2012 Krismas Kan hman dan.

December 30th, 2012 11:07 pm by PKfanai

Arunachal-a Kristiante hi naupang fel ve fu tawh, thil zir lai mek leh thil tha nia an hriat chu chak taka bawh ruih ruih zel an ni vein ka hria a. Krismas-ah pawh hian Speaker neih ngei turah an ngai deuh tawh a, keipawh kan khua atanga km 400 zeta hla East Kameng District khawpui Seppa khuaa Baptist Kohhran 3 awm zinga 1 Bosso ho chuan Speaker-ah min rawn sawm ve a. An bialtu Pastor leh an Kohhran Secretary te chu kan Sikul a an fate dah mek annih avang leh he khua Sualna lama hmingthang tak maiah hian naupang kan neih nual avangin a phur awm ang reng hle mai. Seppa lam mi leh sa tih tawh chuan, sual tura ngaih anni deuh tawp mai a, an tihkhai hle a ni. Zankhat pawh Truck 2 hi an intawk lawi a, kawng an inkian tha duh lo ve ve khawp mai a, pakhat zawk chuan, “min kian(side) rang mai rawh, Kurung Kumey mi ka nih hi” a han ti a. Pakhat zawk chuan, “Mai mai a, keipawh Seppa mi kani asin” a ti ve ta a. Motor dang an lo thleng zel a, an han enchian nak chuan, Bengali ve ve an lo ni a” an tia lawm.

Kan chhungkua bakah staff thenkhat hruai tel tumin kan in rep ve nasa hle mai a. Amaherawhchu, kumin hian Lunglei Venglai kohhran ho Work Camp nei turin kan sawm a, an hna a laklawh avangin Krismas pawh cham an tum ta si a, rorel a khirh ta talh mai. Kan Driver nen chauha kal bakah hun ren thei ang berin Inrinni zan (December ni 22) a chhuah a, a tuk Sunday chhuna thlen a, Krismas ruaitheh zawha kir leh vang vang kan tum ta a ni(Arunachal-ah chuan Ruai theh zawh hian Krismas chu a tawp a ni mai tih lo hre ta i la). Seppa khaw thlen hma deuh km 10 velah hian Thingtlang khaw te reuh te in 30 vel emaw lek Bula khua a awm a, chutah chuan, Speaker turin Puanthui zirtirtu Pi Chhawni a kal ve dawn bawk a, kan zirtirtu 1 a hruai ve bawk a, Inrinni zanlai dar 2 velah Rizai hlimin khawvawt vur maiah chuan kan han tho a, Assam helho tamna leh misual tak tak tamna lam kawng zan thima zawh tura han chhuah chu a phurawm ta lo hle mai.

Chtih nak alai chuan, Assam atanga Arunachal kan luh leh dawn chuan, Bhalukpong Check gate-ah Motor neitu hmingah ka hming awm chu Mizo hming ani tih an hre si a(Sikul Motor hi ka hminga Register ani a), Inner Line Permit te min la dil zui. A hmanhmawh thlak tawh si a, engemaw ti tiin ka namnul a, kan tlan tlang lui ta. A tuk Chawhnuah kan va thleng ta a ni.

Seppa ka kal hnuhnun ber hi kum 5 vel liamtaah daih khan ani tawh a, alo danglam tawh kher mai. Kawngpui tawp leh chep lutuk thin kha, a lo zau hun tawh mai a, alkatra an luan zawh hlim ani a, alo mam pur tawh mai a. Ka kal hnuhnun ber tuma Bosso Kohhran Biakin, Motor Kawngpui atanga kea Luikama chhoh fe ngai kha, Biakin thlengin Motor alo lut thei tawh a. An Biakin Maurap deuh reuh te reuhte lah chu, Assam Type Biakin lian zet a lo ni ta. Arunachala Kristian leh Kohhran than chak dan em em hi a hmunah awm reng mah ila, amak ka tihna a nep chuang lo, min barakhaih hle a ni.

