Mizoram In Dinglai Upa ber ‘Loch House’ !

February 7th, 2013 12:00 pm by lushai_er

by Dr. Zokhuma Vety [L]

The Aizawl Post 11th June 2007 chhuakah khan, Zoa Tlau khan “HEAD HUNTER’S DEN : LOCH HOUSE” ‘Mizo hnam ro inphum chu’ tih thupui hmangin a rawn ziak a. A in thlalak pawh fiah tha takin a rawn tarlang tel a. Mizo ten kan ram a In dinglai upa ber anih anga roh thiam a, kan chawimawi tul zi pawh uar takin a rawn tarlang bawk a. Thangthar te zingah hetiang ngaihvenna a lo piangthar zel hi a lawm awm em em a ni. (N.B : Misual.com-ah pawh hian ZoaTlau hian a post tawh)

He “MANDING SAP BANGLA” ti a kan hriat lar fo hi Mizorama in ding hmasa leh upa tawh ber anih chu a chiang a. Mizo mipui leh Sawrkar ngei pawhin a phu ang ngei a kan roh leh enkawl thiam pawh a phu reng a ni. Hmun-hlun leh hnam rohlu lam humhalh lama hma latu zawng zawng pawh kan hmazawn theuhvah kan pen chak a tha bawk awm e.

Amaherawh chu dan pangngaiin, a sak kum dik tak leh tun hnu a signboard a kum inziak te hian chhui chian ngai a nei nual pek a. Thian thenkhatte nen hei hi kan lo buaipui ve nual tawh a. Tun thlenga kan finfiah theih dan ber chu hetiang hi a ni :-

1. A Sak Kum Thu-ah : Lt. Col. John Shakespeare-in “The Making of Aijal” tih 13th July 1939-a a rawn ziak, tuna ‘Aizawl Centenary (1990) Souvenir’-a la hmuh mai theihah chuan, Manding Sap Captain Loch-in ama chenna in atan a sipai te ruai a, ama sum senga a sak ngei anih thu chiang takin a lo ziak lang a ni.

A kum tak tarlang lo mahse, Bawrsap A.W.Davies hun lai ani a. An sipai bahrik pahnih inchung thlichhia in a len chhiat sak avangin Sawrkarah Lung-in sak phalna dil pui turin a sawm a (Capt.Loch-an). Bawrhsap hian a lo ngaihsak pui duh tak loh avangin, a sipaite ruaiin, ama sum senga lo sa ta anih thu hi a lo tarlang kher bawk. A hnu a, PWD hotu lamin an pawmpui chinah Sawrkar sumin tuna Assam Rifles Lungin la ding zawng zawng hi a sak chhunzawm ta zel a lo ni.

Assam Rifles ho Lungin dang te aiin a hmasa ngei tih pawh amah, John Shakespeare-an Aijal thlalak hlui a rawn pholan zinga pakhatah chiangtakin a lo lang bawk. In dang zawng Rap-in kan tih, mau leh thinga sak an la nih laiin, tuna Manding Bangla dik tak hi a lo ding vah tawh mai.

Heta Zoa Tlau article a thlalak chuang ’1890′ hi chu a sak kum a ni lo tih chu a chiang nghal a, sawi tam angai awm love.
Amah Captain Loch kha Changsilah December 1891-ah lo thlengin, Lt. Cole hnen atangin charge a rawn la tan ani a. Bawrhsap A.W.Davies thung kha chu Bawrhsap R.B.McCabe (Lal Man Sap)-an Lalburha leh khawchhak lal ho Sawrkar laka hel a han tudai zo lo haw hnuah, June 1892 hnu lamah chauh Bawrhsapah a lo thu tan a ni. Chuvangin ziak lan chiah awm lo mahse, A.R ho bahrik 1892 favang a thlichhia in a lenchhiat chu 1892-a sak lo ni ta se, he ‘LOCH HOUSE’ sak kum hi chu 1893 ni ngeiin a lang.

2. Thalak a Kum Intar Hi : Heta thlalakah ngei hian kum 1890 tih chiang akin a lang kalh a. Tun hma 1st A.R-in an luah lai khan 1850 tih a intar thin thung. Chutiang chiahin Lungin-lian (Quarter Guard)-ah pawh tar ani thin.

Hei pawh thian thenkhat te nen kan lo buaipui fo tawh a, kum 1850 daih khan Maj. Lister-a hovin “KUKI LEVY’ hming chawiin tlangmi ho 200 rul vel, Civil Police te border ven pui turin sipai pawl ang an lo din tawh a. Mizoram rawn thut hmasatute kha Surma Valley Military Police tih an ni ve leh a. Mizorama chambang ta te kha, North Lushai Hills Military Police ti a hming sak te an lo ni chho ta zelin, A.R te chu nakin leh zuala lo piang an ni a. An thlahtute tobul anga ngaiin ’1850′ kha an lo chhal ta mai em ni tih chu kan chhui theih chin a ni.

Tuna thlalak a lo lang ’1890′ tih hi tuna 8th A.R-ho rawn tih thar ani mai lo maw ka ti deuh, a bak sawi tur ka hre lo !

