Mysteries Update: Thilmak tharlam lawrkhawm

January 29th, 2013 11:43 am by BigDaddy Hmahmatea

 

MYSTERIES UPDATE

***********************

Thil mak tharlam la lum vat vat te leh chanchinthar dangdai deuh lawrkhawm…

Awle hei Facebook lama keima group THU NGAIHNAWM HUANG lama kar hnih dana kan tihchhuah thin MYSTERIES UPDATE  chu a vawikhatna atan helamah ka rawn post chuak ve chhin a. kan group hi a duh duh in rawn join turin ka rawn sawm nghal che u a ni e.  MYSTERIES UPDATE ah hian Mysteries  News lam ringawt nilo in science lam leh thil dang hriatna ti zau thei ang chi te pawh ka rawn lawr tel thin tih kha min lo hriat sak  ula,tin kan regular features UFO leh BONUS pawh ka rawn telh leh ngei a nia. Tin ka source rawn tarlan ho hi an rintlak khat ang tih kha in lo hre ve mai mai dawn nia.

SEPHUNG LEH THLASIK KAWNG: Friday 25th January 2013, USA- Sephung hi a hming chu hrelo kan awm kher lo anga, mahse la hmulo chu kan awm nual mathei. Kan naupan lai chuan bawngek khawro a an awm hi kan lai a, kan man a kan insik tir thin. Khawchhak lamah khi chuan an ei ve thung a sephung farm te pawh a awm hial a ni. Heng rannung ho te hian engatan tehreng nge an tih chu kan hre chiah lo na a, bawngek khawro hi an hrual mum a, ngil tak mai in an khalh thin a, hei hi a zir mi te sawi dan chuan a nu an hipna atana ti an ni e an ti. A hrual mum lian apiang kha an luck a ni awm e. Heng an ek hrual mum te hi ngil em em mai in an khalh lir thin a, hetianga ngil tak mai a an khalh lirh theih dan hi mithiam te chuan an zir chiang ta a. A tirah chuan thla(Moon) inher dan rinchhan in ngil takin an khalh lir a nih an ring a, mahse tun hnai mai a enchhinna an neih ah chuan ‘Milky Way’ ‘thlasik kawng’ kan tih mai, arsi hlawm khawm rinchhan hian heng an bawng ek khawro hrual mum te hi ngil takin an khalh thin a ni tih an hmuchhuak ta a ni. Siamtu idea hi zawng hriatthiam a har a ni e.

*Source: National Geographic

 

THLA AH MONALISA LASER HMANGIN AN THAWN: Saturday 19th January, 2013, NASA- Hringfa te thiamna hi zawng a sang chak teh zawng a nih hi maw. Tun hnai mai khan NASA scientist te chuan thla heltu atana an dah satellite pakhat ‘Lunar Reconissance Orbiter’ an tih, lei atanga mel 240,000 a sanga awmah chuan  laser hmang a inbiakpawhna chikhat enchhin nan Leonardo da Vinci lemziak Monalisa thlalak chu an thawn thei ta rup mai le. Hetianga laser communication system hi nakin zelah khawvel pawn lam te nena inbiak pawhna hmanraw tangkai taka siam chhoh an tum mek a ni.

*Source: Space.com

 

KUM 76 HNUAH LEHKATHAWN AN HMU: Wednesday 23rd January, 2013,New Zealand- Lehkhathawn tih lemah post office atanga thawn nilo, sidawium a thun a phui taka chhin a tuipuiah, lawng atanga an paih ang chi ‘Message in a bottle’ an tih ang chi kha a ni a. New Zealand tuipui kamah chuan tuifawnin a rawn len chhuah saidawium pakhat chu Geoff Flood-a chuan a lo chhar nawlh mai a. A um chhar chu an en chian chuan a chhungah lehkhathawn a awm tih a hmu ta a, chu lehkha chu a lachhuak a, an enchian nak chuan kum 76 kal ta a lawng pakhat SS Strathnaver atanga March ni 17, 1936 a lawng a thawk pakhat Herbert Earnest Hillbrick’an a chhungte hnena a thawn hi a lo ni a. A lehkha ah chuan chu a thu thawn chu a lo hmu apiang hnenah a address ziah lan te hnenah lo pek sak tura a ngenna a ziak tel bawk a. Tichuan a chhar tupa Geoff Flood chuan chu thu thawn a address inziak chu a zawng chhuak ta a. A address inziak a zawn hmuh chuan a thawn tupa tak hi chu a lo thi daih tawh a, mahse a tupa a lo la dam hlauh mai a. Tichuan kum 76 hnuah an pu, a chanchin engmah pawh an hriat tawh loh thu thawn chu an hmu ve ta hram a ni…Rei vang vang khawp mai.

