Pafa leh Sabengtung (Tunlai version)

January 31st, 2013 10:00 pm by Athana Chhangte

Nikhat chu pafa hian sabengtung kaiin khawpuiah chiseh lam turin an kal a. Chutia an kal mek lai chuan an thenawm pa an tawk a. Ani chuan, ‘In va a tak em! kan khaw bus-a, a savawm bawmah hlang mai ula?’ a ti a. Anni chuan, ‘A thawnthuah khan bus-ah an phur si lova, Esopa’n FIR a thehlut palh ang’ tiin an chhang a. An thenawm pa chuan, ‘A lo ni maw! Sabengtung te chu chuan nana siam alawm chuang mai ula niang chu maw le. Taka, Bazara Korean serial Mizo tawnga lehlin leh puitling film CD kha rawn lei theihnghilh suh u aw’ a ti leh a. Anni chuan, ‘Tehreng mai. Pu Thena pawh kan rawn biak dawn che a nia’ tiin an kalpel a.Tichuan, pa chuan a fapa chu sabengtung chungah chuan a chuan tir ta a.

Rei lo te hnuah chuan politician rual hi an tawk leh a. An zinga pakhat chuan, ‘Pute u, Min vote phawt chuan a thlawnin sabengtung kum nga chhung installment a pek in ni ang’ a ti a. Pafa te chuan, ‘Kan lo inngaihtuah dawn nia, thawh hah ngai lova a thlawna dawn te chu ka’n duh ve tho a lawm’ tiin an chhang a. Chu pa vek chuan, ‘A hrim hrimin, pa zawk ke a kal a, fapa zawk chuan te chu mi hmuhah pawh a mawi lo. I fapa kha local chhe chi rui e maw an ti anga, duty ten an vaw hrep anga, camp-ah an dahlut daih mai tur a sin’ a ti leh a.

Tichuan, vuak leh kum khat dawn camp-a indah luih an hlauh em avang chuan, pa chuan a fapa chu chhuk tirin amah chu sabengtung chungah chuan a chuang ta a. Thui vak lo an kal hnu chuan nu pahnih bag puar tak ak hi an tawk leh a. Nu pahnih chuan, ‘Kha inhralh tur em ni, a tlin that chuan to deuha leiduh kan hria a nia, eng zat nge inhauh dawn, phone no te inpe ila?’ an lo ti nghal zawt zawt a. Pa chuan, ‘A man a zir a ni mai a lawm, mahse a hmel en aiin a buk a zang tlat a’ tiin a lo chhang a. Nu chuan, ‘Chuti, a tling lovang. Tihralna chu inzawn chawp mai ru. A hrim hrimin pa zawk a chunga chuan a, fapa zawk kea kal tir reng reng. Tunlaiah fate kein an kal tir vak vak tawh ngai lo, khawngaih hle tur’ an ti leh a. Pa chuan, ‘Ka fapa hi Kohhran, tlawmngai pawl leh party unit-ah a inhmang kual vek! Hna chu kan thawhtir ngai lo ve bawk e’ tiin a chhang ve leh a.

A dik chiah chuan pa ber lu chu a hai tawh a ni. Bengsika a inngaihtuah hnu chuan, a fapa chu a hmaah a thut tir a, an pahnih chuan an chuang dun ta a. Khawpui an luh hma chuan khaw pakhat hi an thleng ta hlawl mai a. Chu khaw miten pafa sabengtung chunga chuang an hmuh chuan an lo nuih hluah hluah mai a. ‘Enteh u, saw le..FB ah ka post dawn chiang latukk. Zanin nawina tur post atan ka hual e. Comment ava tam dawn emmm!’ tiin an phone camera chuan an thla chu an lo laksak nghal mawlh mawlh a. Pafa te chu hrilhhaiin an hawi kual hrek hrek ngam chauh a ni. Pa chuan inthlahrung dek leh zak chung chungin an nuih nachhan chu a’n zawt a.

Mite chuan, ‘Hey,thingtlang pa, sabengtung kha a overload a nih kha. Dan leh dun hre lo lutuk mai. Zah pawh inzak chai lawm ni? PETA hoin an hmuh che u chuan pawi zawk ang’ an lo ti hrep a.

Pafa chuan PETA chu enge anih pawh an hre lo! Mahse an pafa chuan sabengtung chung atang chuan an chhuk a. Kawngsira thingphun ngil tak, ‘planted by’ tih inziak awmna chu an kit ta thawr mai a. An four wheeler chu halsak an hlauh leh an khawngaih em em vang pawh ni chuang lovin, a keah an phuar khawm sauh sauh a. Thing chuan an zawn ta ringawt mai a.

