Hringnun Tlangchhipa Lawn Tumin

January 31st, 2013 1:03 pm by Dr Mahminga Sailo

(Tunlai chu, mi(sual) in nghaktua ka ngaih thin: KawlHawk, Chemtatrawta, Awmtea Leo Khiangte, Saint Samoo, aduhi, sheldon, H. Vangchhia leh mi(sual) milar leh thahnemngai tak takte an reh, a khawharthlak riau. Tu emaw istail-in, tun bak hi ka post tawh lo mai thei a ni .. :-) )

Chin lem nei lo hringmi
Thingtlang khaw mawngpinga nitin hun hmang thin khan office hnathawka khawpuia awm kan chak em em thin a. Peih lo chung chung leh sum inpukchawp hialin lehkha kan zir chho ve tawk tawk a. Kan zir sang tial tial a, rualawh erawh a na tual tual.

Kan duhthusam leh kan mumang pawha kan man ngai loh hmunah mahni ei tawk thawk chhuakin ka awm ve a talangin rilru erawh a nghet miah si lo. Hna tha zawk thawh tur ka hria a, chu hna thawk thei turin ka inpuahchahna erawh a bei tham hle si. Ka hna duh tak pawh chu thawk ta teh reng pawh ni ila, duh tawk lem nei lovin hlawh tha zawk leh nun nuam zawka ka hriat te nun awt reng rengin hun ka hman tho ka ring.

Ka thesis ziah lai
Vanneihthlak tak ti ngawt ila, vanduaithlak ka tihna lai pawh a awm awm e. Research min kaihruaitu kha kan college Dean a ni hlauh mai a. Research ka beih laiin harsatna lian tham ka tawk lem lo va. Department danga hna ka neih paw’n ka guide hming ka sawi chuan, phur takin min tanpui a, awlsam tein ka hna ka zo mai thin.

Thesis ziah a hun meuh chuan zing office kai hun atangin nitla vanvuaia ka nghah chhuah theih loh hun a thleng fo mai a. Chutih laia ka ngaihtuah thin pakhat chu hei hi a ni. Dean office-a an peon chu zing takah office-a thawk dangte thlen hmain a rawn thleng a. Room a tifai a, engkima rem fel hnuah midang an rawn thleng ve a. Pu ber a rawn thlen hnu phei chuan hmehrik a hmeh vel leh rang takin a tho ang a. chumin khami ah chuan va pe rawh an tihna hmun apiangah a kal kual a. Thingpui lum a tul leh a lum a. Nilenga an tir kat hnuah a thawpui dangte’n an hawsan vek hnuin mi hnu chhuia a buai hnuah a haw ve chauh thin.

A thlabi hlawh erawhin pu ber hlawh hmun sawma thena hmun khat pawh a hen tawp si lo

Dog show
Kum tinin Mysore kennel club-in dog show an huaihawt thin chu kum thum kalta atang khan ka thawhna company-in kan sponsor avangin kan buai hle a. Kan office tirhkah, tih tur engemaw a awma kan tirh kual te ho tho chu bungraw thiar a, tifel tura thu pek an ni a.

Chumi tlai chuan an peih lo ve bakah, kei ber kher a ko khawmtu ka ni nen, mi an nel bawk si chuan chhuanlam an zawng kawi a. Mi peih lo chung hnathawk tura mi nawr ai chuan tihsak mai thin ka nih avangin chumi tlai pawh chuan ka hah phah phian a. Mahse, kan tirhkahte hnathawh nena khaikhin chuan ka hnathawh chu a hahthlak lem lo.

Kan hlawh leh an hlawh khaikhin chuan a inthlau ve hle a. Kan thawh theih loh leh peih loh zawng zawng thawktu an ni lawi si. CHutih rualin an thiam loh hnathawk tura hun rei tak zirna run bel kan ni tih erawh hriatthiam sa a ni. Chuvanga dinhmun tha zawk a lang chelh thei kan ni Mahse, hringnun hi a letling hua hriat chang ka nei fo.

Mi hausa fa chuan a thawh lem loh pawh a nu leh pate zarah nuamsa takin an awm thei a. Zirna tha tha changin hna tha tak an thawk mai a. Khawi hmunah pawh kal se, mi ngaihnsan leh ngaihven an hlawh bik a. Kut dawh fate tan erawh an tawng theih tirh atanga kut dawh a bultan mai loh chu tihtur dang a tlem hle thung.

Englekhawle, hmasawn zel hi mi fingte nun dan a ni. Chutih rualin rualawt leh duham reng renga nun hman erawh a hahthlak. He khawvelah hian kan duhthusamin tumah kan nung dawn lo va. Lungawi lohna leh lawm lohna zawn tum tlat tan phei chuan hlimna leh lawmna reng a awm lo hial ang. Chuvangin Pathian ringa, a hnena intulut a, chatuan nunna chang tura nitin nun kan hman fo hi a pawimawh ber awm e. He lei hringnun hi zawng reilo te mah ni se, kan nunah hian thu kan nei lo em mai.

