Isua Birthday…..

November 30th, 2012 11:30 am by Mr. Mister

Isua piancham-ah hian hlim taka lawm tur nge kan nih ngui takin? Khawvel tlantu lo piang meuh chu a lawmawm a ni. Isua thih hnua mihringte hi chu lawm hle tur kan ni a….mahse…. Isua pian vang hian mi thenkhat tan chuan lawmna tur pakhatmah a awm lo. Thinrimna leh tawrhna thil a ni. Thuthlunghlui atangin a tharah min kai tir a. Hei hi mihring tan thu lawmawm nge anchhia?

Bible thuziak keuhawngtu zingah rul tawng thei a rawn inlar kher kher hi chu an ti fuh lo deuhin ka hria. A ‘fairy tale’ deuh tlat. Bih chian chuan rul tawng thei piah lamah hian thuawih lohna a rawn lang leh a. Mihringte Pathian mita kan sual chhan hi a ho tlat. Snow White leh Rapunzel thawnthu a ang tlat a ni. Bible a dawt sawi hmasa ber pawh hi kan rinhlelh miah loh a lo ni daih bawk a. Nakinah ‘thawnthu’ hi chu kan la chhiar zel ang.

Thei an ei hma khan Adama leh Evi khan thil dik leh dik lo, zahna chang, thil tha lo, sualna tih kawngah engmah hriat an la nei lova. Rilru thianghlim tak puin Pathian nen an inpawl thin a nih kha. Pathianin thei ei loh tur a tih pawh khan an ei chuan thil tha lo leh sual a ni tih pawh an la hre lovang. Rul tawngtheiin a rawn thlem a, thlemna pawh an la tawng ngai lova, thlem an nih pawh an hriat hmel loh.

Rul tawngthei kha tunge a nih Pathianin a lo hrilh lawk bawk si lo nen. Thiam takin a rawn thlem a, an ni chhia leh tha hriatna pawh la nei lo tan chuan do zawh a har phian mai thei a ni. Phalloh tih chu an hria, mahse phal loh tih khan sualna a ni em tih pawh hre thei an la ni lova, an ei hnu chauhah chhia leh tha hriatna an neih vangin. Tin, mipa leh hmeichhia in pawl dan pawh an hre kher lovang. Pathian khan a sapatal tir tawp niin a lang. Tisachakna pawh sual ang hiala kan zir avangin engmah an la hre kher lo mai thei. Mahse mipa leh hmeichhia a siam tlat bawk si. Thlem thluk theih ngei ngei turin a siam lui ni pawn a lang.

Rul tawngthei chuan thiam takin a thlem a. An ni chuan thei rah an ei chuan an ei ni la lain an thih tur thu an sawi a. A tawpah chuan an ei ta nge nge a. Ngai teh, an thi leh ta si lo!!! Pathian khan thihna a ti si a mahse an thi tlat lo. Thenkhat chuan Pathian ngaihah chuan an thi an ti thin, mahse Pathian khan “Ka hmuhdan/thinlungah mitthi ang in ni ang” a ti bawk si lo. Thihna a sawi khan taksa thihna ni awm takin a sawi vel bawk si a. He thu ringawtah pawh hian Bible fiah lohna a intan a ni.
Lehlamah Pathian tluk deuh thawa thil ti thei, rul tawngtheiin a thlem a, an ni lah thiltih-theihna engmah nei lo, rilru thianghlim pu, sualna la hre ngai lo. A ‘fair’ lo ang reng hle a ni. Nang, i hmangaih tak i fapa/fanu la naupang tak chu misual thlem theihin i dah phal kher lovang. I dah a nih chuan misual, mimawl, rilru chhia leh kawi tak i ni ngei ang. Tin, thlem an ni dawn tih hrelawk phei la chuan i thlah thlam lo chiang viau ang. Chuvangin Eden huana min sawngbawl dan atang hian duhthlan theihna min pek hi min hrem theihna tur kawng a insiamna mai mai a ni lo maw? (nakina mahni a inthiam theihnan).

