Hmelthatna Thuruk

January 31st, 2013 12:55 am by CFL

By JV Chhakchhuak

I mawia i mawi chuang e Enchim loh mi thianghlim Van Angel leh Seraf te tluk hial leh Rose par leh Lily, Hawilopar nen, nula hmeltha Chernghaleng leh an sawi hmeltha ram khat lanu hnehin; mahse siamchawp mawina rochan tling lo ral leh mai thin mawina chhuanga inhnangfak ve mai thin, nulate zingah i lo telve mai dah ang tih ka hlau a ni.

Lo hnai la, ka thu ngai teh. Kum sang rorel lo thleng tur tluk hiala dik “HMELTHATNA THURUK” dik tak chu ka han rawlruk teh ang che. Chhaktiang turni chhuakin thlangkawl zamual a liam leh na ngai e tih leh nausen pianghlim chuan hnuntui a mamawh tih pawh lo ringhlel ta mah la ka ngaithiamin awm pawh ka la ti e. Mahse he hmangaihna thuruk zet hi zawng lo ringhlel hlek suh ang che. I mawi a i mawi hluan e. Zoram mawitu Derhken par leh Thangrei, Chawnpui par paw’n an iang zo lo i hmel mawina; mahse lungchim tak a dawn chungin ka han thlir thin che a, lungtiawi lo mit tikhamtu chu mawi lehzual nan ti-a phuahchawp mawi tlereuh incheina, hmelhmai rawng danglamna chi hrang hrang leh sakruang mawina lan loh hlauh vanga khuhtu mumal pawh nei lova i inpenparh velna te khan hmangaihtu che thinlung hi a tihnur thin a ni tih hi theihnghilh hauh suh ang che.

Thinlung thianghlim si lo puan chang tivar i la nih chhung zawngin hmel zawng a tha “mahse” tih thawm hian i hnung lamah um chein hriat pawh i hre thawi thin reng dawn asin. Thawhchhuah ni si lo, thawhin a phu bak el-euha inchei a, in pen-parh leh ngawt thin nula te hian ngaihsan an hlawh ngai mawlh lo tih hi hria ang che. Puitling i ni ve tawh a, ngaihtuahna fim hmangin tunge i nih i inhriatchian theih vena turin i thinlung darthlalangah Inbih nawn fo ang che. Kangvar lenghawr ang lek-a thli bengna lam lama lengkawi mai mai tur i ni hleinem! Mawi nan tia lunghlu behin i ban tluanin darluan-ngun kual bun khat vek mahla, milem bia te pathian cheimawi ang lek bak englua a anpui chuang law’ng che.

Theihtawp chhuaha incheiin han inhnawih paw vel thin teh mahla, Ni a lo tlangsan a, boruak a lo lum meuh chuan i thlan ti rimchhetu mai a lo chan zawh tak kha. I silh leh fen chu sawi loh, i hmui leh hmai cheinaah ngawt pawh khan thawh chhuah loh cheng tam a luangral asin. Khang te mawlh khan a nia hmangaihtu che thinlung hi tina thin ni!!! Ka zilhhauna che hi haw lo la, ngaithla kiau la, zawm ngei pawh tum la, chuti’n i fin leh fel, i hmel mawina te chu nangma tan mai ni lovin Zoram hmel mawina hial lo ni tur chein ka duh tak meuh meuh che a ni. Chuti’n hei hi hria la – I ropui leh mawina nangmaha awm a nih lai khan, i hmelma lian ber pawh nangmaha awm reng a nih avangin fimkhur hi damdawi hmasa a nih hi ringhlel hlek suh la, chetze kawngah te, inchei danah te mizo i nihna tarlang thei tur hi ngaihluin ngaisang tlat la, i hmai aiin i nun tuai ngun zawk rawh. Chu chu “HMELTHATNA THURUK” chu a ni.

{ * He thu ziaktu JV Chhakchhuak hi zaithiam lar leh hla phuahthiam C. Lalzetluanga, “Heiha Huiha” leh hla dang tam tak hmanga Zoram mipuite lo awi tlei tawhtu kha a ni e. }

Similar Posts:

Recent Posts:

14 Responses to “Hmelthatna Thuruk”

  1. 1
    chhana Says:

    A tha h1e mai.

    Report this comment

  2. 2
    chhangteval Says:

    Pic khi (Y) :-P

    Report this comment

  3. 3
    sheldon Says:

    Tukchhuah nuam vek u le (L)

    Report this comment

  4. 4
    H.Vangchhia Says:

    Sawi duh a nei hle mai (Y)

    Report this comment

  5. 5
    Dr Mahminga Sailo Says:

    Tawngkam bungrua a remkhawm thiam mang e… (Y)

    Incheina, an hmel leh pian nena inmil tak hi chuan hmeichhia-te hi a timawi tak zet. A uchuak erawh tenawm lamah a kal. (H)

    Hmaikawr(?) bun miah lo va tleitiri biangno tai tek hmuh hi chu a nuam ve hrim hrim. Khai, zingkar atanga ka’n luanlian dawn ngawt chu a… (U) :-D

    Report this comment

  6. 6
    Dr John Says:

    (Y)

    Report this comment

  7. 7
    Matluanga Says:

    Tawngkam te hi kan inthiamhleih hlawm teh e (Y)

    Report this comment

  8. 8
    PKfanai Says:

    Tha khawp mai. (Y)

    Report this comment

  9. 9
    Chhuaklinga Says:

    Thluaithlum nasa mah mah tepin ka hria. A tha viau tho e. (B)

    tren tren

    Report this comment

  10. 10
    aduhi Says:

    #9 Chhuaklinga ka ngaihdan chiah. A target nula te hian an chhiar peih vak ka ring lo.

    Report this comment

  11. 11
    Amah Charice_mizo Says:

    A concluding para khi a that khi mawle, ziak taima hle mai, engpawhnise (Y)

    Report this comment

  12. 12
    Dr Mahminga Sailo Says:

    # 9… (Y)

    In tih takah chuan (dawihzep hmel mang e) kei tlangval meuh pawh hi, ka chhiar pahin ka ip chawih chawih.. :-D Nia, thu a thiam ka ti khawp mai, mahse tunlai tawng takin a <i)over lek lek zawk em aw ka ti. ;-)

    Thlalak awm chhun khian mit a la tlat mai.. (U)

    Report this comment

  13. 13
    chhangte_ll Says:

    “He thu ziaktu JV Chhakchhuak hi zaithiam lar leh hla phuahthiam C. Lalzetluanga, “Heiha Huiha” leh hla dang tam tak hmanga Zoram mipuite lo awi tlei tawhtu kha a ni e”

    Engtia JV Chhakchhuak chu C. Lalzetluanga ni ta mai chu ni maw. JV hi engtihna ngea :-S

    Report this comment

  14. 14
    Hotunu_pasal Says:

    E..khai! Khai…khai…khai..! A tha hle mai ka rawn ti tlai khawhnu e.

    Report this comment