Hmanlai Sairang Kawng !

February 2nd, 2013 12:24 pm by lushai_er

[Source :” Ka U Thlalian, min lo nghak rawh” by A.Thanglura}

Bungrua leh eitur chi hrang hrangte phur a, Sairang kai thlenga Maji lawngte an lo thlen chhoh theih hnu kha chuan, sairang Dawr Veng hi a lo pawimawhin, a lo lun ve ta em em mai a; Bengali dawrkai langsar zual deuh deuh te chu, Binod-a, Nogen-a, Gopi-a te kha an ni.

Sairang leh Aizawl inkarah Bawngtawlailir zawh theiha lamlian sial alo nih hnu khan, Aizawl pawh Sumdawnna hmun pawimawh tak a lo ni ve ta a. Bawngtawlailir pute chu Gorkhali vek an ni a, “Hmanlai Sairang Kawng” erawh kha chu a ralmuang lem lo khawp mai.

Kum 1890 September thla bul lamah khan Sairang leh Aizawl inkara Sipai Rawsawt inpe tur kal vel te chu Suakpuilala fapa Thanruma, Tanhril lal leh a khaw tlangval hovin an lo lambun thut mai a; an phek buai ta a ni.

Kawng kawi tak takte kha a la tamin, ngawpuite lah kha tukdarh miah lohin an la tlim hmur mai bawk a; chuvangin han inlambun nan chuan a remchang khawp mai. Ramsate lah chu awlsam taka hmuh theihin an la tam nangiang mai a; Zawng te, Ngau te, Hauhuk te chu sawi loh, Sakhi te, Saza te, Sazuk te Savawm te leh Sakei te pawh an la tam hle bawk a ni.

A kahpahin han sawi ta zel ila, hmanlai Sairang kawng khan chanchin rapthlak tak takte leh hlauhawm zet maite pawh lo zuk nei ve nawk a ! Tukkhat chu le kan Sairang inpui atangin ka pu Vanhlira leh ka nu leh ka nu huan enkawltu, Pu Taituka Ralte Siakeng te chu Aizawl panin an kal chhuak a.

Aizawl atanga mel 3-a hla chhinchhiahna lungphun an han thlen chuan, Ailawka Khiangte khan Sairang kawng mel 3 leh Vaivakawn inkarah a nupui a sahhlum ruang kha an han hmu phut ta mai a; a pang ala lum thet thetin an hria. Ailawka fapa erawh chu a pain a sahhlum ve hmain a tlanchhe hman a lo ni a. Ailawk a pawh chu hmuh phakin a awm tawh lo a ni. Kawng thlang lamah erawh chuan a ri deuh thep thep thung a; mi a rikrap thei hle ta ve ang.

Chumi hnu, ni engemaw zat a ral hnu chuan, kawng thlang thing zarah, Ailawka inawkhlum, lei seh tuta lo uai thla zuar mai chu mipuiin an hmu ta a. A iptepui chhungah chuan a chemtum leh a tuibur pawh an hmu bawk a ni.

Hmanlai Sairang Kawng khan thil mak tak tak sawi tur pawh a lo nei viau niin a lang. Sawi leh sawi hnu, Sairang leh Aizawl inkarah Bawngtawlailir zawh theih teh meuhva lamlian sial a lo nih hnu khan ‘Mel 5 Luiruam’ ti a tlang hriat, kawng chhak lamah Thlaliana leh a farnu fal deuh nalhin an awm a. Thlaliana chuan nupui atan Pi Thangi nuthlawi a nei a, fa erawh Pi Thangi nen chuan an nei lo va. Pi Thangi erawh chuan a pasal hmasa Ramesh-a, PWD Mohurrer nen fanu leh fapa an nei thung a ni.

Tin, heti hi a ni a, Pi Thangi kha a sun hnuin Thlaliana leh a farnu chu an chenna ngaiah chuan an la khasa ta reng a. An awmna leh chet tlatna khngawpuiin a hual velkhup avangin Chingpirinu te, Chhimbuk te thawm ri pawh a khat tawka hriat tur kha a awm deuh reng a; chubakah Utum te, Chungu te leh Dawngthlek te chenin, inkiltawihna pawh nei bik chuang bik lek lovin an vau-ah chuan an ri ve chiah chiah hlawm thin a ni.

Tlai lam, thimhmulah phei hi chuan ri chuah chuah thei apui hi an kat nuk mai a, chuvangin ram reh tak ti a sawi tur phei chu a ni bik lem lo. Nungchate lah chuan an thiam ang tawkin leilung mawi zia te hi hrilin an hmanhlel sa teh mai a ni.

An chenna pangngaia an unau pahnih chauhva an la tap tlat lai khan, Thlaliana farnu kha an sawi ‘Awmlai’ in zah ngai lovin a rawn tlawh thut ta mai a; Thlaliana khan chutia a khawhar hnemtu berin a boral san ta mai chu runthlak chingchihlipah ngaiin a tuat thiam lo hle a ni.