Tichuan le, Tlai dar 4:30 ah Biakin duh thala an chei mawi chu Ribbon chep chatin Pa leh Fapa leh Thlarau Thianghlim hmingin ka hawng ta rup mai a, Inkhawm kan tan zui ta. Kawng dangah thang viau mahse, an tawnga Krismas hla sak rual thup thup lam chu an la ti hlei thei meuh lo chu a ni. Inkhawm tan nanah pawh an hla thiam nal “God be with you till we meet again” ngei mai kha Nyishi tawngin kan han sa ta a nih kha. Krismas pawimawhna leh Pathian remruat leh hrilhlawk thlap anih dan ka han sawi ta a, hetah hian Mizoram leh Nyishi kohhran dang an anlohna alo lang ta! Krismas boruakin ati heheu dahlau velo a, Thusawi ngaihnawm an tih hmel em em mai a, hriau pawh thlauh ila, a ri a hriat theih ang’ tih tur khawpin thawm a reh a, che manglo leh mit pawh khap phallo niawm tak hian min en thap mai a, thusawi a nuam kher mai. Ka han sawi zo chu, reilo an ti deuh niin ka hria a, an ri deuh hak mai a ni.

A tuk ni 24 chu, infiamna chi hrang hrang hmanga tihhlimni alo ni ta a. Ball ben (Volley ball), Inhrui pawh (Tug of War), Kut ringawt hmanga tui in thal ngah siak(Water Game), leh naupang game hrang hrangte khelin an hlim hle mai. Naupang te ber atanga Puitling leh Pitar-Putar an kim tha hle.

Zan dar 5 ah kan inkhawm leh a, hetah hian Pathianin A fapa lokal na tura Khawvel a buatsaih dan leh Mari thuawih leh inpekna avanga Krismas hi lo thleng thei anih dan te ka han sawi leh a, an ngaihthlak that dan chu ala ngai reng mai, reilo an tih hmel leh khawp mai. Inkhawm ban atang chuan, Group zai te, Traditional Dress nena a huhoa inlam siak te, Traditional dress nen thoa Nupa te tea inlam siak tea inelna an nei leh a, an va han hlim tak em, an hlim tak meuhin ka hria.

Zan dar 11 ah chuan Zanlai inkhawm kan nei tan leh ta a. Zanlai inkhawm, Zanlaia Krismas Cake zai te, chumi zawha inkhawm zawng zawngin Mawmbati chhit te hi an intihhmuh leh vek tawh a, tih theuh turah an ngai leh tawh a, keini pawh hian kan ti ve ngei a ni. Kohhran dangah chuan, Zanlai dar 12 chiaha Birthday Candle chhem mih leh Cake zai hi an dah pawimawh leh lutuk thin a, Thusawi hi chu a ve lek ni hian a hriat thin a ni. Bosso Kohhranah hi chuan chutiang ani ve hauh lo mai. Berampute leh Vantirhkohte bakah Khawchhak mifingte chanchin atanga kan zir turte ka han sawi chuan, a hma zawng aiin ngaihnawm an ti ni hian a hriat leh tlat mai a, Short message an ti nain, Sermon puitling pangai tho ka sawi leh a ni. Tin, a tuk Krismas zingah chuan Baptisma chan tur ani a, Pastor chuan hming pe mi 4 chiah a nei a, Ka Sermonah chuan, Baptisma pawimawhna; Khawvel mithmuha Isua thihna leh thawhlehna tawmpuitu kannih lantirna leh Isua ringtu leh a ta kan nih tawhzia lantirna anih dan te, Chatuan thilah hian Lal 2 chiah zui tur an awm a, Isua kan Lal anih loh chuan Setana kan Lal anih dan te, Chatuan atan hmun 2 chiah awm hlenna tur a awm a, Isua Krista ringtu leh zuitu ni a Vanrama kan awm lo anih vek chuan, Hremhmunah kan awm ngei ngei dawn thu te ka han sawi kual ta daih a. mi 24 lai chuan hming an rawn pe ta a ni. A lawmawm hle mai.Tichuan dar 11:55 velah Cake chu ka zai ta a, chumi hnu chuan, Isua birthday lawmna thawhlawm thawhin an rawn kal ta a, mawmbati kha an lo pe theuh a, hemi zana inkhawm hi mi 800 vel kanni a, Biakinah pawh kan leng lo kha a ni a, a rei duh fu mai. Chutah bati chu min han pe ve a, ka han chhi hmasa ber ta a. Chu chu Pastorin a la kai a, an la kai chhawng zel a, Electric eng zawng zawng off-in bati chauh chu kan chhi ta a, a hmuhnawmin a pui dangdai khawp mai.

Thalai ho lam tlaivar an tum viau na a, ka encourage lem loh avangin zan dar 2 velah chuan an tin ve ta hlawm a, mahse, ka muhil tan chauh tihah chuan, dar 3:30 vel atangin Sechal an talh leh ta a, Silaiin an kap a, ka harh chiang leh hle mai. Mut chhunzawm a har tawh hle mai. Zingkarah mi 20 in Ringthar Baptisma an chang ta a ni(Mi 4 te kha chu Khawvawtin a hmet dai leh ta a ni mai thei, an rawn lang ta lo a ni).

