Misual ni mah ila ka hlim a ni

December 16th, 2012 9:30 am by Sangpuiipa

Misual ni mah ila ka hlim ani. Kha mi ni kha ka hun tawn tawh ah ka hlim ni ber leh ka hriatreng tawh tur ni pawimawh tak a ni.

“Eng pawl nge in nih ve a?”
“Pawl pawh kan ni chiahlo, MISUAL HO kan ni e,”

Kan fiamthu emaw ti a mak ti deuh hehaw a min en hnu ah kan han hrilhfiah a, hrilhfiah zawh hnu chuan an han nui ve leh rih a. A tam zawk kha chuan an hrethiam vak chuanglo tih a lang reng. Misual ho kan ni miau a, kha bak khan han inhrilhfiah vak ngaihna a awm tlat lo, a thiam pawh kan thiam heklo. Mahse an hriatfiah kher kha kan rilru a lian leh kan tum ber a ni lo. An harsatna chhawk zangkhaitu a lo nih tak hlauhin ti a kan sum thawhkhawm te pek kha kan rilru a lian ber chu a ni.

Nu pakhat chu damdawiin khum ah rilru hah takin a lo mu a. Amah ai mah a rilru hah tur zawk an pa chu an khaw lamah pawisa zawng turin a haw mek a ni. Nu ber chu a inthlahrung em em tawh a, natna in a tlakbuak mek bawk si. Chu a natna ai mah a na zawk chu tuar a la nei a ni. Chu a na tuar chu a hmel ah chuan zawh buai ngai lovin chiang takin a lang reng mai.

Krismas dawn a ni a, hmun hrang hrang a awm ten mahni khua ah, chhungkhat te leh thenrual tha te nena Krismas hmang turin an haw khawm mek a. Naupang ten Krismas dawn a nih avangin thawmhnaw thar leh thil thar eng eng emaw an nei a, puitling pawh an bang bik chuanglo. Chutih lai chuan hemi te chhungkua hi chuan an fa te balloon leina tur pawh an nei lova, chu mai a la nilo, doctor ten damdawiin atanga chhuah an phalsak hnu pawhin an mahni inenkawlna senso tur leh damdawiin atanga an in khulhchhuah na tur takngial pawh pawisa an neilo.

Krismas dawn hnai a fa te lawmzawng leina tur chu sawiloh, damlohna in a tlakbuak mek, mahni in khulhchhuahna tur pawh nei tawhlo nih chu a va hrehawm ngai dawn em! An pa chuan an khaw lamah pawisa dap in a hawsan a, a va hmu ang nge hmu lovang tih chu ngaihtuah tham tak a tling a ni.

Chutia rilru hah taka an lo in dawmkun lai chuan ngaiteh, Misual ho pawisa thawhkhawm keng a misual rual lo lut te chuan chu an pawisa ken chu a dawng ve tur niin an ngai hmiah mai. Tichuan duty room ah chuan ko lut in an pawisa mamawh ang zat chiah chu hlan an ni ta. A va ropui em!. “Kan va lawm tak em, Lalpan malsawm che u rawh se,” tih pahin a kut nem tak mai, natna avanga chaklo tak chuan min han chibai a. A biang ah chuan mittui a lo luang ngiai ngiai a, na a tih vanga luang a ni lova, lawm  avanga luang a ni zawk si a. Kan in chibai zawh chuan ka misual thian te chu ka va en a, insual pui ah cho ila “YES” mai thei tur Kawlhawk te lai lai kha a tahbelh zualpui ah an lo tang lehnghal a.

Hei hi chu mi pakhat kan pek chanchin chauh a la ni a. I sum thawh hmang khan mi tam tak an hlim a, lawm avangin an mittui a tla a ni. Misual nih a nuam a, hrehawm ber chu lawm avanga lungchhia hnukulh insum kha a ni. Han tah ve hawm hawm lah kha mahni tawk a pa in ti ve tak ho te khan kan hreh deuh bawk si. Khami ni khan thil tam tak ka zir chhuak a. Mi te tanpui ngai nilova, mi te tanpui thei tu a ka tang thei kha a ropui ka ti a. Mi harsa tak tak te rilru chiang takin ka hmuh pui ve theih phah ta. Lawm nachang ka hriat zual phah a, nun awmzia ka hmuh chian phah bawk.

Sawi tur chu tam mahse duhtawk mai ang aw. Kumin chu Charity sem ka rawn hmanpui ve thei tawh dawn silo che u a. In sem hunah khan min lo hre ve reng a ni ang chu. MISUAL dam reng rawh se.

Similar Posts:

Recent Posts:

14 Responses to “Misual ni mah ila ka hlim a ni”

  1. 1
    mama Says:

    Lo hlim zel rawh.

    Report this comment

  2. 2
    H.Vangchhia Says:

    Kan nu hian computer ka thutpui nasa lutuk hi a haw deuh thin tih ka hai ngai lo. Tunkum, March 14, 2012 atang erawh kha chuan computer ka thutpui a, mi(sual).com ka hawn (open) phawt chuan a lawm zawk emaw tih tur ani zawk ta. A thiante hnenah pawh mi(sual).com a mite fel zia a sawi ta sek mai.

    Misual zawng zawng, dam leh hlim takin masi in hman vek kan duhsak a che u. (Y) (F) (F) (G) (F) (F) (G) (G)

    Report this comment

  3. 3
    TuaiSialA Says:

    Post leh comment a ropui ngei dhe aw…

    Report this comment

  4. 4
    kawlhawk Says:

    Kumin min rawn ho thei lo tur chu khua i tihar dawn mange a… :(

    Report this comment

  5. 5
    chhana Says:

    Hetianga thilpek in pe thin hi ropui ka ti. Hmun bik neia awm ho hi chuan hmun dang atangin beisei tur an nei a, tul tho mahse i sawi ang ho, rin loh lam taka lo thleng thut hi chu a lawmawm bik ngawt ang. Tun tum chu tlem azawng tal ka pek ve theih ka in beiseiin mi harsate tlawh naah pawh tel ve theih ngei ka in beisei.

    Report this comment

  6. 6
    lr hlonchhing Says:

    Lo hlim zel rawh khai, misual hi a reh tawh khawp mai tih loh chu a tha vek e :-D

    Report this comment

  7. 7
    victor hnamte Says:

    Lungngai suh, misual ho kan awm a lawm.. Engkim tithei chuan awmpui zel che rawh se.

    Report this comment

  8. 8
    TuaiSialA Says:

    I hlim tur a ni. :-D

    Report this comment

  9. 9
    SHauzelSailo Says:

    A va ropui em! (Y)

    Report this comment

  10. 10
    caribou Says:

    A ngaihnawm hle mai.

    Report this comment

  11. 11
    Awmtea Leo Khiangte Says:

    Ṭha lutuk (Y) (Y)

    Report this comment

  12. 12
    Sangpuiipa Says:

    TuaiSiala pawh hi a tap chiang alawm ! :P

    Report this comment

  13. 13
    bbney Says:

    Ngaihnawm hle mai. Chhiar zawng ringawt pawhin rilru a hneh khawp mai.

    Report this comment

  14. 14
    Dr John Says:

    (Y) A Lawmawmin rilru a khawih ngei mai (G) (F)

    Report this comment