A Uire Lai Takin An Man!? {Sunday Pual}

February 3rd, 2013 6:19 am by Dr John

A Uire Lai Takin Maw?
Chanchin Ţha Johana 8:1-11 ah Hmeichhe pakhat uire-a puh, Juda sakhaw hruaitu Lehkhaziaktute leh Pharisaiten Lal Isua hnena an rawn hruai chungchang kan hmu a. Bible-ah a hming a chuang lova, engang chiah-in nge a chetsual a, an man tih pawh a sawi lo. Pharisaite report danah chuan, “a uire lai tak-in an man” a ni.  Pharisaite sawi hi a dik a nih chuan a zahthlakin, a khawngaihthlak hle mai. Sual viau turah pawh ngai ta ila a sual awm lo ve. Bible-in “Mi țhenkhat sual chu a langsar a, an tuar nghal bawk țhin. Ţhenkhat erawhchu a lang lawk lem lo” (1Tim.5:24) a tih angin, he hmeichhia hian “sual langsar tak” a ti tihna a ni thei ang. Mahni țheuh erawh inzawt ta ila, “Sual langsar nge ka tih țhin, sual langsar lo?”

Khawnge a Uire-pui Mipa Chu?
Pharisaite hian a Uire lai taka an man nia an sawi Hmeichhia hi dim lo bak sakin Temple-ah an rawn hnuk phei a ni ngei ang a. A uire lai tak an man a nih phei chuan dim an tum lo hle ang a, Pathian thupek angin “uire chu lunga denhlum tur” a ni mai dawn a ni (Lev.20:10, Deut.22:22-24). Pathian thupek anga thil an ti dawn a nih chuan Uirenaa inhnamhnawih-te 2 mipa leh hmeichhia hi tihhlum ve ve tur a ni. Sakhaw hruaitu Pharisaite leh Lehkhaziaktute hian ‘mipa uire’ hi an rawn hruai tel ta tlat lo hi thil mak a tling ta! Sanhedrin member zingah a chhungte an tam deuh nge? Mihausa tak a ni a, Temple-ah Thawhlawm a thawh țha thei si a, a chungah dan an lek ngam lo nge? Politics a inrawlh emni ang le? Hetah hian Juda Sakhaw Hruaitute hian Thleibik neiin, dik lo takin rorel an tum tih a chiang tawk hle. Thleibik neia rorel hi a awl hle dawn mai. Fimkhur a ngai nasa a ni.

Sual Nei Lo Apiangin Deng Hmasa Rawhse
Lal Isua hian engkim hi a hriat vek vang nge, thilthleng chanchin hi pakhat mah zu zawt hauh lo va! Keini chu ni ta ila, “Evidence in nei em? Witness in awm em? Voice record, Photo, Video evidence-te a awm theih chuan a țha tawp ang. Court date ruat ila…” kan ti mai thei. Kan lo ti a nih pawhin, a awm hle ang. Mahse, Lal Isua hian he Case urgent zia hi a hrechiang a, witness pawh 20/30 rual an awm thei dawn tih a hmu a. Chuvangin, a rang thei ang bera ‘case chinfel’ a tum ta a. A chinfel dan hi Khawvel court-in a entawn thei miah lo…

…A Kutzungin Leiah A Ziak
Khawvel court-ah chuan Sawipuitu țha leh Roreltu Lamțang neih chuan, thiamchan a awl. Lal Isua hian Uirenu hi țawngkam pakhat te pawh-a chhan emaw, sawi fihlimpui emaw a tum lo. Lal Isua hian Pharisaite hi Pathian thu hmang leh aruka an thiltih (leh ngaihtuahna) kaltlangin a chhang a ni. Mizo țawnga, “Sualna nei lo (Greek. anamarteetos) apiangin deng hmasa rawhse” tih hi chu, a huam zau lutuk deuh mai thei.

A Ţawngbul lamin a sawi tum tak zawk chu, “He Uirenu anga uirena leh hurna lam kaihhnawih (same kind of sin, adultery & fornication etc) reng renga thil ti lo leh ngaihtuahna seng miah lo chuan deng hmasa rawh u le,” a tihna zawk a ni. Bible Scholar-te chuan Lal Isua hian Thupek Sawm zinga 7-na “Uire suh” tih kha a ziak niin an ngai a (Ex.20:1-17). Bible-a kan hmuh angin “Uire tih hian a taka taksa ngeia uire leh mit-a thlir a, rilru-a ngaih chaka ngaihtuah zui thlengin a huam tel” a ni (Cf. Matt.5:28).

