Ka thi

October 31st, 2012 6:02 am by PKfanai

Puitea Tuallawt
KA THI (Cotober 26, 2012: 11:30 am) – ‘THU NGAIHNAWM HUANG’ Fb group atanga lak.

THUHMA
Vawiin October 26, 2012 hi ka tan chuan theihnghilh theih loh ni rapthlak leh hahthlak ka dam chhunga ka la tawn ngai reng reng loh thil ka tawnna ni a ni. Mahni mualphona tur pawh ni se, sawi zel mai hi thuziak mite tih tur chu a ni si.

Ka dam lo va, ka ke vei lam hi tun hmain ruihhlo avangin a chhe tawh a;mahse, vanneih thlak takin kum 2009 khan ka malpui vun la thlain hmun li laiah an bel leh a, a him tha viau a, tharum thawhna lam chi hna reng reng thawk tam lo tur hriattir ka ni.

Tun hnai thla khat liam ta vel atang khan ka ke vei lam artui chung chiaha an belna a rawn khawk tlat mai.A na ngar ngar hle a, kal pawh ka kal tha thei ta lo a ni ber. Hmun dangah erawh tha lo pawh a awm lem lo.

Damdawi Brufen ka ei a, ka vun belna rawn chhe leh lai chu uluk takin ka dressing a, hma pawh a sawn leh tan deuh niin ka hria. Tha se ka tih luat avangin hmu tha chawp pawh ka ni thei e. Eng pawh nise, tuna ka thil sawi tur hi dawt a ni lova . Ka mumang mai lah a ni hek lo.

A na a rawn chuah chuan ka thral a rawn thoh a, ka khawsik hian namen lovin min tuam nghal a, ka tlun a, a buaithlak ve duh ang reng thin. Heti thleng hi thuhma chinah dah ta ila.

HRIAT LOH KARIN
Damdawi chak tak tak ka ei avang leh ka chaw ei a tui thlawt bawk si loh avangin ka chau hle a, chuta chhapah zan ka muhil thei mumal bawk si lo. Kan in hi a chhawng a ni, a chungberah keimahin thawl fein ka awm a, a hnuai (Kawng ân)-ah ka nu pindan, chawieina pindan TV enna leh sitting room hran pa te reuh te tein kan siam ve diat diat a.

Zan ka mu thei ngai lo tih a hriat avangin ka nu hian zing lamah hi chuan chaw tur pawhin min kai tho ngai lem lo, kan in ep chiahah hian ka nu Lalhleii’n, dawr a siam ve a, chhang, hmunphiah, thingfak leh bawlhhlawh ruhna, mei hawl thuk, êm, chemte, chempui leh adt. a zuar a, ka nu nen chauha chaw ei hi chu a nuam kan tih loh thin avangin zing tukthuan kilpui atan kan sawm thin; tukin pawh dar 10 rik dawn ruaiah ka tho chhuak ve chhak chhak a, ka nu chu ka nu Lalhleii dawrah a lo thu a, min rawn hmu a, kut zaizirin, chaw in ei tawh em? ka ti a. A lu a thing a.

Kawngkharpui chu a inhawlh kalh ringawt a, ka lut a, hmai ka phih zawhah ha ka nawt leh a. Hetih lai hian ka nu leh Ka nu Lalhleii chu an lo lut a, tukthuan kan siam zui nghal mawlh mawlh a. ka ke chu a na fik ngat ngat hle mai; mahse, ka sawi chhuak duh lem lo va, chaw pawh chu bar thum vel awrh ka bar a, ka kham san ta ringawt a.

Hnathawh tur ka ngah tih ka hria: mahse, ka peih rih ngang lo va, TV IMEM channel ah chuan speaker senior ve lam pakhat ni ngei tur hian thahnem ngai sawm palingkawh duah leh tlawk zetin Pathian thu a sawi a; uluk deuhin han ngaithla ila chuan ngaihnawm fe tur pawh niin ka hria. A awki a han tih squam flow vel dante chu a bu a mi ang thlap a ni mai. Vanglaini chanchin bu ka chhiar pah bawk, news ka en pah zauh zauh reng bawk a.