Krismas tuk inkhawm pawh a nuam leh hle mai. Lawmman semin hun a la rei deuh a, Tin, Keipawh an Traditional Kawr-puan min hak tir a, chumi chungah an tunlai Traditional Jacket 2 min hak tir leh a, Vapual hmui awm ngauh mai Nyishi Lukhum min pek bakah Dar thleng 2 leh Thal leh Thal bawm a chhunga Thalfang khat tana awm nghal min pe ve a ni. Krismas tuk hi chuan, misual.com-a ka post tawh, ‘The best Christmas Present in the World’ a British ho leh German ho kara Krismas-in inremna a siam dan leh ‘Khualbukah hmun a awm’ tih thawnthute kha ka sawi tel a ni. Ngaihnawm an ti leh khawp mai. Kum 10 Nyishi ho zinga ka awm chhunga Kohhran than chak em em dan ka mit ngeia ka hmuhte ka han sawi a, anmahni kohhran ngei pawh chu entirnaah ka hmang tel a, an excited ve hlein ka hria.

Inkhawm banah Ruai kan theh ta a, Chaw chu Hnahthial hnaha fun sa thlapin an sem a, Sialsa pawh chu hnanga thil sain an sem a, a dangdai khawp mai. Ruaitheh hi 800 chuang kan ni. Keini erawhchu, a special deuhin Appy Juice leh Sial kawchhung chum min hlui hmasa a, ril alo tam deuh tawh bawk a, a ei theih khawp mai. Chumi hnuah buhchangrum leh Sialsa chu kan han ei ta chu, a ei theih ang reng khawp mai.

Ruaitheh zawha haw nghal tum kha kan ni si a, kan inseam ta rum rum mai a, an Kohhran Secretary chuan, Envelope 3 hi min pe a, phawrh lovin ka han en thuak a, cheng zanga note hi alo chhah tha hle mai a, “a ngai lo” tiin ka han tang der ve na a, hnial fithlak chi lah ani silo a, chhiar pawh chhiar lem lovin ka bag-ah ka dah ta a. Secretary chuan, Biakin mual Volleyball Court-a an lam kual mup mup chu kual 1 tal ka kualpui loh chuan, a tha lovang a ti a, tichuan ka han chho ve ta a, Thalai leh la valai deuh 100 rual tehmeuh mai chu Krismas hla playin an lo lam kual mup mup mai a, nula zei deuh inkarah chuan min han zep lut ve ta a, Disco emaw, Kalvary break dance emaw Hnam lam emaw pawh nise ka mikhual lo tih an hre silo a, an rin leh beisei loh ang takin anni aia uar leh zei zawk mahin an hnam lam chuan ka han ti ve ta a, an lawmin Camera a de nasa hle mai. Lam zawhah chuan, Chu Krismas hriatrengna ‘Memento’ Shield lian zet mai, Silver plate a ka hming F.Laljidingu tia ziah ngei mai chu min present ta a, a lawmawmin a ropui dangdai khawp mai.

Tichuan, kan Driver chu motor an khalhchhuah tir a, kei erawhchu kawnga lo ding tlar put mai chibai tur chuan min ti ta a, Motora ka luh hmain Last Word sawi turin min han ti leh rih a, microphone min han pe a, Ka pian ahnulama Krismas ka hman nawm ber anih thu ka han sawi chuan, a thenin chang an tuma, a then an au dur dur a, kut an beng dur dur bawk a, tichuan kan inthlah liam ta a ni.

Kan thiante 2 khan an kohhran hruaitute nen min lo nghak a, kan haw ho leh ta a, Report sawi tur kan ngah hlawm hle mai. Assam kan luh leh dawn hian zan dar 9 ani tawh a, Boro hel ho an hran em avangin Police-te chuan min hlauhpui hle mai a, kal an phal ta lo a. Chumi zana in thleng lo thei lo ka nih thu ka han sawi chuan, ‘eng pawh thleng se, keimahni mawhphurhna ani ang’ tih hming sign-in kan kal an phal ta hram a. Kan tawngtai a, Pathianin him taka min hruai ka ring tho na a, Pawisa min pai chu ka Mawza chhungah ka dah hram a, Nyishi Chemsei kan lo pai lo chu pawi ka ti hnuhnawh hle mai. ‘Min lo tibuai ta se’, tia ngaihtuahin engtia chet tur nge niang tihte ngaihtuah nuap nuap a awl ang reng hle mai. Pathian Engkimtitheian min veng a, engmah buaina leh harsatna tawk lovin, zanlai dar 2 ah tluang takin in kan thleng leh ta a ni.
Krismas leh Kumthar Chibai vek u le.