*Source: Sky News

 

PHIR IN PHIR AN HRING: Monday 21st January, 2013, Houston- Coincidence an ti emni kha? Thil thleng a nih tur ang pangngai bak a intawng fuh hi a awm ve leh zauh zauh thin a, hetiang hi Sap sendang ho chuan coincidence an ti a, hetiang thil thlentirtu hi Cosmic Jocker an ti ve thung. Mi in fa an neih a an fa te phir an nihna chance hi 1000 ah 3 vel ni in mithiam te chuan an ngai a, chutih lai erawh chuan phir in phir vek an neih thung erawh chu chance vang tak a ni thung. Phir Carig leh Mark Sanders te unau chuan an nupui te unau phir tho Darlane leh Diane Nettemeier te chu 1998 khan phir ho inhmuhkhawmna ah inchharin 1999 khan a rualin an innei a. Houston ah an nupa tuak hnih hian inthenawm mai in an khawsa hova. Mak deuh mai chu fa pakhat ve ve an neih hnuah an fa pahnihna tur atan phir ve ve zuk nei ve ve leh tlat a mawle. Hetiang tak hi khawvelah hriat a la ni ngai lo a ni.

 *Source: Today News

 

RANGKACHAK TLANG 5KG CHUANG A RIT A CHHAR BIK BIK: Saturday 19th January, 2013, Australia- Mihring hi vannei deuh bik hi chu an lo awm chiang khawp mai le. California Gold Rush hun lai ata tawh kha mi ten rangkachak tlahlang hi an lo zawng tawh thin in tamtak in an hausak pui a, tamtakin an tlakchhiat pui in an nunna hial te pawh an lo chan phah tawh thin a. California lamah mai nilo Australia lamah pawh rangkachak hi an lo zawng tawh thin in tun thleng pawh hian  zawng tawk an la awm reng bawk. Hmanni mai khan Victoria, Australia a Ballarat khua ah chuan pa pakhat, metal detector nena rangkachak tlahlang zawng chuan, lei chhung 6cm vel lek a thukah rangkachak tlang 5.5Kg a rit a chhar nawlh mai a. He a rangkachak tlang chhar hi a hlut zawng $ 30,000 vel lai a chhut a ni in, Australia a rangkachak tlang an chhar len ber record a la ni…Vannei bik khawp mai.

*Source: BBC News

 

UI IN A PI THI TAWH HNU INKHAWMNA BIAKIN A TLAWH ZIAH: Thursday 17th January, 2013, Italy- Ran hi an lo mak khawp mai a, an mahni enkawl tute hi an lo ngaina ve thei hle mai a, ui, mel sang tamtak atanga a pu te zawng chhuak tu Bobbie te, Greyfriars Bobby an tih mai Skye Terier Bobby, a pu thih hnu a a pu thlan kalsan duh lo a kum 14 chhung tehmeuh a pu thlana a thih thleng a awm te, Hachiko, a pu thih hnu pawh a a nghahna ngai a nitin beidawng lova lo hmuak thin te, Africa ram a satel, mel 3000 chuang a hla a a pu te kum 3 hnu a zawng chhuak tu te, zawhte pakhat  Hornblower-a, a neituten an pem san mel sangtam atanga zawng chhuak tute chanchin te pawh ka rawn post tawh hlawm kha. Tunlai hian Italy ram a Puglia ram huam chhunga Santa Maria Assunta biakinah chuan ui pakhat kum 12 vela upa Ciccios-a chu a pi in nikum November thla a a boral san atangin nitin chawhnu inkhawm dar a rik rualin a rawn kal a, a pi damlaia a tih thin dan angin inkhawm chhung zawng biakin maicham sirah chuan a lo thu ve ziah mai a ni. He ui Greman Shepherd an tih ang chi upa tawh tak chet dan hian a hmu tute rilru a khawih hle thin a ni.

