Lo Vah Hi

January 24th, 2013 12:10 pm by Dr Mahminga Sailo

(Lehkhabu rawn ka nei lem lo va. Ka tawnhriat leh kan veng titi ka hriat atanga ziak mai ka ni e. Chinchang hre zawkin thawh belh zel theih.. ;-) )

Ram tuk zai relin
Kum a thar a. Chulram kalsanin ramchang bawh turin ram tangrual te an inpuahchah tan a. Tlangau lo auvin, ram theh tur chungchang leh lo/ram thlan hun tur a rawn aupui a. Rualkhai takin lehkhaa nambar ziah chu chhungkhat aiawhin ram thlang hmasa tur an pawt zel a. An nambar pawh ang zelin ram theh chhung a mi kha an thlang thei thin a. Hmeithai erawh an duhsak bik thin

Patling ban sei lai
Ram tuk dawn lai hi chhungkaw pa kut sei lai ber an ti thin. An lo duh tur ang ram an han sawi a. Chumi tul atanga chhuahlam pangper leh chhim hawi mual kawi zawng zawng nen tiin ram an han pawm tak tak a. Rilru chhe deuh leh duham hriat a awl thin khawp e an ti nia. Tichuan, an lo vah tur chin leh ri insiam remin perh an kheng a. Lo an vat tan thin.

Lo vah hi
Hna hahthlak leh hlauhawm a ni a, hmeichhe thawh tura ngaih a ni lo. Tin, mipa pawh ram tang rual an nih hma chuan an hruai lo tlangpui thin. Amarawhchu, mipa naupang tangkaina erawh a awm teh meuh mai. Mau leh thingkung kih paha hnim te te han sah chu a ninawmin, hna a tisawt lo thin a. Mipa naupangin hnim kung lian lo (perhte kan ti thin) chu lo vah bak a mi te kan lo sam fai ve thin.

Tuk lukhuh
Hei hi lo vah rau rau a hahthlak, pa chak leh huaisen tana lo vah sawt em em si a ni. Lo vah pangngaiah chuan lo mawng atangin thing leh mau an kit tan a. Vahchap a tluk ang zelin lo lu lamah an kaisang zel thin.

Tuklukhuhah erawh chuan lo lu lam atangin an tan a. Tichuan thing leh mau tlu chuan a thlang lama thing leh mau dangte a delh awn thla zel a. Ramchang thaah ngat phei chuan vahchapin a delh mau kung kur pep pup han fik hmawk hmawk te kha a hlauhawmin chet sual palh a awl hle. Hetiangah tak hian pa huaisen leh tuantha an hriat thin. Chempuia mau chhawk ri leh auh ri tuar tuar leh kara a dangin an delh rih luat vanga mau kung puak thawt thawr ri te chu ngaihnawm khawpin a bengchheng thin.

Lentupui hring dup mai thiat a, kan nghak ro te te a, kan han hal leh chiam mai thin hi chu aw, pumpelh theih hram ni tawh se. Thing leh mau baka nungcha nunna hlu tak chan an tamzia te hi hriain, ram ti chhe lo zawngin eizawnna tur hi sawrkar hian duang hram hram se a va’n lawmawm dawn em. Kan tharchhuah lah a hlawk der bawk si lo.

Similar Posts:

Recent Posts:

18 Responses to “Lo Vah Hi”

  1. 1
    Phivawk Says:

    Le, kawmen tan i1a…

    Report this comment

  2. 2
    PKfanai Says:

    Lo vat ve tawh kan awm vak lo anih hmel e. I sawi ang khi kan naupanlaiin ka hre ve thin. Ka Pu (kanu nau) hi kan veng VC ani thin a, naupangte nimahila, an bulah ka lo awm ve thin a, ka hre ve nual. Rampui tak tak vah naah hi chuan ka tel ve chiah lova, mahse College kan kallai hian, chawlh changin daihnai mauhmun leh thang hmun vah naah te chuan ka tel ve nual mai. Mau hmun vah hi chu a nuam phian zawk a, Leilet tur thang hmun vah hi a me duhin college kallai vun no tak tan chuan a hrehawm duh khawp mai. A tirah a hrehawm deuh nain, thlan a chhuah law law hnuah hi chuan, a nuam ang reng phian. Lunglen thlak e.

    Report this comment

  3. 3
    Awmtea Leo Khiangte Says:

    Vat dawn ila… :-)

    Report this comment

  4. 4
    Dr Mahminga Sailo Says:

    @ PKfanai… A nih hmel tlat. Vawiin hi a reh riau, lo vah an hreh nge ni? :-D

    Rawpui hung thiat tur phei hi chuan pa chak leh tharum ngah an pawimawh khawp mai. Phulraw bul chum tha tak, Patling malte tiat tiat dawn kha chu tu pa chem mah hian chhawk theih ni hek lo. A kung an in phan kual chuat bawk si. Mahse, a ruala mau hung an han tlu-kai-diat vel kha hmuhnawm tham tak a ni..

    Report this comment

  5. 5
    Borat Says:

    Ngawi teh u, lo vat tura insawm thut mai chu. Ka chempui ka ha ntat hriam phawt ange aw?
    US of A ah pawh khuan logger ho hi palian leh chak ho tih niawm takain an sawi fo reng ani. Tunlai ah erawh chuan deforestation hi kan ngai pawimawh ta riau va. Lo vah ngai lova awm a hun tawh hle.

