MIZO SAKHAW BIAK DAN LEH A TOBUL~4

January 8th, 2013 7:10 pm by Lalhnam Rinzova Khawlhring

CHUNG- Hei pawh hi vawkte bawk a biak nan an hmang leh a ni. An biak ber nia an hrian chu Ni engatanga malsawmna thlen tirtu leh ruah rawn sur tirtu niin, Mizo Sakhaw chanchin ziaktu dangte hian vawktea hman a ni an ti a, thingkhawn chungah a hmanrua atan thlanvawng thing tel ngeiin a in an sa thin a; ziaktu pakhat thungchuan arhluisen an hmang a ti ve thung tlat mai.

VAN SEN- Hetah hian chhum dum leh chhum senkarah khian malsawmtu awmin an ngai a ni ber a, chu chu an bia a , arpa-hluisen an hmang thin. Tuium hunna chung ditipah a sa serh chu an pe thin.

HNUAIPUI- Hei hi in hmun leh a velleh a hnuai lama lei thuahthip kara mi, lei thuah tina awm hnena malsawmna dilna a ni leh a. Lei hi thuah sawm thleng awmin an ring a, thuah tina mi malsawmtu awm kha an bia a ni. A biak nan hian vawkpui no nei tawh ngei an hmang thin a ni. Dawino chhuinaah chuan a tawp ber leh ahautak ber a mi. Vawk chu kawmchar thlang lam kil ban bulah kher an talh a, a serh zawng zawng leh a lu chu thûk takah phum bovin a sa chu ni thum chhunga ei zawh ngei tur a ni a, an ei zawh loh chuan paih hmiah mai tur a ni.

Heng Dawino chhuinaa an biakte bakah hian Khuangchawi thlenga an sakhaw kawngkal indawt chhova an biak thin Pathian chu han chhui chho leh ta ila, heng kan han tarlan turte an tih dante nen kan hriat theih ang angin hansawi diah diah ila.

SEDAWI CHHUN- Luseiin Sedawi chhun an hman hian sepa an talh a, chu chu in lama thangchhuahnatur sakhaw-kawngkal rahbi pathumna a ni a; hetah hian an setalh chu Khua pual ani a. Sa pual atan pawh vawkpa lian chu an talh leh tho a ni. Tichuan Sa leh Khua chu hetah hian an be kawp tihna a nih chu. Ralte lam pawhin Sedawi hi Khawzîm Pathian an biakna niin a pualin sial an talh a. Sa pualin vawk an talh ve bawk a ni. Tin, K. Zawla sawi danin Pawih hnam pawhin Sedawi hi anhmang ve leh bawk a ni. Chutiangin Hmar Thiak chi pawhinSedawi hi an hmang ve bawk a, anni tan chuan Thangchhuahna tura an sakhaw kawngkal rahbi pahnihna a ni.

PAWLSAWM- Hei hi Hmar Thiak chiho Thangchhuahna tura sakhaw rahbi pathumna a ni a, hetah hian sechal pakhat leh vawkpa pakhat leh kelchal pakhat an talh a ni. Hei hi Chunga Pathian an biakna niin a lang ber a ni. An biak tak hi sawi chian a ni lo.

SEKHUANG- He mi zawhah hian Lusei chuan Sekhuang an hmang leh a, an se talh chu Khua pual, Khua biakna a ni leh a, chu mi rualchuan Sa biakna tur vawkpa an talh leh bawk a ni. Sepa ki hmawr hawng an talh avangin “Khuang kan rual e” an ti a; chu mi awmzia chu “Sekhuan nan pawh a tlâk tawh” tihna a ni. A then chuan Seluphan bula an dah talhkhuang a ken tel avanga “Sekhuang” tih niin an sawi bawk.

SECHAL HMAITUAK CHHUN- Hei hi Hmar Thiak chi tan an sakhaw kawngkal rahbi chhawng lina a nia, hetah hian sechal pahnih leh vawkpa pakhat an talh a, chu chu Chunga Pathian biakna a ni. Pawlsawm dawta rahbi kai lehna chu a ni nghal bawk.

KHUANGLAI CHHIN HAWN- Hetah hian sepa mal an talh a, Sedawi chhun ang chiah a ni leh a, sechal hmaituak chhun tlipna a nideuh ber mai. Hei hi Hmar Thiak hnam ho in lama thangchhuahna tura an sakhaw kawngkal rahbi puitling anga chhiar chu a ni chiah lova, sechal hmaituak chhuntlina atan an hman a ni ber zawk a ni.

BOIH- V.Lalchhawna ziak dan atanga Pawih(Lai) sakhaw kawngkal rahbi indawt danah chuan Boih an tih hi a chhawng ngana a ni tawh a, se talh vawi hnihna a ni bawk a, Khuangchawi tluka rit leh hautak a ni ta a ni. Boih laia an thil tih zawng zawng kha Khuangchawiah hian an chhawm chho vek a, chu bak chu thil tam tak an belhchhah tawh lo a ni. Pawihho ngaihdanah chuan Khuangchawi chu dam rei nghah thil leh mi chak zualte kawng a niin Boih hi Khuangchawi ve thei lote tan chuan Khuangchawi tlukah an ruat tawh a, an ngai ropui hle a ni. An ran talh reng reng hi anni lamah hi chuan Khawzîng Pathian biakna vek a ni mai e.

