Ngaihtuah hmasa phawt teh..!!!

November 29th, 2012 9:04 am by Chemtatrawta

1. ” Kawr tha deuh leh mawihnai deuh rawn ha ta che” i tih hma khan a leina tur pawisa a neih lohzia kha ngaihtuah hmasa phawt teh.

2. ” Engati nge vawiin hnatlang i rawn kal loh, i lokal kan beisei tehreng che nen” i tih hma khan, eitur hlawhchhuak tura mi tlawmngai ten inhlawhfakna an siamsak avanga rawn hnatlang thei lo anihzia kha ngaihtuah hmasa phawt teh.

3. “ I va cher ve a, i vun a chuar vat anga sin, ei leh in fimkhur deuh teh” i tih hma khan ei leh in puar khawp aneih lohzia ngaihtuah hmasa phawt teh.

4. “ NREGA chu ni 5 kan thawk ang a, ni 2 hlawh kan donate mai dawn nia” an tih changa rang taka i lo phar thluk hma khan ni 2 hlawh lek pawh thlahlel ngawih ngawih chhungkua an awm tih ngaihtuah hmasa phawt teh.

5. “Vawiin tlai engnge in hmeh dawn?” tia in chawhmeh tur hre rana i zawh hma khan chawhmeh mumal an neih lohzia ngaihtuah hmasa phawt teh.

6. Vawksa hrisellohzia leh a aia hrisel dang i hrilh zuah zuah hma khan vawksa leina tur pawh a neihloh thinzia ngaihtuah hmasa phawt teh.

7. “Tunkum Krismas bazar tawtzia leh thil a to zia chu” tia i fate thawmhnaw i leisak i entir lai khan a fate Krismas kawrmawi a lei theihloh avang leh a fate rualawt lutuk tur a huphurh avanga hrehawm a tihzia ngaihtuah hmasa phawt teh.

8. “Krismas leh kumthar ruai engati nge in rawn theh lova, in dam lo em ni?” tia zawhna i siam hmain Krismas leh Kumthar atana kohhran sum tuk an pek theih loh avanga an rawn tel ngam lo a ni tih ngaihtuah hmasa phawt teh.

9. ” Bawiha pa/ Ka pa / A pa, Krismas ah chu chu ka duh aw, hei hi min leisak loh chuan..” tia pa ber i vau hma khan a hlawhin a tlinlohzia leh i duh ang i neih theihna tur anih chuan mirethei chanai a eiruk a ngai tih ngaihtuah hmasa phawt teh.

10. ” Ka nu/ka pa/ ka unau/ka pi/ ka pu tel lova Krismas ka hmang tur hi ka va huphurh em!! ” tia i sawi hma khan i chenna atanga hnai teah khan “Ka nu/ka pa/ ka u/ ka nau” tia koh tur nei lo khawpa mi chanhai leh riangvai, mahni thisen zawmpui lohvina an chawilen, fahrah dangte bak “ka unaute” tia lam tur nei lo tam tak an awm tih ngaihtuah hmasa phawt teh.

Krismas leh kumthar, Mizote hunpui ber kan lo thleng leh dawn ta. Van lal berin engkim chana, a thilsiam mihringa changa, lei leh van neituin thingremsiamtu fapa ni a, chatuan nun i neih theihna tura hrehawm tinreng tuara a neih zawng zawng chana a rawn kal hi hrereng la, he Krismas, a rawn kal champhaphak ah hian midangte tan kawng khat talin malsawmna ni ve teh le..!!!

Similar Posts:

Recent Posts:

13 Responses to “Ngaihtuah hmasa phawt teh..!!!”

  1. 1
    lyze Says:

    (Y)

    Report this comment

  2. 2
    Dr Mahminga Sailo Says:

    (Y)

    Report this comment

  3. 3
    Phivawk Says:

    Tha thuai thuai hle mai (Y)

    Report this comment

  4. 4
    hlatekhua Says:

    A tha khawp mai. Tam tak chu sawi tur ngaihtuah hmasa miah loa rilrua lo lang apiang sawi chhuak mai thin kan ni. Sim a tha. ‘I va thau ve’, ‘i va tar tawh ve’ intih mai mai te hi a atthlak dan a ril raih raih teh a nia.

    Report this comment

  5. 5
    PKfanai Says:

    I thu post tawh zingah tha ka tih ber ani hial awm mang e. Tha khawp mai. (Y)

    Report this comment

  6. 6
    Sandman Says:

    (Y)

    Report this comment

  7. 7
    zonumay Says:

    A tha ka ti hle mai,engtin nge hetiang hi i ngaihtuah chhuah thiam ka ti,Pa namai lo tak i ni e.tawngkam hi fimkhur angai thin reng ani,mi rilru tina tu nih hi atha lo fo,rilru na hi a dam leh har si a

    Report this comment

  8. 8
    keimah Says:

    A va dik em! (Y)

    Report this comment

  9. 9
    Chhuaklinga Says:

    Hma ka sawn leh hret e. (Y)

    Mia pawh a ngawih reng chuan mifinga chhiar a ni. (mifing ngawi reng erawh chu a finna chhawr tur a tlem deuh turah ka ngai. :P )

    tren tren

    Report this comment

  10. 10
    sheldon Says:

    Tunlai hun ka nei lo lutuk a, heng ang post te hi uluk taka han sawi zui a chakawm nen maw!

    Report this comment

  11. 11
    MamiPa Says:

    van tha thuai thuai ve le save keuh teh ang (Y)

    Report this comment

  12. 12
    Awmtea Leo Khiangte Says:

    Tha reuh lutuk (Y)

    Report this comment

  13. 13
    Ngaihtuah hmasa phawt teh..!!! | mi(sual).com | Köpa hemsida av webbyrå Says:

    [...] the rest here: Ngaihtuah hmasa phawt teh..!!! | mi(sual).com Dela det här:FacebookTwitterGoogle +1Webbyråer StockholmMer om att köpa [...]

    Report this comment