TUNLAI TECHNOLOGY LEH ṬHALAITE

February 1st, 2013 6:25 pm by Maloma Thadou

- T.D. Zalawmpuia

Media-in tunlai ṭhalaite a nghawng danah hian a ṭha lam aiin a chhe lam zâwnga a nghawng dan chu a langsar zâwk mah a. Mi ṭhenkhatin hriselna lamah hmasawn phah nan hmang bawk mahse mi tam tak nun chu a tihbuai phah zawk a, mihring nundan phunga nun kawngah an buai phah hle a ni. Media hian chak takin ṭhalaite a dêng a, chutih laiin Kohhran hian an nun mamawh phuhrûk zo loin an inhria a. Kristian nundàn phung thlauh thlain nun dàn phung thara nun an duh a. Thil thar hlekah hlimna a awm ringin an bawh huam huam zêl mai a ni.

Tunlai ṭhalaite hian nun kalpui dàn turah kohhran an duh khawp lo tih a lang a. Mahse mahni inenfiahna thûk tak nei si loin thil thar zuanin an tlân a ni ber. |halaite hian ngaihdàn fel tak an nei lo a, mita an hmuh leh benga an hriatte tih châkna an nei lian a. Chu chuan an nunah nghawng tam tak a nei a (Nuna nghawng nei nia inngai 61.33% Khawpui leh 61.6% khawpui pâwn, Synod Bu, 2010) (Nuna nghawng a neih sâng ber – zirna kawngah khawpui 71.23% leh khawpui pâwn 70.45%) (Inchei dànah hmeichhiate lêrh taka an incheina chhan hi TV a ni titu hi Aizawlah 89% zet an awm a, Aizawl pâwna mite 93.6% zetin chu chu an ngaihdàn a ni tho a ni. Synod Bu, 2010). Hnathawh dànah te, mipat hmeichhiatna lam thilah (84.93% khawpui leh 64% khawpui pâwn) te an châk zawng a piang an pan a, nun tlahawlhah an tlu lût mek a ni. Hêng thil pathumah Mobile phone, Television leh Computer te zîngah hian Mobile phone hmangtu an tam ber a. TV leh computer hi inhman ṭâwm theih a nih avangin a nei lote pawhin hman tur an hmu tho bawk. Hêng thil pathumte hian ṭhalaite nunah nghawng ṭha nei bawk mahse nghawng ṭha lo a nei thûk hle a ni. Media-in a nghawng dan ṭhenkhat han târ lang ila:

  1. TV hi nitin darkar khat aia tam an en deuh vek a, mobile phone hi mi ṭhenkhatin an hman tam hle laiin a nâwlpuia lâk chuan dârkar khat aia tam hmang chu TV en aiin an tlêm zawk.
  2. Technology thar hian mi tam tak mut hun leh thawh hun a sawnsak dâwrh a. Hei hian zirna leh hnathawhnaah nghawng a nei a, chhûngkaw nun a tibuai bawk. Hrisêlna lam thlenga a nghawngte pawh an awm bawk. (Zân men rei phah nan ka hmang ṭhin ti hi Aizawl-ah 57.06% zet an awm  a. Synod Bu, 2010).
  3. TV leh Computer neiten dahna hmun bîk an nei lo, a lût a chhuakin an hmuh theihna tûr sitting room-ah emaw an dah ber a. Theih chu ni se dahna hmun hran neih a ṭha hle. TV en hun bîk nei an awm mumal lo bawk. Nu leh pain TV en hun fel tak siam ni se. (Sitting room-a TV dah 219 (88.6%) an awmin an tam fâl hle a. Bedroom-a dah hi 9 (3.64%) an awm a, hmun dangah 19 (7.69%)-in an dah thung. Synod Bu, 2010).
  4. Sawrkarin ‘The Cable Television Networks (Regulation) Act, 1995 hi a nih dan taka a hman loh avangin TV-ah thil ṭha lo en tur a tam phah hle. (Naupang zawhna chhanna aṭanga kan hmuh dan chuan chhangtu 160 (64%) te chuan a remchan hun hunah TV an en ṭhin a, zinga en ṭhin 53 (21.2%) an awm bawk, chhuna en ṭhin 46 (19.6%) an awm bawk. Zana TV en ṭhin 59 (23.6%) leh zan reia en ṭhin 5 (2%) an awm a, a remchan hun huna en 160 an awm bawk. Synod Bu, 2010).