3. Lunginlian a Laipui Pahnih Kha : Kan ti laklawh bawk a han duhthawh belh zel ila, Mizote’n Laipui ti a kan hriat lar em em thin, Quarter Guard ho duty dinna bul a, Kumpinu Lim bul tawn a, laipui pahnih inhnung thin te kha 1st A.R hovin an lo chhawm bo daih tih ani a. Mizote hian kan hnam ang pawhin uina chang kan hriat a tha awm e.Engemaw ti tala kan lak let leh theih nan kawng tinrengin tan kan la tur niin a lang.

An mahni 1st A.R-ho property a ni lo tih finfiahna tha tak, Lt. Col. John Shakespeare-a thuziak atang bawk hian a lo awm reng mai a. Hemi tan chhan pawh hian kan lak let sak leh thei ngei tur a ni. Amah J.Shakespeare-a 1897-a Aizawl Bawrhsap a rawn nih lai khan Capt. Loch-a khan tuna Quarter Guard te hi a lo sa zo vek tawh a. A kawtah British Lalnu (Queen Victoria) lim, ama sum a a lei niawm a lo tar tawh a. Chumi chawimawi belh nan tha ngei a ringin, Lunglei a rawn kalsan a awm, Laipui pahnih te kha Lalnu lim kianga dah turin a rawn lak phei tir ta anih thu a lo ziak chiah mai.

A sawi belhna-ah pawh khata laipui pahnih te kha ‘Indo Lawng’ a an hman thin, 1857 laia Chittagong river-a awm thin ani a. November 1857-a 34 Native Infantry an hel tak khan (Sepoy Mutiny), an kuta a luh palh hlauvin tuiah an paih a (Chittagong luiah). Nakin hnuah la chhuak lehin Rangamati lamah an thawn chhova. Mizorama buaina a lo chhuah (1892) khan Lunglei lamah an rawn thlen chho ani tiin a lo ziak bawk.

Laipui pakhat zawk phei hi chu Waterloo indona-ah pawh hman tawh ni hiala hriain, Lalnu chawimawi nan liau liau Aizawla rawn lak phei ani tih a lo ziak chiang khawp bawk. Lunglei atanga laipui rawn zawn phei kum a piang a, hming a lo chawi te pawh kan awm kha, Pu Laizawna [L] f/o Mamtawia, Saron Veng ang te kha.

Manding Sap Bangla : Loch House chawimawi tur leh Laipui pahnih la let tur hian NGO, Sawrkar leh Mizo mipuite i harh thar mawlh ang u.

Similar Posts:

Recent Posts:

13 Responses to “Mizoram In Dinglai Upa ber ‘Loch House’ !”

  1. 1
    mama Says:

    Assam Rifle Commandent bungalow saw a ni em khah?

    Report this comment

  2. 2
    lushai_er Says:

    LAD-LPG semna bul, Agri office piah ami saw. Airtel Prepaid Ofis opp. anih chu.

    Report this comment

  3. 3
    lushai_er Says:

    Quarter Guard Laipui pahnih hi an tifel vek tawh anga sawina kha a rei tawh fu a, an lak let hun chuan Governor Kawtah dah daih sela a tha ang. A.R-hovin an kawl leh chuan khuareiah an intitatu leh thovang.

    Report this comment

  4. 4
    Borat Says:

    “The Making of Aijal” tih bu chu chhiar tur library ah a awm em le? (Lushai_er nge nge a chhuah tha thin kher mai).

    Report this comment

  5. 5
    Dr Mahminga Sailo Says:

    Post bengvarthlak tak a ni… (Y)

    Report this comment

  6. 6
    SiLent_Man Says:

    A thlalak nei kan awm em? Serkawn a Sap Upa quarter hlui kha Mizorama in dinglai upa ber kalo tia

    Report this comment

  7. 7
    Dr John Says:

    (Y) A Thlalak rawn dah tel thei ula tha tur asin mawle…

    Report this comment

  8. 8
    saint sammoo Says:

    Link @ ZOa tlau- ah khian a thlalak chu a dah e..

    Report this comment

  9. 9
    lushai_er Says:

    Pic hi Link a mi khi ka ring nghal mai a, kal remchanah kan misual cameraman te hian han shot zauh se a tha ang.

    Report this comment

  10. 10
    lushai_er Says:

    #6 @Silent_Man : Serkawn hi chu a hnuhnung deuh zawkin a lang ! Arthington Mission hnuai atang khan Baptist Mission Society lamah an insawn anih kha. Aizawl an chhuahsan phawt a, Tlabung lam atangin Lunglei chu an lut leh chauh zawk a ni. An luh kum hi 1903 ti a record a ni. Chumite qtr. chu Loch House ai chuan a hma thei lovang.

    Report this comment

  11. 11
    lushai_er Says:

    #4, @Borat : The making of Aizawl chu chhiar tur awm teh reng e. Kei chuan ka nei reng mai a !

    Report this comment

  12. 12
    H.Vangchhia Says:

    A ngaihnawm e (Y)

    Report this comment

  13. 13
    chhana Says:

    Nia.

    Report this comment

Leave a Reply

You must be logged in to post a comment.