“Ka hnenah han la rawh u” – Krista sawmna aw mawi chu(Sunday Pual)

December 9th, 2012 6:14 am by PKfanai

“Ka hnenah han la rawh u.” (Matthaia 14:18)
Faten thil harsa, manganna khawp thil an tawh chuan, anmahni thua an nute emaw an pate emaw hnena an thlena an kalpui hmain, an nu emaw an pa emawte chuan, “Ka hnenah han la rawh u” an ti thin a. Chutiang taka kan Pa vana miin a tihduhzia kan hriat theih nan, ‘A fapa Kristaah chuan thu a rawn sawi a,” keimahnin kalpui leh thlenna chang kan hriat hmain kan manganna chu min lak sak duhin, “Ka hnenah han la rawh u,” min ti thin a ni.

He thu kan Lalpan a sawina chhan kha kan ngaihtuah chuan, Baptistu Johana thih thu Isuan a hriatin Lawngin thlaler hmunah a kal hrang a, mipuiten khua atangte chuan kea kalin an zui a ni. Ani chuan mipui nasa takte chu a hmu a, a khawngaih em em a, chungho ei tur ngaihtuaha zirtirte an buai a, engmah an tithei si lo chu a va manganthlak em! Zirtirte mangang chuan Isua hnenah an ei turte lei tura kal botir turin an rawn sawi ta ngawt mai a, mahse Isuan engtin nge a lo tih? “An kal bo a ngai lo ve, nangmahnin ei tur pe rawh u,” a lo ti ta hlauh mai a. Mipui 5,000 zet ei tur pek chu thlaler hmunah si a va harsa dawn teh reng em! Zirtirte chuan engtin nge an ngaih ang le? Isuan thil tihtur harsate min kawhhmuh fo reng thin a ni.

Engvangin nge Kan Lalpa Isua hian kan tihtheih loh turte titura min tih thin mai ni le?? Kan chak lohnate inhria a, Engkimtitheia hnenah kan harsatnate thlenna chang kan hriat nan a ni.

Zirtirte chuan, “Hetah chhangper panga leh Sangha pahnih chauh kan nei a ni,” an ti a. Johana ziak kan en chuan, Philipa hnenah, “Hengho ei tur chhang khawi ata nge kan lei ang?” tiin Isuan a zawt a. (Chung thu chu amah fiah nan a sawi a ni, a tihtur chu Amahin a hre reng si a). Andria chuan a hnenah, “Chhangper panga leh Sangha pahnih nei mipa naupang pakhat hetah a awm; nimahsela, mi heng zozai zingah hian chung chu eng tham nge ni ang?” a ti a. Isuan, “Ka hnenah han la rawh u,” a ti ta a. He thuah hian thu mawi tak pahnih a awm. Chung chu “Eng tham nge ni ang?” tih leh “Ka hnenah han la rawh u” tih te hi an ni.

Kan theihnain a tihtheih lohzia in hre tak meuh va, “heng thil titur hian ka theihna leh ka chaknate hi, “eng tham nge ni ang?” rilru tak meuh va kan tih hian kan Pa chuan, “Ka hnenah han la rawh u.” a ti thin a ni. Aw! Kan Pa Pathian leh kan Lalpa Isua hnena kan chak lohzia inhriaa kan mamawh apiang thlen hi a hlutzia hria ila ka va duh em! Mipui 5,000 zet tan chhangper 5 leh Sangha 2 chu eng tham mah a ni lo angin, kan chakna hi Setana, he khawvel Pathian hneh nan te, khawvel duhna leh hipna nasa tak hneh nante leh nun hlui Adama hmasa ata kan neih hneh nante chuan eng tham nge ni ang? Eng tham mah a ni lo ve. Mahse kan tana Kraws-a thi a, hnehna ropui nena tho leh a, Thiltihtheihna ding lama awm taa khan, “Ka hnenah han la rawh u.” min ti a ni. He Krista thu hi awiin ka manganna tam tak leh harsatna tam takte chu a hnenah ka kalpui tawh thin a, min lo chhawk thin a ni. Aw! Kristaa ka unaute hian, in harsatna zawng zawng chu Krista hnenah a thu ang ngei chuan kalpui ve turin ka sawm che u a ni, a hnar bik lo vang che u.