*Source: Telegraph

 

KUM 300MILLION A UPA ALUMINIUM ATANGA SIAM KHAWL PART AN HMUCHHUAK: Tuesday 22nd January, 2013, Russia-  Pathian in mihring a siam hmasak be Adama kha kum engzat kalta vela a sia nge ni ang le??? Chhut a har viau anga, tin hemi chungchangah hian a zir mi te pawh an ngaihdan pawh a inanglo khawp mai renga. Tin evolution theory atanga chhut tu lam pawh an ngaihdan a inang chuang lo bawk. Kum nuaikhat vel ah pawh lo dah ta ila 300 million years tih velanag chuan mihring hi he khawvelah hian kan la awm lo hrim hrim tih chu thil chiang tak ni chuan a lang. Chutih lai chuan mihring sulhnu nge tih hriat chiah loh thil hlui mak tak tak leh upa tak tak an hmuchhuak fo mai le. Heng thil hlui upa tak tak an hmuhchhuah te hi tute siam nge ni anga engtinge, engatannge an siam ang tih hi mithiam te pawh in a chhut chhuak pa tlat lo mai a ni. Hmanni lawk mai pawh khan Russia ram a Valdivostock a pa pakhat chuan a lungalhthei chhem tur zingah aluminium atanga siam, khawl part ni awm tak mai, mak deuh mai a  chhar nawlh mai a. He a thil chhar hi Primorye region a scientist awm ho in an endik nghal a, he thil hi kum 300 million chuang a upa ani an ti mauh mai le. Chuti khawp a upa chu lo ni ta se tu te siam nge ni anga, engatana an siam nge ni ang, nge ni khawvel dang atanga rawn kal te khawl thil engemaw chhia zawk emni ang tih hi scientist te pawh in a chhanna an la nei thei rih lo a ni e.

*Source: Beforeitsnews.com

 

POLICE THLALAKAH MIPAKHAT LANGTLANG THEI A LO LANG VE: Friday 4th January 2013, Tiwan- Khawvelah hi zawng thil mak hi a lo tam teh a ni e. Thlalak a thil dang lo lang ve hi sawi tur a tam hle mai a. Thenkhat te chu siamchhawp mai mai te an nih lai in thenkhat te erawh chu enge an nih sawifiah ngaihna pawh awmlo khawpa mak te pawh an ni hlawm reng a ni. Hmanni lawk khan Taiwan a Taitung County an tih a hiking vel a an kalna thin hmunh pakhatah chuan police pakhat hian ram thla vel chu a la kual a, chu thlalak a lak lai chu engmah a hmu lo a mahse a thlalak chu in lama an en chian chuan mipakhat sang tak mai, a ruangam hriat theih si, kun deuh kho mai, langtlang deuh ruau mai hi a lo lang tel ve ta tlat mai a. He thil lo lang ve hi thlalak lam mithiam ten uluk takin an endik a, siamchhawp a ni thei in an hre tlat lo mai a, tin a mak lehna pakhat chu a landan atang chuan mihring pianzia ang tak nimahse mihring chiah chu a ni lo tih a pianhmang atang chuan a hriat thei tlat mai a ni. He thil UFO lam tuipui ho chuan Aliens thla he police pa hian a la fuh palh ngei ni in an ring nghet hmiah mai a ni.

