MIZO DIK TAK CHU TUTE NGE?

February 3rd, 2013 9:11 am by Maloma Thadou

-T.D. Zalawmpuia (@facebook Maloma Thadou)

Tun tum chu Luka ziakah chuan tiin bul han tan phawt mai teh ang. “Chi a chhiar tham lohte a thik tir theihnan,” tiin kan Bible-in a lo sawi a, khuti khawpa hnam ropui leh chak, khawvel hriat khawpa thil ti thei mah Bible-in chi a chhiar tham loh a lo tih si chuan Mizo/Zohnahthlakte lek phei chu chi bing tê tê a kal a, in dova, in nghirngho tur kan ni lo a sin maw le. Mahse kan pi leh pute atangin chi bing politics hian kan rilruah hmun a lo khuar thuk tawh lutuk a, siam that leh rual a ni ta lo. Chuvangin Mizo nihna hming pu tur bik kan inthliar a ngai tawh  a ni. Mizo hnahthlak han tih pawh hi thenkhat tan chuan pawm a nuam lo deuh mai thei. A then chu ‘Mizo’ zungzâm an nih la inhre hauh lote an ni a, a then dang chu inhre tawh, mahse mahni chi bing (sub-clan) hming pu duh zawkte an ni a, a then dang leh chu inti duh lo hrim hrimte an ni thung.

Mizo hnathlak hnam danga lut tawh te:
Mizo hnahthlak zinga chi (clan) pêng thenkhat chu hnamdangah an lût tawh a ni. Kawlawi leh Rupini chi pêngte chu Tripura hnamah an lût tawh a; Koireng leh Lamjang chi pêngte pawh Meitei hnamah an lût tawh bawk a; Aimol, Anal, Chawhte, Chiru, Maring, Monsang leh Mayon chi pengte chu Naga hnamah an lût tawh bawk. Heng dinhmun inang lo tak taka awmte huam veka kan sawina a ni a, a lêr emaw, a zâr emaw, a kungpui leh ziding bikte maw awm anga hman a ni lo. ‘Mizo’ tihah hian Lusei leh Ralte chite an inchhun luh vek tawh avang hian a neitu an ni chuang lo a, a kungpui an ni hek lo; chutiang dinhmun chu an hauhin an chuh ngai rêng rêng lo tih kan hria. A dik tak chuan an zavai hian ‘Mizo’ an ni vek a, Mizo inti hmasa apiang leh lungsi taka inti- Mizote hi a ziding leh a kungpui chu an ni mai.

Kum 1901 chhiarpuiah khan Mizoramah hnam hming ‘Mizo’ inchhâl pakhat mah an lo awm lo na a, Kum 1961 chhiarpuiah thung chuan 96.50% in an hnam hmingah ‘Mizo’ an inti tawh a. Assam, Manipur, Meghalaya, Mizoram leh Tripura chhiarpui 1981-ah chuan Mizo hnahthlakte zingah 53.05%-in ‘Mizo’ an inti a. India ram pum chhiarpui 1981-ah pawh, Mizo hnahthlakte zingah 63.16%-in Mizo an inchhal tih kan hmu bawk a ni. (Census of India, 1991)

Mizo hnahthlakte tai darh dan:
Kan pi leh pute’n Kawlphai (Kabaw Valley) an chhuahsan nachhan hi chiang taka sawi theih a ni lova. Shan-ho Assam ram pana an kal pah hian Kawlphaia chengho dial dial pi leh pute chu an nawr chhuak ni ngeia rin a ni. Kawlphai atanga an pan tur Thân tlang leh Run kam vel hi a chhengchhe êm êm a, a tlang a sangin a vawt ngawih ngawih bawk a, ei leh bar zawn harsatna ram a ni leh zel bawk a, a vawh em avangin la (Cotton) a pâr thei lo a, buh (Rice) a vui thei hek lo. Chu bakah an la chen ngai lohna ram ngaw dur pui pui a ni a, kalkawng tha a awm bawk si lo. Chuvangin hmasawn tum vang leh an duhthlanna chuan an panin a rinawm lo. Hetia ram tha zawk atanga tlangram chheng chhe zawk a in suan luh a lo ngaih takah chuan dam khawchhuahna zawngin tlang hrang hrang an bawh ta a, hmun rem deuh leh ei tur leh in tur lakna awl deuh an hmuh chuan khua an din zel a, hmun chhengchhe tak tak leh ram ngaw dur khup a nih avangin in kal pawh a lo har a, mahni awmna theuhva hotute nei hrangin, a hnu zelah phei chuan chi (clan) peng tam takah an lo chhuah phah a, kum tam deuh an awm hran hnu phei chuan, thil ho tê ah pawh an inhnial a, an inhau zui a. Chi leh chi inkarah indona a lo chhuah phah ta a ni.