    Ka tet lai chuan leilet kan nei a, lo vah a ngai ve lo.

    Report this comment

  6. 6
    H.Vangchhia Says:

    Ka lo vah teuh ber, huan sam :P

    Lo leh leipui hi kan nei ve tawh ngei, lo vahnaah chuan ka tel lo. Hlo thlawh, bung seng ilo velah chuan ka pui ve nual.

    Report this comment

  7. 7
    Nirvana Says:

    Mual100vata (mual 99 vata aia chak) kan han pun dawn em ni?

    Report this comment

  8. 8
    chhana Says:

    Hei lo vatin ka riak mek. Rubber hmun kan siam ve teh ang.

    Report this comment

  9. 9
    century child Says:

    Lo vah kan bansan hun ka nghakhlel, ramngaw a uiawm eeee ;-(

    Report this comment

  10. 10
    vakul Says:

    Vat ve nasa tak ka ni. Mau kan han sat khawm teuh a, pahnih thum velin kur pum maiin a’n dang khawm a, a zaangah kan va kik puak tuarh tuar mai chu nuam ve tak a ni. Tum khat ka thing kih a tlu thei lo lutuk a, ka lawn a ka’n tukthla mai chuh…min tlukpui duai duai mai maw le.Ka van thi teuh em ve aw….hnangpui tak takah chuan inchum chi miah a lo ni lo.

    Report this comment

  11. 11
    Hotunu_pasal Says:

    Kut an durh a, chutah an keh zui chiah mai kha.! Thî khawpa an keh phei kha chu(h).. Ava na dth tak!

    Report this comment

  12. 12
    Hotunu_pasal Says:

    Kut an durh a, chutah an keh zui chiah mai kha.! Thî khawpa an keh phei kha chu(h).. Ava na duh tak!

    Report this comment

  13. 13
    Athana Chhangte Says:

    Mau hung thing tha tawka han delh tir hmiah mai chu ngaihthat thlak tak hi a ni ringawt mai. Thing kih thluk lei delha a mut ngut hi chuan a kang tha duh lo an tih kha. Ngaihnawm, tlangram lo neih kan bansan tial tial a, kangvarah chauh to thei tamkawr, baibing etc te hi ei phak loh hun kan la nei thuai ang. Chutih hunah chuan “hmanah chuan kan ei thin a” kan la ti ngei ang
    Loa chin chi thlai chi pawh kumin chu a to hle tih an sawi tawh a nia

    Report this comment

  14. 14
    Ruata Pachuau Says:

    Zanah Lal leh Upaten ramtuk an rel a, Ramhualten an duh lai lai an thlang a, chutah mipui vantlang ta tur erawh a hmun thleng hmasa sa in an thlang hmasa mai thin. Thlen hmasak tum reng rengin zan pawh sawi lovin meichher nen an tlan dawr dawr a, a hmun thlen dawnah pawh kawrah chempui vawm kaiin “Nang aiin ka thleng hmasa” tiin patling an in hmakhalh a…tih thu ka pain min hrilh ka la hre reng…….A lehlam zawnga thlir chuan kan pipute nun kha ava lo tenawm tak!!!

    Report this comment

  15. 15
    Mx Says:

    (Y) Ka experience neihloh lam tak ani. hehe

    Report this comment

  16. 16
    Chhuaklinga Says:

    Developed countries hovin duh tawka ramngaw an thiah darh hnuah ramngaw leh nungchate humhalh tul zia an sawi mawi leh a. Lo vat lova eitur neih loh ai chuan vah ngei ngei tur, kan ram thing te hi Pathianin a cial bik min pek a ni a. Vah tluk vek hnuah halin kumkhat chhung thlo fai hliau mah ila, a tukchawr a awm leh zel a, kum nga hnuah chuan a vah leh tlak zel. Tuten emaw a thing tual to vat a, sap ram thing eng eng emaw tukchawr pawh nei lo an rawn phun hian ram a ti chereu zawk daih. (post a hot deuh nan :) )

    tren tren

    Report this comment

  17. 17
    Dr Mahminga Sailo Says:

    Kut durh tawh, chem hum dan kan thlak sek hnua thingkha, ui pum rual tiat vel kih ngai awm thin kha a ninawm. A chang si, han sat ila kut a nghawr thin si.. ;-(

    Rual u deuh hovin in rawn sawilan ka rin in sawi miah lo, ka sawi chhuak thiam tawh si lo.. A hrechiang in awm chuan a dik zawkin rawn sawi mai t’u. Ka telh zeta, ka paih leh daih a.

    Pa titi thiam takin la a vah dan a’n sawi tak tak hi chu a ngaihnawm thin an tih kha.
    Ti khan thenawmnu mawng atangin ka’n rawn dawm phei zel a, a kawng thleng ka’n hlim chho te te a. Mau hmun a ni bawk a, hma lak kal bawk nen, kawmthlang pa nghawng rek ngawt khawpin ka va reh hnuah, kawmchhak pa mawng bawr ka hlawi leh hram kha… ti zawng deuha lo vah chungchang titi ka hre thawi tawh. Ka thu hman erawh a dikhlel mai thei.. (H)

    Report this comment

  18. 18
    sheldon Says:

    Tukchhuah nuam vek u le (L)

    Report this comment