*Source: IB Times

 

THLAHRANG INLAR VANGIN THAILAND AH MI 10 CHUANG IN AN THIH PHAH: Friday 18th  January 2013, Thailand- Thlahrang hi kan ti teh chawk thin a, thla a ni tak tak nge, ramhuai lam inlar tih sawk erawh hi chu sawifiah a har angreng thin viau a ni. Ramhuai ho ten mihringte an chawh buaina hi tamtak chuan thglahrang hnathawh ah kan lo puh daih maithei tlat a ni. Tun kum hlui liam ta December thla chho vel atang khan Thailand a thingtlang khaw pakhat ‘Tambon Tha Sawang’ an tih ah chuan ‘Widow Ghost,’ ‘Hmeithainu thlahrang’  an tih mai chu a inlar thin ni in an sawi a, He thlahrang hi a hmu tute chu nat lawkna pawh awm lovin an khawlai leng lai te hi an tlu tawp a an thi mai thin ni in an sawi bawk. He khua a mi cheng te chuan he thlahrang hi an hlau hle mai a, a hnawh kian nan intin in an tukverhah puan senlar emaw thawmhnaw senlar emaw an khai a, hetianga thawmhnaw senlar inkhaina in hi chu he thlahrang hian a tlawh ngailo ni in an ngai bawk. He thlahrang hmuh vanga thi ni a an sawi hi mi 10 chuang an awm tawh a, heng mithi  te hi Doctor te chuan ngun takin an endik a, anmahniah natna engamah an hmu loa, mahse an thih dan hi thawchham a thi an ni tlangpui tih  Bangkok Post chanchinbu chuan a sawi.

*Source: Bangkok Post

 

UFO TRIANGLE SHAPE AN HMU:  Thgursday 17th January, 2013, Michigan USA- UFO tel lo chuan ser-a-mu kan thur thei lo kan tih tawh kha maw. Tun January ni 10 zan dar 9 chho vel khan Detroit a West Bloomfield leh Farmington Hill khaw chungzawn velah chuan thil thlawk mak tak mai 3 vel lai mai hi an hmu a. He thil thlawk hi a dum lam rawng ni in kilthum nei, triangle shape an ni a, an mahni chhungah chuan thil eng rawng mak tak mai a eng deuh phut bawk a, West Bloomfield leh Farmington Hill vel hi vawi engemaw zat an thlawh hual a. Fox2 News lama an social network sit lamah chuan a hmutute hian an thil hmuh hi an sawiho nasa hle nghe nghe a ni. He thil thlawk an hmuh hi enge ann nih chiah hriatchianna a awmlo na a UFO lam ngei an nih an ring. Facebook lamah pawh he thil hi an post chhuak nasa viau nghe nghe a ni…eng tak ni ang maw???

*Source: Huffington Post

 

EL-DORADO, HMUN HING NGE MIHRING SAWINA: Wednesday 16th January 2012, Central Colombia- El-Dorado thih hi a hming leh a chanchin hrelo chu kan vang viau awm e. Groupah pawh hian ka rawn post tawh a, a lo chhiar duh tan hetah hian kan dah ve reng reng ange. El-Dorado hi Christopher Colombus an kum 1494 a America ram vel a hmuhchhuah atang khan tun thlengin ngaihven a la hlawh ta reng a. Hmanlai ata tawh he hmun zawng hian mi tamtakin nuna an lo chan phah tawh in an lo tlakchhiat phah tawh thin a, mahse eng tehual erawh an hmuchhuak ngai lemlo thung.  Hmanlai hun ata tawh rangkachak khawpui anga sawi a lo ni tawh thin a, mahse hei hi mithenkhat chuan Muisca hnam ho in an lalpa  thil ban a an hnawih chuah vek a, rangkachak dip a an phul khah vek hnua Lake Guatavita a an pathiante thih lawm nana a inbual thin “Rangkachak mihring’ sawina a ni e an ti ve thung a. Hemi chungchangah hian hmanlai hun ata tawh inhnialna a awm reng thin. Tun hnai mai a mithiam ten chiang leh zual zawk a  research an han beih tak tak chuan an thil hmuhchhuah atang te in El-Dorado tih hi rangkachak khawpui sawina nilo in rangkachak mihring sawina ngei a lo ni zawk e an ti ta a ni…C.Lalhmingmawii hla sak ‘El-Dorado’ tih kha a fuh ta chiah dawn lo a ang khawp mai…wehehehe

*Source: BBC News

 