Chhangper 5 leh Sangha 2 Isua hnena an pek khan engtin nge lo ni ta le? “Abba” tiin van lam enin mal a sawm a, a phel a, zirtirte hnenah a pe a. Aw! A hnena I rawn lak chu hnial lovin a lo la ang. “Ka hnenah han la rawh u.” a tih avangin a hnena I rawn pek chu lo lak sak che a hnial ngai lo vang. Harsatna leh buaina leh mangannate chu a lak bo sak ang che, nangmah leh mi dangte tana malsawmna ropui takah a chantir ang. Kan harsatna zawng zawng hi a hnenah I kalpui zel ang u, tichuan engthawlnaah kan cheng thei ang.

Kan thu tawpnaah chuan, “An kal bo a ngai lo ve, nangmahnin ei tur pe rawh u,” a tihna chhan hi thuk tak a awm a ni. Isuan amah zuitute hrehawm taka awm tura kal botir hi a duh lo chauh ni lovin, a ti thei lo a ni, “An kal bo a ngai lo ve!” Aw! A va mawi em! Kan sawi nawn leh teh ang. “An kal bo a ngai lo ve!” Engvang mahin Krista hnen ata I kal bo a ngai lo ve! Rethei leh tlakchhamna avanga I kal bo a ngai lo ve. Hausakna avanga I kal bo pawh a ngai lo ve. I mamawh tihsak turin Isuan vawiin ni thlengin Zirtirtute leh Kohhran enkawltute a nei reng a ni. In kal bo ai chuan chungho hnenah chuan, “Nangmahnin ei tur pe rawh u,” a ti mai ang. Chungho chuan an pek theih loh che u chuan, “Ka hnenah han la rawh,” a ti mai ang.

Aw! Kohhran rawngbawltute hian kan kohhran enkawlte puarna leh thanna tura kan chakna hi, “Heng I mite ei tur leh puar nan ka chakna hi eng tham nge ni ang, Lalpa?” thinlung takin kan ti thin em aw? Chutianga kan tih chuan kan chakna te tak te chu Lalpan, “Ka hnenah han la rawh,” a ti ang a, a hnena kan lak veleh chhangper leh Sangha a laa lawm thu a sawi a mal a sawma a tipung angin lawm thu a sawi ang a, a tipung ve anga kohhran riltam sang tam tak an lo tlai hnuah pawh a bang I la nei fo vang.
Kan rilruah Krista sawmna aw nem leh mawi ber, “Ka hnenah han la rawh u,” tih hi lo ri reng fo sela ka va duh em!.

Lalpan a thu chhiartu zawng zawngte tan malsawm rawh se. Amen.

Similar Posts:

Recent Posts:

18 Responses to ““Ka hnenah han la rawh u” – Krista sawmna aw mawi chu(Sunday Pual)”

  1. 1
    Hotunu_pasal Says:

    Sunday tuka sermon tha tak mai chhiar tur awm thin hi ava lawmawm thin em! A awm loh tum hian ka hrilh hai thei khawp mai. Paws tupa, Pathianin malsawm zel che sela, han ziak zel rawh.
    Ka 1 em aw.

    Report this comment

  2. 2
    PKfanai Says:

    Hotunu pasal chu tho zing hle mai. Good morning all.

    Report this comment

  3. 3
    Art-a Says:

    A ropui thin hle mai (Y)

    Post pakhat pawh kan puitlin theih loh laia, thu tha tak tak min rawn hlui thin hi chu tluk loh rim in nam thin e. Bei hram hram zel ang u.. kan sokar ve trep tawh e.

    Report this comment

  4. 4
    chhana Says:

    A ropui e.