KA IN HMU
Ka nu chu thenawmte invelah ni lum ai tumin a chhuak, keimah chauhin TV chu ka en a, chu tih lai chuan taksa hi chauh namen lo hian a rawn chau a, ka mit sulh sulh a, engtin chiah nge ka awm ka sawi thiam tawh tlat lo. Pindan veilam thuthlengseia mu ka ni, chuta tang chuan TV pawh ka en Mahse, pindan dinglam atanga en angin ka inhmu ta tlat mai a ni.

Chutah ngaitha vak lovin ka han hawi kual a, thuthlengsei a tla lek lek a mi pakhat mu hi ka hmu a, ka han en chianga keimah ni tlat in hria. Ka han belchiang leh zuala, keimah ka ni tih ka hre ta, vawileh khatah hlauhna hian min rawn thram thut a, hetia ka buai vel chhung hi ka hre thiam lo, ka nu thiante pahnih hi an lo kal a, ka mut dan teh nuai chu a fel hlel tih an hmu a ni ngei ang, “Puia Puia,” tiin min kaih thawh tumina ka awmah te an nem a, an bulah ka dinga engkim chu ka hmu vek a. Keimah ringawt ka ingaihtuah avang a ni ngei ang, tlarau tha leh thlarau tha lo pawh ka hmuh ka hre lo.

Hremhmun emaw vanram emaw pawh engmah ka hmu chuang lo. Mahse,ka hmuh loh avangin chung hmunte chu a awm lo tak tak ti erawh chuan ka tang kawh chuang lo.

Rei a ni lo ve, minit 15 hnuah chuan ka rawn harh leh hlawl mai Min lo dinhual tuau tawh mai. A hrilhhai thlak duh khawp mai.

Note:. Puitea Tuallawt hian he article/Auto-biography hi October ni 26 Zirtawp ni a a ziah a ni a. Hetihlai hian a damlo na fu tawh a ni. Tichuan, tha chhuak tak tak tawh lovin atuk ni 27 khan Aizawl Civil Hospital-ah dah luh ani a. Doctor ten an hmuhin a dinhmun a thalo tak zet tih an hrethiam nghal a, ICU ah dahin, a tuk leh October ni 28 Sunday khan a peih ta lo nge nge a ni.
Tin, damlo na tak thu ziah a ni bawk a, typo a awm nual. Ka han edit sak ta mai a ni. Pu Zohoa post ‘Principality’ nen te pawh khan a inkung kaih thei deuhin ka hria. Tin, hmannia Tejpur a kan thianpa accident chau tak kha min ti hre chhuak a, zanlaiah, a mel awrh a, a melh ngai a melh reng a, second 15 vel a thaw lova, a lung a phu hek lo.(hetiang hian tum 3 lai a awm), kan sawi nawk nawk a, a awm kan nem a, kan ko a, a lo harh leh thin a ni. Kan mangan tawpah kan tawngtai rual tawp mai a, a zia chho ta a ni. Amah pawhin, “min kalsan miah suh u, min be reng rawh u” te a ti bawk. Ka han sawi ve mai mai a ni.

Similar Posts:

Recent Posts:

22 Responses to “Ka thi”

  1. 1
    buhtlei Says:

    chhiar phawt ang aw (C)

    Report this comment

  2. 2
    kiddo Says:

    A nih hi.. chhiar phawt chi a nih hi.. Good morning vek uuuuu

    Report this comment

  3. 3
    kiddo Says:

    RIP (F)

    Report this comment

  4. 4
    ZerO Says:

    He article hian enge a entir? Hremhmun leh vanram a awm lo tihna em ni? A tawp dan teh thut chu a?

    Report this comment

  5. 5
    sheldon Says:

    Tukchhuah nuam vek u le (L)

    Report this comment

  6. 6
    PKfanai Says:

    He thil ka rawn copy na chhan chu, Mihringte hian Thlarau kan neih ngei zia a tichiangin ka hria a. Taksa engmah hrelo a a leh reng lai khan, taksa atanga chhuak, ama taksa ngei pawh chiang taka hmu thei tu Thlarau awm ta tlat khi ka rawn post chhawn chhan chu a ni. Tin, a thlarau kalna tur a chian hmain an sawi harh leh tihna ani maiin ka hria. Tin, Isua lokal leh huna Rorelna a awm hma chuan Thlaraute hi Vanramah emaw hremhmunah emaw an kal nghal a rinawm lem loh. Catholic ho ngaihdan Paradise leh Purgatory te pawh hi a dik a rinawm zawk viau.