Hnam hming bulfuk tak kan nei lo:
Mizo hnahthlak zawng zawng, thlah khat leh chhuahna thuhmunte hi tun thleng hian kan zavaia lungsi taka kan pawm tlan theih ‘HNAM HMING’ kan la nei thei tlat lo hi a mangan thlak mai ni lovin, a zahthlak ngawih ngawih zawk a ni. Khawchhak lama Mizo hnahthlak te hi ‘Chin’ tiin koh an ni a, he hming hi Burmese inscription-ah chuan kum 1233-ah khan a chuang tawh a ni. Amaherawhchu, Burmaa Mizo hnahthlakte hian anmahni chu hmanlai atanga tunlai thleng hian ‘Chin’ an inti ngai rêng rêng lo a, hnam dang hnena an insawi chauhin he hming hi an hmang a. Anmahni chuan chi, chipêng leh chi tepêng (clan, sub-clan, sub sub-clan) an neih hran thliah hmingin an insawi thin. Khawthlang lamah chuan ‘Kuki’ tiin Mizo hnahthlakte chu hriat an ni thung a. Mahse tunlaiah chuan an hmang tawh meuh lova, mahni chi bing theuh kan hmang zel hlawm tawh a nih ber hi. Hetianga hnam dangin min koh dan chi hrang hrang te, keimahni theuh kan insawi dan hming dang dang hman a nih hlawm avang te leh, chu chi leh chipêng hmingte chu kan sahuai thing vawn tlut hlawm avang tein, Mizo hnahthlak zawng zawng hian khawvel hriata kan in chhal ngam tur Hnam hming bul fuk tak kan la nei lo rêng rêng a, ‘Mizo’ tih hming hi kan chhehvela hnamdangte min koh dan ni lovin, Pathian min pek liau liau a ni a, ‘Mizo’ tih a kan lungawi lo a nih chuan, he khawvel hun hmawr tawh takah hian Hnam thar din tura inbuatsaih a hun ta hle a ni.

Mizo dik tak te chu:
Awle, a hmasa lama kan sawi tawh angin, Mizo hnahthlak zingah pawh hnamdanga inchhung lût kan hmu a, a in chhung lût ve lo te pawhin Khawvel mite hriata Hnam hming koh bul fuk tak kan la nei nghet chuang lova, chi peng tê tê in kan la awm thluah a ni ber e. Chi leh chi kan indo a, kan in nghir ngho fo avangin hnam khata in chhung luh leh pawh tun thlengin kan la harsat phah a ni. Tunah zet chuan thangtharte hian, kan hmalam hun kal zel tur atan pawh nise, Hnam hming in kohna bul fuk tak kan neih a hun ta hle a ni. ‘Mizo’ tih hi hmun tam takah hnam hming atan hman a lo ni fo tawh a, chuvangin “MIZO” tihah hian Mizo hnahthlakte hian lungrual tum tawh ila, mahse miin kei chu ‘Mizo’ ka ni lo a la tih tlat chuan, khawvel pum dan (International Law)-ah pawh Mizo a ni ngei tur a ni, tih a in ziak chuang lova, chutiang bawkin Zohnahthlak zinga mi eng chi pêng ber pawh nise, ‘Mizo’ hnam ka ni a tih chuan lo tawng hnawl theih ngawtna dan a awm chuang hek lo. Chuvangin, ‘Mizo’ tih hi ka hnam a ni ti apiang chu MIZO a ni nghal tawp mai a, vawiin ni thleng pawh a, MIZO kan ni lo a la tih tlat chuan Mizo a ni lo tihna  a ni. ‘Mizo’ tih hi miin rilru a ngaihtuaha, thinlung chhungrila pawm a, thluaka chhinchhiah reng bawk chuan, chu mi ngei chu MIZO HNAM dik tak chu an ni e.

(Tawngkam hman sual ka nei a nih chuan, thahnem ngaihluat vang a ni tih min hriat sak dawn nia.)

Lehkhabu râwn te:

Mizo Chanchin By, B.Lalthangliana

Mizo Chanchin By, Rev.Liangkhaia

Similar Posts:

Recent Posts:

18 Responses to “MIZO DIK TAK CHU TUTE NGE?”

  1. 1
    buhtlei Says:

    komen ka hawng e (C)

    Report this comment

  2. 2
    jpaite Says:

    (Y)

    Report this comment

  3. 3
    H.Vangchhia Says:

    http://www.misual.com/2011/12/.....chiang-em/

    Report this comment

  4. 4
    chhangteval Says:

    Kan khel ngun ta malh malh e he topic hi chu :-)

    Report this comment

  5. 5
    lr hlonchhing Says:

    Zu leh Mizo topic hi chu kan khel zing ta malh malh e, ka confuse vek tawh ka chhiar zing tawh lutuk a :-O

    Report this comment

  6. 6
    cotdarz Says:

    A tam ve ta khawp mai. Hriatzaunan erawh a tha phian zel e. Rilru te lo deuh pu ila kan inngeih tlang ni mai tur.

    Report this comment

  7. 7
    VL.khobung Says:

    A tha ve tho mai a

    Report this comment

  8. 8
    chhana Says:

    Mizo diktak ka ni a, Hmar hnam peng pakhat Varte ka ni. Mahse, Hmar hi Mizo a ngailo chu engemawzat an awm.
    Sailo hi Mizo hnam zingah chuan pui berah ka ngai thin a, mahse, Mizo a ka ngaih meuhloh Paihte thlah an ni daih lawi si.
    Chawhte Naga hnama lut ta ang in i sawi a, kan khua Sihphira chhungkaw pakhat chu inti Mizo takin an awm lawi si.
    Chuvangin, inchhui vak vak loin a duh chu inti Mizo se, a duhlo chu inti Mizo lo mai rawh se.

