Ka hmangaih reng ang che

February 3rd, 2013 4:42 pm by bbney

Ka lerh hma deuh pawh a ni mahna, pawl 1 ka nih laia kan class-a hmeichhe naupang pakhat ka atchilh theih zia hi ka chhungten min hrilh thin. Tak tak ni maw.

Pawl 7 ka nih thleng kha chuan thingtlang mipa naupang harh ve tak kha ka ni mai a. Lui kal, thingtuai put, indo lem, inum, inkhelh leh thildang karah khan kan rualpui hmeichhe naupang hmai fai deuh chu ka care ve thei rap :) High School leh Higher Secondary chu hostel-ah ka awm tluan parh a. Rual ka pawl tam lo a, loh theih loh vanga lehkha zir nasat a ngai chung khan * chu ka nei hman nual.

Ralkhat atanga ka sawi peih ang aiin ka bawhzui chak lo bawk a, ka bialnu tih tur chu ka nei ngai chuang hlei lo a. Ngaihzawng nei miah lo-a VC leh MLA inthlanah vote ka thlak ve ve hnu chuan ka thianten min manganpui ta deuh a,ka thianpa cousin pakhat hi vau titih, thlem titihin kan beihrawn a, min lo khawngaih ve ta hram a. Ngaihzawng nei ngai lo tih takah ka phur khawp mai a,rin ang he hu erawh a ni lem lo.

Kei aiin kum li velin a naupang a, a ngo hle a,a pian  a nalh pangngai hle a, a sam a sei nalh viau bawk. Nilenga fashion channel en peih tih takah a inhmeh zawng thawmhnawa hre hle a, hmeltha eltiang ni lo mahse ka lung a awi tawk hle a ni. :) Kei aiin mi biangbiak a thiam fe a, a chhe lo tih pawh a inhai lo hle. Ngawichawi tak leh zakzum tak a ni lem lo a, a confi hle tih hian a sawifiah ber awm e.

Tihtauh a hrat hle tih lohah chuan a kum phu lovin a puitling reuh phian a, hmalam hun turte hi min sawipui leh neuh neuh thin a, plan mumal ka neih loh lutuk avangin min hau leh hrep thin. Kan chawlh lai a innang bawk a, an inah ka leng ngun hle a. Vawikhat an ina ka len tumin, ka haw turin an pangpar khawina ka tilum palh a, fiamthuin hlawh ka neih ve leh pangpar khawina thar leisak turin min ti ve ziah lehnghal.

Khawhar in leh puipun nikhua-a kan inzui tak zel hnu chuan hre tawk an awmbelh zel a, a hria apiangin an inhmeh lo e an lo ti thla zen a saala…

Ka zirna zawm turin phaiah ka chhuksan a, ka ngaihzia leh duhzia ka hrethiam tak tak chauh a. Karkhat kan awmhran hnua ka ngaihna chu thla 3 hnuah pawh a la ngai reng mai. Kei ai mah khan lunglen te kha a lo tuar thei lo ve lehchhawng a. Phone-a kan inbiak lai te hian a lungleng hi a tap leh ringawt thin a, ka tah ve ka hlauh avangin vawikhat chu a tah dan ka zirsak a, kar 2 vel min biak duh loh phah. Ka sim chiang kher mai.

A ler lo a, kei lahin ani aia tha ka hmu dawn lo tih ka chiang a, midang ka ngaihven lem lo. Ka zirna min tuipui a, hlawh ka neih huna thil ka leisak turte hi a sawi leh teuh thin a. Mi a ringtawk a, hlawhtling ngei turin min beisei tlat a, amah vang tal pawha theihtawp chhuah turin min fuih thin.

Chumi tuk chuan a phone ri vangin ka harh a. Harhchiang mang lo zetin ka la a,engnge a sawi a,engnge ka sawi tih tak pawh ka chiang tawh lo. Ka harh chiang vak lo tawng nawi niaih kha a lawm em em a,a nui nasa hle tih chu ka hria. Rei pawh kan inbe lo a, kha kha ka biak hnuhnun ber tur a ni tih hria ila khati mai khan kan inthlah lo tur.

__________________________________________________________________________

Ka pa chuan kan hla play lai chu a titawp a, car atang chuan a chhuak a. Ani hi an accident zawha buaipuitu leh a boral thu min rawn hrilhtu a ni a. A nu leh pate pawh an rawn thleng zui ve mai a, keipawh chu ka chhuak ve ta a.

Rei lote kan dinho hnu chuan kum 6 chuang ka tlawh ngam tawh loh a thlan chu kan pan ta a. A pain “Khu khu ania” tia Siamtei thlan min kawhhmuh lai chuan ka tawng tha thei tawh meuh lo. A thlana dah tur pangpar khawina chu ka en a, a panga ka thuziah chu mittui parawl vanga fiah lo ruai karah zawitein ka chhiar nawn leh hram a.