    Report this comment

  7. 7
    Soberboy Says:

    (Y)

    Report this comment

  8. 8
    Mr.Fanchun Says:

    He thu ka chhiar hmasak ber lai kha chuan a ziaktu pawh kha a la dam a mahse ahnu reilo teah a thih tih ka hriat khan ka chhiar tha leh a vawi hnih\thum. Achhan chu a ziaktu Puitea hian eng a tan nge a ziah? Eng nge sawi a tum leh a zirtir? Tih lam ai mahin a thiltawn a ziak tawp mai vang hi a ni.

    Report this comment

  9. 9
    Jacka Pi Says:

    he thu hi a lawm chhiar ve tuma ka lo zawn duk duk reng chu..Thu ngaihnawm huangah hian ka awm ve emaw ka tia, ka lo awm leh tawh lo aniang

    Report this comment

  10. 10
    Rinzova Khawlhring Lalhnam Says:

    Chutah ngaitha vak lovin ka han hawi kual a, thuthlengsei a tla lek lek ami pakhat mu hi ka hmu a,ka han en chianga keimah ni tlat in hria. Ka han belchiang leh zuala, keimah ka ni tih ka hre ta,

    Pathianin a damlaini a tlak tur a hmuh/hriat tir a ni ve maiah ka ngai.
    Mit lawnga hmuhtheih a nilo Pathian/Thlarau(Kan Nunna) hi.

    Report this comment

  11. 11
    donald Says:

    Dr. L. Ringluaia khan Dr. R Tlangkunga nena damlo na tak an buaipui thu a sawi a. Thi chhuak nasa lutuk avangin engmah a hre tawh lova, mahse a lo harhchhuak leh hlauh mai a. A lo harhchhuah lehhnua Dr. Ringluaia hnena a sawi chu – “khami zan khan ka taksa atangin ka chhuak a, ka taksa khuma mu reng pawh ka hmuin, pindana i lo lut lai pawh ka hmu reng che a ka taksa in buaipui dan leh in chetdan zawng zawng ka hmu vek a sin” a ti. Dr Ringluaia chuan khami zana thilthleng kha damlo engmah hre tawh loin a sawidik vek kha mak a tih thu a sawi.

    Hei hi Mizoram ngeia hetiang lam source rinawm tak atanga kan hmuhtheih a ni a, ram dangah pawh Kristian doctor leh scientist te thiltawn ngei chhiar tur a tam khawp mai. Kan thenawm Muslim rama Pakistani pakhat Shahid Siraj Din pawh a thi a, an admit-na damdawi-In Aadil Hospital paw’n a thi ngei tih a confirm chu a tho leh tlat. A thih lai hian vanram leh hremhmun hmuhtir a ni a, hei hian nasa takin a nun a khawih danglama, property developer hlawhtling tak a nihna chu bansanin Lahore-ah a farnu Dr Tahira Saleem nen Shekinah Churches leh Shekinah Bible Institutes te an din ta a ni.

    Nigerian Pastor Daniel Ekechukwu pawh ni 3 deuhthaw a thih hnuah a tholeh a, a thiltawn chungchang a sawina pawh video a awm kha. Death certificate a nei thlap a, rigor mortis a awm hman tawh hial a ni (a khawng hman). Crusade an neihna hmunah a ruang hi an phur luta, ringtute tawngtaina avangin mitam tak hmuh laiin a rawn tho chhuak thut mai a ni. A rapawm letling viau maithei ..!!

    Upa B. Lalrinkima pawh a chahthlak laia a bula awmte ngei khan a thi ngei niin an ngai bawk. Dr. John Zohmingthanga leh khatih laia an (govt. complex) YMA president te bakah a nupui ngei kha an zawhchian theih ang. Upa B. Lalrinkima hian a taksa a chhuahsana vanram leh hremhmun a hmu ngei tih chiang takin a sawi.

