Lal Isua Tuarna – Part 2 {Sunday Pual}

November 18th, 2012 9:11 am by Dr John

Thuhmahruai
Lal Isua Tuarna – Part 1 ah khan, Taksa-a a tuarna a tlangpuiin kan sawi thuak tawh a. Vawiin chu chipchiar deuh hlekin kan sawi ang. Rom mite hian Kros-a mi an khenbeh tur chu a hma ni aţangin an sawisa phawt ţhin a. An khenbeh dawn ni chuan khenbehna tur Kros an siam chu kawngtluanin an putttir a. An khenbehna tur hmun an thlen chuan leia kros an mut chungah chuan an khenbeh tur chu zangthalin an muttir a, a kutphah-ah emaw, a banpuam-ah emaw leh a kephah-ah thirkilhna-in an kilh ta ţhin a ni.

Hemi hnu hian khur (Kros inphunna tur) an laih-ah chuan Kros chu tungdingin an phunna tur khurah chuan dimna tel miah lovin an thlak chawrh ţhin a, an taksa rihna in a uai avangin an tuar nâ êm êm ţhin. An thih hma loh chutah chuan an dah ta ţhin a. Thi hma deuh se tih an duh emaw, nâ tuar rei deuh tura an duh te chu an ngalruh leh banruh te an vuak tliah sak ţhin. Vawiinah chuan, Vuak a tawrh aţangin kan ţan ang a, Lal Isua tuarna râpthlak ber Kros-a khenbehna hi kan sawi uar deuh dawn a ni.

1. Vuakna (Grk. phragelloó)
“Vua or Vuakna” (Mark 15:15) tih hi a ţawngbul lamah chuan Greek phragelloó hman a ni a. Hei hian “dân remtihna anga vuakna” a huam a. In-vuakna satliah hi a ni mai lo tih hriat a ţha awm e. Lal Isua hunlai hian Vuakna hi taksa sawisakna nasa tak zinga mi a ni a. Kutphaha vawi 2/1 ben mai a ni lova. Mi an Vuakna tur hruiah khan thil hriam te, thir te, leh darthlalang keh them te an ţawn bet a. An vuak tur hnung chu an hlim a, patlingin zak kau meuhvin, nasa takin an vaw ta ţhin a ni.

An Vuakna hian hliam nasa tak a siam ţhin a, thisen pawh a chhuak nasa ţhin a, nasa takin an lo chauh phah ţhin. Ţhenkhat phei chuan hetiang vuakna hi tuar zo lovin an thih phah ţhin. Paula pawhin vawi 40 tling lo vawi 5 lai a tuar thu a sawi a (2 Kor. 11:24). Mihring nunna-in a tuar theih tawk awm chhutin, Juda dânah chuan vawi 40 tling lo (vawi 39 tihna niin an ngai) ţumkhatah vuak ţhin tur tih dân an nei. Lal Isua hi darkar 2/3 dan lekah Sanhedrin leh Pilata sipaiten an vuak thu kan hmu a, vuakna a tuar ringawt pawh hi namen lo tak a ni.

2. Kros Rit Tak A Pu
Chutianga sawisakna nasa chu a tuar tlang hnu-in, Kros rit tak (Kg 30-45 vela rit nia ngaih a ni) chu pu-in Kalvari tlâng lam panin an hruai leh ta a. Kawngtluanin nuihza siam nan an hmang zel bawk a. Zankhuaa lungngaihna nasa tak nena hun a hman a, sawisakna chitin renga sawisak zankhua a nih hnu chuan, a tukah chau êm êm leh lungngai êm êm chungin Kros rit tak an puttir zui ta a ni. A lu-a hling lukhum avanga hliam leh vuakna avanga a taksa thi hnuang leh thler hniang hnuang te, an hnekna avanga a hmui leh hmai leh hnar duk churh leh vung cherh churh te chuan a tichau hle ngei ang tih a hriat theih a. A Kros put zo lova, a tlukpui ţhin pawh hi amah Lal Isua chak loh ve hrim hrim vang emaw, Kros rit lutuk vang emaw ni lovin, a thil tuar hi a nasat êm avang a ni zawk a, a la pu thei cheu pawh hi thil mak tak a ni zawk a ni.