Similar Posts:

Recent Posts:

15 Responses to “2012 Krismas Kan hman dan.”

  1. 1
    chhangte_ll Says:

    Nyshi (Bangni) ho khawpuiah Masi i va hmang eloa :-D

    Tamil pakhatin Seppa panna kawngah Bangni pa arpa a chil hlum hlauh maia. Tichuan, an Hnam danin lawkal kawrt ah an inkhing ta alawm: –

    Bangni Pa: “Aw, ka Arpa, ka Arpa chuam duatlai !! Nikhat-a vawithum lai tui thei min chilhlum sak a !!”

    Tamil Pa: “Arpa an tui thei emia?”

    Bangni Pa: “Bhai, Ar hi i ar nge keima ar”

    Chhan let chi ani tawh silova a chawi teuh an tih kha mawle :-D

    Report this comment

  2. 2
    SHauzelSailo Says:

    Arunachal hi kalin ka hmu chak ve riau.
    Tlem chhiar, a va nawm hmel veee…

    Report this comment

  3. 3
    chhana Says:

    Baptisma chang tura hming pe hmasa palite khan an chang leh lo tihna emni?

    Report this comment

  4. 4
    Hotunu_pasal Says:

    Masi hlawhtling takin nang leh iva hman pui hote hian in hmang niin a lang. Ka lawmpui a che u.

    Kumthar hman nuam le.

    Report this comment

  5. 5
    PKfanai Says:

    Tunlai ka net a kamjur leh lutuk a, ka lut hlei thei lo(kan buai deuh bawk nen). Net chak deuh hunah pic.hlang rawn post ka la tum zawk mai ang.

    Report this comment

  6. 6
    PKfanai Says:

    Hotunu pasal, nangpawh Kumthar chibai le. Chhana, ani thei mai thei.ka chiang bik lo. Chhangte_ll, an ar damchhunga an tui tur leh an no neih tur zawng zawng an chhut thlap zel maw le. Kan driver pawhin nuam a ti lo tih ka hria. Mahre, a hlauhawm zia an hria a, driver an fimkhur vekin ka hria.

    Report this comment

  7. 7
    sheldon Says:

    Nangni Mas hmang ve chu mahni nawmna lam aiin mite tan malsawmna in ni bik a, a ropui thin. In rawngbawlna Pathian in malsawm zel rawh se.

    Report this comment

  8. 8
    Dr Mahminga Sailo Says:

    A va’n nawm hmel ve le. Krismas a thlen apiangin kumin Krismas i hman dan i hrechhuak fo dawn a nih khi.. Lalpa’n i rawngbawlna malsawm zel che rawh se… (Y)

    Krismas leh Kumthar chibai le.. (G)

    Report this comment

  9. 9
    Sangpuiipa Says:

    Kumthar chibai ule.

    Report this comment

  10. 10
    PKfanai Says:

    Hetiang hnam kawlhsen leh Dan leh thupek mahni kutzala kenkawh tum tlat mai ho pawh hi, Isua Krista Chanchìntha chuan zawi zawiin alo ti danglam thei khawp mai tih hmu chiangin ka inhria.

    Report this comment

  11. 11
    ruatruatapa Says:

    A sei naa a ngaihnawm hle mai. Midang te tan i luangchhuak nasa bik hle mai. I hmanhmawh deuh nge ni, spelling mistake ka hmu nual mai

    Report this comment

  12. 12
    saint sammoo Says:

    ka chhiar chhuak a, ka chhiar nawn leh.

    Report this comment

  13. 13
    Jacka Pi Says:

    (Y) pic en a va chakawm tawh ve

    Report this comment

  14. 14
    Puii Says:

    MASI i hmang masi bik kher mai…. (*) (Y) ngaihnawm dap dap hle mai, i lallukhum tur hi an siam tha bik dawn ngei e…lunghlu an dah belh dawn anih hi le ;-) (F)

    Report this comment

  15. 15
    PKfanai Says:

    Jacka pi, ka net a chak tha leh tan tawh a, ka rawn tum ang e. Puii, Lawmman dawnna tur awm khawp ka thawh awm ka hre lo thin lutuk hian min tihrehawm thin. Kan tih phu lovin leiah lawmman kan dawng tawh thin leh nghal.

    Report this comment