Thuthlungthara kal daih ang. A ngaihnawm loh e mai!!
Nula virgin ngatin fapa an hring a. Sakhaw dang thu-hla chu ni se kan nuih a za ngawt ang. He piancham ni hi nu leh pa tam tak tan chuan thihna leh chhiatna chhe ber thlenna ni a ni daih zawk a. Lal Heroda khan Lal tur lo piang chuan a lalna a chuhpui a hlauh vangin nausen kum 2 achin hnuailam zawng zawng a rawt hlum a. Khawvel tlantu lo piang ve lem si hian thihnain bul a rawn tan nghal a ni. I fate kha thi zingah tel ve ta se Isua lo pian hi chu anchhia i lawh ve ngei ang. A phunnawi nasa ber ber i ni hial ang.

Tichuan Isua chuan thu hrilin a hun a hmang a. Mihring a nih ve tho vangin tleirawl chhuahte a nei ve vek ngei ang. Hetih hun lai hi hriattur a tlem hle mai. Tilpawr aw te leh tisa-chaknate pawh a paltlang ngei ang. A tleirawl lai vel hian tawh duhawm lo tak a tawk nge hriat a ni lova. Mahse, tisachakna hi a hmu hniam hle a ni. Pathian angin a lo kal loh avangin mihring pangngai ang bawkin a rilru leh chezia pawh a ni ve ang. Engtinnge a tleirawl lai hun a hman dan tak hi hriat a chakawm a ni. Insum thei tak leh thilsual ti ngai lo a nih theih dante hre thei I la chuan zirtur tha tak tak kan hmu nual mai thei a, thangthar zelte tan pawh an tleirawl thisen chak laia nunkawng hruaitu a ni thei mahna.

Isua lo kal dan leh lo kal chhan hi thil awmze nei lo a ang riau mai a. A chhan chu, mihringte sualna tlan turin lo kal ni mahse amah hi Pathian a ni miau a, chu Pathian laka sualna chu a rawn tlan leh lawi si a. Entirnan, fapa, fahrah khawi naupang enkawlna atanga i khawngaih vanga i chhanchhuah chu a lo sual ta hle mai a. i thu awih lovin i lakah a hel ta a. A tlanbo ta daih a. Sual hle mahse i hmangaih miau avangin i hnena lo let turin i duh ngawih ngawih a ni.

I hmangaih tak tak a, lo let se i ti tak tak anih chuan a sualna kha i duh chuan i ngaidam mai tur a ni. ‘Ka ngaidam a che’ ti la a tawk hle ang. Mahse mi mak dang lam tak i nih avangin i fapa ngaidam tur chuan nangmah ngei khan mahni leh mahni nasa taka i in nghaisak tir kher ngai i ti tlat a. Awmzia a nei lo hlein i hre ve em? Isua chungchangah phei hi chuan engkim siamtu leh ti thei ni siin thisen leh thihna a phut kher a ni.

Zaidam leh nun nem takin Isua chu a lo kal a. Pathianin mi zawng zawng, hnam eng pawh, mizia eng pawh, thlahtu tu pawh, ram zawng zawng, hausa leh rethei, vun ngo leh hang…mi zawng zawng mai baka zawng zawng leh zual te chu a hmangaih vek thu leh an thih hnu ah pawh chatuana damna a pek tur thu a rawn au pui a. Thuthlunghluia Pathian phuba lak ching leh nunna hlut vak lo lakah kha chuan dang tak a ni.

Hetia hmangaihna thu ropui a rawn thlen rual hian Thuthlunghlui huna awm ngai lo a rawn zep tel talh a. Chu chu, thih hnua hremna leh meidil an ni. Thuthlunghlui ah kha chuan thih hnu leh zela inhrem sawi tur a awm lo. A tharah erawh hi chuan Pathian mize dang daih, rilru inletling dik tak kan hmu a. Hei pawh hi Eden huana a “trick” hai ang tho kha a hmang leh a ang hle a ni. Thih hnuah chatuana mihringte a hrem theih nan, duhthlan tur dang awm lova duhthlanna min pe lui ang tak a ni.

Chuvang chuan Isua lo pian atanga Thuthlungthar kan dawn avang hian lawm tur kan ni chiah em?
Krismas hun chuan mahni nuam tih angin, midang tana harsatna siam lovin hmang i la. Kan zawm theih ngai loh sakhaw zirtirna, chhum lo chat lova mipui chunga thu nei thin leh zirtirtu mahse kan moral tlak chhiat tawh zia avanga a hlawhchhamna lang reng mai mai zui lovin kan hlim theih dan theuhin kan hmang dawn nia. He ni chauh ni lovin, nitin kumtin atan.