Lal Isua’n a Kros put chu a zawh tak ngang loh avangin, Kurini khua Simon chu an man a, Lal Isua Kros put-pui turin “an ti lui” (forced him to carry the cross) ta hial a ni. Simon hi Jerusalem-a Kalhlen kut chhim tura lo kal ve, a awmna ram lama let leh lam ni ngeia rin a ni (Mark 15:21, Luke 23:26). Ziaktu ţhenkhat chuan, ram (fields) lam aţanga a lo chhuah dan aţang hian, Simona hian Lal Isua hi a ngaisang a, ţanpui leh chhawk a duh êm êm a, a rukin a lo zui ru a, vawi tam a tlukpui hnu-ah a en thei ta ngang lova amah zawk hi a lo in-volunteer zawk a ni e, an ti. Bible ziak chin hi i pawm hahdam rih mai ang u.

3. Kros-ah Khenbeh A Ni
Kalvari tlâng an thlen chuan, Kros-ah dimna tel miah lovin an khengbet ta a. Kros-a mi an khenbeh-te hi an tuar nasa-in, hrehawm an ti êm êm ţhin a. Kros-a mi an khenbeh hian, dimna nei miah lovin an kut pahnih-ah an kilh (thir kilhna-in) a, an ke pahnihah an kilh bawk a. Rilţam leh tuihalin an thih thlengin an dah ţhin. Ni engemawti chhung chu thi mai thei lovin, nâ tuar reng rengin an awm a. An taksaa thisen chhuak leh pem-te chu thovin an rawn bawm a, rannungten an rawn sawisa ţhin bawk a. An ban lehlam lehlam chu kilhbeh tlat an nih avangin an invêng thei si lo. Engmah ti thei lovin nâ leh hrehawm hre vek siin an awm reng ţhin a. Taksaa tuarna hrehawm ber chi zawng zawng chu tuar kimin, zawiin zawiin  an lo chau riai riai a, rilţam leh tuihalin ni engemaw zat hnuah an thi ta ţhin a ni.

Josephus (Author of The Jewish War & Antiquities) khan khenbehna hmanga inhremna leh intihhlumna hi hremna zinga râpthlak ber leh nunrawnthlak ber leh nun-chhiatthlak ber niin a sawi a. A chhan chu, a nâ thei ang ber leh a râpthlak thei ang ber-a hrem an duh avang leh zawi zawiin thi se tih an duh avangin, an taksaa peng pawimawh-te chu an sawisa ngai lova, thisen pawh chhuak tam lo turin an fimkhur a. Hengte avang hian ni tam tak nâ tuar leh thi thei lovin an awm ţhin a. A then chu nâ tuar rei lutuk avanga thawhchham-in an thi thin. A chang chuan miruang chu Kros aţangin lâk thlâk an awih lova, an ţawih ral vek emaw, chungleng sava ten an tlan zawh vek thlengin an dah ţhin. A tlangpuiin Kros-a an khenbeh-te hi an thuamhnaw an hlihsak vek a, saruak ngalngatin an khengbet ţhin.

A chunga kan sawi tak aţang khian, Kros-a Lal Isua khenbeh a nih khan, a tuar nâ hle ang tih a rin theih a. Hemi avang hian, Fakna hla siamtu chuan, Lal Isua Tuarna hlut zia leh ropui zia hria-in, a nun inenfiah nan-a a hman theih nan Lal Isua tuar lai hmel hmuh a châk a, “Lalpa, kros-a i tuar nât zia en turin ka lo kal…kan tan chuti fakauvin a tuar…” a lo  ti nghe nghe a ni.

