William Williams-a Chanchin

January 16th, 2013 2:00 pm by Chemtatrawta

Rev Dr PL Lianzuala lehkhabu ‘Zofate chanchin tha rawn hlantute’ tih a Wlliam Williams-a chanchin a ziak dan pawimawh zual hi a bu neilote tan thil tangkai a nih beiseiin ka hn tarlang teh ang

William Williamas-a hi kum 1887 tawp lam khan Welsh Methodist Foreign Mission tirhin Khasi ramah Missionary in a lokal a. A rual hian midang 7 tirh an ni bawk. Hetih hun lai hian Mizoram chu British awpna hnuaia awmin Mizo lal tam tak chu Sapho thuhnuaia inpe duh lovin an la sehhel hle a. Kum 1890 Sept. thlaah Mizo lal 6 intiamrualte chuan Aijal leh Changsil kulh an bei vak mai a, changsil kulh phei chu an la thlelh nghe nghe a. Chung lal hote chu manin Syhlet Jailah dah an ni a.

William Williams-a hi a thian Missionary dangte tlawhin Syhletah a va zin a, Jail an tlawh a, mitang thar Mizo lalte chan chin leh mi kawlhsen an nihnate chu a va hre chopchilh a. Hemi atang hian Mizote chu a vei em em a, a rilruah a thi thei lova, Lushai rama awmte tana remna kawng awm chhun chu Isua Chanchin Tha chauh niin a ring nghet tlat a. Zofate a veina hi a reh theih loh avangin kal ngei poh a duh a. Hemi thu hi Mission lama anhotute hnenah pawh lehkha thawnin a hrilh nghe nghe a.

Mizoram a buai zuallai a nih avangin Civil mi reng reng Zorama luh khap tlat a ni a. Silcharah kalin a rilru chu Silchar DC hnenah a hrilh a. Ani chuan a lo hriatthiampui hle a, Sipai ruala Mizoram a kal dan tur a lo ruahman sak ta a. Midang 3, Benjamin Aitken, Church of Scotland Upa te, Kashinath (Assamese) leh M.Khanai (Khasi leh Meitei thlah pawlh nia hriat) te nen kalin Dt 15.3.1891 ah Mualvum lawngkai an thleng a, ni 16.3.1891 ah Changsil Kulh an thleng leh a. Ni 20.3.1891 ah Sakawra kalin Aijal an thleng a, Aijalah hian ni 26 an cham a ni.

An cham chhung hian anmahnia kal hran phal a nih loh avangin leh Sipai venna hnuaia kal a ngaih thin avangin khawlai pawh an fang vak hman lo niawm tak a ni. Aijal kulha hnathawka sorkarin a chhawr Khasi, Naga leh Manipur hote chu ko khawmin Pathianniah Inkhawmna an buatsaih a. M.Khanai hian Manipur tawngin, Aitken-an English in, W.Williams-a hian Khasi tawngin Pathianthu an sawi a. (Hei hi ama ziak ngei a ni). Hei hi Mizorama Isua chanchin an sawi chhun chu a ni mai a. Hei bakah hian kuli lokalte hnenah Bible Milem an sem a, ‘Kan fate tan kan hawn sak ang’ tiin an lawm hle a ni tih poh a ziak.

Mizorama Chanchin Tha hrilh a tulna leh a vei em em na, Mission lama an hotute a hrilh hi an hotute pawhin ngaipawimawhin an lo bawhzui a. Welsh General Assembly 1892 ah thehluh leh pawm a lo ni ta a. Amaherawh chu a veitu ber William Williams-a hi vanduai thlak takin Typhoid natna avangin ni 21.4.1892 ah a hnathawhna hmunah hian a thi ta mai si a. Mission hotute pawhin ‘Lushai-a kal ngei tum kha a nia sin maw le’ tiin pawi an tih thu an ziak.

Similar Posts:

Recent Posts:

15 Responses to “William Williams-a Chanchin”

  1. 1
    bucko Says:

    Uai heti hi a nih si chuan, nikum lawk a synod rorel in chanchintha thlen ni 15.3.1890 tih an passed kha a diklo deuh tho ava ang ve le…..
    Hriat zauna atan a tha hle bawk e.