Similar Posts:

Recent Posts:

17 Responses to “Isua Birthday…..”

  1. 1
    ZerO Says:

    Hlim 1st Over dawn…..

    Report this comment

  2. 2
    shylo Says:

    Thlir dan hrang hrang hi awm ve chawk a nia, a lo pian chhanah hian i lawm mai ang u hmiang.

    Report this comment

  3. 3
    James Bond Says:

    Season of goodwill ah hian “i talhtum leh i tiang hmangin i in ti thunei hler hlur” tih tur hi an tam thin asin.

    Mr. Mister chu i chhut thiam kher mai. Thudang alai chuan Isua kha Christmas ni kan tih ah a piang lo. Northern Hemisphere a nipui laiin a piang.

    Report this comment

  4. 4
    Chhurbura Says:

    A Posttupa chu a ril in afing hle mai ka ti.. Mahse kei zawng ka thiamna leh hriatna te hi Amah(Pathian) min hlat tir tu ni tr khawp a fing a ni ang tih hi ka hlau ani..
    Posttupa ka lo tawngtrai sak dawn che nia.

    Report this comment

  5. 5
    thlanrawkpa Says:

    Ka hnial vak thin che a, mahse tun tum chu ka peih tawh lo. Iti tha khawp mai, mahse Thuthlung hlui ah hian Vanram tih hi, a inziak a, chuan a background nen i hriatthiam a ngai ang (2 Lalte 2:11, pakhat k rawn dah lang e) tah hian a awm a, mi inzir peih tak ini bawk a, i hrethiam leh vat ang.
    Hremhmun chungchang pawh Thutlung hlui ah pawh khan vawi 31 lai sawi ani tawh bawk.

    Engvangin nge a ngaihdam mai loh, Mihring anga awmin sawisak a rawn tuar kher?

    Internet ah ava han tam tehreng em! hei pawh i zir thiam leh vat ang.

    Mizoram ah kalsual an tam viau chhan chu, Bible hi an hriathiam danin an zir thin, a background te an zir lo thin.

    Miin Phd neih nan lawih a an hman hi thil awl ani lo phawt mai a. Nangpawh khawi collge ah emaw han in ziak lut ve teh. I buai rei ka ring lo. :-) :-$

    Report this comment

  6. 6
    Dr Mahminga Sailo Says:

    Keini tawnah hi chuan, tunlai chu ‘a nih duh hmel mang e..’ tih tur hi a tam sawt riau mai. . :-D

    Duhthlanna nei thiam turin a chhia leh a tha hriatna min pe bawk a, a tha e.. :-)

    Report this comment

  7. 7
    likone Says:

    a ngaihnawm khawp mai, Pathian khawvel leh kan chenna khawvel hi inzawmna nei si mahse khawvel dang an ni bawk si. Kan thlir dan leh Pathian thlir dan a dang bawk si mahse inzawmna nei bawk si..hriatthiam har si mahse thil awm ni ngei a ni bawk si..Pathian in RINNA nei turin min tih kha.Pathian laka kan tet zia te ..Kan hriat tlem zia hi a lang tulh tulh dawn..

    Report this comment

  8. 8
    likone Says:

    a ngaihnawm khawp mai, Pathian khawvel leh kan chenna khawvel hi inzawmna nei si mahse khawvel dang an ni bawk si. Kan thlir dan leh Pathian thlir dan a dang bawk si mahse inzawmna nei bawk si..hriatthiam har si mahse thil awm ni ngei a ni bawk si..Pathian in RINNA nei turin min tih kha.kei zawng Pathian laka kan tet zia te ..Kan hriat tlem zia te hi a lang tulh tulh in ka htia..