4. Thiamloh Chang-te Hremna Nâ Ber
Rom mite chuan dân an nei a. Rom mi, Rom khua leh tui dik tak-te chu khenbeh a thiang lova, hetiang Khenbeh inhremna hmanga Rom mi dik tak tihhlum emaw, hrem emaw chu phal loh hulhual a ni. Rom mite ngaihdanah chuan Khenbehna hmanga hremna chu mi hnuaihnung zawk te, tualthah ching te, Rom sorkar laka hel  leh sorkar hmelma leh sal te tihhlum nan chauhva hman ţhin tur niin an ngai a. Rom sorkar thuneihna san zia leh dân leh hrai kenkawhna kawnga an khauh zia lantir nan an hmang ţhin. Chuvangin, Judai ramah chuan, Rom sorkar awpna ngaisang lo leh Rom sorkar dotute chan tur hlimthla an tarlanna hmanrua a ni a, Kros-a khenbeh chu ram dân leh sorkar dân-a thiamloh chang te hremna nâ ber a nih avangin Lal Isua an khenbeh pawh hian Rom mite tan pawh hlawtling hle-ah an inngai tho niin alang.

Rom mite ngaihdan zulzui ni lem si lovin, Judate chuan, Deuteronomy 21:22-24 tlawhchhanin, “Thinga khaikan apiang chu (Pathian) anchhedawng a ni” tih ziak ang khan, Pathian leh mihring laka thiam loh changte hremna leh tihhlumna leh mipui hmuh-a tarchhuah nan an lo hmang tawh ţhin a. Misualte chunga Pathian phuba lâkna tarlanna-ah an ngai hmiah a ni. Tichuan, heng Rom mite, Persian, Assyrian, Greek mite, Indian leh Judate chuan Misual, Pathian leh mihring rorelna-in nung tlâk tawh lova a ngaihte tihhlum nan Kros hi an lo hmang ţhin a ni. Fakna hla siamtu pawhin, Misualte sual-zia tarlanna leh mualphona vawrhtawp chu Kros a nihzia hria-in, “Kros chu misual ber thih nan-a thlan, hmingchhiat, mualpho an tarlanna chu…” tiin a lo auchhuah-pui hial a ni.

5. Kros – Thlarau Saltang Chhuahtu
A chunga kan sawi tak-te ram tiam lo khian, mi ţhenkhat leh ram ţhenkhatah chuan Kros-a khenbeh leh tihhlum chu a ţha zawng leh awmze thuk zawk nei anga ngai an awm ve thung bawk! Stoic mite pawhin, Kros-a inkhenbeh hi entirna ţha tak (metaphor) nei angin an ngai a, “Mihringin, he khawvela nâtna leh hrehawmna lak aţanga a zalen theihna kawng awm chhun chu Kros-a thihna chauh hi a ni. Kros-a thihna chuan taksaa thlarau saltang chu a chhuah ţhin” an ti ve hlauh thung!

Stoic mite ngaihdan hi Thuthlung Thara ringtute ngaihdan leh thu kalpui dân nen a inzul hle. Marka 10:45, Luka 24:25-27, Johana 12:23-28 te kan chhiar chuan, Kros-a Lal Isua thihna chu Lei leh Van Lal, Isua Krista rawngbawlna vawrhtawp (climax of Jesus’ mission)-ah an ngai a. Kohhran hmasa-te pawh khan, Kros-a Lal Isua thihna kha thlarau saltangte chhuahtu, zalenna siamsaktu, malsawmna hnar leh zalenna kawng hawnnaah an ngai tih Rom 4:25, 1 Kor. 15:3-5, Gal. 2:20-21-te han chhiar hian a lang chiang hle bawk.