A chunga târ lan tâk aṭanga Kohhran leh ram leh hnam tana thil pawi tak lo thleng ta te chu:

  1. Kohhran inkhâwm kan tlêm zêl laiin ṭhalaite chuan tûnlai technology lamah hun an hmang tam zâwk daih a ni.
  2. Tunlai media ṭhang duang tak hian ṭhalaite chu mipat hmeichhiat hman uarna lamah a hruai lût nasa hle. Tunah chuan Mobile phone hi chutianga indawrna hmanraw hman uar ber a ni.
  3. TV en leh computer games khelh avangin naupang nunphung a danglam nasa hle a; zirna, nungchang leh hrisêlna lam thlengin an nunah a nghawng.
  4. Mahni nih dan leh pianhmanga lungâwi lo an tam phah a, hnam dang pian nalh tak tak an hmuhin chutiang chu nih ve an châk a, mahni insitnaah a hruai lût bawk.
  5. Media hian incheina kawngah nghawng a nei nasa hle a, mipa aiin hmeichhiate a nghawng nasa zâwk bawk.

Mmedia leh technology lo ṭhang zêl hmachhawn turin hma lâk theih dan tur kawng hrang hrang a awm thei a, chung te chu a tlangpui chauh han sawi zawr zawr ila:

  1.  Media-in nghawng a neih nasatna ber chu chhûngkaw nunah a ni. Chuvangin nu leh paten fate tân an hun pe tam thei sela. Nu leh pate inlaichînna ṭha neih a pawimawh a. Nu leh paten an fate nen hun tam thei ang ber hmang ho turin ṭan la sela. Chhûngkaw inkaihhruaina fel tak neih a ṭul.
  2. Fanaute hi Lalpa laka kan rochan an nih ang ngeiin nu leh pain mahni fate enkawl uluk a ngai a. Kawng ṭha kawhhmuh thei turin nu leh pate pawh inzir a pawimawh khawp mai. Nu leh pa tam tak chuan kan fate hi kan en liam mai mai a, an kalna tur kawng dik pawh kan zawn sak ngai lo. Sual an tihin kan dodal bur a, eng hi nge ṭha eng hi nge ṭha lo tih zirtir leh hrilh hriat fo a pawimawh hle a, chumi atan chuan mahni pawh kan inzir fo a pawimawh a ni.
  3. TV leh Computer-te hi hman loh theih loh a ni a. Nu leh pate hian TV en hun leh Computer Games khelh hun bituk se. An hun bituk chu zawm ngei turin an fate khuahkhirhin thunun tlat bawk se. Tunlaiah chuan ti lo tura inzirtir aiin a hmandan leh a hun hriat hi a pawimawh hle tawh a ni. Hunawl hnawhkhah nana kan hman thiam chuan thil ṭha tak a nih rualin englai pawha kan en a kan khelh chuan thil ṭha lo tak a thlen ṭhin a ni.

Sawi tur tam tak la awm mahse, tunṭum atan chuan duh tawk phawt ila, kan sawi tâk te hi a hmawr hmuhtu-ah hmang thiam ila, tunlai technology-in kan chhungkuaah enge nghawng a neih tih leh engti-anga hmalak zel tur nge tih ngaihtuahna thar min siam sak se, tichuan kan fate’n kawng dik an zawh theihna tur lo ni mawlh teh se. Tuna ṭhalaite hi nakin lawk a ram leh hnam innghahna bulpui an la ni dawn si a.

Similar Posts:

Recent Posts:

22 Responses to “TUNLAI TECHNOLOGY LEH ṬHALAITE”

  1. 1
    Chhuaklinga Says:

    Chhiar dawn i1a..

    tren tren

    Report this comment

  2. 2
    Chhuaklinga Says:

    Tunlai technology vang hian thuziak tha tak tak ka chhiar hnem phah hle. Tunah pawh ka chhiar zo leh chiah. :)

    tren tren

    Report this comment

  3. 3
    Nirvana Says:

    “Synod Bu” i quote hnem bawk a, heng khuate hi “khawpui” ah telh tur nge “khawpui pawn” ah:

    1. Serchhip
    2. Lunglei
    3. Kolasib
    4. Thenzawl,
    5. Hmuifang
    6. Lunglei
    7. Champhai,
    8. Sialsuk
    9. Khawruhlian
    10.Samlukhai
    11.Saiha
    12.Sihphir

    Report this comment

  4. 4
    chhangteval Says:

    Synod khian mi engzatah nge survey hi a lak ang le? Mi tlemte atanga ngaihdan lak anih chuan ram pum dinhmunah a pawm ngawt chi dawn em ni le?

    Kohhran inkhâwm kan tlêm zêl laiin ṭhalaite chuan tûnlai technology lamah hun an hmang tam zâwk daih a ni.

    Inkhawm reng ho te hi mihlawhtling tak an ni vek lo chawk ania.