    Taksa thihna hi mihringte tawpna a ni lo chiang khawp mai.

    Report this comment

  12. 12
    PKfanai Says:

    11.Donald, (Y) ka beisei ruk tak i rawn sawi lang e. Tunlai mite hi an hnialhratin thil an duh khirh tawh si a, hetianga ataka tawng tawh leh Thlarau khawvel han experience deuh zuai an awm leh zeuh thin hi a tha ve riauin ka hria. Mahse Lal Isuan alo sawi lawk tawh angin, Thlarau khawvel atanga rawn kir leh mial te meuh thusawi pawhin a tih danglam zawh loh khawpa ngawng tawh hi chu kan tam hle thoin a rinawm.

    Report this comment

  13. 13
    donald Says:

    Ni chiah e Pk.. Lal Isua’n a sawi kha… mitthi zinga mi meuh pawh khawvelah kir lehin sawi mahsela, Mosia leh zawlneite (Bible) thu an rin loh chuan an awih chuang lovang.

    Report this comment

  14. 14
    lushai_er Says:

    Thu ngaihnawm huang hi an la naupan ngaihtuahin tawnhriat an nei tha thei khawp mai.

    Misual.com-a thuziak ‘thu ngaihnawm huang’ lama reproduce a tam tawh ang reng, mahse @TSA-a hian bauh a ching a, an reh ta riau :-D

    Misual.commer lamin an thuziak kan hung lut ve a, a source kan dah thlap hi a van tha em (Y)

    Report this comment

  15. 15
    Dr Mahminga Sailo Says:

    Post leh comment a tha hlawm e… (Y)

    Report this comment

  16. 16
    Awmtea Khiangte Says:

    A ziaktupa RIP ;-(

    Report this comment

  17. 17
    Amah Charice_mizo Says:

    Puitea Tuallawt thuziah hi a post tirh pawh khan ka hmu renga, ani hi fiction lam ziak thin anih vangin hetiang lam reng anih ka ring phak lova, ka chhiar duh lem lova, mahse ahnu lawka a damloh thu leh ICU-a awm thu post ka hmuh rual khan ka chhiar ta nghala. Thi mai tura inrinna a nei ru emaw ni chu aw ka tia, tin a thla a phang riaua hriatna ka nei bawka, a thuziakah hian spelling mistake a tam bakah ama style pangai felfai, chiang leh hnum hlarha ziah thlap thlap anih loh vang khan. Ka lainat khawp mai a hnu lawkah a boral zui ta mai si a.

    Taksa atanga thlarau chhuak hi a tawng an tam bawka, ka awih khawp mai, tin Isua lo kal leh hma chu mi a thihin hremhmun emaw vanramah alo kal lawk ka ring lo, hun hmasaa thlan bik, entirnan Enoka leh Eliza te ang tih loh kha chu.

    Report this comment

  18. 18
    VL Hminga Says:

    Kei chu thlarau hi chu a petu Pathian hnen ah a kal leh, tih anih ang khan. He khawvel atang hi chuan a pe tu hnen ah a kal nghal chu ka ring a, thih hlim chhawn vel ah hi chuan an awmna an la chhuahsan lo pawh a nimahna. Taksa thawhlehna awm pawh ka ring e..

    Report this comment

  19. 19
    Chemtatrawta Says:

    Atheist ho chhiar atan post leh comment chu ka va it em ve le aw..!!!!

    Report this comment

  20. 20
    chhana Says:

    Ni 26 ah natna khirh tak tawkin a awm a, a tuk hnihnaah chuan a thi tak tak ta. Ni 26 a a thil tawn hi a tuk tuk leha a thih hma lhan na tak tuar chungin a ziak hman a nia, thuziak lam chu a tui viau a nih hmel. Thlamuang takin chawl teh se.

    Report this comment

  21. 21
    sheldon Says:

    Ngaihnawm in a va lainatawm reuh em!

    Report this comment

  22. 22
    Simplyme Says:

    Mitthi te hi hremhmun leh vanramah an thlarau a kal nghal zel chuan a fair awm lo e.. bik takin hremhmun kal tan! :P

    Report this comment