BONUS:  KUT BAWR LIAN TAWKIN ZURUI PAKHAT A BENG LET TAWP MAI: Sunday 27th January, 2013, Aizawl- Khawnge mi rama thil mak thleng hlir kan sawi a kan rama thil mak thleng hi pakhat chu in zep tel ve leh teh ang. Mizoram ah hian hman deuh tawh khan Silchar tlangdungah khuan kut lianpui in handleman pakhat a ben hlum thu a thang chiam tawh a, chutah hmani deuh lawkah Vai pakhat kut lianpui in a ben hlum thu a thang leh bawk a. Hetiang thil mak tak tak hi kan ramah hian sawi tur a awm ve leh zauh zauh thin a, ‘Chanchintha in kan ramah ramhuai a um bo’ te hi kan ti teh chawk a, engtik lai khan nge kan ramah hian ramhuai ho an lo bo tak duak sawi tur hi kei chuan ka hre ve miah lo mai a, thu hi kan sawi uar deuh thin hian a lang deuh te ka ti ve mai mai thin. Tun Sunday zan mai khan Aizawl chhungah  ngei thil mak tak mai a thleng tlat mai. Anmahni hi an hming leh veng chu sawi lang lo mai ila. Tlangval pakhat zurui chu kut bawr lian tak mai in a beng let tawp mai le. He tlangval hi tun Sunday khan nilengin a thiante nen RV lamah zu an in a. Tlaiah pawh haw lovin zan lamah an ban tlang nghal a. Zan rei fe hnuah pawh a haw tak si loh avangin a pa te chuan motor in an zawng kual ta tawp mai a. RV lamah a thiante nen an kal anga tawhsual te an tawk ta aniang tih ringin RV lamah chuan an tlan thla ve ta tawp mai a. RV thlenthlak hma tawngtaina hmunah chuan motor leh bike vel hian mi an lo ding khawm laih mai a. He tlangval an zawn pa chuan an fapa te chu chung ho chuan an lo hmuh takin ti in va zawh a tum a motor atanga a chhuk chuan a fapa an zawn ngei mai chu rui lutukin din pawh dingngil theilo in motor nghenga a lo ding kawi reng chu a va hmu ta mai a. A pa thinrim lutuk chuan a fapa chu a beng ta chawrh mai a, a kutbawr a lian in a beng na bawk a, a fapa zurui chu a beng thal tawp mai a ni…wehehe

*Source: www.keimah.com    wehehehe

 

 

Similar Posts:

Recent Posts:

27 Responses to “Mysteries Update: Thilmak tharlam lawrkhawm”

  1. 1
    Chhuaklinga Says:

    Chawchhun ei khamah chhiar ang.

    tren tren

    Report this comment

  2. 2
    PKfanai Says:

    A chhiar thamin, a bengvar thlak hle mai. (Y)

    Report this comment

  3. 3
    saint sammoo Says:

    chiar chhuak veksss… ngaihnawm hle mai… han uar zel teh..

    Report this comment

  4. 4
    Chhuaklinga Says:

    A ngaihnawmin a bengvarthlak hle mai. (B) He khawvel hi thilmakin a khat a nih ber hi. (&)

    tren tren

    Report this comment

  5. 5
    Mx Says:

    Good Post (Y)

    Report this comment

  6. 6
    sheldon Says:

    Tha, ka interest zawng ani viau lo na in (Y)

    Report this comment

  7. 7
    chhangteval Says:

    “Kut bawr lian tawk” khi a nuihzatthlak :-D

    Report this comment

  8. 8
    funny™ Says:

    Sephung chungchang hi ava mak teh tlat ve. saptawngin enge a hming in hre hlawm em le?