Similar Posts:

Recent Posts:

15 Responses to “Hringnun Tlangchhipa Lawn Tumin”

  1. 1
    Chhuaklinga Says:

    Mai mai a, tan han la sauh sauh zawk teh. (Chhiar thuak komen) :-) ;-)

    tren tren

    Report this comment

  2. 2
    aduhi Says:

    Nia, daktawr kan inentir te pawhin minit sawm vel min enah cheng za chuang kan chawi a, mahse kha thiamna nei tur khan hrehawm takin kum tam tak an zir a, an phu ve reng kan ti lo thei lo.

    Tin, ban phal a la ni lo.

    Report this comment

  3. 3
    Dr John Says:

    (Y) Gud post…

    Report this comment

  4. 4
    sheldon Says:

    Eh! Mahming, ban te hi i lo tum tak tak ang e, kan vel mai ang che. Misual.home hi rinawm takin kan nghak reng alawm. Ban awih loh ani tawp mai.

    Report this comment

  5. 5
    Dr Mahminga Sailo Says:

    @ Chhuaklinga… mi(sual).com a reh deuh hi chuan awm thiam a har thin alawm le. Nula tihtauhkhum tur neibawk si lo, ka’n inhrosa ngawt a nih hi.. :-D

    @ aduh.. Dik chiah. Chutih rualin Dr. nih chak em em, zirna tur sum nei lo leh an dinhmunin a zir ngang loh te ngaihtuah hram chang a awm tho thin a. Ka baui lohna turah ka buai te pawh a ni mahna, Siamtu chungah hian ka pangchang lutuk te a ni mai thei.. ;-)

    @ sheldon.. Min velh dawn ai chuan mi(sual) runmawi hi ka luahlum ang. Mahse, midang an reh vung vung a, ka lo pawt zawrh zawrh thin si a, ka inthlahrung ve deuh alawm… :-D

    Report this comment

  6. 6
    sheldon Says:

    Mahminga, han inthlahrun te chuh! Ka hman phawt chuan kei chu ka tlar thla dul zel. I thuziak chhiar tur a awm loh te’n a dik nang. I ban dawn chuan kan vel tak tak ang che…(H)

    Report this comment

  7. 7
    Dr Mahminga Sailo Says:

    Ehh.. min velh tak tak dawn phei chuan, A-nu Maiseki ka ko a ni mai… :-D

    Tak takina ka phak tawkin mihring nun hi ka ngaihtuah ve fo va. Pathian ringlotu tan phei chuan beidawnna tur hi a tam ngawtin ka ring thin. :-(

    Ka’n sawilang leh hram te’ng.. Kan office-a kan tirhkah tlangval pakhat hi thingtlang atangin khawpui (Bangalore)-ah beiseina sang tak neiin hna a thawk ve a. Ka ziah ang khian bungraw thawn ngai leh engkimah kan koh phar reng a ni a. Henglaia khawsak leh in luah man ringawt pawh ngaihtuah chuan an hlawh hi a beitham hle si. Engmah ni bik lo mah ila, a dinhmun ka ngaihtuahpui hian ka lainat ve leh chhawng thin. :-( Nangni paw’n hetiang hi in tawn fo ka ring..

    Report this comment

  8. 8
    chhangte_ll Says:

    Research ka beih laiin harsatna lian tham ka tawk lem lo va..

    Hmeithai beih tum aiin a harsa lo zawk emawni dawn :-S :-$

    Report this comment

  9. 9
    chhangteval Says:

    Dog show ami pic te rawn post thin la, a hmuhnawm dawn teh lul nen..keini ui ngaina tan tal hian.. :-)

    Report this comment

  10. 10
    ahooma_ Says:

    Post tha lehpek

    Dr.Mahminga hi a (Sual) ber mai :) A awm loh chuan a khawharthlak.

    Report this comment

  11. 11
    Sihtea Says:

    Khai a, Mahming nang ber in chu ti a,
    ban i tum mai te chuan, tih chi nang
    Val siniar dang te an khua a har lu tuk ang a sin.

    Report this comment

  12. 12
    Dr Mahminga Sailo Says:

    @ chhangte_II.. Nuthlawi beih hi vawikhat na na na chu tum ve tur a ni… :-D

    @ Chhangteval… Ka inthlahrung ve thin alawm le. Post a khat deuh hun ka lo chang ang e… :-)

    Report this comment

  13. 13
    Maisek Says:

    Het! bang lovang… i thu ziak hi a ngaihnawm thin khawp mai, mi fel tak i ni tih pawh ka hre chiang. Tuna i thil rawn ziah pawh hi a dik ka ti…. (Y)

    Report this comment

  14. 14
    Hotunu_pasal Says:

    E khai ! Khai…khai…khai..! Het, engtizia nge t.set lak in sawi thawi ve thuak. La lovang.
    Ngainawm leh pek hle mai. (Y)
    Kha coffee kan lo lum che.

    Report this comment

  15. 15
    Dr Mahminga Sailo Says:

    @ Maisek.. Ka lawm e. Ka bang leh lo mai ang… :-D

    @ Hotunu_pasal… Dawm loh Coffee min hlui avangin ka lawm e.

    Zirtawp ni hman nuam vek u… (U)

    Report this comment