Thupek Thar.

September 30th, 2012 10:32 am by PKfanai

Lal Isua, Pathian Fapa, Mihringte hnena chanchin tha, Thutak rawn puang tur leh an aiawha an sual man ba tlakna tura anchhedawng kraws a sual thawina tura hlana awm tura khan, Mihringte nihna zawng zawng a rawn keng zo meuh mai, Mihring famkim ni turin mihringah a rawn chang a ni. Amaherawhchu, Mihringte thlemna tawh theih ang zawng zawng a tawrh chhuah hnu pawhin, Mihringte sualna erawhchu a kai ve silo a ni. Chuti a hnehin, Zirtirna thar tam tak a rawn zirtir a. Mihringte Culture ah a rawn piang a, a rawn thanglian a, amaherawhchu, Zirtirna thar zirtirin, Thupek thar tam tak a rawn pe ta a ni.

‘Ha aiah ha, mit aiah mit’ lo ti thinte hnenah khan, “ Kei erawh chuan ka hrilh a che u, I biang dinglama bengtu hnenah chuan, lehlam pawh dawh rawh” a rawn ti ta daih mai a. (Matthaia 5:38&39). Tin, “ I vengte hmangaih la, I hmelma haw rawh” tih thupek lo zawm thintute hnenah khan, “In hmelmate hmangaih ula, a tiduhdahtu che u chu tawngtai sak rawh u” a rawn ti daih mai a.

Chawlhni(Sabbath) an serh em em niah ngei mai chuan zinchhuakin, a zirtirte riltam khan buhvui an thliak a, an ei ta mai a. Pharisai ho an ter at mai. Chawlhni Lal anih zia leh Chawlhni pawh ni se, a tul tlat chuan thil tha chu tih mai tur anih zia te sawiin, mi tuemaw chawlhniah a sebawngpa chu khuar khurumah tla ang sela, tunge Sabbath a zawh nghak kher kher ang ni? Tih sawiin Chawlhniah tih that chu a thian thu a sawi mai a ni. Kan fate thih ngamin damlo ta se emaw, Motorin su ta se, thih hlauhawmin awm ta se, tunge chawlhni a zawh chu nghak kher kher lem ang?

Judaten an thinhrik em em mai, an khua pawh an hel hram hram thin, Samari mi, chutah pawh hmeichhia lehnghal kha tui intur a dil a, a counsel mial mial mai si a. Chhiah khawntu an hmuhsit leh, sual bawlhhlawha an ngaihte inah lutin an hnenah a eiin a in zel mai bawk si.

Messia kha Juda ho tan chauha lokal tura an ngaih laiin, Jentail te a pawl a, Khawvel zawng zawngah kal a, thilsiam zawng zawng hnena chanchin tha hril turin a zirtirte kha thu a pe hmiah mai si. An sakhaw hotute hnial ena an en ngailoh ho lah kha, a sawisel a, an thinlung tenawm ziate pawh Thlan, a pawnlam mawi taka chei, a chhungah erawh chuan, mitthi ruang tawih tenawm tak awm si ang leh, ‘Lungpal hnawih var’ ang te’n a tehkhin a, an tawngtai duh dan leh an thilpek duh dan te a sawisel hmiah hmiah mai a nih kha. Lal Isua Indigenization hi ava mak ngai em.

Rilru lam entu leh buktu anih angin, mi hausa ho an neih chuangliam thawhlawm bawma thlak ri rum rum ho ai chuan, Hmeithai pakhat thawhlawm thlak ve, dar tangka dere kha a neih zawng zawng anih tlat avangin, “a tam zawk” a ti hmiah mai bawk a.
An Pharisai leh Sanhedrin member (tunlaiah chuan Pastor/Bishop ang aniang chu) te kha, “I piangthar tur a ni. Mi tupawh tuiah leh Thlarauva an pian loh chuan Pathian ram an hmu thei lo vang” alo ti leh hmiah mai bawk.

