (Y) (Y)

    Report this comment

  13. 13
    Chhuaklinga Says:

    In lo comment liam liam a, ka lawm e. (C)

    Eng(power) chungchangah hi chuan kan ram political party te hi an dik lo thum, a tute pawh hian project lian tham deuh hi chu han tipuitling se chu Mizoram political history tharah kan chuang kai ni mai tur. Ram hruaitute u harh ula, hmangaihna dik nen hma han la mawlh teh u.

    Tukin ka zing tho current lo awm lo chu ka post ka ngaihtuah a, ka khi vur vur. :D

    tren tren

    Report this comment

  14. 14
    bucko Says:

    Thiam tawps

    Report this comment

  15. 15
    mama Says:

    Ku Chhuakling i ziak ngaihnawm hle mai (Y)
    tren tren

    Report this comment