    Report this comment

  5. 5
    Dr John Says:

    (Y) A Tha leh hle mai. Pu PK-a nge nge. Tunlai chu keima tawkah ka buai lutuk a, Misual pawh ka tlawh tha hman lova, Post pawh ka comment hman lo, ka inthiam lo hle mai.

    A dik khawp mai. Pathian-ah, Lal Isua-ah Bul tan ila, engkim hi a lo fuh a ni. Kan harsatna te, manganna te, lungngaihna te, Malsawmna te pawh hi Lal Isua hnenah thlen hmasa zel ila, mahni tan leh midang tan hian Malsawmna a lo ni nge nge thin.

    Hemi rual hian, Pathian (Lal Isua) No.1-a kan dah a, kan ngaih pawimawh chiah hian, Pathianin a Aiawh turin Rawngbawlna leh chanvo (responsibility) pawimawh lutuk min pe-in, “Nangmahni’n ei tur pe rawh u” tih hian a zui ta thin a ni.

    Pathian Ni Hman Nuam Vek Ule..

    Report this comment

  6. 6
    Jaira Pa Says:

    I lo thlawh fuh leh hle mai.

    Report this comment

  7. 7
    blackmagicwoman Says:

    Chhiar a nuamin min ti thlamuang hle mai. Sunday hi chuan Pu PK-s te ho ziak chhiar hope hian misual ka lut ngei ngei (Y)

    Report this comment

  8. 8
    Awmtea Leo Khiangte Says:

    A tha dap dap e (Y)

    Report this comment

  9. 9
    Mx Says:

    Mut tui nan chhiar ang (Y)

    Report this comment

  10. 10
    kawlhawk Says:

    a va han tha lehpek em! pkfanai nge²…

    Report this comment

  11. 11
    Hotunu_pasal Says:

    Ka harh hma si a, kan chhiar chhuah leh dap chu le. A ngaihnawm dan a ngai reng.
    Ka chakna leh theihnate a hnenah ka pe lût phal thin lo. Chuvangin a pung thei lo. Min ti lawm hle mai.

    Report this comment

  12. 12
    saint sammoo Says:

    Ka tih ve ngai reng reng loh..Krismas drama ziak a, buaipui zui tura mawhphurhna pek ka ni… ka tih ngai loh a nih avangin ka huphurh hle mai.. mahse, Ka hnenah han la rawh u.. titu hnenah pek nachang ka lo hriat loh vang a ni e.. pe hmak ang…haha..

    Report this comment

  13. 13
    PKfanai Says:

    Pu Saate, ani ngawt mai tiraw. HnamSakhua leh Atheist ho post leh comment khirh ve ang reng tak tak ka chhan dawn te hian, ka hriatna tlem zia leh tawk loh zia hi ka hre chiang thin khawp mai a. Pathian hnena finna leh hriatthiamna dil hmasa lovin ka type ngai lo. Post ka siam dawn pawhin Pathian hnenah ka dil hmasa thin a, comment te tam thin lo mah sela, mal a sawm ngei pawh ka ring thin.

    Report this comment

  14. 14
    Awmtea Leo Khiangte Says:

    Pu PK, i thil han tih dan vel chu ka chhuang hle mai che. Entawn tlak tak i ni.

    Report this comment

  15. 15
    Jacka Pi Says:

    (Y)

    Report this comment

  16. 16
    delis Says:

    Sunday sermon in ron ti thin hi chu a ropui khop mai keini a changa sunday a hna kal ngai inkhom hman lo tan hian a va tangkai tak em. Tihian rohlu kan chhar ani mai. Pu pk (Y)

    Report this comment

  17. 17
    Chhuaklinga Says:

    Good post (Y)

    Tunlai chu hna lamah leh chhungkaw thilah ka buai ve deuh a, Post te hi chhiar thin mah ila comment pawh ka comment mumal hman lo. (&)

    Report this comment

  18. 18
    bbney Says:

    Good post

    Report this comment

Leave a Reply

You must be logged in to post a comment.