Heng thil ka han sawi duah na chhan chu, Tunlaiin, Mission lam rawngbaw naah te, Indigenization(kan va thawhna rammite culture a va in Identify-na leh, anmahni ang chiaha va nun ve na lam) hi kan uarin kan sawi vul khawp mai. Thil tul tak leh missionary hlawhtling ni tur phei chuan, tih ngei ngei tur chi a ni. Amaherawhchu, Kan Zosap-te, kan bible letlingtu hmasate, a pawng atakin kan in dem siak dawn thin hian ka hria a, ka rilru a lo na deuh thin a ni.
An tawng min zirtir lovin, keimahni tawng ngei A Aw, B, min siam sak a, kan zir tur mizo tawng lehkhabu min ngaihtuah sak a, kan sak turah pawh, Sap hla leh hnam dang hla min zirtir lovin, an thiam dan ang angin, Sap hla tha tha kha Mizo tawngin an let ve nawk nawk a, anmahni ngeiin mizo hla an han phuah ve anih kha. A hun laia Mizo tawng ziah dan phung la in develop loh zia ngaihtuah chuan, an kut hnu leh an mizo tawng a mawi ngawt zawkin ka hria. Tunlai mizo tawng nen kan han khaikhin a, kan han sawisel ve khanglang thinte hi ka rilru a lo na thin a ni.

Tin, Mizo Culture hnawla anmahni Sap Culture lalut ang te hian kan puh dawn thin a. An theih ang tawkin Mizo culture-ah khan in identify tumin bei mahse, Mizo Culture-ah khan Kristian zirtirna nena inrem leh inhmeh em em mai, ‘Tlawmngaihna’ (Mel khat kal tura an tih che chuan mel hnih kal rawh) tih te, ‘Thian chhan thih ngam’ nun,(Miin a thian aia a nun a pek aliama hmangaihna nasa a awm lo) a lo tih te, ‘Sem sem dam dam; ei bil thi thi’ (I puan laksaktu hnenah chuan, I kawr lak pawh hnial suh tih leh, “Ka ril a tamin eitur min pe a”) a lo tih te leh a dang tam tak a awm a ni.

Amaherawhchu, Kristian zirtirna nena kal rem theilo leh, a hun laia Social evil, khawtlang, chhungkua leh mimal pawhin an tuar em em, ‘Zu hmun hlimna’ te, Ramhuai hnena inthawi te leh a kaihhnawih te, Nau hnuchham an nute delhhlum tir tak mai te, an paih thlak a, thil thar tha zawk leh changkanna lam zirna te, Naupang leh Hmeichhiate dinhmun chawikan te, Dawi leh inthawi aiah Tawngtai damna leh Damdawi lam te an tih a lo ngai ta a. A hunlaia an tih chhan leh a tul dan va hmuh pui leh va hriatthiam pui pha si lovin, kan ralkhat sawichhiat leh ringawt dawn thin hian ka hria a ni.
Zosap-te khan A AW B te min lo siam sak ta lo se la, English emaw, Bengali emaw kan zir alo ngai ang a, Literature lamah kan hniam em em ang a, kan tawng kan hloh ang a, tawng kan hloh tawh chuan, kan culture kan hloh tihna alo ni ang a, kan identity kan hloh dawn a lo ni. Dik vek leh Perfect tak tak chu a awm thei hauh lo ang a, amaherawhchu, Mizote tlang hrang hranga awmte, kan tawng hrang nuai tur kha, kan Bible hian kan tawng a ti pumkhat a, Kan Kristian hlabu hian, Hla sak dan in angin min saktir a, Solfa hian, a thluk in ang vekin min zaitir thei alo ni. Anihna takah chuan, Isua krista Chanchin tha hian, mimal nunah, chhungkuaah, khawtlangah, Ram leh hnamah danglaoa(Change) a thlen pha tur ani a, a siamtha pha ngei tur ani zawk a ni. A tha zawnga danglamna a thlen phak loh chuan, a thu hria, mahse zawm silo kan la ni lek tihna ani ang a, Lal Isua’n a ngaih theih loh em em, ‘a suak/a lem’ mai kan la ni tihna ani dawn a sin.