    Report this comment

  5. 5
    chhangte_ll Says:

    Hêng thil pathumah Mobile phone, Television leh Computer te zîngah hian Mobile phone hmangtu an tam ber a

    :-D

    Report this comment

  6. 6
    Athana Chhangte Says:

    Post tha tak a ni. A hmasa ber point no 4. The Cable Televison Networks (Regulation) Act 1995 chung chang khi ka lo vei ve thin a ni a. Rawn thlur bing teh a.. (Y)

    Report this comment

  7. 7
    VL Hminga Says:

    TV ai chuan computer hma ah ka hu tam zawk in ka hria, 1. Zirnan, 2. Design tih na atan, 3. Youtube ngaihthlak nan ( zirlai leh hla ), Wikipedia chhiar nan…. tam lutuk. Mahse games ka khel ngai lo thung.

    Report this comment

  8. 8
    Lamji Says:

    Nu leh pa fate kawm hlim hman lo khawpa ‘inti’ buai kan tam zawk tawh vang te ani thei zawk ang em? ;) (I)

    Report this comment

  9. 9
    Saitawk Says:

    Post tupa, ka lo copy aw, i phal em? Paper present tur inpuahchah nan pawh a printed copy en leh ka duh riau.

    Report this comment

  10. 10
    chhana Says:

    Post tha tak a ni.

    Report this comment

  11. 11
    Amah Charice_mizo Says:

    Post pawimawh tak a ni, Survey hi Synod-i’n an conduct tihna ani em?

    Media leh Depression inkaihhnawih dan chungchang ve thung hi le?

    Report this comment

  12. 12
    Nirvana Says:

    Ka post an tilang duh lo. A chhan: “Your (i.e. my) comment is awaiting moderation”. Ka ziah chu khawi lai chin chiah nge khawpui an tih a, khawi lai nge khawpui pawn an tih. Serchhip, Lunglei, Kolasib, Thenzawl,. Hmuifang, Lunglei, Champhai, Sialsuk, Khawruhlian, Samlukhai, Saiha, Sihphir zingah hian khawi nge khawpui. khawi nge khawpui pawn?

    Report this comment

  13. 13
    Dr Mahminga Sailo Says:

    A bengvarthlak hle mai.. (Y)

    TV ka en ngai lova, hunawl ka neih chuan phone hi ka khawih tam ve khawp mai. Laptop erawh hnathawh nan, facebbok nan leh mi(sual) kerh kerh nan ka hmang nasa. Games ka khel ngailo… :-)

    Report this comment

  14. 14
    Nirvana Says:

    Ka comment a lang ve thei lo. Your comment is awaiting moderation a ti zel. Wau

    Report this comment

  15. 15
    Nirvana Says:

    Ka rin dan chuan word 40 emaw tlar (line)3 aia a tam vang.

    Report this comment

  16. 16
    Amah Charice_mizo Says:

    A lan theih reng hi heh

    Report this comment

  17. 17
    Puii Says:

    Mifate hi chu in va han fel tak !! thil hi a thatna leh that lohna te in han chhutchhuak peih thin a… (Y) (D)

    Kei pek tunlai khawvel changkannain a ken tel a ni a, a thatna leh that lohna chu mizoramah chauh lo pawh a awm vek ang chu ka lo ti a…. :-$

    (HAN TI VE KHANGLANG ILA…Akekekek…)kum sawm kalta te kha chuan internet hi ka addict deuh tlat thin a, tunah chuan ka mitte, ka kut leh ke.. ka taksa te hi ka duatthiam ve ta fe maiin ka inhria e.. :-D (*) (O)(O)(O)(O)

    Report this comment

  18. 18
    H.Vangchhia Says:

    Khawvel a than ang a, mihring tam tak rilru erawh tun hma thilah ala tang/chambang fo thin. Chutiang mite chuan an chenna mek khawvel kalphung chu sawisel tur dapin an insawh an insawh thin.

    Thil reng reng hi tha lam leh tha lo lam a hman theih an nih hmel fo. Chumi pahnih chu chhungkua/kan inchhung a tangin hman dan tur kan inzirtir tan thin!

    Report this comment

  19. 19
    Maloma Thadou Says:

    Mr/Mrs. Saitawk, phal teh reng mai…. tangkai takin i lo hmang dawn nia. Synod survey hi rintlak turah ngai ang… a chhan chu Mizoram dapchhuak kohhran a ni a, Bialtu pastor hnen theuh atanga lakkhawm a nih pawhin a aia rintlak tur a awm ka ring chuang lo. Hei aia survey thar hi a awm ka hrehrih lo bawk….. :-)

    Report this comment

  20. 20
    SHauzelSailo Says:

    Thra hle mai (Y)

    Report this comment

  21. 21
    malsta27 Says:

    (Y) (Y) in enfiahna tur a tam hle mai.

    Report this comment

  22. 22
    Lersia Says:

    A tha hle mai a … Thusawi a ka sawi tel tur te zing a mi a ni e …

    Report this comment

Leave a Reply

You must be logged in to post a comment.