Lal Isua kha Kros-ah khan lo khengbet-in, thi ta lo se, tuna kan ngaih-hlut leh ngaihsan ang hian Kros hian ngaih-hlut leh ngaihsan a hlawh hauh lovang! Lei leh Van Lal, Isua Krista thihna avangin Kros chu a hlu-in a lo mawi ta êm êm a ni. Chuvangin, Lal Isua kha Kros-a a thih a ngai a, khaikan-a a awm a ţul tlat a, “Kei, Lei ata khaikan-in ka awm chuan, mi zawng zawng keima hnenah ka hip ang” (Joh.12:32) a lo tih kha a dik zia a lo lang chiang lehzual a ni. Chuvangin, Lal Isua Kros-a a thihna hlutzia hrechiangtu chuan hrehawmna, tihduhdahna leh harsatna avanga bianga mittui luang chung pawhin Kros chu a vuan tlat a, a phatsan phal tawh ngai lo. “A saw raltiang tlangah Kros hlun tak chu a ding. Tuarna leh mualpho tarlanna chu. Kei ka tan chu Kros chu ngaihlutawm ber a ni. Misual tan Mitha ber a thih vangin…”

Ngaihtuah Zui Atan…
Hetiang khawpa insawisakna, inthahna leh inhremna râpthlak (Kros-a in-khenbehna) chungchang hi chiangkuang taka ziahna (detail description) hmuh tur a vang êm êm hi thil mak tak a ni!!!  Biblical & historical Scholar-te chuan, Rom mite hian, an thiltih leh chindân râpthlak leh ţha lo tak hi an hnam ti-mualpho thei thil a nih avangin an lehkhabu leh chhinchhiahna dangah pawh ‘khenbeh an nih thu bak’ hi chu ziakin an dah ţha (record) duh ngai lo a ni, an ti!!!

Kan Bible thianghlim-a record kan neih awmchhun Chanchin Tha Bu 4 – Matthaia, Marka, Luka leh Johana-ah tak ngial pawh hian, Khenbehna chungchangah hian, “Kros an puttir a… an khengbet ta a…” (cf. Mat.27:35, Mk. 15:25, Lk. 23:33, Joh.19:18) tih vel bak hi… chipchiar deuh hleka ziakna zu han awm hauh lova!!!  Kalkawnga kros an puttir te, a hma zana an vuak te, an ben te, an hnek te, chil chhak te, leh nuihza siam nan-a an hman te pawh hi, a hming chauhva record a ni a. Chiangkuang tak leh fiah taka record pakhat mah a awm lo!!! Hemi avang hian, Bible scholar-te chuan, Chanchin Ţha Ziaktute tak-ngial pawhin Rom sorkar kha an lo hlauvin, an lo vengthawng hle tih a hriat theih, niin an ngai a ni.

Kros-a inkhenbehna leh tuarna râpthlak tak hi nang leh keiin Chatuan nunna kan neih theih nan Lal Isua’n rawn thlangin, a lo tuar ta a ni, a va ropui em! Amaherawhchu, misual te, Pathian leh ram hmelma te, nung tlak lohva an ngaih te an tihhlumna hmun-a Vanlal Fapa a rawn thih avang hian, inkhenbehna chanchin (crucifixion history) hrechiangtu Rom mite, Greek mite leh Judate tan chuan Pathian Fapa Kros-a thi kha an awih thei lova, an pawm thei thlawt lova, Kross thu chu an tan chuan âtna, thu âtthlak leh nuihzatthlak a lo ni ta thung! (1 Kor. 1:18-25, 2:1-2 etc.). Kros-a Lal Isua tuarna leh thihna râpthlak tak hian i Nun-ah engtin nge awmzia a neih ve le?

Hun remchang hmasaberah, Rilru lama Lal Isua Tuarna chungchang kan chhui leh ang.

Similar Posts:

Recent Posts:

5 Responses to “Lal Isua Tuarna – Part 2 {Sunday Pual}”

  1. 1
    zoelife Says:

    ngaihnawm hle mai, sermon ropui tak ani, Lalpan malsawm rawh se

    Report this comment

  2. 2
    PKfanai Says:

    A tha thin hle mai. (Y)

    Report this comment

  3. 3
    kiddo Says:

    (Y)

    Report this comment

  4. 4
    Zapper Says:

    (Y)

    Report this comment

  5. 5
    VL Hminga Says:

    Ava tha tak em ve aw lo ti zel teh.

    Report this comment