“Ka hmangaih reng ang che.”

Similar Posts:

Recent Posts:

19 Responses to “Ka hmangaih reng ang che”

  1. 1
    cotdarz Says:

    A va han sad raih raih ve le..

    Report this comment

  2. 2
    Amah Charice_mizo Says:

    He story hi ka chhiar tawh, nangma ziah tho hi amawni le? Chuan ka chhiar hmasak khan ngaihnawm ka ti em em bawk.

    Report this comment

  3. 3
    bbney Says:

    @charice: a ni ngei ang. kha kha chu a thui mah mah a, bakah kum 4 vel kalta a ka ziah tawh ania, a tawplam a mi hi ka belh nual :)

    Report this comment

  4. 4
    Matluanga Says:

    a va lungchhiatthlak ve le…ka story nen inang tep…ka khawngaih hle mai che…good post (Y)

    Report this comment

  5. 5
    sheldon Says:

    Sad sad…life’s not fair. A ngaihnawm lungkuai raih mai. I tawn tak tak te pawh anih hmel e, i ziak thiam.

    Report this comment

  6. 6
    mr.Duhlova Says:

    Ka rilru a khawih hle mai….i ziak thiam, ngaihnawm ka ti tak zet…… (Y)

    Report this comment

  7. 7
    saint sammoo Says:

    hei chu.h. ……..ka duh chi…

    Report this comment

  8. 8
    bbney Says:

    @matluanga: Nangpawhin i tuar ve hle dawn a nih chu, kan story a inan tep chuan. A tihngaihna tak hi a awm tawh thin si lo a.

    @sheldon: nia, nun hi chu a fair thin lo. Mahse phu loh malsawmna ka dawn te hi ka chunga thil tha lo lo thleng thin ai hian a tam zawk zel a, vui thei erawh ka ni hauh lo.
    @mr Duhlova leh saint sammoo: tilawmawm e.

    Report this comment

  9. 9
    Puii Says:

    A tawpa lung chhiatthlak hi chu aw…. chhiar a hrehawm ka ti thin … :-$

    Report this comment

  10. 10
    chhangteval Says:

    Lungrun ve :-)

    Report this comment

  11. 11
    eZee Says:

    True Story hi chhiar a nuam ka ti. Fb a i post poh kha min tag ve lo na in ka lo chhiar chhuak vek ;-( I hnung hi ka rawn zui ve dawn .. Ziak ve teuh teuh teh ang ;-)

    Report this comment

  12. 12
    PKfanai Says:

    A tawpna chu ava tha reuh e. In rinawmlohsan, chun leh zua an hrang, cho rual loh val, ka riang lua e, tih vel ai chuan, hetiang lam love story hi chhiar a nuam ka ti zawk.

    Report this comment

  13. 13
    bbney Says:

    @ezee: e khai lo ziak ve teuh teuh tak teh khai

    Report this comment

  14. 14
    Dr Mahminga Sailo Says:

    Hetsss.. A tir lam ka chhiar khian, min copy emaw ka ti hman tep a lawm.. :-D

    Ramri i’n siam kalh khi a dangdai riau. Ka tawn ni ve ta se, nang aiin ka tah nasat ka ring.. ;-( A ngaihnawm bawn tawp.. (Y)

    Report this comment

  15. 15
    bbney Says:

    nia, kum 6 dan vela thilthleng a ni sia, hetia ramri han kham hiana inzawm put lo deuh e ka tia:)

    Report this comment

  16. 16
    Dr John Says:

    (Y) A Tha hle mai. Rilru pawh a khawih na-ngiang e…

    Report this comment

  17. 17
    Lamji Says:

    Uaai. !! ™

    Report this comment

  18. 18
    Matluanga Says:

    kei chu ka ziaawm ta e..kum 7 a kal tawh a, mahse a hunlai kha chuan ka buai ve khawp mai..a thlan tunthlengin ka la tlawh leh duhlo..ka tawn ang deuh chiah hian nikum ah ka cousin nula hian a tawng ve leh…an hmelthat dun nen ka khawngaih ve leh chhawng khawp mai

    Report this comment

  19. 19
    true ^mizo^Boy Says:

    a van ngaihnawm emmmm….i tawn ang hi tawng ve ta ila nang ai hian ka nat ka ring mah e, mahse hmangaihna hi chu a inchen leh chen loh a teh theih si loh, i cousin chu ka van tuarpui ve, Pathian in awmpui mawlh rawhse…

    A dang pawh han thawh zel teh khai, mittui i ti tling hial e

    Report this comment