…A Kutzungin Leiah A Ziak Leh…
Lal Isua’n Thupek Sawm zinga 7-na “Uire suh” tih a ziak zawh chuan, leiah a kun leh a, a kutzungin leiah chuan thildang a ziak leh ta a. Bible-ah hian Lal Isua’n vawi 2 lai leiah thil a ziak a ni tih record mah sela, eng thil leh eng thu tak nge a ziah tih hi a sawi lo. Achang hi chuan a sawina hmuna mite (context of the people) tana a fiah êm avangin thu tam tak hi Bible ziaktute hian an sawilang lem lo niin alang. Tuna kan thukhel mek pawh hi, Sualna rau rauvah pawh  ‘uirena leh hurna’ lam kaihhnawih case a nih avangin huam zau tir lutuk chuan a kawh tum a dang daih thei.

Lal Isua’n Thupek Sawm zinga “Uire suh” tih thupek a ziah zawh chuan, leiah a kun leh a, amah chu uire lo leh hurna lam reng reng ngaihtuah lo zingah a intelh a, a hming pawh vaivutah (leiah) a ziak ta a ni, an ti! Pharisaite leh Lehkhaziaktute hi sualin, thil sual tam tak ti țhin mahse, arukin an fellohna leh an sualna-te an inhre kur a. Vaivuta Lal Isua thuziak 2 te an hmuh chuan an thiltihsual leh an ngaihtuahna sual zawng zawngte an hrechhuak a. A Upa ber ațanga an relhbo na chhan pawh, kum tam apiang an tisual tam tih an inhrechiang a ni, an ti. Scholar țhenkhat chuan, “Pharisaiten Lal Isua thuziak an zuk en khan, anmahni sualna țheuh an zu hmu a, an hlau ta a ni” an ti! Hei hi chu a penhleh deuh hlek tawh a, sawi hi duhtawk mai ila.

Zâwngin Ama Ngumkhak A Hmu Lo
Uirenu chungchang hi mi țhenkhat chuan, “Pathianin hmeichhia a țan zia min zirtir a tum a ni” an ti! Hei hi chu a dik famkim lo deuh. Ţhenkhat thung chuan, “Dik lo taka midangte rorelsaktute chungchang thu leh Ţantu leh sawipuitu nei lo te chunga Pathian khawngaihna hnathawh a entir” a ni, an ti. Pharisaite hian thil 3 lian tak tak an tisual a, (1). Uire zinga a mipa zawk an hum tlat a, an rawn hruai duh miah lova, hlei nei takin uire hmeichhia chauh an thlur bing, (2). Bible thu-in a tarlan ang khian, uirenu an rawn hruaina chhan ber pakhat chu, Lal Isua țawngsual leh tihsual man an duh vang a ni, an rilru hi a chhe tawp, (3). Pharisaite hi Sakhaw hruaitu pawimawh tak tak ni hlawm mahse, uirena, hurna leh inngaihna lam thilah a rukin an lo fihlim lo (an ngum a khak) nasa mai tih hi anmahniin an inhrechiang a. Chutichung chuan anmahni anga sual ve bawk chu fello taka rorelsakin, tihhlum hial an tum thung a ni. Chuvangin, Lal Isua’n heng zawng zawng hi hmu-in, a hria a, an nihna dik tak chu Pathian Darthlalang ‘Pathian Thu – Thupek Sawm’ kaltlangin a hmuhtir ta hlawm a. Mizo thufingin a sawi angin, “A Vawtu-in êk an cheh ta zawk” a ni.

Kal La Tisual Leh Tawh Suh
Khawvela mihring zingah chuan hmangaihna leh khawngaihna ngah inti eng ang mahila, thinrim-a ân vak mai țum te, huat zawng reh theih tawh loh te, ngaihdam theih tawh loh te, kawm serh te thlengin kan nei fo țhin. Uirenu Case chungchangah hian Lal Isua hian ‘chinfel hna leh siamthatna leh tanpui hna’ (solving, shaping & helping) a thawk kawp vek a ni. A Conclusion te hlei hlei hian rilru a khawih, “Kei pawhin thiamloh ka chantir lo va che… kal la tun hnuah tisual leh tawh suh.” Tunhmaa i fellohna leh sualna-te kha a țha e tihna lam ni lovin, TUN AŢANGA I HMALAM HUN KHA A PAWIMAWH ZAWK A, ULUK TAKA HMAN A ŢUL A NI TIH HI LAL ISUA THUSAWI AŢANGIN A LANG CHIANG HLE A NI.

Similar Posts:

Recent Posts:

22 Responses to “A Uire Lai Takin An Man!? {Sunday Pual}”

  1. 1
    CFL Says:

    Ka va hlawkpui em. Amen
    Excellent post

    Report this comment

  2. 2
    chhangteval Says:

    A para tawp ber chu ropui hle mai (Y)

    Report this comment

  3. 3
    mr.Duhlova Says:

    A ropui hle mai… (Y)

    Report this comment

  4. 4
    Hotunu_pasal Says:

    Amen ! (Y)

    Report this comment

  5. 5
    H.Vangchhia Says:

    Tha ve (Y)

    Report this comment

  6. 6
    lr hlonchhing Says:

    Pu John post ka hmuh reng reng hi chu typing a uluk thin khawpin ka hria. Tuna mi pawh hi chutiang tho chu a ni. Ka chhiar chhuak dap a, ka hlawkpui khawp mai.