    Report this comment

  9. 9
    Nirvana Says:

    “‘Mizo’ tih hi ka hnam a ni ti apiang chu MIZO a ni”. Dik hmel viau. Mizo intih mai aiin “Zohnahthlak, Zomi, Zofate tia inkoh duat kan ching hlawm em a. Mizo/Zohnahthlak ti duah lovin Mizo intih mai tur niawm tak ani. “Mi” lai tak hmang hreh niawma pui hi kan awm tlat thin.

    Report this comment

  10. 10
    Athana Chhangte Says:

    Tha hle mai.Ka save ve hmak e. (Y)

    He thu hi kan hre zing ta. Keichuan Mizo Kristian ka nihna hi ka duhtawk khawp mai. :-D

    Report this comment

  11. 11
    bbney Says:

    Hmar thenkhat hi chu an inti Mizo lo ve bawk em a ni. Bangalore-ah pawh “Kei chu Hmar ka nia, Mizo ka ni lo” titu ka tawng tawh, Hmar ve tho ka nia, mak ka ti kher asin.

    Post tha tak a ni e.

    Report this comment

  12. 12
    Amah Charice_mizo Says:

    I ziak tha hle mai, perspective thar i rawn neia, chuan i ngaihdan hi ka thlawp em em bawk. I hnam hming ka ena, ka ngaisang zual che. i ti tha e unaupa :-)

    Report this comment

  13. 13
    H.Vangchhia Says:

    Mizo tih awmzia hre miah lo, Mizo tih an hman chhanin a huam tel vek tho si hi an tam khawp mai. Chung zingah chuan in tel nawk a nih hmel. Identity leh Tribe/clan awmzia hi hriat tur.

    Mizo tih hi “Ka ni” tih vang emaw, “I ni” kan tih vang emaw a nih chi a nih theih a ni lo va, “Ka ni lo” tih emaw, ” i ni lo” tih vang a nih loh theih pawh a ni hek lo. Zohnahthlak tawh phawt nihna, hnam hrang hrang hming khat a min sawi khawmtu a ni zawk. Mizo hnam hi a awm ngai lova, Zohnahthlakte hi Mizo-ah kan inchhal thei vek thung.

    “Mizo hnam ka ni a, Hmar ka ni. Hmarah chuan Varte ka ni,” tih duah chi a ni hek lo. “Hmar Varte ka ni a, chumi chu Mizo zing ami a ni,” tih ang chiin a dik hmel zawk viau bawk awm e. “I belong to Mizo tribe of Hmar tribe of Varte subtribe/clan,” tih nilo vin, “I am a Mizo of Hmar tribe and Varte is my subtribe/clan” kan ti zawk tur ani ang.

    Comment #3 khi (Y)

    Lusei tawng hmangte hi Mizo zingah kan tam ber a, chumi te chuan a hmang ve lo te hi a huikhawmtu kan nih a tulin a pawimawh em em. Mizo tihin a huam chin pawh hre lote hi kan hrilh fiah zel (beidawng lovin) a pawimawh. #3 a ka ziah khi Lai leh Paite ho hnenah te an mahni tawngin ka pe fo mai. Hmar ho hnenah pawh an mahni tawngin ka lo pe ve thin bawk.

    Report this comment

  14. 14
    Puii Says:

    Inpawihfak ni miah lovin..HVa hian maloma thuziah hi a sawifiah thiam khawp mai… (Y)

    Report this comment

  15. 15
    funny™ Says:

    Mizo dik tak chu keimah hi ka nia, keimah lo mizo dik tak an awmlo. Engvangin maw??? E le keima teh dan atangin…

    Obama khan term hmasa-a a campaign lai khan, “vawk hmui ah hian lipstick hnawih mahula vawk a nihna a bo chuanglo.” a ti.

    No Other Comments…

    Report this comment

  16. 16
    funny™ Says:

    Facebook is down RIGHT NOW. lolz. Just wonder how fb can get down. :P

    Report this comment

  17. 17
    sheldon Says:

    Pu Hv comment @13 (Y) Post pawh (Y)

    Zo hnahthlak ngeiin Mizo ka nilo a tih tlat chuan a duh duh lo ni mai mai teh se. Kei ka duham vak hleinem…hehe.

    Ti daih ila, in mutthilh theihloh tum hian in meng ve reng thin em?? LOLZZ..

    Report this comment

  18. 18
    Dr John Says:

    (Y) Post hi Tha ka ti khawp mai.
    “Mizo” tih ah hian Lungrual vek ila, kan ram zim-te pawhin awmzia a nei leh zual ngei ang.

    Kei chu “Mizo ka ni hi ka Lawm e” ;-) :-) (Y)

    Report this comment

Leave a Reply

You must be logged in to post a comment.