Chutia, sabengtung zawn chunga khawpui chhunga, a thawnthu anga leilawn zawh tur an zawn mek lai chuan, thawklehkhatah an hnung lam traffic jam kar atang chuan bike proton vuah, local biker khalh hi a rawn dawk chhuak teng chhuaih mai a. Bike ri hlau chuan sabengtung chu a tal phut a, a thlang ko sang tak inhmun tura an laih mekah chuan a lum thla ta chiam mai a. A thawnthu ang bawka tuia han tlak hlumna mai tur a hmuh mai loh avangin, double cubic lung an dah khawmah chuan a zukin tauh chawrh ta zawk a. A thi zui ta a.

‘Hmm..Khati kha chuan an inpal harh ve tawh ngei ang,’ tiin atir atanga zuitu putar chu a lo phun vei sup a.

Similar Posts:

Recent Posts:

22 Responses to “Pafa leh Sabengtung (Tunlai version)”

  1. 1
    saint sammoo Says:

    tha reuh eee..

    Report this comment

  2. 2
    Puii Says:

    A va ngaihnawmin i ziak thiam hle mai …. (Y)ka phuah belh ve chak raap… ;-)

    Report this comment

  3. 3
    puiainsta Says:

    Haha….ka va duh ee :-D (Y)

    Report this comment

  4. 4
    Maisek Says:

    Ziak ngaihnawm zek mai a… a tunlai trek trek kher mai… (Y)

    Report this comment

  5. 5
    chhangteval Says:

    Haha (Y)

    Report this comment

  6. 6
    Hotunu_pasal Says:

    E khai!

    Report this comment

  7. 7
    sheldon Says:

    Tukchhuah nuam vek u le (L)

    Report this comment

  8. 8
    Soberboy Says:

    Sheldy, inlo dam maw ka va rawn MISUAL khat ta v :D

    OT lutuk loh nan Sabengtung ;-)

    Report this comment

  9. 9
    Chhuaklinga Says:

    Hahaha.. :-D iDEA (I) (Y)

    Zirtawpni a ni bawk a, khawnge phur surhin hna lamah kal leh tirh tirh ila a ni mai a lawm. ;-) :-D

    tren tren

    Report this comment

  10. 10
    sheldon Says:

    Haha @Soberboy, i rawn misual khat fe zawk. I facebook tlut tlut anih kha aw.. Sabengtung..lolz

    Report this comment

  11. 11
    bucko Says:

    Ha haa….. tha hle mai (Y) :-P

    Report this comment

  12. 12
    Dr Mahminga Sailo Says:

    Primary sikula kan zir thin a nih vang nge ni, Pafa leh sabengtung hi ka hrethiam tehchiam lova. Tunlai version ani bawk a, ka var kuar.. :-) I ngaihtuah chhuak thiam hle mai.. (Y)

    Report this comment

  13. 13
    Lamji Says:

    Modern ve. :)

    Report this comment

  14. 14
    VaiVa Says:

    (Y)

    Report this comment

  15. 15
    Matluanga Says:

    Thu te hi inthiam mang tak e aw (Y)

    Report this comment

  16. 16
    Amah Charice_mizo Says:

    Imaginative hle mai, good job!

    Report this comment

  17. 17
    Athana Chhangte Says:

    Ka lawm latuk e :-D Haha.Niminah vaipa mix funnaah Pafa Sabengtung zuar tiin ka hmu a. Ka google kual vel phah tak chiam avangin, sawisak kual vel hi chu a ba ve hrim hrim. Tu’n an haw lo’ng chu maw!

    Tunlai chu kan admin te zinga pakhat hi ‘hmangaihna’ an tih hian a pawt na riauin ka hria a. He post tenghneng tak hmang hian lo inawitlei thei hram se aw! (U) or (L) hahaha

    Report this comment

  18. 18
    Amah Charice_mizo Says:

    Vaipa mix chu eng tak ni ang maw :-)

    Report this comment

  19. 19
    Athana Chhangte Says:

    Haha…Amah charice , vaipa mix hi a sawifiah nan kan la rawn sawisa kual leh chiam dawn nia. ;-)

    Report this comment

  20. 20
    Jacka Pi Says:

    sabengtung lem ka duh e (Y)

    Report this comment

  21. 21
    Pafa leh Sabengtung (Tunlai version) | mi(sual).com | Köpa hemsida av webbyrå Says:

    [...] more: Pafa leh Sabengtung (Tunlai version) | mi(sual).com Dela det här:FacebookTwitterGoogle +1Webbyråer StockholmMer om att köpa [...]

    Report this comment

  22. 22
    SHauzelSailo Says:

    A original version chu ka va chhiar leh chak em… theihnghilh tawh sia… nge ka chhiar mumal lo pawh hre lau
    I thiam eeee, a original pu in a duh leh duh loh tur chu ka hre lo.

    Report this comment

Leave a Reply

You must be logged in to post a comment.