    Report this comment

  2. 2
    H.Vangchhia Says:

    Han sawi teh u lem :)

    Report this comment

  3. 3
    Nirvana Says:

    Mizorama mi thil ngaihsante:

    Missionary vun ngo
    PWD engineer
    Concrete in sang
    Korean films,
    English premier league
    Politician koham

    Report this comment

  4. 4
    H.Vangchhia Says:

    #3 :-D

    Report this comment

  5. 5
    century child Says:

    (Y)

    Report this comment

  6. 6
    Hotunu_pasal Says:

    Ka birthday nen a inrual chiah turin March, 3 ah lo thleng se an inchuh buai lo vang…he. ;-)

    Report this comment

  7. 7
    Awmtea Leo Khiangte Says:

    A chiang mai alawm, hei…

    Report this comment

  8. 8
    PKfanai Says:

    Bengvar thlak e. William Williams tih hi, Mawimawii, tetea tih ang type deuh a ang.

    Report this comment

  9. 9
    Chemtatrawta Says:

    William Williams hma hian Sohan ROy(?) leh Kristian dangte pawh an rawn lut chho tawh ngei ni a hriat a ni bawk a, Mizo nupuia neite pawh an awm a, Pathian thu te pawh an hrilh ngei a rinawm bawk a ni.

    Report this comment

  10. 10
    rawihteamizo Says:

    Zoram Vartian tih lehkhabu, MAL Book of the year top three, ziaktu Pu Lalhruaitluanga’n Vanglaini lama a ziah ve thung aw (Ani hian research nasa tak beiin Zoram Vartian tih hi a ziak a ni, chhiar pawh kan awm tawh nual awm e):
    “Rev. Williams-a te zin report, sap rama Missionary magazine lâr tak, The Monthly Tidings, September 1891, p.160-ah leh Kristian Tlangau April, 1953, p.74-ah tihchhuah a ni a. Chuta Williams-a ziah dan chuan March ni 2, 1891 Thawhtanniah Silchar atangin an chhuak a, Mizo an hmuh hmasak ber chu Tlawng lui kam, Kutbûl lui chhuaha Liankunga khua, Mualvum naupangte leh putar an ni. Tlawng lui atangin helai kaiah hian an lo chhuak a, Bible milemte leh nawhalhte an pe a, hlate an saksak a, âng phiauvin an ngaithla, a ti a. Hemi ni hi March ni 15, 1891, Pathianni chhun a ni a, hei hi Mizorama Chanchin Tha thlen tan ni tak leh Chanchin Tha hril tuma Missionary-ten Mizoram leilung an rahna hmasa ber a ni. Kutbul lui chhuah hi Changsil atangin mel 3 vela hla a ni a, hmanlai atanga Mualvum leh Kawnpui kai a ni.”

    Report this comment

  11. 11
    Chemtatrawta Says:

    rawihteamizo, “Bible milemte leh nawhalhte an pe a, hlate an saksak a, ang phiauvin an ngaithla” hei zawng hi Mizorama Chanchin Tha thlen ni tak atana base anih dawn chuan, William Williams hma hian Kristian sawrkar hnathawkte pawhin Mizote chu Pathian thu an hrilh tawh ania aw… :-)

    Report this comment

  12. 12
    Nirvana Says:

    “Chanchin Tha” chu a lo theng anih pawn a chhuak leh daih tawh, June 1986 vel khan. [Khalai "peace agreement" hnua Congress leh MNF inthural khan tun thleng Mizoram an la rawk ta zel anih hi] .

    Mizoram changkan duh ho chuan Missionary Day an tih hian office khar tawh loh tur, tih nawr vak ang u. Ram tana chanchin tha chu hemi ni ngeia hnathawh zawk ani. Office a pen leh computer a hnathawk ho chawl mahse kut hnathawk ho tan chawlh ani ve lo.

    Nitin inhlawh a ei zawng tan phei chuan sorkar hnathawk ho chawlh hi chaw nghei thaihna ani tih lo hre rawh se. Function a “Kut Hnathawk Day” a thusawi mai ani lo.

    Report this comment

  13. 13
    Chhuaklinga Says:

    Han sawi zel teh u, a bengvarthlak thin khawp mai.

    tren tren

    Report this comment

  14. 14
    Dr Mahminga Sailo Says:

    # 3 & 12… (Y) :-D

    My-story pawh ka hre tlem bawk a, Hi-story phei chu ka bo khawp mai. :-D

    A bengvarthlak e ti mai ang. (Y)

    Report this comment

  15. 15
    mzvision Says:

    #10 The monthly Tiding Sept 1891 Scan copy hi hmuh tur a awm tak tak em? Han chhiar ve ngei a chakawm.

    Engpawhnise Mission hmun khuar lemlo ah chuan midang pawh LUSHAILAND hi XTian tlawh hmasa an awm ngei ka ring Akyab emaw Chandraguna lam Mission Compound atangin, mahse record hmuh tur a awm silo.

    Report this comment

Leave a Reply

You must be logged in to post a comment.