    Report this comment

  9. 9
    Awmtea Leo Khiangte Says:

    A ngaihnawm zawnga chhiar chi niin ka ngai. Ril awm taka lang si hian ngaihdan pawnlang tak a ang ka ti

    Report this comment

  10. 10
    PKfanai Says:

    Point i ngah ang reng si a, heta chhang lo hian Post hran Isua birthday-II ka rawn siam ve ang e. ;-(

    Report this comment

  11. 11
    Mr. Mister Says:

    Lo chhiartute zarah ka chapo mai dawn a lawm. Lo chhiar ringawt lovin in rawn comment leh zel duh a ka va lawm em!!!
    In zavaia chungah lawmthu ka sawi a ni.
    Bible thu hi ngaihdan hrang hrang siam theihna a tam hle mai a, khawi pawl (kohhran) ber hi nge dik tih hriattheihna kan nei si lo.
    thlanrawkpa (H) sawi ang hian a background zir ngai kher ani hi a mak ka tia. Theologian tam takin an bei viau tawh a mahse dik ber erawh an la thlang thei lo chu a nia. Pathian lehkhabu siam ve meuh si chu mi mawl ber tan pawh hriatthiam awlsam tak ni mai awm…te ka ti mai mai.
    Kum 100 kalta hun lai kha chuan Bible hi a awihawm leh zual viau a rinawm. Tun hunah hi chuan hei aia fiah deuh zawk kan mamawh tawh a ni. Second Edition rawn siam vat se a lawmawm ngawt ang.

    Report this comment

  12. 12
    Mr. Mister Says:

    Isua lo pian hun hi a chiang lo hle a ni. A then chuan nipui lai angin an sawi a hei hi ka hre ta zauh zauh mai. A hrechiang deuh kan awm chuan han ti chiang teh u.

    Report this comment

  13. 13
    likone Says:

    i ti dik chiah .,(khawi pawl (kohhran) ber hi nge dik tih hriattheihna kan nei si lo…)sakhua na leh pawl hmanga rin hi a fuh lo takzet a nia..Pathian hi rin ber tur chu a ni..chutiang bawk in Bible pawh Pathian a awm ngei a ni tih ti chiang tu a ni, Biak chi a ni chuang law. :-D :-)

    Report this comment

  14. 14
    Hnam sakhua Says:

    Isua pian hun lai kha Bible ziak atanga han chhut chuan thlasik lai a ni lo reng reng ang tih a hriat theih bawk. Kan ram, Mizoramah hian thlasik lai hi a vawh lai chu a ni ve a, mahse chuti lutukin Israel (Palestina) ram te angin a vawt ve lo. Hmun thenkhatah chuan vur te pawh a tla ve a, ruah pawh a sur ve zeuh zeuh a ni. Palestina ramah erawh chuan nipui laiin a lum em em a, thlaler hmun phei chu a satin a sa huam thin a. thlasikah a vawt leh em em a,vur te a tla chiam a; kum khat chhunga hunpui dangah ruah sur si loin thlasikah ruah a sur thin a, a vawt nasa em em a ni an ti thin. Mizo fate ngei pawh hian Israel ram chu an fang chiar dup tawh a, a hre chiang an tam ta hle. Chutiang chu thil awmzia a nih si avangin Luka chuan, “Tin chu mi ram vekah chuan beram vengtute an awm a; zanah an beramho an veng a, phulah an riah chilh a,” tiin a sawi a ni. Khang beram vengtute kha mirethei te te, inhlawhfa mai an ni a, an beram vente pawh kha inthawi nana hlan tur chi bik niin an sawi a ni. Chutiang beram vengtu inhlawhfa, rethei te te, puanthuah pawh nei tha hlei lote khan thlasik khaw vawt tak, ruah leh vur tla karah an beramte chu phulah zawng an riah chilh lek lo ang tih a lang reng a ni. Chuvangin Isua pian hun chu thlasik lai ni loin, phula an riah chilh mai mai theih danah khaw lum hun lai a ni tih a chiang sa reng a ni.
    Kan chenna leia lo piang mihring Isua kha mihring a ni a, Pathian emaw tih tlat tur a ni hek lo. Pathian thu a rawn tlangaupui kan tih chuan a dik e. Engkim siamtu Pathian emaw tih erawh chu a dik lo hulhual a ni.

    Report this comment

  15. 15
    Vetehmial Says:

    Mifing ten an finna a Lalpa an chhût in..thutak lakah an peng bo zo ta a..

    Thuhrilh atthlak hmanga chhandam kan ni.

    Report this comment

  16. 16
    caribou Says:

    A posttupa hi Christian (Kristian) a ni em le?

    Report this comment

  17. 17
    duata pa Says:

    Tlu fo thin in, chaklo tak chungin, beidawng rum rum a, rinhlelh chang awm thin chung pawhin “RINNA” a a lam pan ka la thlang fo e.

    Report this comment