E khai, a lo thui lutuk leh reng tawh mai. Tawk phawt mai rih teh se.

Similar Posts:

Recent Posts:

8 Responses to “Thupek Thar.”

  1. 1
    sheldon Says:

    Chhiar a va man hla em! Inkhawm remchan loh ni pawh a sermon thatak chhiar tur min hlui thin hi a lawmawm tak zet (Y)

    Report this comment

  2. 2
    Ignatia (33-115 AD) Says:

    Pu PK post a ni a, a ngaihnawm leh hrim hrim. Hman hunah ka chhiar ang.

    Report this comment

  3. 3
    Dr John Says:

    (Y) A tha leh khawp mai. Ngaihtuah pawh a ti-thui e

    Report this comment

  4. 4
    vakul Says:

    “Heng thil ka han sawi duah na chhan chu, Tunlaiin, Mission lam rawngbaw naah te, Indigenization(kan va thawhna rammite culture a va in Identify-na leh, anmahni ang chiaha va nun ve na lam) hi kan uarin kan sawi vul khawp mai. Thil tul tak leh missionary hlawhtling ni tur phei chuan, tih ngei ngei tur chi a ni. Amaherawhchu, Kan Zosap-te, kan bible letlingtu hmasate, a pawng atakin kan in dem siak dawn thin hian ka hria a, ka rilru a lo na deuh thin a ni.”

    kan ngaihdan a inang chiah…a hman hmanin an sawisel hi chu ka tang na ve viau zel ang..history-te pawh bih ho ka huam zan.

    i post the lehpek hle mai,,,

    Report this comment

  5. 5
    Sihtea Says:

    A va’n tha kher ve maw le. Kalo chang char char a, tlai dar nga ah chuan
    ka chhiar hman ve hram e. Eng mah a hun lai a thilthleng chiang taka,
    hre hawt lo hovin thil in ti hre dik ber ni awm zia zanga, kan zo SAP te
    thil tha lo tin reng ti tu, kan culture zawng zawng a chhia a tha thleng pawha, min hnawl bo sak tu ah te an han chhuah deuh fo mai hi chu,
    a tha nat thlak deuh chuan ka hria. An thawh rim thin dan tur te
    ka han ngaih tuah chang hian, fak an phu hliah hliah in ka hria.

    Report this comment

  6. 6
    PKfanai Says:

    Pu Vakula’n debate a cho teh lul nen, han hnial kalh in awm lo tlat mai. Tuna kan awmna Arunachal Nyishi ho zingah pawh hian, eng ang pawhin an tawng thiamin an culture ah in hnimphum thei ila, a hnam pum deuh thaw kristianah siam pawh ni ila, An Polygamy hi vaw thiat si lovin pa hausa deuh ten nupui 3/4 nei chhunzawm chho zelin, ‘ha aiah ha, mit aiah mit’ ti reng tho ta se la, hlawhtling tak takah ka in ngai lo vang. Chanchin tha chuan, a change pha ngei tur a ni. An danglam sawt viau leh kristian nih hnua nupui neih belh an awm ta ngai lo hian min tilawm viau mai. Kan ramah pawh hian, kan kristianna hian corruption rate te hi eng chen chiah nge a tih tlakhniam ang le?

    Report this comment

  7. 7
    Spider Man Says:

    Post tha tak a ni… (Y)

    Report this comment

  8. 8
    Chhuaklinga Says:

    Mi tha tak leh chhuanawm tak te pawh hi an that lohna leh tih dik lohna chhui ngar ngar chuan sawi tur a awm thei zel, famkim lohna a khat mihring an ni ve miau a. Tluk loh te hi kan rel chawk. (H)

    A tlangkawmna chu a va dikin a va tha kher em ve le. (Y)

    Report this comment