KHUANGCHAWI- Hei hi Lusei danah chuan in lama thangchhuahna tura an sakhaw kawngkal rahbi pangana leh a tawp berna a nih bakah an se talh pathumna a ni bawk. Sepachal pahnih an talh a, chu chu Khua biakna pual ani a, sepui pakhat chu tlangphal sa(ruai) atan an talh a; tin, vawkpalian pakhat leh vawkpa dang têdeuh an talh tel leh bawk a. Vawkpa lian zawk chu Sabiakna puala an talh a ni a,vawkpa te zawk chu Chunga Pathian pual bika an talh a ni.
Pawih hnam chuan Khuangchawi hi ‘Tlaihrahden’ an ti a, ziaktupakhat sawi dan chuan in lama thangchhuah tura an sakhaw kawngkal rahbi chhawng thumna leh tawp ber a ni a; sial pathum leh vawkpa pakhat an talh a. Ziak dang pakhatah thung chuan rahbichhawng ruknaleh a tawpna ber niin, an se talh vawi thumma a ni a, Khuang vawi hnih chawi angin ‘Lawngtuk’ an tih hi an hmang lehniin a sawi thung a ni. He Tlaihrahden hi a tlip nan sial an talleh a,’Selulawk’ ti lovin ‘Sekhawzim’ an ti.
Khuangchawi hi Hmar Thiak hnamah chuan Thang chhuahna tura se talh vawi ngana niin, an sakhaw kawngkal rahbi parukna leh a tawpna ber a ni bawk a ni. Sechal hmaituak leh tlangphal sepui pakhat talh a ni thin a, Sepa chal pahnih leh sepui pakhat an talh tihna a nih chu.

Similar Posts:

Recent Posts:

13 Responses to “MIZO SAKHAW BIAK DAN LEH A TOBUL~4”

  1. 1
    TuaiSialA Says:

    Tuk chhuah nuam vek ule.

    Report this comment

  2. 2
    H.Vangchhia Says:

    A ngaihnawm hle mai. “Pawih” i tih khi “Pâwi” tia ziak tur anih hmel. (Y)

    Keini thlahtute kha chu ramhuai hlau lo an ni bawk a, sechhun an neih changin, chu chu an thlahualna a ni ve mai awm e.

    Report this comment

  3. 3
    sheldon Says:

    Tuaite, uang viau teh suh. Ka ‘Tukchhuah nuam’ i ti common zo dawn…lol

    Report this comment

  4. 4
    Ruata Pachuau Says:

    Tunlai chu ka va fel tak em! Ka misual khat riau :-)

    Report this comment

  5. 5
    Awmtea Leo Khiangte Says:

    Sikri chhem in awm em? A va vawt ve… :-)

    Report this comment

  6. 6
    H.Vangchhia Says:

    #5 keini lam pawh ka fanu skul kal ka thlah chu ka khang (froze) ve zo dawn emaw tih tur a ni, hit cher cher tak a ni. Hnim pawh daikhal-in a khuh vek bbbrrrrrr

    Report this comment

  7. 7
    Awmtea Leo Khiangte Says:

    #6 keini chuti em chu a la ni lo. Chu, nangni lakah chuan a la lum hle a nih dawn chu a. Ka thlan a tla dawnin ka hria :-P

    Report this comment

  8. 8
    H.Vangchhia Says:

    #7 hahaha helam chu minus a ni deuh reng mai. Mahse, tunkar tawp lam chu 67.F (19.C) vel lai a ni dawn thung. 67.F (19.C) hi chu a nuam tawk viau a ni. :-)

    Report this comment

  9. 9
    sheldon Says:

    Hv, keini ang sa pan deuh chu minus ah chuan kan nung zo ve lovang…lol

    Report this comment

  10. 10
    lr hlonchhing Says:

    Khawvawtah te chuan, keartui-a mawngkaw hup chata mut hian a lum duh an ti :-P :-D :-O

    Report this comment

  11. 11
    Hotunu_pasal Says:

    Thil dang hlir in sawi a, paws tupa in ti lungawi lovang e, a hriathnem teh lul nen. Han fak der ve hram ula.

    Paws tupa, i chhiar zau awm hle mai, helam thil hriat duh ka neih hunah mi(sual) kal tlang hian ka la rawn ang che.

    Report this comment

  12. 12
    Rinzova Khawlhring Lalhnam Says:

    Nizan khua a vawt lutuk a ka rawn lut peihlo a lawm mawle, ka post a chhuak tih lah ka lo hre bawk si lova!!!

    H. Vangchhia # ; ni e ziak thenkhatah hian PAWI ti a ziak leh PAWIH ti a ziak an awm tlat a, i rawn sawi pawh hi a lo dik zawk mah na!!!

    Report this comment

  13. 13
    malsta27 Says:

    (Y)

    Report this comment