A farnu lah khan, ‘Fam dairial changa’ mual han liamsan mai kha a zuam bik lo niin a lang. Engpawh nisela, a farnu thih zan chuan Mel 5 luiruamah nuchang rawl tih hriat ngei mai hian, “Ka u Thlalian, min lo nghak rawh !” a rawn ti thla ta ruai ruai mai a; a lo chhuk thlak lai khan luichhuk Dumde te pawh a rawn su darh chum chum ta ve ang.

A enga pawh chu rawn tawnin rawn pal thla pawh chu ni sela, lamlianpuia a lo chuan chhuah thurh lai khan khua kha a eng deuh riai ruai tawh a. Mel 5 luiruam erawh kha chu tiauchhumin a la bawh chuk mai a ni.

Chutih lai vel chuan Sairang atanga Bawngtawlailir muangchanga lo chho chu a lo lang ve hlawl mai a, Bawngtawlailir chhuat hnuaiah chuan laltin ung deuh khik khek tawh hi a la eng ve set setin, a inkhai then nelh nelh a; Bawngtawlailir pu lah kha a la muthlu lap lap bawk a ni.

Chutih lai tak chuan Thlaliana farnu thlahrang khan, “Ka u Thlalian, min lo nghak rawh !” a rawn ti leh ta ruai ruai mai a. Chu veleh Gorkhali pa la muthlu diar diar lai kha a rawn harh zawk mai a. “Kawstaw Manchhe Haw ?” ti chunga a han hawi chhoh nak chuan le, nu phanchang tawh, ti deuh teh tuh, heh lip terh tur, Bakhik kherh thluk thuk thuk nana tha fahran chawn lian tlet tlut, Savawm thithun ang zut mai nei leh vawng chuan a lo thlirin, a lo melh kur mai a. A sam hreu re ru leh bawrchhawr zet mai lah chu a dar sawi deuh pen pun kha vuain, a thlah hnuang mai bawk a, ‘Chawmnu’ an tih hi ni zaw ber awm a ni ! Chutah na chuan le, “Ram ! Ram ! Ram ! Sita-Ram !” ti chel chul chungin a thidang ta niin an sawichhawng a lawm.

Similar Posts:

Recent Posts:

12 Responses to “Hmanlai Sairang Kawng !”

  1. 1
    VaiVa Says:

    A tha thei khawp mai (Y)

    Report this comment

  2. 2
    bucko Says:

    A thu tawp dan chuan part 2 a neih duh hmel e..

    Report this comment

  3. 3
    SHauzelSailo Says:

    Ngaihnawm veeee (Y)

    Report this comment

  4. 4
    chhangteval Says:

    Den rem rem :-[ :-[

    Report this comment

  5. 5
    chhana Says:

    :-[

    Report this comment

  6. 6
    Terema Chhakchhuak Says:

    Pu A. Thanglura hi chu tawngkam leh tawng hmang hi a thiam ve hranpa hrim hrim a ni. Savawm thithun ang han tihte khi a nih duh hmel riau asin. A lehkhabu “Zoram Politic lumleh dan” tih phei kha chu ngaihnawm tak a ni. Post tha tak a ni e. (Y)
    Heti ang chi hi post awm ve zauh zauh zel se la, ramhuai leh lasi chungchang vel post pawh hi awm nual zel se la, mi tawnhriat leh an thiante tawn ngei hriat hi chuan a ngaihnawm bik thin. :-)

    Report this comment

  7. 7
    Amah Charice_mizo Says:

    Van ngaihnawm em em, a tawp incident hi ka hre thawi thuak tawh. Chuan Ailawka tih khian engvanga a nupui that nge anih ka hre chak, a fapa lehzel pawh that tuma amah inawkhlum zui bawk chu a rapthlak em mai.

    Report this comment

  8. 8
    blackmagicwoman Says:

    Ngaihnawm reuh e. (Y)

    Report this comment

  9. 9
    H.Vangchhia Says:

    A ngaihnawm khawp mai (Y) ty em em.

    Ka pa Zakhuma (Paul Z Hauhnar) nen an inkawm zarah a fate nen kan inkawm ve thin a. Anni pahnih titi kha a ngaihnawm thei thin ngawt mai.

    Report this comment

  10. 10
    malsta27 Says:

    Chhiar a manhla e (Y)

    Report this comment

  11. 11
    Athana Chhangte Says:

    Ngaihnawm khawp mai (Y)

    Report this comment

  12. 12
    lushai_er Says:

    Post ka vil hman lova, min hrethiam aniang chu. Vawiin chu Lawipu lam atangin Tlawng kam kan hrut a, ka haw ve chiah (H)

    Pu Thanglura articlete hi a remchan hunah kan la rawn tarlang thin dawn nia.

    Report this comment