    Report this comment

  7. 7
    chhana Says:

    I sawifiah tha bawka, ka var uar mai. עמן

    Report this comment

  8. 8
    Athana Chhangte Says:

    Vawiin hian ka inkhawm lo. I thuziak ka chhiar a,ka chhiar nawn leh thin. Tha ka va ti tehreng em! Van court a Pathian hmaa kan din hun tur thlengin min mitthla tir chu le. Hmana ta tawh tunthlenga ngam zawngte chala chil hnawm hrep mai zel hi mihring zia tenawm tak chu a ni reng a ni. Kan Pathian erawh misualte thian a ni si a.

    A kharna khian ka rilru a khawih zual. Kan Pathian hmangaihna leh khawngaihna hi ava ropui tehlul em!! Kal ila, i tisual leh tawh lovang u.

    I thuziah tawngkam i hmang ulukin, a nalh hle mai (Y)

    Report this comment

  9. 9
    lr hlonchhing Says:

    Ka ngaihtuah mai mai a, minu uire chu ka ngaidam ve thei ngawtin ka ring. Kan nu uire erawh ka ngaidam hauh lovang :-P :-O :-P

    Report this comment

  10. 10
    cotdarz Says:

    A va han tha em! (Y)

    Report this comment

  11. 11
    Dr John Says:

    In Comment a va ngaihnawmin, ka va Lawm em! College Campus-a Inkhawm kan Bang chiah …

    #6, Nia LR, ka nau, ka thiam tawk te te chuan ka uluk ve ang reng khawp mai. A Engmah ni si lo hi, SiTail hi ka nei ve deuh roh Khanglang lehnghal a, e.g. Capital hman lohna turah ‘Hman Nuam Ka Ti Riau Pek’ :-P

    # 8, Thanks Athan, ni e, i Rawt ang khian, “I Tisual Leh Tawh Lovang U” (Y)

    # 9, LR, ka nau, I sawi khi ‘Ngaihtuah-tham a tling’ a ni. Thil reng reng hi Mahni chunga a thlen meuh chuan a dan a dang zak mai. Mahse, Lalpaa Innghatte chuan Ngaihdamna Lamtluang chu kan Zawh zel turah ka ngai a. Har erawh a har khawp ang… Chuvangin, “Pathian nen chuan Engkim Tih-theih a ni,” tih a nih kha ;-)

    Report this comment

  12. 12
    donald Says:

    I rawn chhui chipchiar bawka a ngaihnawm hle mai. ATC male-voice te’n Uire NU hla an han sap dup dup lai te mitthlaah a lo lang uar uar mai alawm :-P

    Ni e, helai thu hi sermon leh mon lem lovah pawh Bible thu lar ber pawl a ni awm e. Sual chungchang sawinaah pawh ‘sualna nei lo chuan deng rawh se’ tih hi a ri zing khawp mai. A awmzia i rawn sawichiang a, a lawmawm hle mai.

    Tlem han tuihnih ka’n duhlai chu helaiah hian mihring zia dik tak a lang chiang em em tih hi a ni. A huho leh haw-haw ang chuan (Mizo context-ah hian a ni lehzual em?)thil hi kan ngam huai thei khawp mai, mahse mimal anga mawhphurhna la ngam leh la duh hi chu kan tlem thin hle a ni. Ka sawi awmzia tihchian na’n Juda te’n lunga mi an denhlum dan han sawi kai zawk ila –

    Misual kha a kut an hnungkhirh a, dawhsan (feet 12 vela sang) atangin a hektu/thuhretu khan a namthla a, a hnuaia lungah/leiah a insawh hlum thin a ni. A thih loh erawh chuan thuhretu dangin lung lian tawkin a awmah a deng tur a ni a, hei hi chu an thihpui tlangpui tawh thin. A hektu/thuhretu kha tihlumtu/executioner a ni nghal thin tihna a nih chu. Mahse Judate khan he dan hi an zawm em em lem lo a nih hmel. A haw haw ang zawngin tu tih ber nge hriat theih lohin mipui khan an deng luai luai mai thin a nih hmel – Stephen-a leh Paula te an tihdan atang hi chuan.