    Hei 300 milllion years old gear technology chu.
    http://www.mobilemag.com/2013/.....ilization/

    Report this comment

  9. 9
    Dr Mahminga Sailo Says:

    A ngaihnawm hlawm hle mai.. (Y)

    Report this comment

  10. 10
    DuatDuat Says:

    BigDaddy bengvarthlak khop mai,i taihmakna hi ka ngaisang (Y)

    Report this comment

  11. 11
    PKfanai Says:

    Sephung chu Beetle an ti mai lo maw? Tin, sephung kan insiktir thin leh ek lir thin hi an danglam deuh hlekin ka hria. ‘Pawngeklir’ kan ti thin. :-0

    Report this comment

  12. 12
    century child Says:

    Heta alo chhuah takah chuan chhiar chhuak vekhhh (Y)

    Report this comment

  13. 13
    aduhi Says:

    dung beetle an ti kher lo maw?

    Report this comment

  14. 14
    Dr John Says:

    (Y) Post-tupa a va BVT ve … (F)

    Report this comment

  15. 15
    H.Vangchhia Says:

    Good post Bond-a (Y)

    Report this comment

  16. 16
    Awmtea Leo Khiangte Says:

    A va tha hlawm tak em! Bengvarthlak ngei mai! (Y)

    Report this comment

  17. 17
    Matluanga Says:

    comment phawt i la chhiar ang :-) (Y)

    Report this comment

  18. 18
    Amah Charice_mizo Says:

    Ngaihnawm reng mai, its fun reading, news update tih lemah chawtak khukpui hluai chi erawh a awm lemlo anih khi (H)

    Report this comment

  19. 19
    H.Vangchhia Says:

    300 million a upa.. tih denchhen khian:

    Mithiamte chuan Adama kha kum 6,000 pel hret vel kalta a siam niin an chhut a… hairehai :-P ;-)

    The ages and relationships of the patriarchs, given in Genesis and shown Figure 216, allow one to estimate the time of Adam’s creation at slightly more than 6,000 years ago. What uncertainties are involved?

    a. These ages are based on the Hebrew (Masoretic) text, used in almost all English translations. The corresponding numbers in the Samaritan and Greek (Septuagint) texts place Adam’s creation about 6,200 and 7,300 years ago, respectively. Which text is closest to the original is uncertain. If one uses the Septuagint, then Methuselah died 14 years after the flood—a logical impossibility, since he was not on the Ark. (Some sources say that the name Methuselah means, “When he is dead, it shall be sent.” According to the numbers in Figure 216 (the Masoretic text), the flood began in the year Methuselah died.)

    b…. etc etc.

    http://www.creationscience.com.....AQ217.html

    Report this comment

  20. 20
    I am0 Says:

    Bonus, khi ava han mak awm ve, chutia, mipakhat han beng let tawp thei tur kutbawr han len dan tur zia chu, museum a dah tlak anih khi, wehehehehee

    Report this comment

  21. 21
    Sihtea Says:

    Adama kha, kum maktaduai 6000
    liam ta a siam hi a lo ni reng lo maw?
    hahaha.

    Report this comment

  22. 22
    Hotunu_pasal Says:

    Rangkachak 5.5 kg a rit, ka rin aiin a man a tlawm.

    Report this comment

  23. 23
    mate ainawn Says:

    Big Daddy Hma Hmatea @ Post tupa chu, hetah ka vawikhat hmuhna che, i ti tha hle mai, vawikhat a sei deuh ai chuan, part 1 & 11 in then la, chhiarchhuah a peihawm deuh ka ring.

    Informative thei khawp mai (Y)

    Report this comment

  24. 24
    Mr.Fanchun Says:

    THU NGAIHNAWM HUANG Group chu mimal group a ni maw.!. :-D

    Report this comment

  25. 25
    BigDaddy Hmahmatea Says:

    Nia sephung ka rawn ti mai a ‘Dung beetle’ a in ti bawk si a, ‘Pawngeklir’ ang hi a nih hmel..sephung chikhat chu a ni tho hmel..

    Report this comment

  26. 26
    H.Vangchhia Says:

    #25 dung beetle(English) = Sephung (Mizo/Lusei) :)

    Ka van mu tlai ve le, a hma tawh zawk. Zing dar 1:25 a ri der mai. Mu ve tawh teh ang hairehai ;-)

    Report this comment

  27. 27
    SHauzelSailo Says:

    Kutbawr lian tawk hi thilmak tharlam ber chu ani lo maw hikkk hikhik hikhik :-P

    Report this comment