    Lal Isua’n ‘sualna nei lo chuan deng hmasa rawh se’ a tih nachhan pawh uirenu rawn man tute thinlung kha a hrechiang em em a, anmahni ngei pawh khan an thiltih dan kha Pathian hmaah a thianghlim lo tih an chiang em em a ni. “Sualna nei lo” (Gk. anamarteetos) tih hian uirenu sualna anga uirena leh hurna lam kaihhnawih mai bakah he thil/issue chungchanga mahni chhia leh tha hriatnain thiam loh a chan tir loh tih a context hian a kawk tel a ni. A awmzia chu Pathian thu kawra hmang lova, Pathian dan anga uire denhlum duh leh ngam tak tak chuan mawhphurhna lain a deng hmasa ber tur a ni. Uire denhlum kha chu an thupui a ni lo chiang hle si a, Isua AWH tir kha an tum chu a ni. An dan ang taka den anih phei chuan midangin an den zui ve a ngai kher awm si lova; sual nei lo an nih loh bakah denghlumtu nih kha tuman an ngam leh si lo a ni. Pathian tihmualpho an tum a, an mualpho letling ta erh zawk a ni.

    Report this comment

  13. 13
    PKfanai Says:

    Mithiam thuziak tih a hriat hle mai. (Y) Nizan khan Sunday pual tur 2 chu ka han buatsaih ve a, mahse zankhua leh vawiin chawhma lam thlengin server a down leh si a. Inkhawm banah Fb lamah ka post hman hram a, power supply a awm leh si lo. A awm hunah rawn post ka tum ang. Pharisai hovin Lal Isua dan kawlawk a, tawngsualtir an han tum thin a, Lal Isuan nalh lutuk a ahan lehthal thin kha chu a ropui thin ngawt mai. He khawvel thila mifing, inzirsang ber ber te pawh hi Pathian Thlarau finna lakah chuan eng anni tak tak ngai si lo. Good post.

    Report this comment

  14. 14
    Dr John Says:

    (Y) #12 Donald, Ka Va Lawm Em, i rawn comment tha tawp. Ka Lawm Lutuk E. Ka Post dangah pawh lo Inrawlh ziah teh, ka Lawm ngawt ang…

    Report this comment

  15. 15
    Dr John Says:

    #13 Ka Lawm E Pu PK,
    Titi Chhunzawm a Chakawm tehlul nen, Chawhnu Dar 3pm Inkhawm nang hman tura ka chhuah a ngai ta tlat mai…

    Report this comment

  16. 16
    PKfanai Says:

    Donald-an a rawn tuihnih sak phei hi chuan, a chiang uar zel mai. Mithiam tak tak kutchhuak chu chhiar a manhla thin e. (Y)

    Report this comment

  17. 17
    donald Says:

    Lal Ignatia’n min chawlhsan ta rih mahse Pk-a leh Dr. John te in la awm hlauh a, khawhar pawh a ziaawm deuh e :-) Nangni in tuihnang tha deuh a, in thu post hi ka tan hlawkna leh malsawmna hlir a ni.

    Report this comment

  18. 18
    sheldon Says:

    Ka chhiar ve hman chiah a, a va tha em! Misual te tan a sermon tha tak tak min hlui thin a, tam tak hian i rin phak bak in kan hlawkpui thin ania.

    A dik lutuk – Tun leh kan hmalam nundan hi a pawimawh takzet zet.

    Report this comment

  19. 19
    Nirvana Says:

    Sin (mahni tana nghawng thil tihsual) leh crime (midang tinazawnga thil tihsual) hi kan hriat thiam loh ang bawkin Century #1 pawh khan corrupt leh midang tana pawi khawih fe fe aiin midang nghawng lem lo uire, phar, Samari mi, etc an diriam vak vak mai a. Anmahni sual khuhna remchang atan a tha laileng reng a.

    Helamah pawh officer/politician/engineer/forest officer midang chan tur ruksaktu aiin fun hnih khat lek zu zuartu dai kil kar ami leh intihlim nana zu tlem a zawng lo inte an diriam vak vak a, an vei loh tur an vei chiam chiam ani ber e.

    Report this comment

  20. 20
    Avalon Says:

    (Y) A tha hle mai. Ka hlawkpui khawp mai.

    Report this comment

  21. 21
    Puii Says:

    Sermon a tha thuai thuai, comment lah a ngaihnawm… (Y)

    Ka sermon ngaihthlak pakhata thusawitupa chuan leia Isua thu ziah hi uire den hlum tumte hming a ziak a ti… (I)

    Banah Bible pawn lam ami rinthu sawi chu a tha ber lo tiin an comment hlawm sap sap nghe nghe… ;-)

    Report this comment

  22. 22
    Amah Charice_mizo Says:

    He Bible thu i interpret dan chu tha ka van ti em! A chiang kalh kalh hle mai, mi tam takin an sawitel ngailoh a (uiretu) mipa lam an hmaih fo thin i rawn zep tel bawk nen. Chuan Pu DOnald-a comment khi a fiah khawp mai bawk. Post hlu tak a ni.

    Report this comment